A escandalosa eiva da mala administración dos diñeiros públicos serve para
que agora se recorten gastos onde non interesa ós políticos. Temos un
exemplo no Conservatorio de Música do Carballiño, onde se anuncian subidas
escandalosas.

Xa sabemos que "non é rendible", que é a xustificación que esgrimirán
-sempre esgrimen- os políticos e os seus adeptos, pero, se vamos a iso,
tampouco é "rendible" a saúde pública, nin o asfaltado das vías, nin a
recollida do lixo, nin a limpeza das rúas... Realmente, por non ser
rendible, non o é nin o alcalde ¿É razoable prescindir do alcalde porque
non é "rendible"?

Precisamente, porque o Conservatorio non é "rendible", necesitamos dos
poderes públicos (que votamos e pagamos cos impostos e coas taxas) para que
nolo xestionen. Doutro xeito estará abocado a desaparecer. Pero antes de que
iso ocurra, moitas familias terán que deixar de levar ós seus fillos ó
Conservatorio xa neste vindeiro curso porque uns políticos insolidarios e
insensibles deciden subir unhas taxas xa de por elas bastante altas. A obriga
dos gobernantes é a de atopar recursos para sostelo sen sacudir máis os
escorrichados petos dos cidadáns. Pero os gobernantes non queren saber de
obrigas. Iso só debe ser para os cidadáns.