O Concello de Beariz, en colaboración coa Cruz Vermella, organiza unha charla informativa sobre acollemento familiar de menores. O acollemento familiar unha medida de protección para menores que, por determinados motivos, non poden continuar convivindo cos seus proxenitores.

É un programa da Xunta de Galicia que ten como obxectivo proporcionar unha atención temporal a aqueles nenos, nenas e adolescentes en situación de risco, desamparo ou desprotección social, tutelados ou en garda pola Xunta de Galicia, nun ambiente familiar normalizado, alleo á súa familia de orixe, por non existir esta ou non ser idónea para o seu coidado.

Trátase de que estes menores poidan vivir da mellor forma posible a súa infancia, sendo esta unha etapa fundamental na vida.

Deste xeito, colaborar facéndose familia acolledora supón ofecer un fogar a nenos, nenas e adolescentes e proporcionarlles coidados, seguridade, educación e o agarimo que necesitan mentres se solucionan as circunstancias que lles impiden vivir coa súa familia.

A charla terá lugar o vindeiro luns, día 17 de febreiro, ás 16:30 no Salón de actos ubicado na planta baixa do Concello de Beariz e poderán acudir todos aqueles que o desexen. Para máis información poden contactar co Departamento de Servizos Sociais do Concello no teléfono 988.28.40.00.

Os populares corrixen o erro do anuncio que facía o concello do Carballiño este pasado mércores, que avanzaba un programa de actividades "para conmemorar o 85 aniversario da morte de Antonio Palacios, o autor do proxecto arquitectónico da Veracruz".

O Partido Popular recorda que Palacios finou en 1945, coas obras da Veracruz xa comezadas, e polo tanto neste 2020 cúmplese o 75 cabodano da súa morte.

"O grupo de goberno dos socialsitas do Carballiño non ten término medio. Ou vai a remolque e improvisa a diario, ou de repente se volven previsores e organizan uns actos conmmorativos par dentro de 10 anos", ironizan os populares.

Aclaran, ademáis, que xa lle comunicaron este erro ao grupo de goberno "co fin de evitar que o concello faga o ridículo e tamén para evitar un despilfarro encargando promoción, publicidade, cartelería e placas erróneas".

Finalmente, o grupo popular manifesta que lle parece estupendo conmmorar o aniversario do arquitecto da Veracruz, "aínda que unha vez máis quede de manifesto a constante neglixencia do grupo de goberno do PSOE".

A alta ocupación das instalacións deportivas municipais ubicadas en Veiga motivou que o concello encargase un proxecto de acondicionamento do pavillón deportivo do colexio público da Uceira, co obxectivo de melloralo para a práctica deportiva do alumnado do centro educativo, así como para complementar as instalacións deportivas municipais cubertas e poder dar servizo ao elevado número de equipos, escolas deportivas e competicións que hai na vila ao longo do ano.

Debido a estas necesidades, que desde a área municipal de Deportes que dirixe Silvia Baranda, considéranse imperiosas, e ante o elevado custo que suporía construir un novo pavillón, considérase que esta é a mellor opción para ampliar as instalacións municipais.

O anteproxecto está xa redactado, e remitirase de inmediato á Secretaría Xeral para o Deporte, coa finalidade de poder obter a financiación necesaria para levalo a cabo.

O acondicionamento contempla a construcción de vestiarios anexos ao pavillón, o peche dos parámetros exteriores e dotar a pista deportiva de parqué. Así mesmo, prevé a construcción de graderío e dun acceso cuberto entre o pavillón e o colexio.
O orzamento é de 352.000 euros, e no anteproxecto prevese un prazo de execución de catro meses.

ACTIVIDADE DEPORTIVA INTENSIVA

O Pavillón Municipal de Deportes “Paco Chao” concentra unha gran actividade deportiva a cotío. Nesta instalación teñen lugar os adestramentos e competicións do Club Carballiño de Fútbol Sala en todas as categorías; son, en total, 14 equipos con 180 deportistas. Asemade, adestran e compiten os equipos de Veteranos de Fútbol Sala, con 160 deportistas inscritos. Tamén adestran e compiten as categorías inferiores da modalidade de balonmán que practican 50 rapaces. Polas mañás, solen usar as instalacións os centros educativos da vila con motivo das Xornadas de Deporte Escolar, dentro do Programa Xogade. Incluso, por falla de horario para usar as pistas, non o poden facer as deportistas da Escola Municipal de Ximnasia Rítmica, que conta con 60 ximnastas.

