A Consellería de Medio Ambiente, Territorio e Vivenda colaborará co concello de Boborás na execución dunha actuación de humanización de rúa no marco do chamado Plan hUrbe.

O Consello da Xunta deu luz verde onte ao convenio de colaboración co rexedor deste municipio e en virtude dos cal a Xunta investirá case 270.000 euros –o 70% do custo total das obras- mentres que o 30% restante correrá a cargo do concello.

A Delegada Territorial da Xunta, Marisol Diaz Mouteira, achegouse ata Boborás onde analizou coa tenente alcalde, Patricia Torres, os traballos que se executarán ao abeiro do convenio, co que se ratifica e concreta o compromiso do Goberno galego con este concello.

O proxecto ten por obxectivo a recuperación dunha parte do espazo do núcleo tradicional de Boborás, identificado como rúa Cristobal Colón. O convenio establece un orzamento por importe de máis de 383.000 euros, dos cales a Xunta achegará un 70%.

O Irixo ten a maioría das súas fontes caídas en total abandono e desleixo e en moitos casos case desaparecidas ante a pasividade do goberno municipal, denuncian dende o PSdeG.

Algunhas incluso non se da chegado pola maleza, ou non existe un acceso pavimentado que permita con facilidade chegar a elas... fontes en pobos que en moitas ocasións os propios veciños foron arranxando ante "a falta de iniciativa e parálise do goberno municipal", advirten.

Fontes ás que tampouco se analizan as súas augas como xa puxo se manifesto o portavoz socialista ante o pleno da corporación municipal.

"Lamentable que o Grupo de goberno despilfarre miles de euros en cousas non necesarias e non sexa quen de conservar o patrimonio e neste caso de conservar, rehabilitar e poñer en valor as fontes dos distintos pobos do noso concello", afirman.

O Portavoz do Grupo Municipal Socialista do Concello de O Irixo, Iago Fariñas Valiña, presentou o pasado 20 de febreiro, unha MOCIÓN PARA A POSTA EN MARCHA DUN PLAN DE REHABILITACIÓN, CONSERVACIÓNE POSTA EN VALOR DAS FONTES DOS POBOS DO IRIXO, con esta exposición de motivos:

PRIMEIRO.- Que é responsabilidade do Concello de O Irixo a recuperación e posta en valor do patrimonio deste concello para evitar que éste se deteriore de forma irremediable e incluso chegue a desaparecer co paso do tempo.
Que o noso concello como administración máis próxima ó cidadán, debería traballar arreo polo futuro e o progreso do noso concello e para proporcionar unha mellor calidade de vida e benestar dos seus veciños e veciñas.

SEGUNDO.- Que como xa temos manifestado en outras ocasións, a recuperación e conservación do patrimonio do concello debe ser,ademais, unha obriga canto menos moral dos dirixentes deste concello;na actualidade esta obriga tradúcese en deixadez e abandono deste noso patrimonio.

TERCEIRO.- Que dentro de ese patrimonio, que ademais ten unha función en moitos casos importante ou esencial para a vida da nosa veciñanza, encóntranse as nosas fontes, as fontes que os nosos pobos dende tempo inmemorial teñen para uso dos seus veciños. Moitas destas fontes, na actualidade, caídas en total abandono e desleixo e en moitos casos case desaparecidas ante a pasividade do goberno municipal.

CUARTO.-Que hai ó longo de todo o noso concello moitas fontes abandonadas, e a algunhas incluso non se da chegado pola maleza, ou non existe un acceso pavimentado que permita con facilidade chegar a elas... fontes en pobos que en moitas ocasións os propios veciños foron arranxando ante a falta de iniciativa e parálise do goberno municipal.

QUINTO.-Fontes ás que tampouco se analizan as súas augas como xa pedimos noutra moción traída a este pleno, pero en algúns casos xa da o mesmo, porque non se sabe onde está a fonte por atoparse tapada pola maleza ou sendo imposible o acceso á mesma.

SEXTO.-Que é lamentable que o Grupo de goberno despilfarre miles de euros en cousas non necesarias e non sexa quen de conservar o patrimonio e neste caso de conservar, rehabilitar e poñer en valor as fontes dos distintos pobos do noso concello.

SÉTIMO.- Que existen fontes no Irixo desaparecidas entre a maleza e sen acceso, a maioría en estado lamentable, incluso algúns casos para coller auga hai que poñerse de xeonllos ou non dispoñen dun acceso digno nin accesible. Outras, ademais, debido a anos de abandono,fixeron que incluso perderan o seu manancial.
Os socialistas creemos que se debe facer unha intervención urxente para a conservación e mantemento das nosas fontes para que recuperen todo o seu esplendor e restablecendo así e poñendo en valor unha peza máis do gran patrimonio do noso concello para orgullo dos veciños e veciñas de O Irixo e desfrute de toda a veciñanza.

