A demografía empresarial da Comarca do Carballiño mostra que das 2.387 empresas que se contabilizan (1.628) son autónomos que non teñen asalariados, o que representa o 68% do total das unidades empresarias existentes, según os datos que recolle no seu último informe o Instituto Galego de Estatística.

Ademáis, outras 460 empresas teñen entre un e dous asalariados, o que pon de manifesto o gran minifundio empresarial da Comarca do Carballiño. 

Tan so unha empresa aparece no rango entre os 250 e os 499 empregados, que ten a súa actividade no parque empresarial do Carballiño, e tan so outras 3, dúas do Carballiño e unha do concello de Piñor, teñen máis de cen traballadores,  e tan so unha do Carballiño está no rango entre 50 e 99 traballadores.

Entre 20 e 49 empregados están 24 empresas, o resto son pequenas empresas que teñen entre 3 e 19 asalariados.

Por concellos, a capitalidade comarcal, O Carballiño conta con 1473 empresas. 

San Cristovo de Cea é o segundo municipio con máis empresas, ao contabilizar 238, mentres que Maside con 227 está en terceira posición en número de empresas no ámbito comarcal.

Xa a bastante distancia está PIñor, que conta con 117 empresas, Boborás con 99 unidades empresariais e O Irixo con 89, respectivamente.

Despois, completan este ranking comarcal polo número de empresas, está San Amaro con 70 empresas, e as últimas posicións son para Punxín con 39 e Beariz con 35 empresas., según os datos que recolle o informe.

Parece incrible pero é certo, O Carballiño rompe estatísticas, e en apenas tres meses acumula tres premios do Millón do Euromillóns, un premio único por sorteo para toda España.

Son tres millóns de euros en tan so un intervalo de tempo de tres meses, o primeiro foi no Bar Lérida o dia 15 de Outubro de 2019, o segundo no Restaurante Fuchela, o dia 12 de Novembro de 2019, e agora o terceiro, no Bar Paco, na rúa Perfectino Viétez nº 26, no sorteo deste venres dia 10 de Xaneiro de 2020. 

O boleto premiado con este millón de euros é o que se corresponde co código BST33327

Nun intervalo de tempo de menos de tres meses, O Carballiño suma tres premios millonarios, e ademáis, curiosamente, no mesno xogo, o Euromilóns. De auténtico record.

O certame de Cantos de Taberna “No bico un cantar”, que este ano chega á súa sexta edición, será o de maior participación tanto de grupos de música popular como de locais hostaleiros nos que se desenvolverá esta actividade. O evento, que reunirá a once grupos, e no que participan once locais hostaleiros, foi presentado esta mañá polo concelleiro de Cultura,

Diego Fernández, e a integrante da asociación cultural Terras do Arenteiro, Asun Adá, que organiza o festival en colaboración co concello do Carballiño. A partir das 8 da tarde deste sábado, 11 de xaneiro, e ata pasada a medianoite, os grupos “Música Tradicional Rubulir”, de Ramirás; “Lembranza Solpor”, de Celanova; “Os da Cuña”, de Ourense; “As Faíscas”, de Boborás; “Feitizo de Pau”, de Cea; “Banda de Gaitas do Irixo”, “Cotovías”, de Maside; “Tokaide”, de Partovia; “Serandeiros”, do Carballiño; “O Canto do Viri”, do Carballiño, e “Terras do Arenteiro”, tamén do Carballiño, actuarán nos locais Brioche, Caserío, Don Paco, Ernesto, Estate Quieto, A Fuchela, Ningures, Plaza, Riquirmo e Soldado, ademais de O Fiadeiro, onde será o fin de festa.

En cada local actuarán tres grupos, alternándose nos diferentes locais, ás 8, 9, 10 e 11 da noite. O festival ábrese ás 8 no Ernesto, e o fin de festa será a partir das 12 da noite no Fiadeiro.

Diego Fernández dixo que esta edición supoñía un récord de participación de grupos e locais, e que o obxectivo era recuperar a música popular e tradicional de Galicia. Agradeceu a colaboración dos once locais adheridos a esta iniciativa e a da asociación cultural Terras do Arenteiro, organizadora do evento.

Finalmente, animou á participación veciñal así como da xente da comarca e a todas as persoas interesadas na recuperación da música e as cancións populares de Galicia.

Asun Adá agradeceu ao concello a confianza depositada na asociación cultural Terras do Arenteiro para organizar o festival, e asegurou que se trata dunha das mellares iniciativas para resaltar a cultura tradicional deste O Carballiño. Tamén dixo que ainda que había máis grupos propostos, fíxose unha selección para que a xente poida acudir a todos os lugares. Neste senso detacou a participación de grupos do Carballiño, así como da comarca, das Terras de Celanova e da capital ourensá.

