Desde o PSdeG-PSOE de Leiro queremos manifestar: ​Hoxe vivimos un novo episodio dun xeito de gobernar que confunde o interese xeral co interese dun partido. O Goberno local organizou un acto oficial para presentar un investimento de 240.000€, pero decidiu facelo de costas á corporación municipal e á veciñanza.

​O que os veciños deben saber:

UN ACTO INSTITUCIONAL "A PORTA PECHADA": Unha visita dunha Consellería é un acto oficial que representa a todo o Concello. Porén, o Alcalde converteu o que debería ser unha xornada informativa nunha reunión privada. Non avisar á oposición e ocultar a información a representantes locais é unha falta de respecto á democracia e a todos os veciños que non pensan como el.

 MÁIS FOTOS QUE REALIDADES: Resulta rechamante que se prefira a posta en escena controlada antes que unha convocatoria aberta onde se expliquen os detalles técnicos do proxecto. ¿A que ten medo o Alcalde? ¿Por que non se fomenta a participación de todos nunha obra de tal envergadura? A resposta parece clara: priorízase o marketing político sobre o servizo público.

DIGNIDADE FRONTE Á EXCLUSIÓN: A veciñanza de Leiro merece ser tratada con seriedade. Non se poden usar os recursos públicos para facer actos que exclúen deliberadamente a unha parte da corporación. Os veciños son cidadáns con dereito a unha información clara e non meros acompañantes nunha estratexia de comunicación que moitas veces esquece a rigorosidade administrativa e ambiental. ​

 XESTIÓN BAIXO SOSPEITA: Se un proxecto é positivo, non hai razón para o segredo nin para as présas. Mentres hoxe se busca o titular fácil, dende o PSOE seguiremos vixiando que se cumpra a legalidade en cada paso, especialmente naquelas obras que afectan ao noso patrimonio natural e que noutros puntos do concello están a resolverse con "parches" de formigón sen control.