Nas fins de semana intensifícase a intensidade no uso do pavillón. Así, prácticamente de 10 da mañá a 10 da noite, estas instalacións atéiganse de competicións de fútbol sala, en todas as categorías, e de balonmán, ademáis doutro tipo de competicións e exhibicións máis esporádicas.

Precisamente, debido ao elevado número de usuarios, o Pavillón Municipal de Deportes conta con dúas pistas: unha central e unha anexa, que actualmente son insuficientes para cubrir as necesidades da práctica deportiva no Carballiño.

Aconteceu esta pasada madrugada de mercores, os ladrós volveron conseguir entrar no interior do Restaurante-Pulpería Fuchela, e son xa oito veces dende a súa apertura en 2011.

Desta vez, accederon ao local tras romper cunha maza a cristalera da fachada, na Avenida 25 de Xullo do Carballiño, os ladróns tiñan como obxetivo apoderarse do diñeiro da máquina "tragaperras".

Dase a circustancia que este local, referencia na hostelería carballiñesa, permanece pechado por vacacións dende principios desta semana.

En outubro deste ano 2020 cumprirase o 85 aniversario da morte de Antonio Palacios, autor do proxecto arquitectónico do templo da Veracruz, e con tal motivo o concello desenvolverá unha serie de actividades sobre este monumento e emblema do Carballiño, que culminarán coa colocación dun busto do arquitecto porriñés no entorno do templo.

Entre as actividades a desenvolver, figuran diversos concertos, conferencias, a edición dun folleto divulgativo, visitas guiadas, a convocatoria dun concurso fotográfico, a mellora da iluminación exterior do templo e a colocación dun busto de Antonio Palacios.

De feito, o concello enmarca como preámbulo desta programación o concerto da Escolanía de Segovia, que se celebrará na apertura do Festival Internacional de Música “Pórtico do Paraíso”, o día 6 de marzo ás 20,30 h. A este concerto lle seguirán outros que protagonizarán as corais do Carballiño en datas posteriores.

Así mesmo, terán lugar unha serie de conferencias sobre o templo da Veracruz e Antonio Palacios, editarase un folleto divulgativo e programaranse unha serie de visitas guiadas. Tamén está previsto establecer un sistema de información a través dun código QR con audiosignoguía, cuxo obxectivo é facilitar a accesibilidad á información relativa ao templo ás persoas xordas ou con outro tipo de discapacidade. Ademais convocarase un concurso fotográfico sobre os distintos aspectos arquitectónicos do templo.

Con respecto á mellora do sistema de iluminación exterior, o concello estudia neste momento diversas posibilidades de financiamento para acometer este proxecto, que está xa en estudio, e que se levará a cabo neste mesmo ano. Finalmente, como colofón do programa, está previsto encargar a un obradoiro de escultura un busto do arquitecto Antonio Palacios, que será ubicado nun lugar do entorno exterior do templo no mes de outubro, coincidindo co 85 aniversario da súa morte.

O párroco promotor da construcción do templo, don Evaristo Vaamonde da Cortiña, conta cunha escultura de bronce no exterior e un busto no interior dende hai tempo, pero non existe ningún monumento que lembre ao arquitecto que o deseñou, polo que se considera que é unha iniciativa que ven a saldar unha débeda que ten O Carballiño con Antonio Palacios.

Para ultimar este programa, o concello contará coa colaboración das entidades culturais carballiñesas, así como da parroquia, co obxectivo de dar o maior realce posible aos actos que se programen.

O grupo municipal de Espazo Común ven de dar a coiñecer unha moción que presentará no próximo pleno da corporación munmcipal na que propón a creación dunha comisión de traballo para "o relanzamento das feiras do Carballiño"

Na parte expositiva desta moción, ESCO subliña como "o mercadiño quedou espallado por varias rúas co que perde forza e interese. A realidade é que hai moita xente que vive no Carballiño que nin se percata dos días que son feira pois, fóra desas rúas e dos cambios no tráfico, pasa case desapercibida".

