Vinte e catro persoas inscritas no Programa Integrado de Emprego de Galicia “ Carbaemprega 2018” finalizaron esta semana o curso de soldadura, que é un dos módulos máis solicitados neste terceiro programa de emprego financiado pola consellería de Economía, Emprego e Industria da Xunta de Galicia, que se puxo en marcha o pasado mes de novembro, e cuxos diplomas seranlles entregados nun acto que se celebrará este xoves, 27 de xuño, ás 10,00 h., no salón de plenos do concello.

Asistirán a este acto o Concelleiro de Turismo, Industria e Emprego, Manuel Dacal; Carlos Rivas, responsable da empresa DIZMAR no Carballiño; os responsables da formación e técnicos do departamento de Orientación Laboral do Concello do Carballiño.

Ata agora xa conseguiron traballo un total de 40 persoas, o que supón o 40% sobre o total de participantes. Ao final do programa, que ten un ano de duración, o obxectivo de inserción é do 45%. Os sectores nos que se empregaron estas 40 persoas son moi dispares, habendo persoas traballando en hostalería, industria, sector alimentario, administración pública e mesmo un usuario contratado de investigador nunha Universidade.

Actualmente os usuarios xa finalizaron as formacións transversais en orientación laboral, manipulador de alimentos e a ocupacional en soldadura, e comezarán en breve cos certificados de profesionalidade, prevención de riscos laborais e carretilla elevadora.

O curso de perfeccionamento de soldadura finalizou o 21 de xuño, onde se lles impartiu tamén formación en prevención de riscos específico para o sector, pechando desta forma a reciclaxe profesional de 24 persoas que remataron a formación na súa totalidade.

Proximamente comezarán a realizar prácticas profesionais non laborais en diferentes empresas do municipio. Así mesmo, o resto de participantes iniciarán pronto a súa formación para os sectores de loxística e forestal.

OBXECTIVOS DE INSERCIÓN

No primeiro plan de emprego conseguiuse reinserir no mercado de traballo a 41 persoas, e no segundo o plan a reinserción superou as 50 persoas. Neste terceiro programa espérase incrementar o número de persoas que consigan un emprego, e que é como mínimo o 45%.

A actuación deseñada polo concello de Maside permitirá "a humanización desta praciña no acceso á igrexa parroquial de Dacón, n centro neurálxico do pobo, que vai ofrecer unha nova imaxe unha vez que se execute estas obras", destaca o alcalde de Maside, José Manuel Iglesias.

O rexedor municipal remarcaba nos micrófonos de COPE que "eu mesmo ocuparéi de estar encima desta obra, para que a mesma se desenvolva según o proxecto aprobado" e que pretende transformar esta praza nun espazo de encontro e lecer para a veciñanza, sen perder a súa funcionalidade, xa que é o acceso tanto ao barrio de arriba de Dacón como a entrada principal ao templo parroquial, moi frecuentado sobre todo durante a tradicional novena e celebracións na honra a Santa Rita, no mes de Maio de cada ano.

Fai apenas unha década atrás, a Festa dos Maiores que con carácter anual organiza a Xunta achegaba ata O Carballiño a máis de 30.000 persoas, a celebrada este sábado apenas reuníu a unhas 3.000 persoas, según as cifras aportadas pola propia organización.

A xuntanza festiva tocou fondo unhos anos atrás, cando apenas chegou a reunir a 1.000 persoas no parque municipal, e dende entón iniciou unha progresiva pero moi lenta recuperación en canto a afluencia de público, de ser unha das mellores datas para a hostelería carballiñesa, pasou a pasar case desapercibido estes últimos anos.

A esta 41 edición asistíu o presidente do Goberno galego, Alberto Núñez Feijóo, e compartiu parte da xornada coas persoas chegadas de toda Galicia que se deron cita no parque municipal carballiñés para desfrutar dun día de convivencia e diversión. Tamén asistíu a conselleira de Política Social, Fabiola García.

A conselleíra afirmou durante a súa intervención que na actualidade “ser maior en Galicia é unha oportunidade excelente para vivir como desexamos”, e garantiu o compromiso da Xunta de continuar a traballar para que todos “sexamos libres para decidir como queremos facernos maiores”.

