A vila de Leiro rexistra un gran ambiente dende primeiras horas da mañá deste domingo 25 de Agosto, de ceos cubertos e amenaza de choiva.

A 30 edición da Festa da Vendima, co expresidente do goberno de España Mariano Rajoy como pregoneiro estelar, está resultando un  gran éxito de convocatoria, coa Praza de Cruceiro e a rúa principal de Leiro cheas de público de todas as idades que non queren perderse o sempre espectácular desfile de charangas e carrozas, que representan distintas esceas do traballo e as tradicións arredor do viño no Ribeiro.

A presenza de Mariano Rajoy tamén trouxo ata Leiro a outras personalidades da política, entre as que se encontran a expresidenta do Congreso dos Deputados Ana Pastor, ou o presidente da Xunta, Alberto Núñez Feijóo.

Unha vez celebrado o desfile de carrozas, as actividades concentranse dende primeira hora da tarde no parque do Salgueiral, á beira do río Avia, onde se encontra ubicado o mercado artesanal, a mostra de viños de Leiro e o gran comedor ao aire libre que acolle o xantar campestre.

A xornada complétase co Festival da Vendima do Ribeiro, a partir das oito da tarde na igrexa de San Pedro de Leiro,  e actuación dun grupo musical.

Moda infantil, de home e muller; zapatos, complementos, xoias e flores, entre outros, son os produtos que se poden adquirir na 15ª Feira do Stock, que organiza o Centro Comercial Aberto en colaboración co concello do Carballiño, e que se celebrará na Praza Maior durante esta próxima fin de semana.

Anúncianse descontos de ata o 80 e 90 por cento nalgúns produtos, así como 10 vales de compra por un valor global de 200 euros, que se sortearán ao remate da feira.

O evento foi presentado pola concelleira de Comercio, Sivia Baranda, e a xerente do CCA, Noelia Mares.
A feira abrirase o venres, 23 de agosto, ás 6 da tarde e permanecerá aberta ata as 10 da noite. O sábado e o domingo, 24 e 25, respectivamente, estará aberta de 11,00 a 14,00 e de 17,00 a 22,00 h.

15 establecementos dos máis diversos sectores estarán representados nesta feira, que a xerente do CCA cualificou como unha gran oportunidade para mercar produtos en condicións moi ventaxosas.

Noelia Mares destacou a importancia desta cita para o comercio carballiñés, que espera liquidar os restos da tempada de verán, ofrecendo produtos de calidade a baixo prezo. Tamén agradeceu o traballo que realizan os operarios para montar as casetas que albergarán a feira.

Pola súa parte, Sivia Baranda incidiu na necesidade de promocionar e apoiar o comercio local como unha parte esencial da economía carballiñesa. Por iso pediu á veciñanza que acuda á feira e que tamén realice as súas compras o resto do ano no comercio local, que é un comercio de proximidade e de calidade, según dixo.

A Consellería do Medio Rural comprometeuse a estudar coa máxima atención a proposta do concello de Beariz para declarar o núcleo de Alvite, situado na parroquia de Santa María de Beariz, como “aldea modelo” para a prevención e defensa fronte os incendios forestais.

Así llo transmitiu o titular deste departamento, José González, ao alcalde do municipio, Manuel Prado, durante unha xuntanza de traballo na que tamén participaron os directores xerais de Desenvolvemento Rural, Miguel Pérez Dubois, e de Planificación e Ordenación Forestal, José Luis Chan.

Neste encontro, o rexedor de Beariz amosou un especial interese por integrar o devandito núcleo nesta iniciativa que está a desenvolver a consellería e que ten como principal obxectivo defender as persoas e os bens da ameaza dos incendios forestais, mediante diversas actuacións dirixidas á posta en marcha de actividade agrogandeira na franxa dos 50 metros próxima ás vivendas.

