O último episodio de avaría dun tren que afectaba aos pasaxeiros na estación do Carballiño foi o rexistrado no primeiro tren da mañá deste pasado martes dia 4 de Febreiro, cando o tren non quixo arrincar e os 40 pasaxeiros que agardaban para viaxar a Ourense tiveron que facélo en autocar, co evidente retraso que esta circustancia provocou.

O máis curioso é que o representante enviado por Renfe para reunírse esta mañá cos portavoces dos grupos políticos municipais no concello do Carballiño confesou que non tiña  coñecemento desta avaría, despois de comentar que "nos últimos dous meses non tiñan incidencias rexistradas nos trens".

Nesta reunión informativa, que se celebrou a instancias do concello carballiñés, o portavoz da empresa ferroviaria comunicou aos portavoces municipais que según a concesión adminstrativa en vigor, os actuais servizos que ten a estación do Carballiño -tres trens diarios con Ourense e un con Santiago de Compostela- están garantidos nos próximos dez anos.

En canto a modificación de horarios, tal como se demanda dende a Plataforma pola Mobilidade, non descartou posibles cámbeos para coordenar horarios e facilitar o enlace na estación de Ourense a outros trens de medio e longo percorrido.

En canto á demanda de que se restableza o servizo de información e venda presencial de billetes, o representante da empresa ferroviaria informou que xa é un feito a instalación dunha máquina de auto-venda na estación carballiñesa, onde se ubicou un dos tres novos dispositivos instalados en Galicia. Polo que respecta a reapertura da taquilla asegurou que xa está en marcha un procedemento de licitación para o concesión deste servizo de atención, que será de sete horas diarias de lúns a venres.

O Concello do Carballiño emitíu un comunicado no mostra as súas condolencias polo pasamento de José Luis Cuerda "gran cineasta e amigo do Carballiño"

Desde o Concello do Carballiño manifestan "o máis fondo pesar ás súas fillas Elena e Irene, demais familia e amigos. E deixar testemuña da súa fonda pegada na nosa vila e comarca, e nos nosos corazóns".

José Luis Cureda chegou a estas terras no ano 2000 para rodar a curtametraxe "Primer amor", e dende entón visitou O Carballiño e comarca unha infinidade de veces, onde pasou moitas tempadas nos últimos vinte anos, tras comprar unha casa en Paradela de Moldes, no concello de Boborás, e despois, no ano 2002, un caserón do século XV en Cubilledo-Gomariz, preto de Leiro, onde creou a adega do seu viño San Clodio, e onde estableceu a dirección de Produccións A Modiño S.L.

"O seu recordo como gran cineasta e intelectual, e sobre todo como persoa comprometida coa cultura e co Carballiño, onde deixa moi boas amizades, permanecerá sempre con nós", recolle o texto de pésame difundido polo concello do Carballiño.

O conselleiro de Medio Rural, José González, fixo público durante unha intervención en COPE O Carballiño o seu compromiso para apoiar as dúas peticións que foron acordadas no último pleno da corporación municipal carballliñesa.

Concretamente, en relación a proposta que partíu do grupo popular no concello, González recoñeceu que dende fai xa algún tempo mantén conversas "coa xente da Indicación Xeográfica Protexida Pan de Cea e para promover un proxecto de cultivo de cereal autónono, o trigo tremesino, que é o que máis se adecua para a elaboración dese pan e a min gustaríame que fose na concentración parcelaria de Santa Uxía de Lobás, que ademáis está bastante abandoada".

Doutra parte, e noutro momento da súa interveción radiofónica en COPE O Carballiño, o titular da Consellería do Medio Rural tamén se referíu a outra petición do concello carballiñés, acordada neste caso a instancias do alcalde Fumega, a declaración de Cabanelas como aldea modelo.

O Conselleiro afirmou que "nada me gustaría máis que facer de Cabanelas aldea modelo" destacando o feito de que estas peticións fosen acordadas por unanimidade de todos os grupos políticos da corporación municipal do Carballiño "temos os cartos, temos a vontade de facélo e demostrar que este modelo funciona e alí onde hai abandono, e antes houbo riqueza, podemos recuperar esa terra abandoada con producións de moito valor engadido", subliñou.

José González mostrouse entusiasmado con este proxecto de aldea modelo para Cabanelas "un proxecto para sería para recuperar o viñedo en socalcos unha zona espectacular dende Cabanelas de Arriba a Cabanelas de Abaixo, nunha das ladeiras máis impresionantes do Ribeiro do Avia", ademáis o conselleiro resaltou a gran riqueza arquitectónica, natural e paisaxística de Cabanelas, que a converten en candidata ideal para aldea modelo.

