Cine para todos os públicos na pantalla do Novocine de Leiro para esta Semana Santa, con ata catro películas que se proxectan nos distintos horarios e dias que poder ver na carteleira.

Xa o afirmou no seu discurso o alcalde, Francisco Fumega, “a traxectoria profesional de Dona María Teresa Miras Portugal é tan extensa que se precisaría un groso volume para plasmar os seus méritos docentes, institucionais e científicos”. A científica e catedrática en Bioquímica e Bioloxía Molecular recibiu esta mañá, a título póstumo, a Medalla de Ouro Honorífica do Concello, nun acto no que a súa familia sentiu o agarimo deste pobo.

O seu fillo, Fernando Varela, recolleu a insignia e mostrouse moi agradecido polo recoñecemento: “A da mina nai foi unha vida de esforzo e traballo. Aínda que tivo que exercer a súa profesión fóra, sempre que tiña oportunidade volvía a súa casa do Carballiño. Moito traballou nese xardín que agora nos revive o seu recordo. Moito lle deu este pobo á miña nai”. Con este recoñecemento deuse cumprimento ao acordo plenario do mes de decembro que contou co apoio de todos os grupos políticos.

O rexedor, Francisco Fumega, asegurou representar o sentimento de todos os veciños e veciñas no acto institucional no que se lle outorgou a Medalla de Ouro Honorífica do Concello. Destacou tamén que María Teresa Miras “foi unha muller exemplar en todos os ámbitos da vida”. Destacou, ademais, que “como carballiñesa de nacemento e de corazón, e como científica de relevancia nacional e internacional, ostentou os valores implícitos nun recoñecemento institucional como o que hoxe levamos a cabo”.

María Teresa Miras estudou Farmacia en Santiago de Compostela e rematou a carreira na Universidade Complutense de Madrid con Premio Extraordinario e Premio Nacional da Licenciatura de Farmacia. Doctorouse na Universidade Louis Pasteur de Estrasburgo e tamén na Complutense de Madrid. Foi catedrática de Bioquímica e Bioloxía Molecular nas Universidades de Oviedo, Murcia e Complutense de Madrid. Miras destacou na súa faceta investigadora, á que se dedicou durante máis de 40 anos. Publicou máis de 350 artigos en revistas especializadas.

Cómpre destacar que a carballiñesa foi a primeira muller en presidir a Real Academia Nacional de Farmacia e acadou numerosos premios, tanto das institucións académicas como científicas, así como das administracións públicas e fundacións privadas.

O PSdeG-PSOE de Leiro informa que a Valedora do Pobo da a razón aos e ás socialistas en relación ao expediente de queixa aberto pola denuncia presentada o 14 de decembro de 2021 debido a “demora, opacidade e dificultades” postas polo alcalde do municipio, Francisco José Fernández, a hora de facilitar o acceso a expedientes, datos e información solicitados polo PSdeG do municipio para a fiscalización da súa xestión.

Tal e como apuntan dende o grupo municipal socialista de Leiro, nas análises realizados pola Valedora do Pobo “ponse de manifesto o claro incumprimento dos artigos 77 da Lei 7/1985 de Bases Reguladoras de Réxime Local, do 14 Real Decreto de Organización e Funcionamento e Réxime Xurídico de las Entidades Locais e do 226 da Lei 5/1997 de Administración Local de Galicia”. Dende o PSOE de Leiro subliñan que en todo este articulado “recóllese o dereito dos membros da corporación local ao acceso a antecedentes, expedientes, datos e información no concello para desenvolver a súa función de control e fiscalización da xestión municipal, nun período de cinco días naturais, algo que non se cumpre no concello de Leiro”.

Cabe destacar que esta información da Valedora do Pobo súmase ás do Consello de Contas de Galicia e a Confederación Hidrográfica Miño-Sil, sendo xa tres as institucións públicas ás que o PSdeG-PSOE tivo que recorrer, con éxito, para obrigar ao alcalde de Leiro e presidente da mancomunidade do Ribeiro para que “entenda que as súas mentiras e manipulacións na súa xestión, non son suficientes para ocultar as súas irregularidades”.

O voceiro do PSdeG-PSOE en Leiro, Manuel Rodríguez Vázquez, lémbralle ao rexedor do Partido Popular que “mentir e manipular para ocultar a realidade da mancomunidade do Ribeiro ou das obras de remodelación do campo de fútbol, entre outras cuestións, só lle serviu para que as contas da mancomunidade sexan fiscalizadas polo Consello de Contas e que a CHMS sancionara ao concello por incumprimentos na normativa vixente polas obras do campo de fútbol”.

