A vila de Cea celebra as festas da Saleta entre o venres 23 e o lúns 26, que será festivo local no municipio, o acontecemento que cada ano despide o calendario festivo estival na comarca carballiñesa.

Para amenizar estas festas estarán en Cea 7 orquestras, que son Unión y Fuerza (Dia 23) New York e Tentaciones (Dia 24) Fusión e Olimpus (Dia 25) e Pégate e Claxxón (Dia 26).  Ofrecerán pasarrúas e concertos as bandas de música Artística de Merza e Muimenta, e complétase o programa musical coa Charanga CLK e o grupo Feitizo de Pau.

O Carballiño ten esta fin de semana dous eventos musicais. O sábado dende as 20:30 horas o Festival Galaico-Portugués de Polifonía e Canto Coral, que terá lugar no Casino, e coa participación da propia Coral do Casino, e como agrupacións invitadas o Orfeao de Espinho-Portugal e a Coral Ecos do Miño de Lugo. O domingo, no auditorio e con entrada de balde, Alfonso Medela Trío presenta "Jazz Ad Líbitum", un concerto no que o artísta carballiñés estará acompañado de Luis Vivas á bateria e o cubano Óscar Rodriguez no Contrabaixo.

No campo da festa de Brués, o concello de Boborás programou para as seis da tarde do sábado o musical infantil "Pako Pakolas".

E na carteleira cinematográfica, o Cine Club Carballiño inicia tempada coa proxección da película española Alcarrás, o venres en pases ás 20:00 e 22:30 horas no auditorio. No Novocine de Leiro dúas películas para estes dias: "Tadeo Jons 3" ás 16:00 horas, e "Viaje al Paraiso" ás 18:15 e 20:30 horas.

O Casino do Carballiño acolle, con entrada de balde, dende as 20:30 horas deste sábado dia 24 de setembro a edición número 39 do Festival Galaico-Portugués de Polifonía e Canto Coral.

O concelleiro de cultura Diego Fernández, subliñou no acto de presentación deste festival que "trátase dun evento que nunca deixa de sorprendernos grazas ao bo facer da familia da Coral do Casino e tamén do seu director Jaime Pichel, un orgullo para O Carballiño poder contar cun home do seu talento e sempre implicado coa nosa vila".

Pilar Caballero, en nome da organización, que corresponde á Coral Polifónica Casino do Carballiño, destacou o nivel artístico das dúas corais invitadas "que nos achegaron a súa ilusión por estar no Carballiño e participar neste festival, témoslle preparada unha visita turística e gastronómica, na que non faltará o pulpo".

Ademáis dos anfitrións e organizadores, a Coral do Casino, participarán neste festival a agrupación portuguesa Orfeao de Espinho e a Coral Ecos do Miño, de Lugo.

A Deputación e cinco balnearios ourensáns lanzan a campaña “1.000 sesións balnearias a 1 euro”. “Con esta iniciativa innovadora e sen precedentes queremos promocionar a saúde a través da cultura termal”, explicou esta mañá Manuel Baltar no lanzamento da iniciativa en As Burgas, nun encontro mantido cos responsables dos establecementos participantes, todos os da provincia con piscinas de auga mineromedicinal de usos lúdico-terapéuticos: Laias, Cortegada, Lobios, Partovia e Arnoia.

“A promoción posibilitará o goce dos balnearios a prezos moi alcanzables coa intención de que moitos das persoas residentes na nosa provincia que aínda non coñecen os nosos balnearios poidan facelo”, resalta o presidente da Deputación, que encaixa esta presentación no Día da Cooperación Europea (EC Day), “unha forma de resaltar a riqueza termal da provincia e a localización da maioría dos nosos balnearios en territorios considerandos pola UE como transfronteirizos, así como para visibilizar a contribución dos programas de cooperación europea ao termalismo provincial”.

Entre Laias, Cortegada, Lobios, Partovia e Arnoia achegarán unha cifra inicial de 1.000 sesións balnearias que se distribuirán entre os meses de outubro e novembro, de luns a domingo, en diferentes franxas horarias e cunha duración entre 1,5 e 2 horas, en función do balneario.

A reserva das sesións balnearias poderá realizarse a partir do 29 de setembro a prezo especial único de 15 euros, importe sobre o que haberá códigos de desconto de 14 euros, quedando o prezo final en 1 euro. O acceso ás 1.000 prazas será por orde de solicitude e reserva, podendo tramitarse a través de internet.

Os códigos de desconto poñeranse ao dispor dos interesados de diferentes maneiras, a través de eventos ou redes sociais. Os códigos de desconto poderán utilizarse ata completar as prazas ofertadas na promoción, serán individuais e cada persoa poderá utilizar un código.

Toda a información sobre a promoción estará dispoñible en: raiatermalou.com/promocion

Ábrese o rexistro para a promoción, a entrega dos primeiros códigos desconto a próxima semana en Termatalia.

Para acceder á promoción “Sesións en Balnearios a 1 euro” será necesario unha inscrición previa a través de internet, que se poderá facer a partir de hoxe na dirección: www.raiatermalou.com/promocion

Os 250 primeiros códigos de desconto entregaranse o 29 de setembro en Termatalia. As persoas que visiten a caseta da Deputación de Ourense na Feira Internacional de Termalismo en Expourense e teñan interese na campaña de promoción recibirán o seu código de desconto ata esgotarse os códigos dispoñibles.

A Deputación de Ourense a través da área de Benestar habilita o teléfono 999317760 para responder a calquera consulta ou dúbida sobre a promoción termal.

Espazo Común comeza a súa exposición de motivos desta moción que trasladará ao pleno da corporación municipal suliñando como "O Carballiño é, históricamente, unha vila cunha gran tradición deportiva".

E continúa remarcando que "folga falar da importancia da educación e os valores que aporta a práctica de calquer deporte, sobre todo nos anos de formación dos nosos nenos e nenas e, polo tanto, do importante que resulta dar tódalas facilidades posibles para o seu desenvolvemento.
Sen embargo, coma en outros moitos ámbitos, O Carballiño leva anos quedando atrás con respectoa a outras vilas semellantes de Galicia pola falla de iniciativa e renovación das diferentes instalacións para a súa práctica".

Repróchanlle ao goberno do alcalde Fumega que "non semella que chegara ao goberno local a nova de que hai xa moitos anos que numerosos deportes aparte do fútbol contan con grande número de seguidores e de novos adeptos. Podemos destacar o inmenso número de veciños que exercen como atletas, patinadores ou ciclistas, só por nomear uns poucos".

Poñen desde Espazo Común coma exemplo do afirmado "o feito de que incluso un deporte con tanta tradición coma o baloncesto despareceu do Carballiño por falla de espazos para os seus equipos e agora a xente que desexa xogar ten que desprazarse a Maside".

Asimesmo, engaden que "temos que dende o ano 2009 no que se instalou o céspede artificial no campo de fútbol da Uceira cunha subvención da Xunta de Galicia na que estaba Pachi Vázquez, apenas se fixeron inversións de ningún tipo. Tampouco se adaptaron ás necesidades dos usuarios as poucas instalacións existentes. Por exemplo, contamos cun Pavillón que, a pesares de quedarse moi escaso para as necesidades existentes, pecha as fins de semana e gran parte do verán. A Piscina Municipal é un cúmulo de despropósitos que acumula gastos que superan con creces o millón de euros nos últimos anos e só provoca o disgusto e as queixas dos que a frecuentan. O antedito campo de fútbol da Uceira precisa con moita urxencia unha renovación pois son moitos os equipos (sobre todo da base) que fan uso del, sendo calamitoso o seu estado actual. Os usuarios habituais da pista de pádel queixanse das dificultades con que se atopan para facer uso da mesma. É unha anomalía que unha vila coma a nosa non conte cunha Piscina Climatizada Municipal. A adaptación das instalacións de Pena Cobertoira para a práctica do atletismo e do ciclismo ou a construción dun novo Pavillón deben ser proxectos esenciais no plan de futuro desta vila".

Espazo Común tamen considera que a posta en marcha de pequenas pistas deportivas nos distintios barrios do Carballiño é unha necesidade básica para fomentar o uso do deporte.

Tras esta exposición de motivos, a moción demanda da corporación un acordo para "a elaboración dun Plan Municipal de Renovación e Creación de Instalacións Deportivas que cubra tódalas necesidades actuais e futuras da poboación do Carballiño neste eido".

O PSdeG-PSOE de Punxín estuda a posibilidade de emprender accións xudiciais e pór en coñecemento da xustiza a actuación do alcalde do municipio, Manuel Vázquez Fernández, en materia urbanística. As e os socialistas denuncian que o “silencio” e a “inacción” do rexedor poderían estar incorrendo no incumprimento dos deberes esixidos pola normativa urbanística e o procedemento administrativo co único obxectivo de beneficiar a persoas afíns ao Partido Popular.

As concelleiras do Grupo Municipal Socialista de Punxín subliñan que esta decisión chega tras os “numerosos incumprimentos” do alcalde en materia urbanística e apuntan a que se “poden estar vulnerando os deberes esixidos pola normativa urbanística para beneficiar a persoas afíns as súas cores políticas”. Neste senso, as edís socialistas tamén explican que “parece que en Punxín hai veciños de primeira e de segunda e parecen que os de primeira teñen máis dereitos que o resto da veciñanza do municipio, só por pertencer a unhas cores políticas”.

A voceira do PSdeG-PSOE de Punxín, Lorena Peleteiro Vázquez, afirma que “fai pouco tempo, observamos como o propio alcalde incumpría a normativa urbanística cunha reforma nunha das súas propiedades, sen asumir responsabilidade algunha por elo”. A edil socialista tamén destaca que “agora tivemos constancia que afíns ao Partido Popular están seguindo o mesmo modus operandi do alcalde, aproveitando o seu silencio cómplice e o incumprimento dos seus deberes en materia urbanística, namentres este mira para outro lado para evitar tomar medidas ao respecto”.

Peleteiro Vázquez pon o foco en que esta forma de actuar “é impropia dun goberno democrático e vén a demostrar que coas eleccións municipais no horizonte, o alcalde trata de beneficiar os seus acólitos co único obxectivo de tratar de manterse na cadeira de mando e rascar uns votiños para apuntalar o seu poder”.

Dende o PSdeG-PSOE de Punxín explican que ante esta situación, os e as socialistas “non podemos seguir mirando cara outro lado, cando dende o equipo de goberno municipal se trata de forma diferente aos veciños e veciñas votantes e militantes do Partido Popular, que ao resto da veciñanza”. Tamén manifestan que “é inconcibible que o alcalde se salte a normativa e as obrigas do seu cargo para favorecer a certos veciños e veciñas en detrimento do resto”.