Por terceiro ano consecutivo, e segundo no Carballiño, o colectivo ELO organiza unha nova edición do Encontro Literario de Ourense, que terá carácter solidario a prol da loita contra o cancro de mama, e que se celebrará este sábado, 19 de outubro, no salón de actos do Casino do Carballiño.

O evento foi presentado esta mañá polo concelleiro de Cultura, Diego Fernández, e as escritoras e integrantes do colectivo organizador Cristín Ferro e Lizzi Quintas.

Escritores e escritoras, bloggers, instagrammers, representantes de editoriais e axencias literarias, así como lectores e lectoras, acudirán a este encontro, no que se desenvolverán seis mesas sobre diferentes temáticas e xéneros literarios e edición, e outro tipo de actividades como a novidade da exhibición de combates de esgrima ou xogos literarios baseados en concursos de televisión como A ruleta da sorte ou Agora caigo.

As persoas que donen á asociación contra o cancro (aecc) un mínimo de 3 euros recibirán a cambio un book dunha obra literaria.
As mesas de debate levan nome de flores, en relación á temática, e entre elas hai unha sobre o proceso de edición, na que intervirán programadores, maquetadores, ilustradores e cantas persoas interveñen na edición dunha obra literaria.

Entre as persoas participantes figuran destacados escritores e escritoras, así como bloggers e representantes de editoriais novidosas, como Ages Editora que recupera libros descatalogados, ou a portuguesa Cooperativa Sacauntos.

Diego Fernández amosou a súa satisfacción pola organización por segundo ano consecutivo deste encontro no Carballiño, que ía a situar á vila nun lugar de referencia dos eventos literarios en Galicia. Ao respecto recordou o dinamismo cultural do Carballiño este outono, como acontece coa Mostra de Teatro Amador. Por todo isto, agradeceu ás organizadoras o traballo que realizan e reiterou a colaboración do concello.
Lizzi Quintas expresou a súa satisfacción por poder celebrar a terceira edición do ELO e de facelo por segunda vez no Carballiño. Dixo que a elección do Casino como lugar de celebración obedecía sobre todo á idoneidade das instalacións así como á situación estratéxica, permitindo acercar aos escritores co público, que é un dos obxectivos do encontro. Neste senso animou á participación, recordando que a entrada é totalmente libre e gratuita para o público.

Tamén destacou o interese das mesas de debate, como a do proceso de edición; a presencia de editoriais novidosas, e as actividades complementarias como os xogos e a exhibición de combates de esgrima.

Cristín Ferro corroborou o interese destas propostas, así como a presencia dun número importante de escritores, bloggers e editoriais, e recalcou o carácter solidario do encontro a prol da loita contra o cancro de mama, establecendo donativos mínimos de 3 euros que serán compensados con B´s literarios. Tamén recalcou o acceso libre e gratuito ao evento.

O encontro comezará ás 9 da mañá do sábado e rematará ás 9 da noite.

A entrada é totalmente aberta ao público, polo que calquera persoa pode acceder ao salón de actos do Casino para asistir ás mesas e demáis actividades do encontro.

Espazo Común levará ó próximo Pleno de O Carballiño unha moción para que de xeito inmediato “se dea traslado á oposición dos informes elaborados polos servizos técnicos municipais que avalan a contratación dun determinado número de policías”.

Espazo Común solicitará “que se facilite tamén a OPE anunciada e o documento de remisión da solicitude á AGASP” e pedirá “que se designen responsables e prazos para facer as xestións necesarias que restan para poder cubrir as vacantes e completar o cadro de persoal e garantir así un servizo acorde co que precisa O Carballiño”.

Espazo Común cualifica de “improvisación permanente” a xestión “que se está a facer no Concello do Carballiño cun asunto de tanta relevancia como a cobertura das vacantes no cadro de persoal da Policía Local”, que “leva anos experimentando un descenso constante no seu número de efectivos o cal fai cada vez máis complicado manter o servizo nos mínimos que precisa unha vila coma a nosa”.

Espazo Común salienta que “en febreiro deste ano, o alcalde anunciaba publicamente a aprobación dunha OPE (Oferta Pública de Emprego) e a solicitude por seis prazas. A finais do mesmo mes, desdecíndose a se mesmo, xa fala de só catro e nestes días pasados, o concelleiro de Persoal e Policía, Manuel Sotelo, baixou a cifra a só tres. Xa hai meses que pedimos acceso aos informes técnicos aos que fan alusión e a esa suposta OPE pero recibimos a calada por resposta”.

O grupo municipal de Espazo Común precisa que “o proceso legal para a contratación de novos policías é longo pero despois de cumprir cos primeiros e máis complexos pasos entre 2017 e 2018, o procedemento quedou estancado e xa se perderon convocatorias da AGASP (Axencia Galega de Seguridade Pública) para a súa cobertura”. Así, “dende finais do ano 2017, cando se aprobou a RPT, e primeiros do 2018, cando se aprobou a adhesión ao convenio coa Xunta de Galicia pola que esta se encarga da selección do persoal para completar o cadro de persoal, xa só quedaba a aprobación dunha OPE (Oferta Pública de Emprego), trámite responsabilidade do alcalde e que non ten nin que pasar polo pleno, xunto coa remisión dunha simple solicitude co número de prazas a cubrir”.

A proposta feita por COPE O Carballiño para elixir o pobo máis bonito da Comarca do Carballiño superou todas as expectativas e acadou un gran éxito de convocatoria, superándose os catro mil votos contabilizados.

A iniciativa non so despertou o interese entre a veciñanza da Comarca, senón que tamén foron numerosos os votos enviados dende distintos países nos que temos presenza de emigrantes, sobre todo desde México e Panamá ou Argentina, ou en menor medida dende Brasil, Estados Unidos, Perú, Venezuela, Reino Unido ou Francia, entre outros.

