O concello prohíbe esta fin de semana calquera celebración no parque municipal ou calquera outro espazo público

O concello do Carballiño prohíbe que se realicen celebracións no parque municipal, asi como en calquera outro espazo público da vila, durante esta fin de semana.
Só estará permitido xantar ou cenar nos locais hostaleiros, pero non se poderá facer no parque municipal nin en calquera outro espazo público do Carballiño non autorizado.

Así mesmo, tampouco está permitido celebrar “botellóns” nin calquera outro tipo de festa da mocidade nestes lugares. Ao respecto, o concello anuncia que as persoas que infrinxan calquera destas prohibicións serán sancionadas con multas.

A situación que se vive polo Covid 19 esixe que sexamos responsables en todo momento, polo que é preciso extremar as medidas de prevención, sobre todo durante estes días nos que se incrementa o número de visitantes na vila.

As Xornadas Gastronómicas do Pulpo teñen o obxectivo de ofrecer a posibilidade de degustar a gastronomía propia do Carballiño, pero nos lugares autorizados e con todas as garantías de seguridade e as medidas preventivas que se esixen na normativa polo coronavirus.