O alcalde de San Cristovo de Cea fixo este anuncio no transcurso da súa intervención en COPE O Carballiño, tres actuacións coa que se completará a urbanización e infraestructuras no polígono industrial de Fondo de Cea, que ocupa unha superficie de 360.000 metros cuadrados a carón da estrada nacional 525.

José Luis Valladares confirmou que o concello de San Cristovo de Cea ven de recibir esta semana a notificación dunha subveción concedida pola Consellería de Economia, Emprego e Industria por importe de 240.000 euros para completar a infraestructura viaria de toda a área industrial, e a construcción dun depósito de auga, como dispositivo contra incendios.  Doutra parte, a Deputación aporta 120.000 euros para a construcción de beirarrúas.

Ambas obras serán licitadas e adxudicadas polo propio concello "e rematar un proxecto no que temos depositadas grandes esperanzas nun momento económico tan crucial como o que imos vivir, ofrecendo ás empresas e emprendedores a oportunidade de implantarse neste polígono, e para elo contarán con todas as facilidades que poidamos darlle dende o concello de Cea", subliñou o alcalde Valladares.

A Concellería de Benestar Social, Igualdade, Sanidade, Educación e Normalización Lingüistica do concello do Carballiño, que dirixe a concelleira Guadalupe Sobrado, finanza un campamento de verán para un total de 80 participantes, impartido pola empresa Mais Escola XXI.

É un servizo de balde, dirixido a nenos empadronados no Concello de entre 4 a 12 anos no que se ofertan diferentes actividades que permitan aproveitar o tempo de lecer dunha forma educativa, divertida e saudable, respetando as actuais normativas de prevención necesarias fronte ao Covid-19, sendo obrigatorio o uso de mascarilla de todos as participantes. Habilitaranse dúas quendas; a primeira, dende o 20 de xullo ao 7 de agosto e unha segunda dende o 10 de agosto ata o 28 de agosto.

Os interesados deberán recoller a folla de inscrición nos Servizos Sociais e presentala no Rexistro Municipal ou na sede electrónica do Concello a partir do martes, 14 de xullo e con data límite do xoves, 16 de xullo. A asignación de plazas será por rigorosa orde de entrada en dito Rexistro. Para máis información, pódese chamar ao teléfono 988 531 076.

A empresa Paniagua, unha familia carballiñesa de artesanos licoreiros desde o ano 1878, acaba de culminar a renovación da súa planta de fabricación no polígono industrial do Carballiño. Son 3.400 metros cadrados nos que se elaboran medio centenar de produtos, entre augardentes, licores, cremas, viños, vermús e xenebra, e cuxa producción anual supera os dous millóns de litros, coa previsión de acadar os tres millóns o próximo ano. De feito, íanse acadar neste ano 2020, pero a crise provocada pola pandemia do covid 19 retrasou un ano este obxectivo.

A empresa Paniagua, que conta cunha plantilla de trinta traballadores e traballadoras, atópase nun momento de emprendemento de novas iniciativas, como unha colaboración con schwepps para introducir no mercado e promocionar dous combinados, un de vermú con tónica, e outro de xenebra con tónica; ou montar unha nova planta destiladora, para a que xa conta cun terreo anexo á súa planta no polígono industrial, de máis de 6.000 metros cadrados.

Os augardentes, licores, cremas, viños, vermús e xenebra de mazá, que elabora a empresa Paniagua e que comercializa con diversos nomes, atópanse entre a gama media-alta do mercado deste tipo de bebidas. Incluso moitos destes produtos enmárcanse na categoría “premium”. Tanto é así, que incluso o vermú blanco “Povarelo” foi considerado nunha cata realizada en Cataluña como un dos cinco mellores vermús españoles.

Oruxo de augardente, licor de herbas, licor de café, crema de licor, licor tostado, licor de wiski, limonciño, crema de arroz con leite, crema de tarta de améndoa e crema de chocolate branco son algunhas das referencias de licores que comercializa a empresa coa marca “Paniagua”. Os vermús levan a marca “Povarelo”

E en xenebra premium, comercializa unha denominada “The Tinkle Apple Gin”, que se elabora con enebro, mazá verde de A Estrada e auga de manantial do Paraño; e outra de corte clásido denominada “The Tinkle Dry Gin”.

