A Consellería de Traballo despraza á sede da Mancomunidade do Ribeiro  a mostra ‘Descobre as cooperativas’ que presenta as potencialidades e solucións que ofrece este modelo empresarial.

A exposición permanecerá aberta ata o sábado 6 de abril na Mancomunidade do Ribeiro, na rúa Fondal de Beade, s/n. A iniciativa fai un percorrido polos elementos claves do modelo cooperativo: que son, que tipos hai, como funcionan, cales so os valores que defenden, que pasos dar ou que apoios existen para impulsar o emprendemento cooperativo.

Ao longo de algo máis de 100 metros cadrados, os visitantes poderán achegarse ao cooperativismo agrario ou ao autoemprego cooperativo dun xeito interactivo e dinámico.

A actividade intégrase na Rede Eusumo, unha estratexia de cooperación entre diferentes axentes públicos e asociativos orientada ao fomento da economía social para a xeración de emprego. Esta rede conta co apoio do Fondo Social Europeo. Precisamente, a Mancomunidade do Ribeiro desenvolve unha importante actividade de difusión do cooperativismo no marco da Rede Eusumo, nos concellos de Arnoia, Beade, Castrelo de Miño, Cenlle, Leiro e Cortegada.