Este 30 de setembro foi o último dia de servizo para Paco Valeiras como xefe da Policia Local do Carballiño, cargo que viña exercendo desde o ano 2008.

Valeiras incoporouse á Policia Local carballiñesa en novembro de 1991, nesta maña de feira no Carballiño patrullando as rúas completou 34 anos de servizo como axente, sendo unha das persoas máis recoñecibles do concello para varias xeneracións de carballiñeses.

Na entrevista de COPE O Carballiño, Paco Valeiras fai memoria do que foi o seu paso pola Policia Local do Carballiño. Escóitaa aquí:

A Xunta vén de aprobar de forma inicial o Plan Básico Municipal (PMB) do concello de San Amaro para dotar o municipio dun instrumento eficaz de ordenación do territorio.

A directora xeral de Urbanismo, Encarnación Rivas, informou hoxe ao alcalde de San Amaro, Fernando Rodríguez Redondo, da aprobación inicial deste Plan por resolución da Consellería de Vivenda e Planificación de Infraestruturas.

Trátase dun instrumento urbanístico básico que permitirá ao municipio ofrecer capacidade de acollida residencial e económica.

Tras a aprobación inicial de hoxe, o documento someterase a información pública durante dous meses e solicitaranse todos os informes sectoriais preceptivos previos para a súa aprobación definitiva.

O Plan para este concello, que conta cunha poboación de 1.040 habitantes, clasifica un total de 62 núcleos rurais, repartidos en 8 parroquias. Deles, 46 son tradicionais, 7 comúns e 9 combinan partes tradicionais e comúns.

Ademais o Plan tamén contempla un total de 160 elementos de patrimonio cultural. Deles, 19 son bens etnolóxicos catalogados como Bens de Interese Cultural (BIC); e entre os Bens Catalogados (CAT) hai 27 arqueolóxicos, 43 arquitectónicos e 71 etnolóxicos.

A Consellería de Vivenda e Planificación de Infraestruturas, a través da Dirección Xeral de Urbanismo, está a promover os Plans Básicos Municipais en concellos de menos de 5.000 habitantes que non contan con planeamentos xerais.

O obxectivo da Xunta é dotar estes municipios dunha ferramenta que permita impulsar unha ordenación urbanística responsable e sostible.

Na comarca do Carballiño xa contan con aprobación inicial do PBM os concellos de San Cristovo de Cea, Punxín e Beariz.

Coa chegada do outono, volve o teatro afeccionado ao Carballiño grazas á XVIII Mostra de Teatro Amador “Terras do Orcellón”. A cita cultural, impulsada polo grupo teatral Tiruleque coa colaboración do Concello do Carballiño e da Deputación, comezará o 4 de outubro e estenderase ata o 9 de novembro.

Ao escenario do Auditorio Manuel María subirán un total de nove compañías de diversos puntos da xeografía galega, que farán rir e desfrutar ao público.

O concelleiro de Cultura, Diego Fernández, destacou esta mañá, na presentación da mostra, a calidade das obras seleccionadas por Tiruleque en cada nova edición. “Sempre nos sorprenden, e este ano tamén, traen obras moi variadas de moitísima calidade”, apuntou o edil, quen agradeceu o esforzo por parte dos organizadores.

O concelleiro lanzou unha invitación á veciñanza do Carballiño e dos concellos da contorna para achegarse e desfrutar da oferta teatral. César Fernández, alcalde de Ribadavia e deputado de Cultura, tamén animou á poboación a acudir á mostra, e resaltou o papel “dinamizador” deste tipo de eventos, non só no tecido cultural e social, senón tamén no económico.

Lydia Giselle Almonte e Pepín Prada, de Tiruleque, deron conta do esforzo do grupo teatral por impulsar cada ano a mostra de teatro. Nese sentido, agradeceron o apoio do Concello do Carballiño e da Deputación e pediron que se manteña no tempo “para non poñer en perigo a mostra”.

Programación variada

A XVIII Mostra de Teatro Amador traerá moitas risas e comicidade ao Carballiño. A programación arranca o 4 de outubro coa peza “Mal do miolo” da Asociación Dramatúrxica Pico do Castro. Continúa o 5 de outubro con “De marzo a marzo”, de Opaí Teatro Canido SRD, unha obra que, pese a ter tintes dramáticos, non esquece a comicidade. “Fala dos incidentes que houbo no ano 72 na Navantia de Ferrol, durante a dictadura”, detallou Pepín Prado. “O parvo”, do Grupo de Teatro Badius, será o día 11 de outubro.

La Caja de Pandora presentará “O atranco” o día 18, e Teatro Terra de Outes presentará “O doente imaxinario… daquela maneira” o día 25. Tiruleque representará a súa peza “A conspiración da piolla” o día 26 de outubro e repetirá o 1 de novembro. “É un grupo de conspiradores que queren atentar contra un tirano”, avanza Prada, autor da peza teatral.

O público poderá desfrutar de “Os vellos non deben namorarase”, de Rebuldeira Teatro, o día 2 de novembro; “Aquí as fabas, a caldeiradas!” de Abázcaro Teatro o día 8, e “Paga e cala” do Grupo de Teatro do Hospital de Lugo o día 9 de novembro, que pechará a programación da mostra.