Tamén resaltou que no fin de festa actuarán todos os grupos participantes ademáis de Terras do Arenteiro. E finalmente, agradeceu a todos os grupos a súa participación.

Coa posta en valor da formación como vehículo prioritario para incrementar as posibilidades de inserción laboral das persoas desempregadas, comezou o Programa Integrado de Emprego do Concello do Carballiño 2019/2020, que conta cun centenar de persoas inscritas.

O acto contou coa asistencia do alcalde, Fancisco Fumega; o director de Orientación e Promoción Laboral, Pablo Casal; o Xefe Territorial da Consellería de Economía, Emprego e Industria, Santiago Álvarez, e o concelleiro de Turismo, Emprego e Industria, Manuel Dacal.

Francisco Fumega agradeceu á Xunta de Galicia a concesión deste novo programa ao concello do Carballiño, e resaltou a importancia da formación no camiño para a procura dun posto de traballo. Así mesmo, expresou o seu desexo de que resulte tan proveitoso como os realizados anteriormente e que tiveron unha gran porcentaxe de inserción laboral.

Pablo Casal amosou a súa satisfacción pola alta participación no programa e no acto de presentación, cun salón de plenos completamente abarrotado. Recordou que o obxectivo dos cursos é mellorar a cualificación das persoas desempregadas coa finalidade de lograr a súa inserción laboral, e que para isto faise fincapé en tres sectores de futuro como son o industrial, os servizos e o sociosanitario. Dixo que a Xunta de Galicia financia este programa con 250.000 euros, sendo un dos cuarenta e seis que están en marcha, e que teñen un orzamento global de 10,5 millóns de euros. Finalmente, indicou que a esixencia mínima de inserción era do 35%, se ben era probable que se superase.

Manuel Dacal dixo que o principal capital dun concello é o capital humano, e que por eso o programa resulta de gran interese para as persoas desempregadas que van a participar nel para mellorar a súa formación. Tamén agradeceu a colaboación da Xunta e do departamento de Orientación Laboral do concello.

Finalmente, Santiago Álvarez, que compartiu a satisfacción pola alta participación na presentación do programa, ofreceu a colaboración da Delegación Provincial da Consellería de Economía, Emprego e Industria para axudar á consecución dos obxectivos do mesmo.

O Programa Integrado de Emprego do Concello do Carballiño 2019/2020 ten o compromiso de inserir laboralmente como mínimo ó 40% das cen persoas que forman parte del. Para tal fin conta con tres itinerarios formativos principais: de Servizos, Sociosanitario e Industrial, así como unha formación transversal común con disciplinas como Manipulador de Alimentos, Alfabetización Informática, Carretilla Elevadora, etc. Nesta mesma dirección os profesionais de Orientación Laboral do concello farán un seguimento de cada usuario con non menos de cinco accións individuais de asesoramento para a procura de emprego.

O 13 de xaneiro comezará a formación das cen persoas usuarias cos primeiros cursos de formación de Informática e Manipulador de Alimentos. O Programa Integrado de Emprego do Concello do Carballiño terá unha duración de dez meses e para a súa realización o Concello do Carballiño conta con tres profesionais de orientación laboral asi coma con múltiples profesionais docentes punteiros nos seus campos.

A deputada provincial do Reto Demográfico, Igualdade, Benestar e Emprego, Luz Doporto, trasladoulle, na sede da Mancomunidade do Carballiño, as bases do proxecto EmprendOU da Deputación de Ourense aos alcaldes, concelleiros e axentes de desenvolvemento local da comarca do Carballiño, "continuando con esta rolda de visitas polas distintas comarcas da provincia, para que os municipios coñezan as liñas básicas desta iniciativa coa que pretendemos afrontar o reto demográfico",dixo Luz Doporto.

O proxecto EmprendOU da Deputación de Ourense apoia a nova actividade empresarial das persoas que teñen entre 16 e 30 anos para que poidan crear o seu propio posto de traballo, xa sexa individual ou formando parte dunha persoa xurídica de carácter mercantil, e o fagan naquelas áreas rurais afectadas polo gran desafío demográfico, os que se denominan "municipios elixibles", en concreto, son 82 os concellos da provincia que poderán beneficiarse deste proxecto.

A finalidade é incrementar as posibilidades de desenvolvemento profesional/laboral da poboación máis nova, aumentar o atractivo do mundo rural entre o público destinado destas axudas para provocar un 'efecto chamada' por parte da provincia de Ourense para persoas con mentalidade emprendedora. A dispoñibilidade de orzamento deste programa ascende aos 2.025.000 euros, sendo a contía de axuda económica a persoas beneficiarias deste Plan de 675€/mes.