Os dezaseis locais hostaleiros inscritos na Ruta das Tapas ofrecerán este venres, 7, e o seguinte, 14 de febreiro, tapas baseadas na gastronomía propia do entroido, que se servirán ao prezo de 2 euros. Así mesmo, sortearase entre os clientes que participen nesta nova xornada unha estancia de fin de semana para dúas persoas no hotel spa Oca Augas Santas de Ferreira de Pantón.

O evento foi presentado este mediodía no Bar Soldado coa presencia do concelleiro de Turismo, Manuel Dacal; a relacións públicas de Pazo Tizón, Raquel Cabo, e representantes dos locais hostaleiros.

Ao término da presentación realizouse o sorteo correspondente á ruta das tapas do mes de xaneiro, consistente nunha fin de semana para dúas persoas nun hotel spa de Sanxenxo, e cuxa afortunada foi Cristina Vázquez.

Manuel Dacal diulle a noraboa por teléfono en nome dos hostaleiros, de Pazo Tizón e do Centro Comercial Aberto. Tamén agradeceu a colaboración e a creatividade da hostalería carballiñesa, que se supera en cada xornada e contribúe a que a ruta das tapas teña o éxito que ten. Recordou que na APP quedamosdetapas.com pódense ver as diferentes propostas culinarias destas novas xornadas das tapas, baseadas na gastronomía propia do entroido.

Raquel Cabo amosou a súa satisfacción por colaborar con esta iniciativa e agradeceu a confianza do sector hostaleiro nos viños da adega Pazo Tizón.

En nome do sector hostaleiro, a xerente do Bar Soldado animou á veciñanza a participar nestas novas xornadas das tapas e a disfrutar das diferentes propostas de cada establecemento.

Filloas recheas de xamón e queixo San Simón da costa, tostas de lacón e queixo de Arzúa, flan de filloa, filloa rechea de grelos con langostinos, burritos de cachucha prensada e salsa picante, arepas recheas de lacón cocido e outras tapas saladas e douces completan a ampla gama de posibilidades de degustar os productos típicos desta época do ano.

A fibra óptica chegará nos próximos meses a todas as localidades do municipio, según aseguran dende o goberno do concello.

O alcalde de San Amaro, Rubén Gómez, informa que “esta semana comezarán a instalación no núcleo de San Amaro e posteriormente extenderase a tódalas parroquias do municipio”, e sinala que “dende o Concello estamos a traballar para facilitar a labor”.

Asimesmo, Gómez sinalaba que “estamos a traballar paralelamente para mellorar a cobertura móbil no concello, xa que se trata dunha demanda histórica dos veciños e veciñas de San Amaro e moi necesaria, que precisamos poñerlle solución o antes posible”.

Dende o Grupo de Goberno son conscientes de que o acceso ás tecnoloxías da comunicación son un punto moi débil no Concello, “algo no que estamos a traballar para mellorar, xa que nos tempos nos que estamos é imprescindible solucionar”, finaliza Gómez.

O Carballiño faise maior, ou acaso moi maior, de feito nunca antes tivemos unha poboación tan envellecida se temos en conta os últimos datos do INE correspondentes a 2019, que sitúan a poboación do municipio do Carballiño en 14.027 persoas.

Se observamos os datos ao detalle vemos que os carballiñeses menores de 10 anos son 996, mentres que 1.561 carballiñeses superan os 80 anos de idade, e dentro deles 872 son maiores de 85 anos. Pola contra, o quinquenio con menos carballñeses é o de menores de 5 anos, son 471. 

A inmigración non logra frenar esta pirámidde invertida na poboación do municipio, tampouco cadran as contas da esperanza de vida para explicar o envellecemento carballiñés.

De feito a diferencia entre nacementos e falementos, o chamado crecemento natural ou vexetativo, presenta o pior dato dende que existen rexistros, e certifica que no último ano faleceron no municipio do Carballiño 111 persoas máis das que naceron.

Se analizamos a idade da poboación por quinquenios, vemos que os sete quinquenios con menos poboación son aqueles que van dende os cero aos trinta e cinco anos de idade.

E tamén podemos concluir que O Carballiño é a dia de hoxe unha localidade dominada polos cuarentóns, os que están entre os 40 e os 49 anos, suman en total 2.301 carballiñeses, deles 1.215 teñen entre 40 e 45 anos e 1.086 entre 45 e 49 anos. Son os dous quinquenios con máis carballiñeses, sen dúbida producto do "baby boom" da década dos anos 70 do seculo pasado.

Da poboación carballiñesa, 4.844 persoas son maiores de sesenta anos, o que representa case o 35% do total de habitantes empadronados no municipio. 

