O presidente da Deputación, Manuel Baltar, mantivo esta mañá no Pazo Provincial unha xuntanza co alcalde de Avión, Antonio Montero, para analizar os proxectos en marcha no concello e avanzar en novas liñas de colaboración entre as dúas administracións.

Manuel Baltar avanzou o apoio a varias propostas de colaboración formuladas polo rexedor. En concreto, a Deputación colaborará na renovación do equipamento da residencia de maiores de Avión; cooperará no arranxo de vías municipais e a estrada da OU-0308 e, ademais, afondará no seu compromiso coa mellora dos servizos públicos que este concello presta aos veciños.

O presidente do goberno provincial pondera a importancia destes encontros de traballo para “coñecer a situación concreta de cada concello da man dos alcaldes e reforzar a cooperación entre a Deputación e os gobernos locais”. Para a Deputación, remarca Manuel Baltar, “é un piar fundamental estar ao lado das administracións locais e apoialas naquilo que precisen e que resulte na mellora do benestar dos veciños e o desenvolvemento da provincia”.

Sofía García, voceira do Grupo Municipal do BNG do Carballiño, ven de rexistrar unha iniciativa no concello para impulsar de inmediato un Plan de Mobilidade Urbana Sostibel (PMUS), que inclúa entre outras cuestións e como mínimo as seguintes medidas urxentes: mellorar a mobilidade peatonal e a seguridade vial.

Resulta moi imporante a instalación de sistemas de iluminación ou sinalización específicos que resalten a presencia dos pasos de peóns e dos propios viandantes, declara a voceira nacionalista do Carballiño, así como mellorar a sinalización horizontal e vertical pondo especial interese na súa revisión e o seu bo estado. Sofía García analizaba que actualmente temos unha vila que está pensada para os vehículos, na que a dependencia do automóbil ocasiona un tráfico intensoen todas as rúas do Carballiño.

A isto hai que engadir, di García, que camiñar por algunhas rúas resulta imposible, pola combinación de beirarrúas estreitas nas que se sitúan farois, sinais e mobiliario urbano, así como diversas barreiras arquitectónicas que dificultan a mobilidade da veciñanza con unha mobilidade reducida, que mesmo en ocasións se ve obrigada a invadir a calzada poñendo en risco a súa seguridade. Tampouco debemos esquecer as sinalizacións mal conservadas, os problemas na ordenación do tráfico, ou iluminacións insuficientes que agravan aínda máis a problemática da mobilidade na vila.

Toda a veciñanza é nalgún momento un peón, os usuarios da vía pública máis vulnerables ao tráfico.Polo tanto, debe ser preocupación das institucións públicas municipais situar no centro da planificación ás persoas, priorizando a redución do transporte individual en beneficio dos sistemas colectivos e doutros modos non motorizados de transporte e desenvolvendo aqueles que sexan compatibles co crecemento económico, a cohesión social, a seguridade viaria e a defensa do ambiente, manifesta a concelleira nacionalista.

Todas estas medidas a implementar nun Plan de Mobilidade Urbana Sostible (PMUS) veñen a dar continuidade a varias iniciativas que o BNG xa levou ao pleno do Carballiño neste mandato para mellorar a seguridade vial e a mobilidade peatonal e solucionar un problema que cada día medra máis e ao que o goberno municipal non pon solución.

O conselleiro de Sanidade, Julio García Comesaña, destacou hoxe, na súa visita á reforma efectuada no centro de saúde de Beariz, o esforzo conxunto de Xunta e Concello para garantir a máxima accesibilidade no edificio. O investimento nesta obra, que supera os 120.000 euros, foi compartido pola Xunta e o Concello.

Tamén incidiu o responsable do Sergas que os fondos destinados nos orzamentos da Xunta deste ano para o capítulo de investimentos en atención primaria son, con 56 millóns de euros, “os máis altos dos últimos 16 anos”.

“Agora a veciñanza de Beariz ten un centro de saúde plenamente accesible, que é unha necesidade sempre, pero máis se cabe nun concello con moitos veciños maiores aos que temos que facilitar ao máximo o acceso á sanidade pública”, -remarcou Comesaña-.

Tal e como explicou o responsable do Sergas na visita, na que estivo acompañado polo delegado da Xunta, Gabriel Alén, polo alcalde do concello, Manuel Prado, e polo xerente da área, Félix Rubial, decidiuse aproveitar a planta semisoto e habilitala para que toda a área asistencial sanitaria se poida prestar nela. Así mesmo, creáronse aseos adaptados, aumentáronse os ocos das ventás e fíxose o cambio de portas e ventás e de toda a carpintería. Toda esta obra fíxose, -remarcou o conselleiro-, “sen interromper en ningún momento a prestación asistencial no centro”.

