Un xabarín no paseo do Arenteiro

Este domingo pouco antes da tardiña ía paseando cun amigo polo paseo do Arenteiro cando de repente, entre a ponte da estrada de Ponevedra e o viaducto do tren, apareceu un xabaril adulto de gran tamaño transitando tranquilamente polo paseo como si tal cousa. Ao percatarse da nosa presencia este porco bravo, posiblemente asustado, deteuse e quedouse mirando para nós durante un intre. Tras asegurarse de que nós non constituíamos unha ameaza para el o xabarín reanudou a súa marcha avanzando dereitiño ata onde estábamos.

Para evitar problemas con este animal o meu amigo e máis eu decidimos saír do paseo e subir a unha costa para deixarlle o paso libre, pero para a nosa sorpresa o xabaríl tamén fio a mesma manobra que nós e acercándose cada vez máis. Por sorte este animal, quen sabe se levado polo medo que nos tiña, decidiu esquivarnos subindo por un terraplén para internarse nunha arboleda.

Aínda que non pasou nada e todo quedou nun susto, sobre todo para o xabarín, poño estes feitos en coñecemento de quen corresponda para que tome as medidas oportunas, pois como comprenderán a presenza dun xabaril de gran tamaño neste paseo supón un perigo para as persoas que a diario transitan por el para pasear e facer deporte. De feito a poucos metros de onde tivemos o encontro co xabaril había unha parella paseando cunha nena pequena. Non sei se esta parella se topou co xabarín, pero concidirán comigo que de atoparse con xemellante animal, por moi pacífíco que fora, este presentaría un perigo para eles e, sobre todo, para a neniña.