Engade que son varios factores que evidencian que o modelo de feira que a maioría de nós temos na memoria, xa non existe nin vai voltar a existir.

"Iso non quere dicir que teñamos que renunciar a unha das nosas máis senlleiras sinais de identidade, máis ben o que esixe esta situación é que dende este Concello se busquen á maior urxencia accións e iniciativas que a revitalicen e a adapten aos novos tempos",propoñen dende Espazo Común.

E para elo, consideran,"compren medidas que posibiliten que a feira sexa de novo un referente conxugando tradición e novos costumes, compre recuperala coma o que sempre foi, un importantísimo balón de osixeno para a economía local".

Finalmente, dende Espazo Común piden nesta moción " creación vinculada á Mesa de Comercio Local dunha comisión na que participen asociacións de comerciantes, de empresarios, de pulpeiros, hostaleiros, culturais, veciñais, xuvenís e de calquer outra índole que poida ter interese en darlle un novo pulo á feira do Carballiño".

E tamén unha dotación orzamentaria singularizada nos orzamentos do 2020 para as accións que se poidan levar a cabo.

As festas do Entroido e da Cachucha deste ano contarán con moita animación musical de rúa. Tres orquestras (Gran Parada, La OcaBand e D´Moda), e seis charangas (Castro Bello, Doctor Anchoa, Ardores, CLK, Noroeste e Asociación Cultural Cobre), así como a batukada Percucar e o grupo folk tradicional Feitizo de Pau, farán o aporte musical nas verbenas e pasarrúas destas festas, que se desenvolverán entre o 18 de febreiro e o 1 de marzo, coa celebración da XXVI Festa da Cachucha.

O programa inclúe tres concursos de disfraces, peñas e comparsas (Sábado, 22, Festa-Concurso Infantil de Disfraces; luns, 24, Gran Concurso de Peñas “A Rutas dos Mil”; martes, 25, Gran Concurso de Comparsas do Martes de Entroido) e tres desfiles de comparsas (Martes de Entroido e dous o Domingo de Piñata), ademáis dun concerto do Conservatorio e da Escola de Música, unha exhibición da Escola de Danza, un obradoiro de máscaras, Contacontos musical de entroido, unha festa vaqueira, e a murga Os Liborianos, que interpretarán as súas coplas o domingo de entroido na Praza Maior.

Tampouco faltará a escenificación do enterro da sardiña o mércores a cargo de Aspadisi. A XXVI Festa da Cachucha terá unha das maiores participacións de restaurantes da súa historia, con 26 establecementos e outros 4 que xa teñen as reservas pechadas, e contará nos dous desfiles da mañá e da tarde, ademáis das comparsas gañadoras do Concurso do Martes de Entroido e outras comparsas convidadas, coa participación dos grupos tradicionais do entroido oriental ourensán, Arrieiros de Petín, Folión de Fradelo e o Folión de Tameirón.

O programa destes eventos foi presentado hoxe polos concelleiros de Cultura e Turismo, Diego Fernández e Manuel Dacal, respectivamente. Diego Fernández dixo que nestes últimos anos o entroido, e sobre to a Festa da Cachucha, adquirirán un auxe extraordinario, e que o programa deseñado vai dirixido a todo tipo de público, con moita animación de rúa. Agradeceu a implicación do sector hostaleiro, sobre todo na Ruta dos Mil do luns, que repartirá 1.500 euros en premios.

Manuel Dacal asegurou que a XXVI Festa da Cachucha ía a ser a de maior participación de locais hostaleiros da historia, con 30 locais participantes, e que xa había catro que tiñan pechadas as reservas do seu espazo, o que amosa a forte implicación da hostalería nesta celebración gastronómica.

Tamén dixo que desde o concello estase ultimando a tramitación da documentación necesaria para que esta festa sexa declarada de Interese Turístico de Galicia, e agradeceu a todos os departamentos municipais, así como á Policía Local, Garda Civil, Protección Civil e Grupo de Emerxencias a súa colaboración con estes eventos.