O Partido Popular mantén como candidatos nas eleccións municipais do 28M aos seus candidatos nos sete concellos que goberna na comarca do Carballiño, desta maneira optarán a un novo mandato de catro anos o actúal alcalde de San Cristovo de Cea, José Luis Valladares. Tamén repiten como cabeza de lista do PP Manuel Casalta en Punxín, Manuel Prado en Beariz, Patricia Torres en Boborás, José Luis González en Piñor, Manuel Cerdeira no Irixo e Fernando Redondo en San Amaro.

As dúas novidades, xa anunciadas semanas atrás, son Lino González que pasa a ser a nova aposta dos populares no concello do Carballiño, en sustitución de Ricardo Perea, e Ignacio Campo, que colle o relevo de Luis Jorge Ferro, como alcaldable para o concello de Maside.

No concello de Leiro, volverá presentarse á reelección á alcaldia baixo as siglas do Partido Popular Francisco José Fernández, que tamén é senador. E tamén optará a un novo mandato, que será o 2023-2027 Antonio Montero, que volverá liderar a lista popular no concello de Avión.

A Deputación de Ourense prepara unha candidatura para presentar á convocatoria extraordinaria dos Plans de Sustentabilidade Turística en Destino (PSTD) -financiada con fondos Next Generation-, cun proxecto específico destinado ás vilas termais e concellos con cascos antigos declarados Conxunto Histórico-Artístico, alineado co plan territorial da comunidade autónoma galega.

O presidente da Deputación, Manuel Baltar, acompañado pola xerente do Inorde, Emma González, presidiu no Centro Cultural Marcos Valcárcel unha reunión con representantes dos municipios implicados neste novo proxecto. Como vilas termais forman parte da área de intervención do proxecto Arnoia, Boborás, Cenlle, Cortegada, Leiro, O Carballiño, Ribadavia, Bande, Lobios, Muíños, Baños de Molgas, Monterrei, Verín, Punxín e Castrelo de Miño. E, como concello con cascos históricos, Castro Caldelas e Allariz, ademais dos xa mencionados Ribadavia e Boborás -Pazos de Arenteiro-

Manuel Baltar afirma que o proxecto liderado pola Deputación, a través do Inorde, “é unha nova oportunidade para poñer en valor a provincia e aproveitar os recursos europeos que, sen dúbida, virán ao noso territorio grazas a ese factor diferencial e competitivo que é o termalismo”. O presidente do goberno provincial expresa a súa total confianza en lograr estes fondos “tanto polo consenso como pola unión de esforzos, o éxito e a experiencia do noso territorio, que conta con dous plans de sustentabilidade turística, un deles xestionado pola Deputación e cofinanciado pola Axencia de Turismo de Galicia e a Secretaría de Estado de Turismo”.

Manuel Baltar lembra que a próxima semana -o día 7 de marzo- celebrarase en Ourense a XII Conferencia Política da Confederación Europea de Poderes Locais e Intermedios (CEPLI), “onde precisamente falaremos da capacidade dos gobernos provinciais para unir ás entidades locais na execución de proxectos, como estamos a demostrar desde a Deputación de Ourense, que fortalecerá esta nova candidatura co importante aval que representa a execución doutros programas europeos”.

Pola súa banda, Emma González explica que na reunión celebrada esta mañá “analizáronse as prioridades que nos permitirán situarnos como destino turístico, especialmente no ámbito termal, onde cómpre destacar que xa formamos parte do itinerario europeo das cidades históricas con patrimonio termal”. No encontro, dixo, “tamén se avaliaron aquelas actuacións que permitan atraer poboación, xerar emprego e facer esa transición ecolóxica cara un destino sustentable na provincia de Ourense, que desde a chegada do AVE ten todo para posicionarse”.

Un proxecto con catro eixos

O obxectivo da candidatura que estrutura o Inorde é liderar, desde unha visión integral de provincia, a transformación competitiva das vilas termais e cascos históricos. As actuacións que incluirá este proxecto xiran en torno a catro eixos: transición verde e sostible; eficiencia enerxética, transición dixital e competitividade.

A transición verde e sostible comprende iniciativas de restauración ambiental, xestión de espazos naturais, implantación de economía circular, rehabilitación sostible de edificios e adaptación ao cambio climático. A mellora da eficiencia enerxética inclúe actuacións para mitigar o cambio climático, reducindo a enerxía requirida para proporcionar produtos e servizos turísticos, limitar a contaminación por carbono e estimular a transición cara a enerxías renovables, así como plans de mobilidade sostible.

A transición dixital abarca a mellora continua da cadea de valor turística no ámbito tecnolóxico, mentres que na competitividade se inclúen todas aquelas accións de xeración creación de oferta, mellora do produto, creación de equipamentos, embelecer espazos públicos e todo o relacionado coa mellora constante da xestión do destino.

O Carballiño pasa a contar cunha nova dotación cultural, o "Espazo O Potiños" poderémos encontrálo na primeira planta da biblioteca pública municipal, na Casa da Cultura do Carballiño.