Precisamente, o conselleiro salientou o feito de que Beariz teña solicitada a súa adhesión ao convenio no que se enmarca esta actuación e que foi asinado pola consellería, a empresa pública Seaga e a Federación Galega de Municipios e Provincias, para a posta en marcha do sistema público de xestión da biomasa nas proximidades das vivendas, co fin de protexelas dos lumes.

A maiores, José González destacou que con esta proposta de Beariz xa son máis dunha ducia os concellos galegos interesados en incorporar algún dos seus núcleos a este proxecto de “aldea modelo” e que as candidaturas non deixan de medrar, polo que agradeceu a boa acollida que está a ter esta iniciativa entre os municipios.

Por último, neste encontro de traballo tratouse tamén sobre o pasteiro situado neste concello, precisamente nas proximidades do núcleo de Alvite, habilitado dentro dos plans impulsados pola consellería no marco das diferentes iniciativas postas en marcha para a recuperación e posta en valor de terras agrarias.

A Festa da Vendima de Leiro cumpre 30 edicións como escaparate do viño do Ribeiro, produto esencial na economía da comarca e particularmente do municipio de Leiro. A presentación desta tradicional celebración tivo lugar no Pazo Provincial, acto no que participou o vicepresidente da Deputación de Ourense, Rosendo Fernández; o alcalde e o concelleiro de Cultura de Leiro, Francisco José Fernández e Ramón Álvarez; e o presidente do Consello Regulador da D.O. Ribeiro, Juan Manuel Casares.

A Deputación de Ourense colabora con esta celebración que "transcende o aspecto puramente festivo para converterse nunha canle de divulgación e promoción económica dos recursos endóxenos do Concello de Leiro", dixo Rosendo Fernández, quen sinalou que "en Leiro o viño faise festa e a festa faise viño, pero sen a vendima non habería nin festa nin viño".

Así mesmo, Rosendo Fernández destacou o papel da veciñanza nesta celebración "participando de forma activa nesta festa de exaltación do proceso da vendima que ofrece aos asistentes un amplo e variado programa de actividades que conta cunha parte didáctica no desfile das carrozas, no que se escenifica todo ese proceso da vendima".

O alcalde de Leiro, quen agradeceu o apoio da Deputación de Ourense, lembrou que se trata dunha "festa de homenaxe á xente que vive por e para o viño" e explicou que a aposta do Concello con esta celebración ten como obxectivo "revitalizar o noso produto estrela e auténtico motor do municipio: o viño".

Neste mesmo sentido, Juan Manuel Casares felicitou ao municipio de Leiro por ser capaz de "innovar e manter a identidade do municipio" nesta celebración que "naceu no ano 1963 e que, polo tanto, é un ano máis antiga ca propia Feira do Viño do Ribeiro". Ademais, o presidente do Consello Regulador da D.O. Ribeiro dixo que "o futuro da comarca vitivinícola do Ribeiro baséase, en parte, na colaboración de tódolos axentes".

 A programación da festa comezará, segundo explicou o concelleiro de Cultura de Leiro, o sábado 24 de agosto, coas atraccións infantís ás 17.00 horas e, posteriormente, a partir das 22.30 horas celebrarase o "Vendima Rock" no Salgueiral. O domingo 25 de agosto, a festa dará comezo ás 10.00 horas coa recepción de acios a concurso que posteriormente serán expostos.

O concurso de Acios de tintos e brancos, que só admite variedades autóctonas do Ribeiro, outorgará premios dotados con 90 euros o primeiro, 60 euros o segundo e 30 euros o terceiro premio. Ás 11.30 horas será a benvida ás autoridades e convidados na Casa do Concello, para continuar ás 12.00 horas coa lectura do pregón na praza do Cruceiro que nesta edición correrá a cargo de Mariano Rajoy Brey.

Ás 12.30 horas terá lugar o tradicional desfile de Carrozas e Charangas desde a rúa Gabino Bugallal ata o Campo da Feira, así como a 3ª edición da Mostra de coches clásicos.