Neste sentido, reafirmou a aposta da Administración autonómica por iniciativas que promovan o envellecemento activo, con festexos como este e con diferentes programas como o de benestar en balnearios e talasos, que oferta máis de 1.000 prazas en 16 instalacións deste tipo na nosa comunidade; ou o voluntariado sénior, para que as persoas maiores teñan máis oportunidades de colaborar en proxectos solidarios.

Así mesmo, a conselleira de Política Social destacou as alternativas das que dispoñen hoxe en día as galegas e galegos de máis idade para facerse maiores nas súas casas ou nas súas parroquias, tal e como é o seu desexo maioritario. Isto é posible grazas ao reforzamento de servizos como a Axuda no Fogar, a Teleasistencia ou Xantar na Casa; así como coa creación das Casas do Maior, pequenos centros de día totalmente gratuítos no rural. Tamén se referiu á maior oferta de prazas públicas en residencias para aqueles que prefiren esta opción.

Entrega de agasallos

Como en edicións anteriores, na Xuntanza distinguíronse a diferentes centros e organizacións polas actividades que levaron a cabo ao longo de todo o ano. Nesta ocasión, os galardóns recaeron en dúas asociacións de pensionistas e xubilados da provincia de Lugo: a de Santa Isabel, en Outeiro de Rei, e a de Baleira; no voluntariado dos centros sociocomunitarios da provincia pontevedresa; e nos centros sociocomunitarios de Ferrol e do Carballiño.

O programa da xornada completouse con diferentes actividades, como música, baile, xogos populares, unha exhibición de coreografías ou a entrega de agasallos, entre outras.

Por segundo ano consecutivo e ante o éxito do pasado ano, o Centro Comercial Aberto promove para este sábado, 22 de xuño, un Shopping Day no que participarán 31 establecementos comerciais.

En horario de 10,00 a 14,00 h., e de 17,00 a 21,30 h., estes establecementos permanecerán abertos ao público ofrecendo descontos e participacións para entrar no sorteo de 300 euros en vales de compra ou para degustar pinchos en dez locais hostaleiros asociados ao CCA.

Durante toda a xornada, a partir das 10,30 h., en que terá lugar a inauguración na Praza Maior, haberá animación de rúa con charangas, dj, zancudos e atraccións infantís, así como catro desfiles pola mañá e tres pola tarde que se celebrarán nas rúas céntricas da vila.
Nesta iniciativa participan establecementos de todos os sectores do comercio: moda infantil, xuvenil, de home e muller; zapaterías, complementos, librerías, xoierías, etc…

Diego Fernández felicitou ao CCA e aos establecementos por promover esta iniciativa encamiñada a dinamizar o comercio e as compras, e ao mesmo tempo dar animación na vila e atraer aos visitantes da comarca. Neste sentido, fixo un chamamento á veciñanza para que participe nas actividades programadas e aproveite para realizar compras de produtos de tempada con descontos.

Noelia Mares, xerente do CCA, asegurou que a boa experiencia do pasado ano facía albergar un bo día para o comercio no Shopping Day deste sábado, e dixo que se facía durante toda a xornada porque se abrían máis posibilidades tanto para os clientes como para realizar actividades.

Recordou que o comercio local era de gran calidade, e que valía a pena facer compras neste día, xa que ía ser como un adianto das rebaixas do verán. Agradeceu a colaboración da Axencia Luena, que se encargará de organizar os sete desfiles previstos, e ao club de patinaxe Fénix, que ofrecerá unha exhibición.

Finalmente, dixo que era unha festa do comercio de cara aos clientes, e que por eso esperaba unha gran participación e un do día de ventas.

O alcalde do Carballiño Franscico Fumega deu a coñecer no transcurso dunha intervención nesta emisora de radio o reparto das delegacións de competencias entre os oito concelleiros e concelleiras que o acompañan nesta nova etapa municipal, agora con maioría absoluta na corporación carballiñesa.

O propio alcalde seguirá asumindo a área de Urbanismo e Economía.

 Manuel Dacal será primeiro tenente de alcalde, e concelleiro de Turismo, Industria, Comercio e Promoción do Emprego.

Rita Soto segunda tenente de alcalde, e concelleira de Medio Ambiente.

Manuel Sotelo, terceiro tenente de alcalde e concelleiro de Persoal, Policia Local e Protección Civil.

Silvia Baranda, concelleira de Deportes.

