O Irixo ofrecerá dous menús en "Xantar", co cocido como prato estrela, do 3 ao 7 de novembro en Expourense.

O concello do Irixo estará por vez primeira representado no salón gastronómico "Xantar" que se celebrará na súa edición 2021 entre os dias 3 ao 7 do próximo mes de novembro en Expourense. O Irixo ofrecerá "dous menús nos que se resaltan a gastronomía típica deste municipio", salientou en COPE O Carballiño o alcalde do Irixo, Manuel Cerdeira.

MENÚ 1: 30 euros
Empanada de torresmos e chourizo ceboleiro
Sopa de cocido tradicional
Cocido típico do Irixo
Requeixo con mel e xeado de marmelo ou Filloa con salsa de toffee e xeado de castaña
Pan e viño branco e tinto D.O. Ribeiro

MENÚ 2: 27 euros
Croquetas de lacón
Cazolada de cogomelos e castañas
Croca de tenreira con pataca española
Requeixo con mel e xeado de marmelo ou Filloa con salsa de toffee e xeado de castaña
Pan e viño branco e tinto D.O. Ribeiro

"Xantar é unha fiestra aberta ao mundo na que durante cinco días poñemos nosa hospitalidade xacobea ao servizo dos participantes e convidados”. Deste xeito, o delegado territorial da Xunta en Ourense, Gabriel Alén subliñou na presentación deste evento gastronómico que “a gastronomía é un elemento intrínseco á nosa cultura, ás nosas celebracións e ao noso modo de ser; unha calidade que é sinónimo de hospitalidade, tolerancia e solidariedade”.

Desde a Xunta de Galicia -explicou e delegado territorial- “estamos traballando en fortalecer este campo ao que consideramos un alicerce importante na nosa economía pola súa capacidade para atraer poboación e polo o seu efecto desestacionalizador, e unha feira como a que hoxe estamos a presentar é un escaparate moi importante para a súa promoción”.

Gabriel Alén puxo como exemplo o programa Galicia Sabe, unha estratexia transversal para promover un turismo gastronómico de calidade, para que este sexa un elemento crave no desenvolvemento local sustentable das nosas zonas agrícolas e gandeiras; o programa Gastronomía nos Camiños para dar a coñecer e poñer en valor o mellor das nosas terras e dos nosos mares, produtos de proximidade e de calidade que os nosos cociñeiros son quen de transformar en saborosos pratos que se definen pola súa excelencia e que sorprenden aos peregrinos en cada recuncho do Camiño; ou a campaña Galicia sabe amar para incidir na importancia para comer peixes e mariscos así como na variedade de produtos da máxima calidade que o complexo mar-industria de Galicia pon a disposición dos consumidores para que cada un elixa aquel que máis lle interese e mellor adáptese ás súas necesidades e gustos.

Tamén destacou a iniciativa Écociña no Camiño, un programa orientado á realización dun traballo en contacto cos restauradores do Camiño de Santiago para promover a incorporación nos seus negocios de prácticas aliñadas na consecución dos obxectivos de desenvolvemento sustentable. O obxectivo final desta proposta é a mellora da oferta gastronómica no Camiño de Santiago en termos de calidade e sustentabilidade, implicando tamén ás prazas de abastos como fornecedoras de produtos de calidade e de proximidade.