Un dos actos máis populares da festa é o concurso e desfile de carrozas, unha exposición que mostra as tarefas propias da vendima. O concurso recolle, na categoría de adultos, un primeiro premio dotado con 1.000 euros, o segundo premio de 750 euros, o terceiro premio é de 600 euros, e 400 euros por participar no concurso. Na categoría infantil, os premios van dos 400 euros ó primeiro, 300 euros ó segundo, 200 euros ó terceiro e aos 50 euros por participar.

A partir das 14.00 horas haberá varias actividades instaladas no Salgueiral como o XVI Mercado Artesanal e a 2ª Mostra dos Viños de Leiro e, ás 14.30 horas, comezará o xantar popular.

Pola tarde retomaranse as actividades ás 16.30 horas coa entrega de premios aos gañadores dos concursos de Acios e Carrozas e continuarán as actividades infantís e a festa no Salgueiral.

O deporte chegará ás 17.45 horas co partido de presentación do C.F. Leiro.

Ás 20.00 horas será o concerto de Corais da Vendima e ás 21.00 horas pechará a xornada festiva unha actuación musical.

Os vinte alumnos e alumnas que formaron parte do obradoiro de emprego “Carbosan 2018/19” recibiron hoxe os diplomas que acreditan a súa asistencia aos respectivos módulos de albanelería e forestal nos concellos do Carballiño, Maside, Boborás e San Amaro.

O acto tivo lugar no salón de plenos do concello do Carballiño, e celebrouse coa asistencia dos alcaldes do Carballiño e Maside, Francisco Fumega e Manuel Cadaviz, respectivamente; da alcaldesa de San Amaro, Mª del Carmen Pérez, e da concelleira de Emprego de boborás, Rosa Pérez, así como do director e moitores do obradoiro.

Neste evento confirmouse a solicitude polos catro concellos participantes dun novo obradoiro para o período 2019/20, que terá os mesmos módulos e número de alumnos que o que se clausurou hoxe.

Os catro representantes municipais agradeceron o traballo desenvolto tanto pola dirección e os monitores como polo alumnado, e que tivo como resultado práctico, ademáis da formación, a realización de importantes obras nos catro concellos.

Neste sentido, amosaron a súa satisfacción polo obradoiro, e destacaron a importancia de ofrecer a posibilidade de que persoas desempregadas poidesen formarse e teñan a oportunidade de atopar traballo.

Un total de vinte persoas participaron neste obradoiro, que conformaron os concellos do Carballiño, Maside, Boborás e San Amaro, e que estiveron distribuidos en módulos de albanelería e forestal. Así mesmo, contou con cinco persoas máis para as labores administrativas e técnicas

Cinco espectáculos teatrais e dous obradoiros forman parte do programa do xa clásico veraniego "Festival de Títeres do Carballiño" que organiza a concellería de cultura coa colaboración da Deputación de Ourense, con representacións a diario ás 19:30 horas na Praza Emilia Pardo Bazán.

Abre a programación este lúns 19 de Agosto a compañía "Os contos de Pablismo" coa obra "O Paroleiro", recomendada para un público entre os 4 e os 9 anos.

O martes 20, "Larraiz Urruzola" presenta "Dona Barriga Verde", para nen@s a partir dos 6 anos.

O mércores 21,  "Títeres Babaluba" trae a O Carballiño a súa producción "Lume" para un público entre os 2 e os 10 anos.

O xoves 22, "Fantoches Baj" representará "Auga que non vas beber", apta para todos os publicos, incluido o adulto.

O vernes 23, na xornada de clausura, "Viravolta Títeres" presenta "Marionetas de Papel", recomenndado para maiores de 6 anos.

Os dous obradoiros desenvólvense ás 12:30 horas, o lúns 19 sobre a creación de títeres con elementos de reciclaxe, e o vernres 23 sobre a creación de monicreques de papel.