Rodríguez Vázquez apunta a que máis do 50% do orzamento da mancomunidade “é financiado con recursos públicos da Xunta de Galicia” e sinala que “dos 65.000 euros da obra do campo de fútbol, 60.000 son aportados pola propia Xunta”. Neste senso destaca tamén que “o coste derivado da obrigación de mover a grada do campo de fútbol de Leiro por orde da CHMS, ao non cumprir cos requisitos preestablecidos, será tamén financiado con cartos públicos da Deputación de Ourense, concretamente con 42.000 €”.

Os e as socialistas de Leiro consideran que Francisco José Fernández “está obrigado a dar explicacións a veciñanza, aos que el mesmo, en cumprimento da lei de patrimonio, do plan urbanístico de Leiro ou das zonas inundables da CHMS lles nega a execución de obras en proxectos nas súas propiedades, namentres o alcalde incumpre a lei de transparencia ou de zonas inundables, entres outras moitas cuestións”.

O Museo do Papel do Carballiño abrirá as súas portas despois de Semana Santa cun modelo museístico audiovisual que será referente en Galicia e que permitirá coñecer aos visitantes, a través dun código QR e audioguías, o proceso de industrialización decimonónica da Galicia interior e desta comarca. Así o anunciou o alcalde, Francisco Fumega, nunha visita realizada ás instalacións da Fábrica de Papel “A Labandeira” xunto co concelleiro de Turismo, Manuel Dacal, para comprobar a evolución dos traballos que se están realizando no interios do inmoble.

O rexedor asegurou que a empresa á que se adxudicou o proxecto de musealización da Fábrica de Papel, Ingeniería Interactiva del Ocio s.XXI S.L, xa elaborou todos os elementos que se exporán, mentres que outra parte do material, como as prensas, foi encargado a unha firma do concello. O edificio guiará aos visitantes nunha viaxe no tempo ata a fábrica de papel do século XIX que realizaba o proceso de transformación a través do trapo. Precisamente este proceso poderá coñecerse na primeira planta do inmoble.

Na área de recepción de visitantes realizarase a elaboración artesanal dun mostrador a dúas alturas para a recepción, tallos e cadeiras, armarios de almacenamento e estantes. No andar semisoto, cunha superficie de 45,2 metros cadrados, instalarase o taller de elaboración de follas de papel e fabricaranse, en madeira de piñeiro, elementos a escala real como unha bañeira grande para a pasta de papel. Haberá nesta zona paneis explicativos con gráficas correspondentes a cada proceso que se dará a coñecer na sala. No andar de abaixo haberá tres zonas diferenciadas: A de encolado, onde irán aquelas follas de papel que recibirán tinta para facelas máis impermeábeis; a de brunido, onde o papel recibe outros tratamentos como o prensado e a zona de clasificación e preparación para o mercado. O primeiro andar, cunha superficie útil de 115 metros cadrados, estará dedicado ao sequeiro de papel, cos tendais e mesas de colocación e o resto da sala a documentos históricos.

Un auditorio para 40 persoas será acondicionado no segundo andar (89 metros cadrados) e dotarase de medios audiovisuais e informáticos relacionados con elementos temáticos do mundo do papel. Serán máis de trinta paneis os que permitirán ao visitantes coñecer todo o proceso de fabricación do papel. Ademais, poderán verse exemplares do século XIX do Boletín Oficial da Provincia de Pontevedra. Outra das seccións protagonistas será a dedicada a persoeiros das fábrica do papel e na que terá un papel relevante Valentín Fernández, que foi alcalde do Carballiño e creou a nivel galego a primeira feira municipal: “Sen el non poderíamos entender o actual concello”, afirmou Francisco Fumega. O alcalde insistiu en que “as instalacións complementarán ao Parque Etnográfico do Arenteiro e potenciarán a cultura e a economía local do concello”. Ademais, cun importe de 150.000 euros dunha subvención da Unión Europea e nunha fase posterior, poñeranse en funcionamento os muíños.

Sen dúbida que Luis Sobrino (O Carballiño 1961) foi un dos fútbolistas carballiñeses que máis anos defendeu a camisesta verde do Arenteiro, fixoo durante 13 tempadas en varias etapas, e ademáis en 3 categorias diferentes,  Preferente Autonómica, Terceira División e Segunda B.

Antes, Sobrino, que comezou a dar as primeiras patadas ao balón no campo do Outeiro de Arcos, o lado da súa vivenda familiar, tivo a súa primeira ficha de futbolista federado co desaparecido "Veracruz". A súa traxectoria como xogador de fútbol profesional levouno a outros clubs como ao Bergantiños en Segunda B e  CD Ourense, co que foi o seu capitán e conseguíu dous ascensos á Segunda División.

