A 31ª edición do Festival do Teatro Galego "Celso Parada", que se celebrará do 23 ao 26 de setembro no Carballiño, contará na súa programación con dúas actividades coas que chegará a outras Comunidades de España e a países como Alemaña, Francia, Portugal e Brasil. Trátase dunha lectura dramatizada da recoñecida obra de Carvalho Calero "A Farsa das Zocas" coa colaboración de 50 voluntarios ao redor do mundo e dunha "Escola de Espectadores do Teatro Galego", orientada a afeccionados, interesados e espectadores do programa oficial do FETEGA.

A presentación deste evento cultural tivo luga no pazo provincial da Deputación, acto no que participou o vicepresidente da Deputación de Ourense, Rosendo Fernández; o alcalde do Carballiño, Francisco Fumega; o director de AGADIC, Jacobo Sutil; o director do Festival, Carlos Ledo; e a directora artística do Festival, Josi Lage.

A Deputación de Ourense colabora con este evento que é "un referente da acción teatral de Galicia desde O Carballiño e ofrecerá ao público a posibilidade de gozar dos mellores espectáculos do teatro, así como de outras actividades paralelas como obradoiros ou charlas", dixo Rosendo Fernández, quen salientou que esta 31ª edición é "máis internacional ca nunca". Pola súa parte, o alcalde do Carballiño afirmou que "a seguridade está garantida ao 100%" e agradeceu á organización do Festival que pensara na figura de Carvalho Calero "nun ano no que por desgracia non puidemos recoñecerlle todo o que aportou á cultura galega". Jacobo Sutil puxo en valor que as tres administracións (Xunta de Galicia, Deputación de Ourense e o Concello do Carballiño) "colaboremos neste evento porque é importante que se manteña a actividade cultural, aínda que se faga con restricións, xa que é a maneira de que subsista o sector cultural".

O director do FETEGA explicou que nesta edición quixeron "coidar da nosa familia porque ir ao teatro é seguro, e ampliar a familia de maneira xeográfica e mental, coa Escola de Espectadores que pretende achegar dun xeito informal o teatro á outra parte do binomio do teatro, o público; e coas lecturas dramatizadas da obra de Carvalho Calero coas que nos demos conta que había unha especial sensibilidade nunha institución cun alto nivel académico: as Universidades e os Centros de Estudos Galego no exterior". A lectura dramatizada da obra de Carvalho Calero, a quen estivo dedicado este ano o Día das Letras Galegas, chegará ao resto de España, Portugal, Alemaña e Brasil coa axuda de lectores e alumnos dos Centros de Estudos Galegos. Durante trinta minutos diarios, a farsa irase debullando nunha lectura dramatizada que dirixe desde Galicia Vanesa Sotelo. Será posible acceder á lectura mediante redes sociais e Youtube. Pola súa parte, a "Escola de Espectadores do Teatro Galego", que se desenvolverá entre o 23 e 25 de setembro ás 16.30 horas, estará dirixida por Pepe Domínguez. Ademais destas dúas actividades, a programación desta edición estrutúraseen catro xornadas nas que o público poderá gozar de obradoiros, mesas redondas, monólogos cómicos, teatro na rúa e as clásicas sesións de espectáculos.

Programación

A directora artística do FETEGA explicou a programación desta edición que no Auditorio Municipal comezará o mércores, 23 de setembro, co espectáculo "Clausura do Amor" da compañía Cámara Negra. Ao día seguinte será a quenda para a obra "Os nenos da varíola" da compañía Pérez & Fernández. O venres, 25 de setembro, chegará o espectáculo "O mel non caduca" de Ibuprofeno Teatro e, o último día, o 26 de setembro, será a quenda para a compañía AveLina Pérez co espectáculo "A que non podes dicir Coca-Cola?(II)". Tódolos espectáculos serán ás 20.30 horas.

Paralelamente, os días 23, 24 e 25 de setembro celebraranse na Casa da Cultura monólogos cómicos a cargo de Pedro Brandariz, Arantxa Treus e Diana Sieira, mentres que o sábado, 26 de setembro, desenvolverase unha performance co proxecto literarias. Todas estas actividades serán ás 18.30 horas. Asemade, tódolos días ás 11.00, 17.00 e 20.00 horas haberá teatro na rúa da man de Barafunda.

Ademais, o Festival do Teatro Galego concederá o premio de honra "Dorotea Bárcena" 2020 ao dramaturgo e director de escena Afonso Becerra Arrojo polo seu labor académico e de activismo teatral ao longo de 25 anos dunha carreira cunha ampla e brillante traxectoria no sector das artes escénicas. O galardón será entregado o 26 de setembro, durante a gala do Festival no Auditorio Municipal e, previamente, ás 18.00 horas, impartirá na Casa da Cultura a charla "De traxedias, dramas, comedias e públicos".

Un caso positvo en Covid-19 nun traballador municipal confirmado esta pasada fin de semana levou ao alcalde do Irixo a pechar as dependencias do consistorio nesta xornada de lúns 21 de Setembro, e coa finalidade de levar a cabo traballlos de desinfección na casa do concello.

A partir de mañá, retomaráse a atención ao público na oficinas municipais, aínda que de momento será con servizos mínimos, según confirma o alcalde Manuel Cerdeira.