Diego Fernández, concelleiro de Cultura e Participación Cidadán, ademáis exercerá como Portavoz do Grupo Socialista.

Guadalupe Sobrado, concelleira de Servizo Sociais e Educación.

Rosa Fuentes, concelleira de Medio Rural.

Rogelio Otero, concelleiro de Obras.

A Denominación de Orixe Ribeiro viviu a súa grande xornada anual coa entrega dos seus premios que tivo lugar no histórico Mosteiro de San Clodio, en Leiro, ante uns 250 convidados entre os que estaban profesionais do sector, distribuidores, xornalistas e autoridades.

O presidente do Consello Regulador, Juan Manuel Casares, anunciou que o organismo contará por fin cunha nova sede, tras lograr un acordo coa Xunta.

“Unha vez recibido o plácet da Xunta de Galicia, nos vindeiros días asinaremos un novo acordo de cesión das instalacións para a nova sede por 35 anos. Unha vez asinado, un proxecto pagado integramente con fondos propios do Consello, dotaranos dun local á altura da Denominación de Orixe máis antiga de Galicia”, apuntou Casares.

No seu discurso tamén tivo palabras para a reivindicación: “Neste contexto eu reivindico o papel do Consello Regulador como axente vertebrador e de cohesión do territorio. Xestionamos calidade, xestionamos promoción pero tamén xestionamos a vida das persoas porque xeramos oportunidades para o desenvolvemento dunha comarca esencialmente vitivinícola”.

O presidente do C.R.D.O. Ribeiro animou a todos os elos da cadea de valor do viño na comarca do Ribeiro a traballar xuntos para impulsar esta comarca vitivinícola. “Somos Miño, Arnoia, Avia; somos adegas, cooperativas, colleiteiros, viticultores. En resumo, somos bacelos da mesma cepa de treixadura e a nosa misión é colocala onde lle pertence por dereito; por historia e por caste”, destacou Juan Manuel Casares.

Un serán de premios

O evento serviu para desvelar os gañadores nas distintas categorías dos galardóns para viños, designados nunha cata cega por un panel de expertos.

Pazo do Mar Expresión 2018, de Pazo do Mar é o “Mellor viño branco de adega”, sendo os finalistas Pazo Tizón 2018 (Pazo Tizón); Alter 2018 (Priorato de Razamonde); Catro Parroquias 2018 (Loeda); Farnadas 2018 (Pazo de Vieite); e Antonio Montero Autor 2018 (Vinos Antonio Montero).

O galardón ao “Mellor viño branco de colleiteiro” recaeu en Finca Teira 2018, de Manuel Formigo de la Fuente, acompañado como finalistas por Libro 2018 (Antonio Cajide Gulín); Casal de Paula 2018 (Emilio Docampo Diéguez); Mal raio te parta 2018 (Javier Estévez Abeledo); Manuel Rojo 2018 (Adega Manuel Rojo); e Lagar do Merés 2018 (José Meréns Martínez).

O “Mellor viño tinto de adega” é Alberte 2018, de Bodegas Nairoa. Pola súa parte, Alter 2018 (Priorato de Razamonde); Viña do Campo Mencía 2018 (Docampo); Preto de Leive 2017 (Leive Ecoadega); Divino Rei 2018 (Castro Rei); e O Cotarelo 2018 (Benigno Ríos Mosquera) foron finalistas.

E, o “Mellor viño tinto de colleiteiro” é Mónica Albor Mencía 2018, de Mónica Albor López. Ademais, Elisa Collarte 2018 (Elisa Collarte Bernárdez); Verbas 1917 2017 (Eva Bermúdez Pulleiro); Viña Carpazal 2018 (José Antonio Rodríguez Fernández); Celme do Souto 2017 (Adegas Celme); e Manuel Rojo 2017 (Adega Manuel Rojo) tamén chegaron á cata final.

Durante a gala tamén se entregaron os galardóns honoríficos do Consello Regulador.

O presidente de Paradores, Óscar López, agradeceu o “Premio de Honra”, recollido das mans do presidente da Xunta, Alberto Núñez Feijóo. O galardón quere agradecer a profesionalidade, calidade e máis o compromiso da empresa pública coa riqueza vitivinícola española e, en especial, cos viños do Ribeiro.