Será unha exposición permanente que reúne os fondos documentais que esta asociación carballiñesa foi reunindo durante os seus 45 anos de vida e de documetación fotográfica, e tamén de libros ou revistas, que agora serán custodiados nun lugar axeitado, e visitable para o público en xeral. Asi o destacaron tanto o concelleiro de cultura Diego Fernández coma o presidente de O Potiños, Manolo Blanco, no acto de presentación deste novo equipamento cultural.

Asemade, tamén deron a coñecer o último traballo fotográfico que realizaron en colaboración coa asociación de pulpeiros de Arcos-O Carballiño, son máis de 700 fotografías representativas de 35 familias con tradición pulpeira, un traballo que agardan poida culminar coa publicación dun libro, para elo agardan a colaboración da Deputación.  

A Secretaria Xeral de Igualdade, Susana López Abella, visitou hoxe o Concello de Avión, onde participou no acto de constitución da Mesa Local Interinstitucional contra a Violencia de Xénero, á que asistiron diferentes colectivos implicados na devandita mesa como son as diferentes asociacións de mulleres existentes no termo municipal, así como culturais, veciñais e educativas, entre outras.

O alcalde, Antonio Montero, destacou a importante implicación da Secretaria Xeral polo apoio mostrado en todas as medidas de igualdade de oportunidades e de Violencia de Xénero para o Concello de Avión. A directora do CIM, Yesica Moreno, aproveitou a presentar oficialmente a programación do vindeiro 8M, na que se inclúe ao colectivo educativo e á cidadanía en xeral.

O delegado do Goberno en Galicia, José Miñones, avanzou hoxe en Boborás a concesión en Galicia de 56 axudas de transición ecolóxica a 30 pequenos concellos por un valor de 26,4 millóns de euros do Plan de Recuperación, Transformación e Resiliencia. José Miñones fixo este anuncio no Concello de Boborás, que acadou unha das axudas deste programa, o DUS5000, que xestiona o Ministerio para a Transición Ecolóxica e o Reto Demográfico.

“Hoxe en Boborás comprobamos como o Goberno de Pedro Sánchez tende a man aos pequenos concellos para avanzar na súa transición verde e na súa dixitalización e como materializamos os investimentos e as accións políticas para combater o Reto Demográfico”, remarcou José Miñones. En Boborás, o delegado mantivo unha reunión coa alcaldesa, Ana Patricia Torres, e con parte da Corporación Local, con quen avaliou o proxecto que en Boborás financiará o programa DUS5000 con 102.625,79 euros de subvención.

En concreto, con esta axuda a Administración Local poderá afrontar a mellora da iluminación exterior de varios puntos do concello, co obxectivo de facela máis eficiente, reducindo o consumo de enerxía e a pegada ecolóxica do Concello.
Programa DUS5000 en Galicia.

O Ministerio para a Transición Ecolóxica e o Reto Demográfico é o responsable desta liña de axudas, recollida no Plan de Recuperación, Transformación e Resiliencia, financiado polos fondos Next Generation UE. A convocatoria ten como obxectivo impulsar a transición ecolóxica nos municipios de reto demográfico financiando proxectos de enerxía limpa con ata o 100% do investimento necesario.

José Miñones detallou que o orzamento total do programa ascende a 675 millóns de euros, dos que se reservan 51.232.500 euros para os proxectos presentados por municipios de Galicia: “hai que destacar que o Goberno aprobou varias ampliacións do orzamento inicial ata multiplicalo por nove”. Con esta decisión, o Goberno deu resposta ao enorme éxito do programa, para o que recibiu, ata o pasado 7 de novembro, fin da convocatoria, 3.000 solicitudes, 222 delas procedentes de concellos de Galicia.

Entre os proxectos financiados ata o momento en Galicia inclúense melloras da eficiencia enerxética, desenvolvemento de instalacións de enerxías renovables e o fomento da mobilidade sostible. O programa establece unha pinza de investimento que vai desde un mínimo de 40.000 euros ata un máximo de 3 millóns, segundo o proxecto. A subvención cobre o 85% da mesma e pode alcanzar o 100% en casos puntuais. “No caso de Boborás, a axuda concedida permite financiar a totalidade da actuación”, sinalou o delegado.

Na provincia de Ourense, ademais de Boborás, oito concellos acadaron, ata hoxe, 23 axudas deste programa por un importe de 4,2 millóns de euros. José Miñones apuntou que este listado se vai incrementar posto que aínda quedan orzamento dispoñible ata esgotar os 51,2 millóns de euros totais.

Apoiando a transición verde e dixital en Boborás

O delegado do Goberno lembrou que o proxecto aprobado en Boborás no marco do Programa DUS5000 complementa as axudas que xa percibiu este Concello do Goberno de España para a transformación da iluminación exterior do municipio. Isto é así porque o Ministerio para a Transición Ecolóxica concedeu tres subvencións por valor de 337.211,16 euros para executar nos últimos dous anos tres proxectos de mellora de eficiencia enerxética da iluminación exterior municipal deste Concello.