Despóis de xogar co Ponte Ourense en terceira división, colgou as botas como xogador de CD Arenteiro. Sobrino tamén participou da política municipal, formando parte das corporacións municipais de Leiro e O Carballiño, en ambas como concelleiro do Partido Popular.

Na foto, o dia no que CD Arenteiro lle tributou unha homenaxe en maio de 2021 con motivo do Arenteiro-Bergantiños, no que o Arenteiro proclamouse campión de terceira división e conseguíu o ascenso á Segunda Federación.

O Concello do Carballiño avanza na construción dun parque infantil no barrio da Toscaña que terá moi presente ao pulpo. Máis en concreto, as obras lévanse a cabo na zona verde pública situada na rúa Amalia Mosquera e contan cun orzamento que supera os 250.000 euros. A extensión superficial da zona na que se actúa ten máis de 1.000 metros cadrados, dos que 820 metros cadrados corresponden á zona de xogos infantís e 220 á pista multideporte.

O parque infantil constrúese nunha planta irregular de 30 metros de ancho por 40 de largo, destinada a xogos para os nenos e nenas na parte norte e a unha cancha multideporte na parte sur. Unha das atraccións estrela será un equipo combinado temático modelo pulpo, con 5 metros de altura, para un total de 70 cativos e cativas maiores de tres anos. O pavimento de seguridade será de cor azul coma o mar e os xogos serán dende un barco, ata golfiños e peixes.

Os xogos propostos adaptaranse ao desnivel existente no terreo, entre dúas plataformas a distinta rasante e un talud intermedio no caso dos xogos, e unha terceira a nivel inferior separada por un muro de contención de cantería.

Con este proxecto, "o executivo local do Carballiño segue apostando polas zonas de xogo ao aire libre para os máis pequenos, ao mesmo tempo que rende homenaxe ao pulpo como símbolo de todo un pobo", afirman dende o concello carballiñés.

Espazo Común considera que "a pesares dos continuados intentos por disfrazar a realidade con anuncios ficticios e mesturar cifras co único obxectivo de confundir á poboación, o certo é que O Carballiño padece unha caída moi acusada en tódolos indicadores demográficos".

"Á perda de máis de 400 habitantes nos últimos dez anos, hai que engadir o evidente envellecemento da poboación cunha media de idade de 49,16 anos, 1,44 anos máis ca hai tan só cinco anos", remarcan dende Espazo Común.

Isto evidencia -subliñan- que a xente máis nova marcha do noso pobo e que se perdeu a capacidade de atraer a parellas xoves doutros lugares para que fixeran deste o seu punto de residencia. "Facendo unha análise un chisco máis profunda dos datos, non fai falla ser un experto para saber que de non ser pola inxente cantidade de poboación chegada do estranxeiro, as cifras do Carballiño serían aínda máis aterradoras. Outro dato siginificativo é o do crecemento vexetativo, moito máis ca negativo nestes últimos anos: cun dato de -156 en 2021. Esta é a diferencia entre falecementos e nacementos nese ano, dinámica que non se revertiu en absoluto posteriormente".

Namentres todo isto está a acontecer, "as medidas tomadas polo goberno municipal ascenden a cero", afirma no seu diagnóstico Espazo Común. Para a formación liderada por Pachi Vázquez "a pesares dos acordos e das propostas feitas pola oposición, nin campaña de captación de novos empadroados, nin medidas correctoras algunhas, nin nada de nada".

E inciden nas causas do seu diagnóstico "a resposta é moi evidente e ata os alumnos de infantil a coñecen: porque o resto de concellos ofrecen, de xeito gratuito, servizos de conciliación moito máis completos que o que ofrece a teórica capital da comarca, a maiores de axudas diversas para material escolar e similares. Nun mundo no que, na maioría dos fogares, traballan ambos conxuxes, iste é un factor decisivo. É un dos servizos máis básicos que se teñen que prestar para facerlle a vida mellor aos cidadáns".

E neste contexto dende Espazo Común apuntan posibles solucións, que pasarían por "elaborar un novo Plan Municipal de Conciliación Gratuita que teña en conta os horarios dos diferentes colexios; que contemple a situación laboral da meirande parte das familias, con xornadas partidas; que inclúa todo o ano e non só as épocas lectivas"

A través dunha moción que presentarán o pleno da corporación ESCO demandará que "o Concello do Carballiño comece de xeito inmediato a elaboración dun Plan Municipal de Conciliación Gratuita en cuxa elaboración participe toda a comunidade educativa: centros, ANPAS, asociacións".

Finalmente, demandarán do pleno do concello que cara o próximo curso escolar 23-24 se instaure unha liña de axudas para libros e material escolar de 100 euros por neno e coa única condición de que o gasto se faga no comercio local.