Que dito todo o anterior, o Grupo Municipal Socialista do Concello de O Irixo presenta para a súa consideración e dada a importancia da conservación e posta en valor das fontes dos pobos do Irixo como parte tamén do patrimonio do noso concello, insta ó Pleno municipal á adopción dos seguintes ACORDOS:

1º.-Que o Concello de O Irixo poña en marcha un plan de rehabilitación, conservación e posta en valor das fontes dos pobos do Irixo.

2º.-Que se solicite das distintas administracións unha subvención destinada para a posta en marcha desta iniciativa.

O exalcade e exlider do PSdeG presentou nun hotel de Ourense o seu novo proxecto político "Espazo Común", coa idea de presentar un mínimo de 20 candidaturas na provincia nas vindeiras elección municipais do 26-M.

Pachi Vázquez asegurou que a nova formación política conta cunha base de 400 persoas que xa están involucrados no proxecto, entres eles os excooncelleiros socialistas do Carballiño, Piñor, San Cristovo de Cea e San Amaro, no ámbito comarcal.

Tamén avanzou que non se presentará como candidato en Ourense pero non desbotou a posibilidade de facélo no Carballiño.

Mentres, o alcalde do Carbaliño Francisco Fumega aproveitaba unha intervención en COPE O Carballiño para referirse a posta en escea do "Espazo Común" manifestando que "o tempo a cada un vaille dando as razóns"

Fumega recordou que cando perdeu a confianza en Adolfo Nogueira e retiroulle as competencias delegadas como concelleiro de persoal, seguridade e promoción económica "foi porque tiña datos evidentes e xa o dixen no seu momento, de toda unha série de accións e de feitos que estaban nesta liña".

O rexedor municipal deu "por zanxado este tema" e manifestou sentirse moi a gusto no PSOE "coa xente que é de partido, que creen no partido e continúan no partido".

Eso si, admitíu que no caso de presentarse Pachi Vázque como rival para desputarlle a alcaldía será "unha situación que non me agrada, porque botamos anos traballando xuntos e ás veces pesa máis o persoal que o político, pero está claro que no político non podo desexarlle sorte".
 

A escultura é obra da artísta canteira Laura Rodríguez, e xa foi instalada na ubicación elexida, na Praza Maior do Carballiño

A escultura representa a figura dunha pulpeira con todos os elementos característicos do seu oficio: caldeira, táboa, pratos, aceiteira, pimenteira, tesoiras, pincho e, por suposto, un pulpo cocido.

Trátase dunha escultura realista de gran tamaño, colocada no xardín central da Praza Maior coa finalidade de que poida ter certa protección, xa que, se ben nun pricipio valorouse situala na parte alta da praza, fronte á rúa do Paseo, houbo que desbotar esta idea polo perigo que entrañaban algúns dos elementos da peza para os rapaces, así que, para maior seguridade, optouse por ubicala neste xardinciño.

Non cabe dúbida que as pulpeiras son as verdadeiras protagonistas dun dos oficios máis ancestrais e representativos da feira e do Carballiño, polo que este proxecto, que foi promovido polo alcalde, Francisco Fumega, ten un gran significado histórico e na actualidade, sendo como é O Carballiño un referente da tradición pulpeira en Galicia, en España e no mundo.

Os catorce establecementos hostaleiros integrados na Ruta das Tapas celebran este venres, 1 de marzo, unha nova xornada de degustación de pinchos que, nesta ocasión, están dedicados aos Sabores do Entroido.

O evento, xunto coa Ruta dos Mil, que é o concurso de disfraces de peñas que organizan para este próximo sábado vinte locais hostaleiros da vila, foi presentado este mediodía no xardín da Praza Maior, nun acto ao que asistiron o concelleiro de Turismo, Manuel Dacal; o concelleiro de Alternativa Veciñal, Bernardo García; a xerente do Centro Comercial Aberto, Noelia Mares; a representante da adega Pazo Tizón, e representantes dos mesóns, bares e restaurantes integrados nesta iniciativa.

Manuel Dacal amosou o seu agradecemento aos hostaleiros, ao CCA, á adega Pazo Tizón e ás demáis entidades e marcas comerciais que fan posible esta demostración da gastronomía local, e que nesta ocasión se dedica aos produtos do entroido. Dixo que era unha iniciativa que estaba a ter moito éxito, e que, de feito, estábase manifestando como un gran espectáculo gastronómico que atraía a moita xente da vila e tamén de fóra.

Noelia Mares recordou que a consumición dun pincho conleva a posibilidade de obter premios directos, e que na app “quedamosdetapas” ofrécese toda a información da oferta de cada un dos establecementos. Así mesmo, fixo fincapé na gran variedade e calidade das tapas que elabora a restauración carballiñesa, e que nesta ocasión leva por lema Sabores do Entroido. Convidou a disfrazarse e percorrer os locais hostaleiros tanto este venres como o sábado na Ruta dos Mil.

Finalmente, un representante dos hostaleiros convidou á cidadanía a achegarse aos locais e degustar os seus pinchos.