A confirmación dun caso positivo en coronavirus nunha aula de 20 alumnos dun 5º curso de primaria no CEIP Calvo Sotelo, edificio da Uceira, motiva a activación do protocolo, as familias afectadas xa foron informadas na xornada deste domingo.

A partir deste lúns dia 21 de Setembro, non deberán asistir ao colexio os contactos directos da aula afectada por este caso positivo en Covid-19. Xa foron notificados a totalidade de usuarios que comparten o autobús do transporte escolar.

Cea non poderá gozar este ano das xa súas famosas verbenas nas festas da Saleta, canceladas pola pandemia, non obstante non poderá impedir que a veciñanza manteña a tradición nestas datas tan sinaladas no calendario festivo de San Cristovo de Cea.

Ademáis da novena que se veu desenvolvendo na capela da Saleta, e a maiores das celebracións solemnes tamén na propia capela que terán lugar tanto o domingo 20 como o lúns 21, estes dous dias a comisión de festas mantén o espírito festivo con dúas actuacións musicais.  O domingo, ao concluir a misa solemne, ofrecerá un concerto a Banda de Música "A Lira" de Ribadavia, se as condicións meteorolóxicas o permiten será ao aire libre no mesmo campo da Saleta, no caso contrario trasladaríase ao pavillón de deportes. Mentres, o lúns -que ademáis será dia festivo de carácter local no municipio de Cea- amenizará a xornada a chranga CLK.

Todas as actividades terán lugar coas correspondentes medidas de prevención e seguridade ante o coronavirus.

Gabriel Alén Castro é o novo delegado territorial da Xunta de Galicia na provincia de Ourense.

O presidente da Xunta anunciou, tras a reunión do consello do Executivo galego deste xoves 17 de Setembro, a substitución dos cinco delegados territoriais e, nesta provincia, Alén substituirá a Marisol Díaz Mouteira, que ostentaba o cargo desde 2015.

Gabriel Alén Castro naceu en Ourense en 1977, é profesor especialista en educación física, e foi alcalde do concello de Cenlle polo Partido Popular desde 2011 ata o pasado mes de marzo, cando deixou o cargo para formar parte da lista ourensá do PP ao Parlamento de Galicia.

Foi o único acto celebrado no Carballiño neste dia festivo sen festa, o recoñecemento institucional do concello carballiñés a quen foi o titular da parroquia de San Cibrán durante os últimos 28 anos, Xosé Benito Siero.

Ao acto asistíu o presidente do Parlamento de Galicia, Miguel Santalices, e representantes dos grupos municicipais de PSOE, Partido Popular e Espazo Común. O alcalde Francisco Fumega, que lle fixo entrega dunha placa e unha reproducción da Veracruz ao expárroco, salientou na súa alocución "a colaboración que sempre encontrei en Xosé Benito durante no dia a dia e para resolver calqueraa necesidade, como as axudas de alimentación a moitas persoas" destacando o seu compromiso social coa parroquia e o pobo do Carballiño.

Ninguén recorda no Carballiño un 17 de Setembro como o deste ano 2020, e nesta situación motivada pola pandemia, sen ningunha actividade festiva no dia no que se celebra a festividade do patrón do Carballiño, San Cibrao.

O concello do Carballiño renunciou a organizar actividade algunha nesta data que, non obstante, é dia festivo de carácter local no municipio. A única actividade anunciada dende o concello é o recoñecemento institucional que se fará ao sacerdote Xosé Benito Sieiro, recentemente xubilado tras exercer durante 30 anos como párrroco de San Cibrao do Carballiño, o alcalde Francisco Fumega farálle entrega dunha placa e unha reproducción en miniatura do Templo da Veracruz, este acto terá lugar no propio Templo da Veracruz coincidindo coa misa solemne de San Cibrao que comezará ás 11:30 da mañá.

Dende Espazo Común non disimulan a súa decepción, afirmando como "nos derradeiros anos, a perda de servizos no Concello do Carballiño está a ser certamente alarmante. E sin que semelle que ninguén faga moito por evitala". E poñen unhos cantos exemplos "comezando polo transporte público, continuando co Centro de Saúde e cun longo listado de elementos que foron desaparecendo paulatinamente do mapa local e que van provocando un retroceso nas condicións de vida dos cidadáns".

Agora -manifestan- tócalle a Correos, un servizo totalmente público e, polo tanto, xestionado polo goberno central de Madrid. Dende Espazo Comun recordan como "hai un par de meses, a oficina do Carballiño reduciu o seu horario eliminando os sábados coma día de apertura, precisamente o día que moitos usuarios aproveitaban para facer xestións in situ por non ter que traballar". Por todo elo, ESCO afirma que "a tomadura de pelo é constante. Hai pouco tempo, cando dende Espazo Común, protestábamos pola supresión da venda de billetes na Estación do Tren, díxos publicamente (alcalde incluído) que estes podían ser adquiridos na oficina de Correos" "O goberno de Fumega semella estar a outras cousas, aínda que ninguén sabe moi ben cales. É obvio ca que os seus compañeiros de partido da capital sigan mermando os servizos da veciñanza do Carballiño non debe ser unha das súas prioridades", manifestan.

E remantan anunciando que oGrupo Municipal de Espazo Comun levará esta cuestión a pleno se antes da súa celebración, a oficina de Correos do Carballiño non recupera o seu horario, porque "non podemos consentir máis aldraxes".