En canto ao sexo da persoas, viven no Carballiño algo máis de mil mulleres que homes, concretamente 7522 mulleres e 6.505 homes.

O mozo foi localizado sen vida ás 17:30 horas deste sábado por efectivos do GES de Avión a escasos metros da vivenda familiar, na capitalidade municipal do concello de Avión.

A.B.G., de 22 anos de idade, estaba sendo buscado nas últimas horas e despóis de que a súa familia notara a súa falta dende a pasada madrugada.

A autopsia deberá aclarar a causa concreta da morte, ainda que os indicios apuntan a que pudo ser consecuencia dun golpe accidental tras caerse dende un muro dunhos catro metros de alto.

A Garda Civil, como ocorre nestes casos, investiga as circustancias nas que se producíu o suceso.

O PSdeG-PSOE denuncia publicamente que "ao alcalde de Leiro “lle importa máis ben pouco ou nada que a veciñanza do Concello teña un bo acceso a Internet e se asente poboación".

Os socialistas fan estas criticas porque afirman que o alcalde retirou da orden do dia do pleno deste pasado lúns unha moción do grupo municipal socialista na que se pedía a mellora da cobertura móbil e de Internet no municipio. Un feito ante o que o PSdeG na localidade “non da creto” e que amosa “a falta de miras e de futuro do grupo de goberno do Partido Popular”.

A deficiente cobertura das tecnoloxías da información e comunicación "convertéronse nun problema grave en Leiro" e por elo os socialistas pretendían debater no pleno do Concello unha moción na que pedían realizar tódalas xestións pertinentes diante das administracións públicas e as empresas operadoras de telecomunicacións para rachar dunha vez con todas con este problema e mellorar a cobertura tanto móbil como de Internet.

“A resposta que obtemos ante un problema que afecta a veciñanza de Leiro e impide un mellor desenvolvemento das novas tecnoloxías é a de non entrar na materia e deixar todo no estado no que está o do abandono e as graves deficiencias de cobertura que nos atanguen”, explica o voceiro socialista Manuel Rodríguez.

Dende o Grupo Municipal Socialista pretendían "solucionar a través desta moción a fenda dixital reinante no municipio e que provoca que haxa fogares que teñan dificultades e que incluso non teñan a posibilidade de realizar unha simple chamada telefónica".

“A tecnoloxía está avanzando a pasos axigantados, e estes cambios tecnolóxicos están separando as poboacións urbanas e rurais, algo o que Leiro non é alleo e sabemos de primeira man os problemas que sufrimos debido a esta fenda”, sinala Rodríguez.

Problemas de cobertura que afectan tamén o problema do despoboamento e que impiden que moitas persoas fixen a súa residencia en Leiro, ante a falta de acceso as novas tecnoloxías. “En Leiro temos un grave problema co despoboamento, pero comprobamos que o Partido Popular non lle preocupa para nada a situación e non poñen medidas para frealo como ben podía ser solucionar o tema da cobertura móbil, algo que facilitaría as comunicacións e permitiría fixar nova poboación”, destacan dende o PSdeG-PSOE no municipio.

Para os socialistas de Leiro “é grave que un obxectivo común” como é o de eliminar a fenda dixital “non se teña en conta por parte do grupo de goberno” e sinalan que esta situación provoca que “non teñamos as mesmas oportunidades laborais, de formación, de emprendemento e de ocio que outros concellos”. O voceiro do PSdeG-PSOE no municipio é contundente a hora de expresar o seu malestar pola decisión do PP de non debater a moción “esta é unha nova mostra de que o Partido Popular non lle interesa o futuro de Leiro, atraer nova poboación e dar uns servizos dignos a poboación que é o obxectivo principal de calquera concello”.

A Consellería de Medio Ambiente, Territorio e Vivenda comezou as obras de acondicionamento e humanización da rúa Cristóbal Colón, a rúa principal da localidade de Boborás, e na que se ubican a casa do concello, o centro de saúde e a farmacia do municipio.

A Consellería de Medio Ambiente financia as obras cun importe de case 240.000 euros, e que consisten na mellora integral da rúa Cristobal Colón, dentgro do núcleo tradicional de Boborás.

Os traballos consisten no levantado do firme de rego asfáltico, sumidoiros e arquetas do tramo, abriranse gabias para canalización de redes de alumeado público, electricidade, telecomunicacións e rede de pluviais e tamén se procederá á renovación da canalización de recollida de augas pluviais, o soterramento das liñas de electricidade e de telefonía e concluirán coa instalación dun novo pavimento. O prazo de execución das mesmas é de oito meses.