Os produtos da empresa Paniagua comercialízanse por toda España, fundamentalmente, nas capitais, e na actualidade promoven iniciativas para poder introducirse en determinados mercados internacionais.

A empresa presentou hoxe as novas instalacións nun acto ao que asistiron o xerente da empresa, Rodrigo Paniagua; o responsable de desenvolvemento de produto da empresa, José Manuel Novoa; o alcade do Carballiño, Francisco Fumega; o concelleiro de Turismo, Industria e Emprego, Manuel Dacal, e o concelleiro de Cultura, Diego Fernández.

Manuel Dacal amosou o seu orgullo por contar no Carballiño cunha empresa familiar e centenaria con tanta proxección exterior, e con moitas ideas novas para incrementar a súa cota de mercado. Tamén valorou moi positivamente que dea traballo actualmente a unhas trinta persoas.
Rodrigo Paniagua destacou a traxectoria histórica da empresa, que cumpre o 133 aniversario como empresa familiar dedicada á elaboración de licores artesanais, e que actualmente ten unha producción de máis de 2 millóns de litros e pronto acadará os 3 millóns de litros. E amosou o seu orgullo por continuar esta tradición familiar.

José Manuel Novoa comentou os cambios suscitados na empresa desde fai catro anos coa elaboración de produtos con valor engadido. Así, pasouse de fabricar licor café e augardentes, a ofrecer unha ampla gama de cremas, licores, vermú e xenebra, así como viños das denominacións de orixe Ribeiro, Albariño e Ribeira Sacra.

Está previsto organizar en próximas datas, xunto coa hostalería do Carballiño, unha ruta vermú, dun xeito semellante a como se realiza coa ruta das tapas.

O Partido Popular compara ao concello do Carballiño co resto do seu entorno na comarca e da comparación non sae ben parado o concello carballiñés xa que "mentres concellos do entorno do Carballiño, de moita menos poboacion, xa contan con campamentos de verán para os máis cativos,resulta que O Carballiño non foi quen de organizar este tipo de alternativas de conciliación para as familias con cativos".

Manifestan que "unha vez máis o concello do Carballiño está quedando en evidencia, porque non son capaces de organizar servizos necesarios, non sndo aqueles que teñen externalizados" e poñen como exemplo a apertura en tempo e forma da piscina municipal "en funcionamento grazas a súa xestión por parte dunha empresa privada".

Outro motivo de crítica ao goberno municipal socialista dende o Partido Popular, é a tardanza na apertura dos parques infantís do municipio "cando a inmensa maioría dos concellos xa os teñen abertos con protocolos preventivos da Covid-19, no Carballiño siguen pechados". Finalmente, dende o grupo municipal popular esixen ao goberno socialista no concello do Carballiño "que se poña a traballar no que importa ás persoas e atendan o que é un reclamo das familias carballiñesas con cativos".

A Festa do Pulpo do 2020 non se celebrará como tal, senón que se cambia por unas xornadas gastronómicas na vila entre o 3 e o 9 de agosto, nas que o protagonismo seguirá recaendo no pulpo ao estilo feira, que se poderá degustar nos bares, mesóns e restaurantes do casco urbano, que ofrecerán un menú típico da Festa do Pulpo, como é a carne ao caldeiro e empanada, ademais doutras posibles ofertas culinarias da hostalería local.

De feito, durante esa semana, o concello autorizará a instalación de postos de pulpo nas rúas e prazas da vila, dun modo semellante a como se fai os días de feira, e incluso se permitirá algún emprazamento máis, co obxectivo de facilitar que as persoas que desexen degustar o pulpo no Carballiño o podan facer calquera día desa semana, evitando posibles aglomeracións.
Coa finalidade de garantir a separación de seguridade, así como o cumprimento da normativa sanitaria polo covid 19, recoméndase reservar mesa nos establecementos hostaleiros da vila para calquera día da semana, sobre todo o venres, 7 de agosto, o sábado, 8 de agosto, e o domingo, 9 de agosto.