O conselleiro destacou a implicación do alcalde na reforma, o que posibilitou que, en decembro, “xa estiveran rematadas as obras tan necesarias para mellorar a accesibilidade do centro de saúde”.

Ademais, este centro de saúde tamén foi receptor, nos últimos anos, doutros investimentos para mellorar o seu equipamento, neste apartado, recibiu un electrocardiógrafo, un desfibrilador e un hólter de presión arterial.

O temporal rexistrado a principios de ano deixou danos e causou estragos en varios puntos do municipio do Carballiño, sendo o desprendemento de terra e o derrubamento dunha parte da rúa Alberto Vilanova, nas proximidades do Centro de Saúde carballiñés, o episodio máis grave dos rexistrados e o que ten causado o principal problema dos causados polas chuvias e as crecidas dos ríos e os cursos de auga que percorren o municipio.

O Concello acometeu os traballos de emerxencia para asegurar a zona e evitar problemas neste lugar, ao tempo que se foron desenvolvendo as tarefas de inspección e valoración dos danos sufridos, para elaborar o proxecto necesario para actuar neste punto e recuperar o trazado da rúa Alberto Vilanova, co obxectivo de restablecer o tráfico rodado neste punto e normalizar o paso de peóns que acoden diariamente ao Centro de Saúde.

Logo de analizar a situación xerada polos danos causados polo río Carrás, e de elaborar un proxecto de urxencia para actuar neste punto, o Concello do Carballiño acometerá a reparación da rúa Alberto Vilanova con fondos propios para dar unha solución aos problemas xerados polo temporal e restablecer o tráfico rodado e repoñer as infraestruturas afectadas. O proxecto foi redactado por José Ángel Rodríguez Rodríguez, enxeñeiro técnico de obras públicas e máster en enxeñeiro de camiños, canles e portos. O investimento para realizar o proxecto de reparación levará consigo o investimento de 127.270 euros.

Como se recolle no proxecto “Arranxos de emerxencia na obra de drenaxe transversal no río Carrás, no cruce con Alberto Vilanova” as abundantes chuvias rexistradas hai unhas semanas causaron danos graves na obra de drenaxe transversal existente sobre o río Carrás, coa conseguinte perigosidade para o tránsito pola zona. Entre os traballos de emerxencia incluíronse accións como a retirada de obstáculos na embocadura e augas arriba (troncos de árbore e outros materiais) que impedían o paso da auga e a limpeza do río augas abaixo (accións que se desenvolveron nos primeiros días deste ano). Tamén se procedeu a instalar, in situ, unha estrutura metálica para garantir o paso de peóns para facilitar o acceso ao Centro de Saúde e o IES nº 1 do Carballiño.
Con posterioridade rexistrouse o desprendemento dunha placa do firme, situada sobre a canalización de gas e a liña eléctrica, o que fixo necesario actuar para erradicar o grave risco que iso supuña. Para evitar futuros episodios de risco procedeuse a demoler unha boa parte do firme que quedara ao aire enriba da drenaxe transversal.

Unha vez finalizados estes traballos unha empresa especializada procedeu a comprobar o estado do interior da construción pola que discorre a canalización do río Carrás, empregando para iso un robot específico para este tipo de traballos. Tamén se fixo unha inspección visual para comprobar o estado da tubaxe.
Logo de acometer estes traballos o Concello do Carballiño procederá agora a executar o proxecto para reparar os danos neste lugar.

Entre as actuacións a desenvolver no lugar figuran accións como retirar os materiais danados, demoler o pavimento existente na zona de actuación, retirada das zonas afectadas polas augas, instalación de tubaxe para mellorar a capacidade de desaugue de drenaxe transversal, tratado con formigón dos parámetros afectados, creación de muros de cachotería, recheo da zona con material seleccionado, acondicionamento das instalacións afectadas, execución do novo firme de aglomerado na zona de obras e rehabilitación da tubaxe metálica existente, entre outras iniciativas.

As empresas e autónomos asociados a Carballiño CCA contarán cun servizo personalizado para axudarlles a reducir o gasto enerxético e implementar medidas de aforro e eficiencia.

Este servizo será levado a cabo pola empresa ARSEM Servizos Enerxéticos, cuxa delegada, María Aurora Cacheda, asinou un convenio de colaboración co presidente de Carballiño CCA, Julián Garriga.

A Consultora realizará un estudo inicial gratuíto, a aqueles asociados que o precisen, de optimización das facturas de electricidade e gas. Do mesmo xeito, cando un asociado teña próximo o vencemento dalgún contrato de subministración, recibirá asesoramento desde ARSEM para atopar as mellores opcións do mercado.

Pola súa banda, a asociación Carballiño CCA, comprométese a divulgar entre os seus asociados os servizos e solucións que ofrece a consultora ARSEM.