O PSOE "desenmascara a politización da festa da vendima coa entrevista ao seu portavoz en Leiro, Manuel Rodríguez"

Pregunta 1. Por que consideran un erro a elección de Miguel Tellado como pregoeiro? Que consecuencias pode ter esa decisión para a festa e para a imaxe de Leiro?
Resposta: Porque a Festa da Vendima é un evento cultural, turístico e patrimonial que pertence a todo o Ribeiro. O pregón debería estar en mans de persoas vencelladas ao viño, á cultura ou á nosa terra, non dun alto cargo dun partido político que non ten relación con este mundo. Esa decisión converte un acto veciñal e festivo nun escaparate partidario.

Pregunta 2. Algúns veciños lembran que noutras edicións tamén houbo políticos como pregoeiros. Non se está caendo no mesmo erro? Que alternativa proponse?
Resposta: É certo que noutras ocasións se trouxo a políticos, e por iso pensamos que xa é hora de cambiar. Temos exemplos que demostran que hai outra forma de facelo: en 2008 o director de cine José Luis Cuerda, tamén viticultor, foi pregoeiro. Ese tipo de eleccións dan prestixio, autenticidade e vinculan a festa coa cultura e co viño, que é o que realmente nos representa.

Pregunta 3. Que modelo alternativo propoñen vostedes para a organización da Festa da Vendima? Que medidas concretas levarían a cabo se gobernasen?
Resposta: Propoñemos un modelo aberto, participativo e sen politización. En concreto:

Que os pregoeiros sexan persoas vencelladas ao mundo do viño, da cultura ou da nosa propia veciñanza.

Dar máis protagonismo a colleiteiros, adegueiros e viticultores de Leiro.

Potenciar a música, o teatro e outras manifestacións culturais locais.

Escoller o pregoeiro con consenso e diálogo entre forzas políticas e asociacións veciñais.

Usar a festa como escaparate turístico e de prestixio para Leiro, non como ferramenta partidista.

Pregunta 4. Desde o PP poderían dicir que a súa crítica responde só a unha cuestión partidaria. Como poden demostrar que non se trata dun ataque político senón dunha defensa da festa?
Resposta: Esa é precisamente a estratexia do PP: intentar converter en “ataque político” o que en realidade é unha defensa da veciñanza. Nós seríamos igual de críticos se o pregoeiro fose un ministro socialista ou un alto cargo do noso propio partido. A Festa da Vendima non pode ser usada por ninguén como mitin disfrazado de tradición.
A nosa postura é clara: queremos unha festa aberta, plural e que represente ao noso Concello e o Ribeiro.Isto non vai de cores, vai de respecto á cultura e ás tradicións. A política partidista ten outros espazos: os plenos, os parlamentos, as campañas electorais… pero non a nosa festa máis importante.
E por iso insistimos: a nosa crítica é unha defensa da identidade da Festa da Vendima, non unha cuestión de rivalidade política.

Pregunta 5. Que aspectos concretos perde a Festa da Vendima cando se politiza e se converte en escaparate dun partido?
Resposta: Perde moitísimo. En primeiro lugar, perde autenticidade, porque o foco deixa de estar na nosa tradición, no viño e na cultura para poñerse nun discurso político.
En segundo lugar, perde visibilidade para a xente que traballa todo o ano: viticultores, colleiteiros, adegueiros… que son quen manteñen viva a esencia da festa.
Tamén perde prestixio cultural e turístico, porque en lugar de proxectar unha imaxe aberta e atractiva cara ao exterior, proxecta unha festa usada como propaganda partidista.
E por último, perde unidade veciñal, porque en lugar de xuntar a todos arredor do orgullo da Vendima, xera división e debates que non axudan a sumar.

Pregunta 6. Pola contra, que beneficios traería escoller pregoeiros vencellados á cultura, ao viño ou á veciñanza?
Resposta: Gañaríamos unión, orgullo e recoñecemento. Un pregón feito por alguén da nosa cultura ou do viño uniría ao pobo arredor do que realmente nos identifica. Ademais, proxectaría unha imaxe moito máis atractiva de Leiro cara ao exterior, fortalecendo o noso turismo e prestixio.

Pregunta 7. Cales serían os perfís máis axeitados para ser pregoeiros da Festa da Vendima? É mellor buscar persoas de Leiro ou figuras de prestixio galego relacionadas co viño e a cultura?
Resposta: Sen dar nomes concretos, porque debe decidirse con consenso, si podemos dicir que en Leiro temos colleiteiros, adegueiros, viticultores, músicos tradicionais, escritores, artistas e promotores culturais que representan mellor ca ninguén a nosa festa. Iso non quita que tamén se poidan traer figuras galegas de prestixio no ámbito cultural ou vitivinícola, pero sempre evitando que sexa un acto partidista.

Pregunta 8. Consideran que esta decisión pode ter repercusión máis alá do propio evento? Como afecta á imaxe do Ribeiro e, en especial, do concello de Leiro?
Resposta: Si, claro. Cando se usa a festa para facer política partidista, dáse unha imaxe pobre e interesada. Pola contra, cando o pregón recae en figuras culturais ou do viño, a festa medra en prestixio e xera unha repercusión positiva para toda a comarca do Ribeiro e, en especial, para o noso concello de Leiro, que é o auténtico corazón da Vendima.

Pregunta 9. Que lle diría á veciñanza que si está conforme coa elección de Miguel Tellado e que pensa que non hai problema en que veña un político como pregoeiro?
Resposta: Respectamos todas as opinións, pero pedímoslle á veciñanza que pense que a Festa da Vendima debería ser de todos e para todos. Non se trata de quen goberna nin de que partido sexa, senón de que Leiro e o Ribeiro brillen polo que son: terra de viño e cultura.

Pregunta 10. Para rematar, cal é a mensaxe final que quere trasladar como portavoz do PSdeG en Leiro á veciñanza e aos organizadores da festa?
Resposta: Que nós miramos aos veciños e veciñas de Leiro como persoas, non como votos. Queremos unha Festa da Vendima aberta, plural, cultural e orgullosa das súas raíces. Unha festa para celebrar o viño, a nosa tradición e a nosa xente, sen partidismos. Porque Leiro merece máis prestixio e menos propaganda partidista.