Precisamente, estes dous últimos días son os que haberá un maior número de pulpeiros e pulpeiras cocendo na rúa e prazas da vila, tal e como o manifetaron durante a reunión que mantiveron este pasado luns cos concelleiros de Turismo e Cultura, Manuel Dacal e Diego Fernández, respectivamente.

Onte á tarde tívose outra reunión co sector hostaleiro para falar do menú que se ofertará durante eses días, así como para garantir o cumprimento da normativa en materia de separación e prevención, e promover as reservas de mesas.
Durante esa semana tamén haberá actos culturais de pequeno formato, tanto infantís como para dultos, con aforo limitado a 150 persoas, que terán lugar na Praza Maior, no entorno da Veracruz e na explanada do Parque Municipal, con cadeiras desinfectadas e nos que se cumprirán estrictamente as medidas de separación e prevención sanitaria establecidas para este tipo de actos, como levar mascarilla e lavar as mans cunha solución hidroalcólica á entrada. Pese a celebrarse ao aire libre, estes recintos estarán acotados por vallas.

Cine, teatro e música, con preponderancia dos grupos locais, permitirán manter viva a actividade cultural no Carballiño, pero evitando calquera tipo de aglomeración.

Neste sentido, compre destacar que non se permitirá o consumo de bebidas fóra das terrazas ou do interior dos locais hostaleiros, e gardando sempre as medidas de separación e prevención establecidas, quedando totalmente prohibido a instalación de barras no exterior dos locais ou de columnas de sonido, como se solía facer na víspera da Festa do Pulpo.
A Policía Local velará polo cumprimento desta prohibición, así como de que se organicen “botellóns” pola mocidade, que non se permitirán en ningún caso.

Ao non celebrarse a Festa do Pulpo do 2020 como tal, tampouco terá lugar ningún dos actos programados nos anos anteriores, como son a elaboración da tapa xigante de pulpo, nin a Festa das Camisetas, entre outros.

Con estas medidas, o concello pretende apoiar á hostalería e ao comercio local, así como ao sector do pulpo, durante a primeira semana de agosto, pero garantindo en todo momento o cumprimento estricto das medidas de separación e prevención establecidas.

O complexo turístico do Corgo (Muíños) acollerá este verán, novamente, os campamentos "Explora Ourense" e "Natur-Camp", que ofrecerán actividades deportivas, culturais, musicais e de natureza aos ourensáns de entre 9 e 17 anos, "nun dos lugares máis emblemáticos da nosa provincia, perfectamente disposto para desenvolver estes eventos con éxito acreditado en todas as anteriores edicións, e con total satisfacción dos usuarios e das persoas que os atenderon", destacou o presidente da Deputación de Ourense, Manuel Baltar, na presentación, que tivo lugar hoxe na sala de prensa do Pazo Provincial, onde estivo acompañado polo alcalde de Muíños, Plácido Álvarez; o representante de Sustinea, Paulo Vázquez; e o representante de La Casa de la Música, Fernando Calvo.

Baltar destacou a idoneidade do lugar onde se desenvolven os campamentos, "que mestura auga, sendeirismo e natureza, co interese arquitectónico e patrimonial, sendo un auténtico regalo para os sentidos e para que a xente nova, co asesoramento dos monitores, descubra e sinta ese orgullo ourensán".

O presidente do goberno provincial dixo que Sustinea e La Casa de la Música son "colaboradores esenciais" para poñer en marcha dous campamentos de verán que son "benvidos logo desta etapa tan difícil" e agradeceu a todos o seu labor para desenvolver estas actividades, que "continuaremos a organizar porque son algo innovador no medio rural, pero tamén a mellor postal dese Ourense que defendemos, un Ourense de auga, natureza e de inmensas posibilidades do noso medio natural".

Pola súa parte, Plácido Álvarez agradeceu á Deputación de Ourense a súa colaboración e invitou á mocidade ourensá a gozar do municipio de Muíños e da comarca da Baixa Limia afirmando que ambos son "destino seguro".