O “Premio á mellor tarefa de Comunicación” aos programas da Televisión de Galicia Labranza e O Agro salienta o esforzo do seu equipo e do conxunto da CRTVG por informares tanto as novidades como da situación global do mundo agro alimentario, nunha traxectoria que supera xa os 27 anos e os 1.500 programas.

Así, Juan Manuel Casares agradeceu á CRTVG o seu traballo na construción da identidade de Galicia.

“Síntome orgulloso do papel dun medio público na construción do país; síntome feliz polo seu labor diario na conservación do idioma; síntome agradecido por facerdes cada día unha Galicia máis de seu”, expuxo o presidente do C.R.D.O. Ribeiro.

Tamén tomou a palabra María Isabel Mijares, Premio “Muller e Viño” 2019 polo seu traballo senlleiro durante décadas en campos como a calidad, a xestión, a formación ou a difusión da viticultura.

Emilio Rojo Bangueses recolleu o “Vida entre Vides”. O Consello quere destacar a súa aposta polo carácter propio nos viños; as castes autóctonas; e o coñecemento profundo da riqueza e da pluralidade enolóxica coas que contan as terras do Ribeiro.

Na cerimonia tamén foron premiados tres establecementos. La Sucursal (Lugo) recibiu o galardón a “Mellor tenda especializada – viñoteca”; La Molinera (Lalín), o de “Mellor servizo de viño en restaurante”; e a Taberna A Curva (Portonovo) foi distinguida como “Mellor taberna – Bar de viños”

A D.O. Ribeiro ten unha extensión de 2.220 hectáreas de vide situadas nos concellos de Arnoia, Beade, Boborás, Carballeda de Avia, Carballiño, Castrelo de Miño, Cenlle, Cortegada, Leiro, Ourense, Punxín, Ribadavia, San Amaro e Toén. Un territorio de grande diversidade vitivinícola onde traballan uns 5.700 viticultores.

Produce viños brancos e tintos xenuínos con variedades autóctonas locais: Treixadura, Loureira, Sousón, Brancellao… Así como o Tostado do Ribeiro, un viño naturalmente doce de longa tradición na zona que data do século XIX. A produción da colleita 2018 na Denominación de Orixe foi de 9 millóns de quilos de uva. O 92% da produción total é de viño branco e o 8% de viño tinto.

Por vixésimo séptimo ano consecutivo, a Festa das Parroquias volta a celebrarse como unha xornada de irmandade entre as dezaseis parroquias que conforman o municipio do Carballiño, e nesta edición o fai na parroquia de Arcos, cuxa asociación veciñal tomou as rendas da festa ante a falla de propostas das outras asociacións.

O evento foi presentado esta mañá nun acto ao que asistiu o alcalde, Francisco Fumega; a concelleira Rosa Fuentes, que asumirá a área de Medio Rural, e a representante da Asociación de Veciños de Arcos, Alsira Fernández.

Francisco Fumega resaltou o carácter participativo desta celebración, da que dixo é un nexo de unión entre as distintas parroquias do Carballiño.

Rosa Fuentes amosou o compromiso do concello por seguir poñendo en valor o medio rural e emprender iniciativas que axuden a mellorar a vida da xente nas parroquias, e por eso esta festa de irmandade seguirá contando coa nosa colaboración.

Alsira Fernández, como representante da Asociación de Veciños de Arcos, amosou o seu orgullo por acoller de novo esta festa, posto que ningunha outra asociación a quere. Expuxo o programa e anunciou a venta de de tarxetas para o xantar no restaurante A Fuchela, no bar Casablanca, na carnicería Pérez de Arcos ou na propio Asociación de Veciños de Arcos.

O prezo da tarxeta é de 25 euros e poderán mercarse ata o mércore 3 de xullo. O menú consiste en: empanada, pulpo á feira, carne ao caldeiro, sobremesa, pan, viño e café.

O programa comezará ás 12,30 h., coa celebración da misa na igrexa de Sta. Mª de Arcos. Ás 13,00 h. haberá sesión vermú a cargo do grupo folk Feitizo de Pau. Ás 14,30 h., será o xantar. Ás 16,30 h., animación musical polo grupo Cotovías de Maside, e comezo da festa infantil con área multixogos (xogo tragabolas, tiro con arco, xogos de raqueta e pelota, xincanas), e ás 18,00 h. festa da escuma.