Os proxectos consistiron na substitución de preto de 700 luminarias de tipo tradicional por luminarias tipo LED de maior rendemento e eficiencia, xunto coa substitución de cadros de mando. Esta transformación permite ao Goberno local de Boborás aforrar un 70% do consumo de luz nas zonas que se executou e reducir, en consecuencia, a factura eléctrica municipal, que é un dos gastos máis elevados que ten esta administración.
Xunto coa transición verde, José Miñones subliñou que o Goberno traballa para a dixitalización do Concello de Boborás a través do Programa ÚNICO-Banda Ancha, un programa que tamén financia o Plan de Recuperación, Transformación e Resiliencia do Goberno, a través do Ministerio de Asuntos Económicos e Transformación Dixital.

“A través deste programa imos garantir a conexión a través de fibra de moi altas prestacións de 675 vivendas de Boborás en 153 zonas do municipio que non dispoñían desta conexión”, sinalou o delegado.

Como novidade, José Miñones avanzou que o Goberno vén de aprobar o programa UNICO-Demanda Rural que permitirá que, mentres a fibra non estea instalada nestas zonas, as persoas que desexen acceder a internet dispoñan de acceso mediante satélite a prezo fixo: “costearemos a instalación cunha axuda de ata 60 euros e reduciremos o prezo da conexión mensual a 35 euros ao mes, para facelo competitivo e accesible. Estamos traballando para ofrecer este servizo nesta próxima primavera”.

A Deputación de Ourense colaborará coa celebración da I Ruta Cabalar de San Amaro, organizada pola Escola de Equitación de San Amaro e o Concello, e que se realizará o vindeiro sábado 4 de marzo.

O presidente da Deputación, Manuel Baltar, reuniuse co rexedor de San Amaro, Fernando Redondo, para abordar os detalles da colaboración cunha actividade aberta a todos os públicos.

O titular do goberno provincial pon en valor o traballo do equipo de goberno e destaca o compromiso da Deputación con San Amaro, apoiando "proxectos estratéxicos coma a transformación do antigo campo de fútbol nun espazo multiusos para a escola de equitación, a mellora dos camiños ou a celebración do Festival Céltico xunto ao Irixo".

Pola súa banda, o alcalde desta localidade, Fernando Redondo, explicou que "o que se pretende coa primera edición da Ruta Cabalar é que esta sirva como un elemento de promoción e dinamización do noso concello, enchendo a vila de xente e mostrándolle as atraccións turísticas coas que contamos".

"A finalidade é poñer en valor o noso patrimonio e crear un movemento de xente que se traduza en retorno económico para os negocios locais", sinala Fernando Redondo.

A ruta a cabalo terá un percorrido circular de 20 quilómetros, permitindo coñecer os principais puntos de interese patrimoniais cos que conta San Amaro, como o Castro de San Cibrao de Las ou o mosteiro budista, así como as distintas parroquias pertencentes ao concello. Ademais, a actividade ecuestre, que arrancará ás 15,30 horas do sábado, estará acompañada dunha merenda e dunha cea con verbena, a partir das 21,00 horas, no campo da festa de San Amaro. A inscrición remata o 1 de marzo.

A Deputación de Ourense colaborará co Concello de Boborás na modificación do PXOM para a delimitación do núcleo da capital co fin de, entre outros obxectivos, dotar de solo dotacional para a construción dunha residencia de maiores no municipio. Esta nova liña de cooperación institucional foi abordada nun encontro de traballo do presidente da Deputación, Manuel Baltar, coa alcaldesa de Boborás, Patricia Torres.

Trátase dunha axuda de 18.000 euros coa que o Concello de Boborás poderá contratar o equipo que se encargará de facer este documento e así poder levar a cabo os cambios pertinentes na delimitación urbanística en vigor.

Esta modificación, explica a alcaldesa, suporá ademais a adaptación á normativa actual e coa que o equipo de goberno de Boborás tamén quere aproveitar para ampliar o solo edificable e definir a ampliación de espazos públicos e viais para mellorar ó acceso a zona do colexio. Un espazo no que na actualidade se están a levar a cabo novas infraestruturas coma a piscina ou o futuro centro de saúde, sumadas ás xa existentes e coa previsión da mencionada residencia de maiores.

O presidente da Deputación enmarca esta nova liña de cooperación na “posición activa do goberno provincial atendendo as necesidades dos concellos ourensáns” e resalta o “bo traballo de Patricia Torres e o seu equipo deseñando e implementando novos proxectos para Boborás”.

Pola súa banda, Patricia Torres resalta a importancia da colaboración da Deputación co Concello de Boborás -“sen a súa cooperación sería imposible desenvolver e transformar Boborás”- e agradece ao presidente do goberno provincial, Manuel Baltar, “o seu compromiso e sensibilidade coas diferentes necesidades trasladadas”.

A rexedora pon en valor a importancia da modificación do PXOM, “un feito importantísimo que nos permitirá avanzar na transformación de Boborás, que, entre outros avances, contará cunha residencia de maiores que, ademais dun servizo á veciñanza, será unha fonte de traballo local”.