O tradicional campamento "Explora Ourense", que leva seis anos celebrándose, volve ao calendario estival da nosa provincia para que 50 rapaces de entre 9 e 14 anos, en diferentes quendas, poidan coñecer a riqueza natural e cultural da nosa provincia. Desenvolverase do 1 ao 6 de agosto para 25 rapaces de 12 a 14 anos; e do 7 ao 12 de agosto, para 25 rapaces de entre 9 e 11 anos. Os interesados en participar poderán inscribirse desde mañá, 7 de xullo ata o 16 de xullo, e deberán formular a inscrición no Rexistros da Deputación ou dos concellos da provincia. A cota de inscrición para participar no campamento é de 88 euros.

Paulo Vázquez insistiu na importancia, este ano, de "habilitar un espazo para que os nenos e nenas poidan gozar e estar con plena seguridade e garantías de saúde e hixiene, nun espazo natural e libre no que poidan correr, xogar e esquecerse desta enfermidade". O campamento baséase novamente nas actividades ao aire libre como o sendeirismo, o kayak, e os xogos medioambientais.

O representante de Sustinea explicou que o campamento se reforzou, dada a situación actual, en tres áreas, primeiro que as instalacións do Corgo compren tódalas garantías que marca a pertinente lexislación sanitaria, as actividades serán ao aire libre e en pequenos grupos, establecerán un protocolo de detección e as medidas de hixiene e desinfección en tódolos materiais que empreguemos e nas propias instalacións. Paulo Vázquez animou a tódolos pais e nais a que inscriban aos seus fillos porque "van a gozar e van a facelo con seguridade e con equipos de monitores perfectamente formados".

Máis información: www. exploraourense.com.

"Natur-Camp"

A segunda actividade presentada hoxe foi "Natur-Camp", un campamento que ofrecerá á mocidade de 12 a 17 anos, un variado programa de actividades culturais e deportivas. "Natur-Camp", que se celebra por segundo ano, desenvolverase do 25 ao 31 de xullo, en Muíños, para que a mocidade de 12 a 17 anos, ata cubrir as 40 prazas ofertas, poidan realizar as actividades que se planificaron ao redor de dous pilares: no apartado musical con propostas de iniciación ao canto, á guitarra, ao baile moderno, para o que non é necesario ter coñecementos previos, e tamén haberá actividades propias dos campamentos de verán como sendeirismo, actividades náuticas, escola de patinaxe, explicou Fernando Calvo, quen dixo que "será moi divertido e que os rapaces, logo de pasar esta época, están necesitados de relacionarse nun ambiente de natureza, sen esquecer nunca as medidas de protección e seguridade".

Os interesados en participar poderán inscribirse desde mañá ata o 15 de xullo e poden recollerse os impresos no Rexistro da Deputación ou ben a través da páxina web de La Casa de la Música, e deberán presentalo nas oficinas de Rexistro da Deputación. A cota de inscrición é de 88 euros. En ambos campamentos, se hai máis solicitudes que prazas, procederase a realizar un sorteo.

Máis información: www.casadelamusica.es.

Un grupo de xóvenes empresarios do Carballiño están promovendo a creación dunha nova asociación empresarial que pretende non so abarcar o municipio carballiñés senón ao resto dos concellos da Comarca.

Entenden que existe unha necesidade de autónomos e empresarios de todos os sectores que está sen atender "unha asociación empresarial representiva de todos os sectores", manifestaron os seus promotores.

Facilitan tres teléfonos de contacto: Sara (627052663) Antonio (647507348) e Óscar (674131706)

O proceso de creación da nova asociación está aínda en periodo embrionario aínda que "xa estamos dando os primeiros pasos e xa mantivemos algunhos contactos con colectivos xa constituídos, como a asociación de empresarios do polígono, non se trata de rivalizar con ninguén, senón de xuntarnos para ser máis fortes", subliñan.

Este venres dia 10 de Xullo convoacan dúas reunións informativas no Aparthotel Arenteiro, a primeira ás 17:30 horas, e a segunda ás 21:30 horas, nas que se vai expoñer este novo proxecto.