O Colectivo Veciñal O Carballiño denuncia a situación dos accesos do Carballiño a Dacón durante a Novena de Santa Rita.

17, Maio 2022

A novena da Santa Rita en Dacón é unha celebración moi concorrida por gran número de persoas que nestas datas van a pé dende O Carballiño ata a igrexa do pobo veciño.É unha tradición secular que ano a ano enche de xente os diferentes camiños que unen ambas localidades.

Este ano, os viandantes que fan o percorrido pola N-541, a máis habitual, atopanse cun problema moi desagradable do cal nos deron queixa aos membros deste Colectivo Veciñal: as beirarrúas ó pasar ó carón do poboado da Fontela están absolutamente intransitables.

Cheas de madeira, palés desfeitos e demáis chatarra, obrigan ós viandantes a ter que baixar á estrada durante un bo tramo da mesma, co perigo que isto conleva ó tratarse dunha nacional con moito tráfico.

Pedimos logo a quen corresponda que tome medidas para subsanar este problema e garantir a seguridade dos moitos veciños do Carballiño que desexan ir a Dacón ás misas da Santa Rita.

Asinado: Colectivo Veciñal O Carballiño.