Carta aberta ó alcalde de Maside

Comparezco públicamente neste medio para contestarlle a unha carta que 
recibín no meu domicilio, na que vostede intenta xustificar, con máis pena 
que gloria, a necesidade da privatización da xestión da auga e 
alcantarillado durante os próximos 25 anos. 
Sería conveniente recordarlle que os veciños de Maside firmaron con 
vostede un contrato por catro anos, mediante o cal lle outorgaron  a súa 
soberanía depositando en vostede a súa confianza como representante do pobo 
de Maside. E está vostede extralimitándose no uso desta confianza ó querer 
firmar un contrato cunha empresa privada para privatizar o servizo da auga 
nos próximos 25 anos, sen consultar cos veciños, sen informar á xente 
sobre as peculiaridades do procedemento, sen telo incluido no seu programa 
electoral, e atrancando un movemento veciñal que nace para informar á xente 
do procedemento que vostede está  empeñado en levar adiante a toda costa. 

Cando vostede dí na súa carta que"a empresa que resulte 
adxudicataria do servizo de abastecemento e alcantarillado terá que manter o 
prezo fixado na ordenanza de marzo durante 25 anos coa única variación do 
IPC", está faltando vostede á verdade. Falta vostede á verdade 
por omisión, non informando aos veciños de que os ingresos que percibirá a 
empresa adxudicataria estarán formados polas tarifas vixentes, as 
subvenciones que o concello aporte á empresa adxudicataria, que como vostede 
comprenderá, supón un coste indirecto ao tratarse de cartos do concello que 
deberían ir destinados as múltiples necesidades do municipio, e as 
contribucións especiais, que terán que pagar os veciños cando a empresa 
considere que hai que realizar unha obra, a financie, lle pase os gastos ao 
concello, e o concello repercuta estes gastos en novas tarifas, todo elo 
reflectido no artigo 25 do prego de cláusulas administrativas.
Pero é que ademáis vostede minte por incomprensión e descoñecemento  
dos efectos xurídicos do propio prego de cláusulas administrativas. O 
artigo 33 do prego de cláusulas informa da revisión extraordinaria de 
tarifas, por iso minte vostede cando di que a empresa adxudicataria terá que 
manter durante 25 anos o prezo fixado na ordenanza de marzo. O ser o prego de 
cláusulas ó que contempla a revisión extraordinaria de tarifas no artigo 
33, a súa aseveración de que a empresa privada terá que manter os prezos 
da ordenanza de marzo coa variación do IPC, é, simple e llanamente, FALSA. 

Sr. Celso Fernández, hai outras opcións que sirven con obxectividade ao 
interese xeral dos veciños de Maside.  A máis axeitada é o mantemento da 
xestión pública. Se non ten vostede tempo para desenvolver as tarefas 
necesarias para garantir esta xestión, ten vostede a opción de deixar paso 
a outra xente que amose este compromiso de servizo público. Pero non 
hipoteque vostede as economías familiares de Maside durante 25 anos. E non o 
faga con medias verdades que agochan grandes mentiras.
Maside, 3 de decembro de 2012
Asdo.: Antonio Iglesias Fernández