“Todas as obras serán ás 20,00 horas no Auditorio Manuel María, e o prezo das entradas será de cinco euros”, apuntou Lydia Giselle Almonte.

Coa celebración do tramo espectáculo desde as 20:00 deste venres na antiga estrada de Pontevedra, que bordea o parque municipal do Carballiño comeza a cuarta edición desta proba automobilística que terá continuidade duarnte o sábado dia 27 en estradas dos concellos de Piñor, Cea, San Amaro, Leiro, Maside e Amoeiro.

Preme no enlace para ver os tramos e horarios do rally:
https://www.gzrally.com/evento/4-rally-comarca-do-carballino-2025/

Comezou unha nova temporada da Tertulia dos Venres en COPE O Carballiño, que seguirémos escoitando os venres de cada semana entre as 13:00 e as 14:00 horas.

Nesta primeira tertulia da temporada participaron José Antonio Barge, Maria Luisa Rodríguez, Sebastián Lamazares e Manuel Nogueira, e presentada por Xan Pinal.

O PSdeG-PSOE de Ourense leva ao Parlamento de Galicia a situación do balneario de Berán, que permanece pechado, a pesar dos importantes investimentos públicos que ten recibido nos últimos anos. As e os socialistas afirman que a cidadanía do Ribeiro e o conxunto da sociedade galega “teñen dereito a coñecer o destino dos recursos públicos investidos, así como a planificación prevista para a reapertura e posta en funcionamento deste equipamento, clave para o desenvolvemento económico e turístico da zona”.

O Grupo Parlamentario Socialista presentou o 21 de maio unha petición formal de documentación, na que solicitaban copia e/ou acceso ao expediente completo, no que conste a información relativa ás subvencións, convenios ou axudas públicas outorgadas pola Xunta desde o ano 2000 ao balneario de Berán. Tal e como explican as e os socialistas “o goberno galego tiña 20 días para contestar, pero a día de hoxe seguimos sen respostas”.

A deputada do PSdeG-PSOE de Ourense no Parlamento de Galicia, Carmen Rodríguez Dacosta, destaca que esta situación demostra que “estamos ante unha falta absoluta de transparencia e opacidade que non é admisible nun goberno democrático” e pregúntase “que ten que ocultar a Xunta de Galicia neste senso”. A parlamentaria socialista lembra que diversas administracións públicas “teñen participado no financiamento de actuacións para a rehabilitación, modernización e posta en valor deste recurso termal, con fondos procedentes de subvencións, convenios e outras liñas de axudas”.

Rodríguez Dacosta ten claro que o balneario de Berán “é hoxe un monumento ao abandono institucional e ao malgasto de fondos públicos, e non é algo que diga eu, senón que abonda con achegarse ata aló para ver de primeira man a realidade, cun espazo que debería ser un emblema da comarca, totalmente pechado”. Asemade, a representante do PSdeG-PSOE de Ourense no Parlamento de Galicia tamén apunta a que Berán “leva vinte anos agardando, vinte anos perdidos” e fai fincapé en que “a Xunta prefire optar por parches e mirar para outro lado en lugar de asumir responsabilidades”.

Os socialistas teñen claro que o balneario de Berán “non é só unha instalación pechada, é a demostración de que, sen planificación, sen control e sen vontade política, o termalismo galego non terá futuro”. Ante o “silencio” e a falta de “transparencia” por parte da Xunta, o PSdeG volverá a reiterar as súas preguntas en relación ao balneario de Berán este venres en sede parlamentaria.

O delegado territorial da Xunta, Manuel Pardo, desprazouse ao concello de San Amaro para informarlle ao seu alcalde, Fernando Rodríguez, que a Consellería de Política Social e Igualdade vai destinar máis de 106.000 euros para a posta en marcha de dúas casas do maior neste municipio. Estes novos recursos, sumados aos xa existentes neste concello, permitirán atender ata unha vintena de maiores de xeito totalmente gratuíto.

Así o fixo durante a súa visita a unha casa do maior xa existente nesta entidade local, onde destacou que na última resolución da convocatoria para a creación de 20 destes recursos en diferentes concellos de Galicia, 6 pertencen a provincia de Ourense sendo ademais das dúas de San Amaro, unha nos concellos da Mezquita, Quintela de Leirado, Maside e Petín, contando cun investimento da Xunta de máis de 306.000 euros.

Manuel Pardo salientou que a través desta orde, que contou cun orzamento dun millón de euros, o Goberno galego incrementará a rede de casas do maior de Galicia ata as 160 (59 na provincia de Ourense), co obxectivo de fomentar o envellecemento activo e o benestar das persoas da terceira idade.

O representando Goberno galego rematou lembrando que a Xunta impulsou estes recursos pioneiros co obxectivo de ofrecer unha atención totalmente gratuíta aos maiores que viven nos concellos máis pequenos, potenciando así os coidados de proximidade na contorna e para ofrecer alternativas de asentamento de poboación no rural.