Guiso de entroido, cocido de entroido, filloas de cocido, brocheta de chourizo e cacheira, as dúas orellas (douce e salada) e outras variedades culinarias baseadas en produtos propios deste tempo de entroido poderán degustarse ao prezo de 1,50€ este venres a partir das 20,00 h., en calquera dos catorce locais integrados na Ruta das Tapas.

A Dirección Provincial do Partido nomeou a Comisón Xestora encargada de dirixir a Agrupación Socialista do Carballiño, unha vez que a demisión do exsecretario local Adolfo Nogueira provocou a disolución da Executiva Local do PSdeG-PSOE.

O secretario provincial dos socialistas, Rafael Rodríguez Villarino, confirmou nesta emisora de radio a composición da Xestora "integrada por militantes históricos do partido no Carballiño", subliñou. En ningún caso contaban ata o de aquí con resposabilidade orgánica no partido, nin tampouco ocupan cargos institucionais.

Como presidenta da xestora foi nomeada Doris Fernández, e completan a mesma en calidade de vocais, Carlos Fernández, Teresa González, Manuel González e Manuel Pérez. A xestora dirixirá o partido de forma transitoria ata a convocatoria electoral na Agrupación Socialista do Carballiño, que culmirá coa elección dun novo secretario local.

Alternativa Veciñal do Carballiño transfórmase en partido político e xa figura como tal inscrito no Rexistro de Partidos Politicos do Ministerio do Interior, a incrición ten data do pasado dia 18 deste mes de Febreiro no que andamos.

Faino baixo a nova denominación "Alternativa Veciñal En Común" e o seu ámbito territorial será autonómico, polo que podería presentarse ás eleccións municipais en calquera concello galego.

O novo partido fixa o seu domicilio social na Avenida do Parque nº 61 do Carballiño.

Os seus representantes legais son Maria Jesusa Álvarez Canitrot como presidenta e Manuel Nogueira Pérez, como vicepresidente.

Nas eleccións municipais de 2015,  Alternativa Veciñal presentouse ao amparo do partido instrumental SON, promovido polas Mareas Galegas, obtivera un concelleiro na corporación do Carballiño, Bernardo García.

Agora, crean a súa propia marca política que, según se recolle no artículo 1 dos estatutos, ademáis da denominación "A.V. En Común" poderá engadírselle o nome do respectivo concello.

O grupo popular no concello carballiñés trasladará en formato de moción esta proposta ao pleno da corporación municipal. Na expoosición de motivos, os populares fan un repaso ao inicio desta convocatoria festivo-gastronómica que o vindeiro dia 10 de marzo celebrará a súa 25 edición.

"Esta festa que comezou fai xa 25 anos, fixérase dunha forma simplemente presencial na contorna da Praza Maior, onde veciños e veciñas podían pasar a degustar a cachucha, pretendendo así, promocionar un produto típico en datas do entroido", recordan.

Unhos anos despois a celebración tiña lugar baixo carpa no Domingo de Entroido, organizábase un xantar, realizado por algúns dos restaurantes do pobo, no que unhas 300 persoas no mellor dos casos se reunían e daban boa conta da cachucha Foi con posterioridade no ano 2012 na edición XVIII, cumprindo a maioría de idade a Festa, cando transfórmase nun modelo máis participativo do sector da restauración, eliminando a carpa que limitaba ou número de comensais e ademais cambiabase a data para o domingo posterior ao do Entroido.

Foi a partir desa data do 2012, cando a Festa da Cachucha pasou a celebrarse fundamentalmente nos propios restaurantes do Pobo, que sendo apoiados polo Concello en animación, foi conseguindo ano tras ano, un éxito de asistencia nos propios locais, pasando así a ser unha festa popular, á que acuden miles de persoas tanto a degustar o cocido de cachucha como gozar das actividades programadas durante esa xornada.

Logo a partir do ano 2014 se lle incorporou, a parte da animación en rúas e locais, un desfile de entroido, incrementándose o atractivo turístico, enchendo de xente O Carballiño.

Así, dende o Grupo Popular, consideran que vale a pena tentar para esta festa, A Festa da Cachucha, a declaración de Festa de Interese Turístico Galego, toda vez que se dan os requisitos necesarios como son a antigüidade (máis de 20 anos), singularidade, arraigo, accións promocionais suficientes, valor cultural e continuidade no tempo.

A importancia de declarar a Festa da Cachucha como de Interese Turístico Galego, "basease na posibilidade de recibir achegas económicas da Xunta de Galicia, ser incluída en accións de promoción da propia Xunta, e planificar inversións materiais que melloren e beneficien ao evento", remarcan.

Por todo elo, o grupo municipal do Partido Popular vai pedir o acordo plenario para poñer en marcha o procedemento que consiga a declaración por parte da Xunta de Galicia, promovendo o correspondente expediente ante a Axencia de Turismo de Galicia.