Esta iniciativa da institución provincial obtivo unha axuda na convocatoria de axudas efectuada polo Ministerio de Política Territorial e Función Pública, a través do cal se conceden axudas a entidades locais para o finaciamiento de proxectos de emprego, autoemprego e emprendemento colectivo, dirixidas a afrontar o reto demográfico.

A alcaldesa do Concello de Boborás, Patricia Torres, valora moi positivamente a reunión mantida semanas atrás co Presidente da Xunta de Galicia, Alberto Núñez Feijoó en sede parlamentaria para trasladarlle a solicitude de colaboración en futuros proxectos do municipio, nos que o Goberno Local está a traballar, como é o caso dunha piscina municipal.

"Neste sentido Núñez Feijoó, comprometeuse a estudar a posibilidade de colaboración co Concello de Boborás para a construción da mesma", asegura a alcaldesa.

Patricia Torres, tamén lle deu traslado das modificación do PXOM que están en marcha como a modificación puntual na Almuzara e no solo industrial, e explicoulle que no 2020 o Concello promoverá un Plan Parcial no solo dotacional existente nunha finca de propiedade municipal para logo a construción de vivendas de protección autonómica.

Ademais, esta reunión tamén serviu para un contacto directo entre a recen elixida alcaldesa, por maioría absoluta nos anteriores comicios municipais, co responsable máximo da administración autonómica e así darlle traslado de cal é "a liña de traballo na que se está enfocando este mandato; no que ademais de garantir os servizos xa prestados e melloralos, así como o mantemento das infraestruturas existentes como a mellora das mesmas e tamén de nova construción, agradecendo a colaboración que a Xunta de Galicia lle presta a este concello, referendado en diferentes convenios como a Senda Peonil, a humanización da rúa Cristóbal Colón de Boborás e o edificio sociocultural entre outros",subliña a rexedora municipal de Boborás.

A primeira ruta das tapas deste ano 2020 rende homenaxe ao mundo do cine coa elaboración de pinchos baseados en tiítulos de películas. O evento, que terá lugar este venres, 10 de xaneiro, e o seguinte, 17 de xaneiro, foi presentado este mediodía polo concelleiro de Turismo, Manuel Dacal; a xerente do Centro Comercial Aberto, Noelia Mares, e representantes dos establecementos de hostalería intgrados nesta iniciativa.

Películas como Blade Runner, Pulp Fiction, Titanic, La dama y el vagabundo ou La fiesta de las salchichas, entre outras películas, teñen a súa correspondencia gastronómica nesta ruta que, ademáis, sorteará unha viaxe de fin de semana para dúas persoas nun hotel spa de Sanxenxo.

Manuel Dacal destacou a imaxinación das propostas culinarias que elevan en cada xornada o prestixio desta iniciativa, e que contribúe a dinamizar as tardes dos venres no sector hostaleiro e, en xenral, no Carballiño. Destacou asimesmo o sorteo dunha viaxe de fin de semana para dúas persoas nun hotel spa de Sanxenxo, o cal lle engade interese á iniciativa.

E agraeceu a colaboración de Pao Tizón, do CCA e dos dezaseis locais hostaleiros integrados nesta ruta.

Noelia Mares recordou que estamos en tempo de grandes citas cinematográficas mundiais e nacionais, e que, polo tanto, a idea de dedicar esta ruta ao mundo do cine resulta máis que oportuna. Tamén se referiu a App “quedamosdetapas” onde se poden ver as diferentes propostas dos dazaseis locais da ruta, e animou a participar e soborear as tapas. Finalmente, Marta, en nome dos hostaleiros, animou á veciñanza a percorrer os locais e degustar as súas tapas.

Unha representación do goberno municipal bipartito de San Amaro, encabezada polo alcalde Rubén Gómez, visitou as instalacións do Mosteiro Chu Sup Tsang, sito na aldea de Ventoselo, e no que se proxecta unha inversión de máis de 1,5 millóns de euros por parte desta comunidade de monxes busdistas.

Dende o concello de San Amaro agradecen "a excelente acollida que tiveron durante esta visita", na que os gobernantes municipais coñeceron ao "venerable Gueshe Tenzinng Tanding", do que resaltan "a calurosa benvida" que tivo coa representación municipal.

Alcalde e concelleiros coñeceron os terreos onde se vai construir un"templo formal" para 500 persoas , unha biblioteca con colección de textos de todas as relixións e filosofias, unha sala de meditación, un edificio de culto, asi como dormitorios e outras dependencias.

Tras esta visita, o alcalde Rubén Gómez, destaca que "é o proxecto de máis envergadura realizado no noso concello, cun investimento de máis de 1,5 millóns de euros, e San Amaro é xa un referente por contar con este monasterio, un dos máis importantes de España e Europa, e esta inversión será un novo revulsivo para atraer visitantes a San Amaro".