Un centenar de pilotos participarán esta fin de semana na proba de Enduro “Xtremo Mesego”, que contará por primeira vez con representación internacional.

Así, hai inscritos un piloto francés e varios de Portugal. Ademáis, a proba deste ano, que vai na cuarta edición, terá o aliciente de contar con auténticos pilotos da élite de induro procedentes, sobre todo, do País Vasco, Navarra e Cataluña.

Entre eles, cabe destacar a Pol Tarrés, que foi campeón do mundo de trial junior, e que debuta nesta proba do Carballiño na modalidade de enduro; o navarro Josu Baraibar; o vasco José Artola, que gañou o pasado ano esta proba;o galego Joaquín Rodríguez, e o francés Peio Etxebesti, entre outros.

Dos cen pilotos inscritos, setenta e cinco son de fóra de Galicia, o que amosa o interese crecente desta proba no calendario nacional de Enduro, según dixo Juan Caderno Baranda, membro do Moto Club Extremo Mesego, que organiza esta proba, durante a presentación efectuada esta mañá na Praza Maior do Carballiño.

Neste acto tamén participaron o concelleiro de Deportes, José Manuel Dacal, e Miguel Lois López, integrante do Moto Club Extremo Mesego. Dacal salientou a importancia deste evento deportivo, tanto pola calidade como pola participación, que conleva a ocupación de prazas hoteleiras, a dinamización do sector hosteleiro e do turismo na vila.

Pola súa parte, Miguel Lois agradeceu a colaboración do concello e patrocinadores, e convidou ao público a asistir a esta proba, que terá un prólogo o sábado pola tarde, fronte ao concello, e o domingo en Pena Cobertoira e zonas de monte.

PROGRAMA

A proba disputarase o sábado, 1, e o domingo, 2 de outubro. O sábado haberá un prólogo en Pena Cobertoira, a partir das 5 da tarde, e outro na Praza Maior, a partir das 7,30. E o domingo a proba comezará en Pena Cobertoira ás 11 da mañá, e rematará ás 5,30 da tarde coa entrega de trofeos.

O parque pechado e verificacións terán lugar no Bar Parque, Rúa Circunvalación.