Dende o primeiro día no que se abríu a votación, dous pobos, os de Alvite en Beariz e Pazos de Arenteiro en Boborás protagonizaron un apretado man a man desputándose o primeiro posto desta primeira fase da votación, e conseguindo superar os mil apoios cada un deles.

Alvite quedou finalmente en primeira posición con 1.074 votos, mentres que Pazos de Arenteiro foi segundo con 1.012 votos. Ambos suman case o 50% do total do voto contabilizado.

En terceira e cuarta posición quedaron duas aldeas do municipio do Carballiño, Cabanelas e Banga, que recibiron 241 e 186 votos, respectivamente, clasificándose tamén xunto a Alvite e Pazos de Arenteiro, para a votación final da que sairá elixido o pobo máis bonito da Comarca do Carballiño.

Será por medio dunha votación que faráse a través desta mesma páxina Web do 23 ao 27 deste mes de Outubro.

Ademáis dos xa catro finalistas, outras 103 aldeas repartidas por toda a xeografia comarcal tamén tiveron votos en maior ou menor cantidade.

Os máis votados por concellos

Ás portas de entrar na final quedouse Oseira, que foi o pobo máis apoiado no concello de San Cristovo de Cea.

A Touza e O Lago, foron as aldeas consideradas como as máis bonitas no concello de Maside.

Lousado, este pobo da parroquia de Loeda, foi o máis votado no concello de Piñor.

Eiras e Anllo foron os favoritos da nosa audiencia no concello de San Amaro.

Ourantes foi a localidade que máis votos obtivo no concello de Punxín.

Finalmente, no concello do Irixo o voto estivo moi repartido entre varias aldeas, as que máis apoios lograron foron as de Barcia, na parroquia de Reádegos, Cebral en Froufe e Parada de Laviote.

Espazo Común considera que “a recente supresión de moitas prazas de estacionamento en rúas céntricas pode xerar confusión e malestar entre a veciñanza”.

Neste sentido, o grupo municipal salienta a necesidade de poñer en marcha un Plan de Mobilidade que recolla, ademais, accións específicas encamiñadas a superar as barreiras arquitectónicas.

O grupo municipal de Espazo Común en O Carballiño precisa que durante os catro anos anteriores conseguíronse crear arredor de 200 novas prazas de estacionamento nas rúas Evaristo Vaamonde, Otero Pedrayo, Otero Landeiro, Ben Cho Shey e Celso Emilio Ferreiro para aliviar na medida do posible a carga das rúas máis achegadas ao centro da vila”.

Sen embargo, durante os últimos meses, “vemos que se está a emprender un camiño totalmente contrario coa supresión de prazas de aparcamento en rúas como Cuba ou a Avenida do Balneario, aplicando criterios dispares a rúas de iguais características, o cal agrava aínda máis a problemática e multiplica os prexuízos para os afectados”.

Espazo Común recorda que “se acadou un histórico consenso entre tódolos partidos e colectivos sociais para habilitar unhas zonas de aparcamento regulado gratuíto que permitiran maior rotación de coches e, polo tanto, moitas máis opcións dispoñibles” e que, sen embargo, queda pendente “a elaboración dunha ordenanza e a aprobación da partida necesaria para o equipamento dentro dos orzamentos municipais”.

O arqueólogo Jorge Lamas Bértolo, coordinador do equipo multidisciplinar formado por arqueólogos, historiadores, documentalistas e medievalistas, que elaboraron o estudo sobre a delimitación do Camiño Miñoto Ribeiro, presentou esta mañá ante a asamblea da asociación os pormenores e características desta investigación.

A reunión tivo lugar no salón de plenos do concello do Carballiño, e no transcurso da mesma tamén se acordou prorrogar a actual xunta directiva, que leva dous anos de mandato.

O estudo sobre a delimitación do Camiño Miñoto Ribeiro xa lle foi remitido á consellería de Cultura e Turismo co obxectivo de que sexa declarado camiño histórico cultural como paso previo para a declaración deste camino como Ruta Xacobea, que é a finalidade dos concellos integrados nesta iniciativa.

O presidente da asociación e alcalde de Cortegada, Avelino Luis de Francisco, felicitou a Jorge Lamas polo rigor do estudo realizado e asegurou que hai xa algunha xente que transita en peregrinaxe por este camiño, e que espera que sexa declarado camiño histórico cultural o antes posible. Tamén dixo que, en todo caso, na actualidade xa se pode obter o documento da Compostelá que concede a Igrexa ás persoas que fan o Camiño Xacobeo.

Catorce alcaldes e concelleiros asistiron a esta asamblea extraordinaria, na que tamén estivo o alcalde e concelleiro de Turismo do Carballiño, Francisco Fumega e Manuel Dacal, respectivamente, como anfitrións da xuntanza.

PODEMOS O Carballiño afirma que "o longo do verán vimos como a situación que se ven dando nos últimos anos de non poder conciliar ocio con descanso na nosa vila se agrandou·

Na formación morada entenden que "existe un verdadeiro descontrol no tocante a permisos de terrazas, horas de peche dos locais, control nas zonas de aparcar e de carga e descarga, ruido e suciedade nas rúas,....Vamos que o grupo de goberno do señor Fumega, a día de hoxe, non ten un plan de actuación eficaz para poder conciliar o que é o descanso da veciñanza co ocio e a celebración de festexos, sin que uns vaian en detrimento ou en contra dos outros".

Por todas esas razóns, Podemos ven de presentar no rexistro do concello carballiñes unha proposta de Plan Cívico "con seis liñas a defender e que entendemos que son beneficiosas para a nosa vila".

Para acceder ao documento no que se recolle este plan cívico, prema no arquivo adexunto: