Manuel Prado López (Boborás, 1958) optará a un novo mandato como alcalde de Beariz liderando a lista que o Partido Popular presentará neste concello, “pensando como o fixen sempre en ofrecer á miña xente os mellores servizos e proxectos”. Un candidato do que o presidente provincial, Manuel Baltar, destacou a súa capacidade para estar sempre ao carón dos seus vecinos “e ter a Beariz como máxima reivindicación”.

Prado López preside a corporación municipal desde 1983, ano no que decidiu dar un paso á fronte para traballar por un futuro mellor do seu concello. “En Beariz foi onde decidín facer a miña vida e daquela estimei oportuno que participar na vida política local era o mellor xeito de loitar polo meu concello”, explicou o candidato.

En todos estes anos foron moitos os obxectivos conseguidos, pero Manuel Prado xa está a pensar en novos retos cara un próximo mandato. O principal, afirma, “é sentar as bases que nos permitan fixar poboación, sen dúbida unha das prioridades que ten calquera concello do rural”. Con esa finalidade loitarán por poner en marcha o parque empresarial, como xeito de xerar riqueza e emprego no municipio, “aínda que tamén hai outros proxectos, como rematar o novo cemiterio municipal”.

Trala súa decisión de liderar de novo a lista popular en Beariz, López afirma que non se parou a pensar o sentir dos seus veciños, “que xa se demostra co apoio que nos outorgan nas eleccións, unha confianza que hai que gañar non cada catro anos, senón desenvolvendo un proxecto continuo, ao longo do tempo, que mellore a calidade de vida da xente”.

“Falar de Manuel Prado é falar dun grandísimo alcalde con vocación de servizo público”, subliñou entre tanto o presidente provincial, Manuel Baltar, para quen o seu traballo “se reflicte nas ocasións nas que conseguíu o pleno dos concelleiros da corporación”.

Ninguén pode dubidar, declarou Baltar, que o candidato “voltará a facer unha lista que contará co apoio maioritario da veciñanza, respaldando unha traxectoria marcada pola entrega, o compromiso e sobre todo a identificación con Beariz”. Lembrou Manuel Baltar que o candidato tamén preside a xunta local do Partido Popular, “o que fala da súa visión política”.

A Consellería de Medio Ambiente, Territorio e Vivenda eliminará un total de 16 puntos de vertido incontrolado (PVI) en San Cristovo de Cea. Así llo avanzou a conselleira Ángeles Vázquez ao alcalde do municipio, José Luis Valladares, con quen mantivo unha reunión de traballo para falar de varios asuntos e proxectos de interese en materia medioambiental.

As actuacións previstas, que comezarán nos próximos días e terán un custo estimado de 75.000 euros, consistirán na recollida, clasificación e retirada do material acumulado nestas zonas –fundamentalmente residuos procedentes de traballos de construción e demolición, plásticos, madeira, pneumáticos fóra de uso, aparellos voluminosos, etc- e na posterior revexetación dos solos mediante o estendido de terra vexetal e hidrosementeira.

Cómpre lembrar que este tipo de intervencións enmárcanse nunha campaña continuada da Xunta para identificar e erradicar estes focos, nos que se van acumulando residuos sólidos de distinta natureza co prexuízo que isto ocasiona para a contorna desde un punto de vista ambiental e estético. Coa limpeza dos PVI, perséguese minimizar e corrixir os impactos e a degradación ambiental orixinados por estes focos, logrando a integración do lugar coa contorna e eliminando o hábito entre a poboación de seguir depositando lixo nestes lugares.

Por outra banda, o rexedor tamén aproveitou a reunión para presentarlle á conselleira algún dos proxectos nos que traballa o seu equipo en materia de humanización de espazos urbanos. Neste sentido, Vázquez Mejuto comprometeuse a estudar posibles vías de colaboración co concello e lembroulle que esta mesma semana saíu publicada no DOG a convocatoria dunha nova orde de axudas, dotada con case 2,5 millóns de euros, para crear ou mellorar infraestruturas urbanas en concellos de menos 50.000 habitantes.

O teniente alcalde e concelleiro de Turismo, José Manuel Dacal, e o concelleiro de Cultura, Diego Fernández, asistiron hoxe en Fitur ao acto de presentación da campaña turística SABOR PROPIO 2019 do Xeodestino Turístico O Carballiño-O Ribeiro.

Ao acto tamén asistiron a secretaria de Turismo de Galicia, Nava Castro; a delegada da Xunta en Ourense, Marisol Díaz, o alcalde Leiro, a concelleira e Cultura de Boboorás,o presidente da Mancomunicade dos Concellos do Carballiño, e o presidente do consello regulador da D.O. Ribeiro, entre outros.

A Festa do Pulpo, a Feira do Viño do Ribeiro, a Festa do Pan de Cea, e outros eventos festivos e gastronómicos, así como demáis potencialidades destas comarcas, foron presentadas como principais reclamos desta campaña.

Dacal e Fernández aproveitaron esta feira de Fitur para reunirse con representantes do Consorcio de Turismo da Xunta, así como con diversos medios para seguir incidindo na promoción do turismo no Carballiño, cuxos pilares son o termalismo, a gastronomía e o patrimonio natural e cultural, segundo dixo na presentación José Manuel Dacal, que incidiu sobre todo na tradición pulpeira.

Neste senso asegurou que "se existe unha capital mundial do pulpo, esa é O Carballiño».

Amplísimo respaldo das familias á implantación da xornada contínua no CEIP Calvo Sotelo, unha vella demanda da comunidade educativa deste centro escolar de primaria e infantil.

Na xornada de votacións convocada pola Consellería de Educación celebrada este mércores 23 de Xaneiro acudiron a votar un total de 381 familas, das que 353 votaron a favor da xornada, o que representa o 78,10% do total de familias, 28 votaron en contra e 71 non participaron neste proceso.

Necesitábase o apoio do 58% do total do censo, que con este resultado superouse con moita claridade.

A conselleira de Infraestruturas e Mobilidade, Ethel Vázquez, quixo comprobar sobre o terreo o resultado do acondicionamento das rúas Casanova e do Centro Cívico, no Concello de Leiro, e destacou a mellora que supón para o contorno urbano, e a accesibilidade e seguridade nos percorridos dos seus veciños, cun investimento de 100.000 euros.

Vázquez Mourelle sinalou que esta actuación, que rematou hai unhas semanas, é hoxe realidade e un exemplo da suma de esforzos das Administracións autonómica e local, froito dun convenio de colaboración asinado entre Xunta e o concello. Nesta intervención a Administración autonómica achegou o 80% do investimento final, correspondendo ao concello financiar o 20% restante, e a contratación e execución das obras.

Explicou que esta actuación vén así a facilitar o tránsito peonil e rodado no treito inicial da rúa Casanova e tamén na rúa do Centro Cívico, co obxectivo de mellorar a mobilidade dos veciños e reforzar a súa seguridade viaria nestas zonas tan frecuentadas, xa que acollen importantes equipamentos, como o centro escolar ou o mesmo Centro Cívico, lugar de actividade e de encontros.

Concretou que os traballos do concello nestas 2 rúas permitiron a renovación do pavimento e aproveitouse a obra para revisar as redes de saneamento, ademais de deixarse acondicionada para a instalación de futuros servizos, telefonía, electricidade. Tamén se substituíu a iluminación, instalando luminarias máis eficientes.

Lembrou que estas intervencións dan continuidade a outras melloras realizadas polo concello hai algúns anos na praza municipal da Pontiña, e tamén en rúas do contorno, logrando unidade e continuidade no ámbito viario do núcleo de Leiro.

Avanzou que, de cara ao futuro, o departamento de Infraestruturas da Xunta ten previstas novas actuacións en materia de infraestruturas viarias neste municipio e no seu contorno.

Subliñou que, atendendo á solicitude do alcalde, se ten previsto acometer a limpeza da Ponte da Esperela, sobre o río Avia, na estrada autonómica OU-209. E indicou que o departamento que dirixe está a iniciar a tramitación necesaria, coa redacción dunha memoria valorada
 
A conselleira indicou ademais que tamén están licitadas obras de mellora do firme na estrada OU-504, que vai a Ribadavia e a Cea, cun investimento de 600.000 euros. E abundou en que, aínda que non se actuará no treito concreto da estrada ao seu paso por Leiro, estas actuacións se executarán ao longo deste ano e beneficiarán igualmente aos veciños de Leiro, que verán melloradas as súas comunicacións cara ás poboacións veciñas de Ribadavia e de Cea, remarcou.

Coa sinatura estos días dos correspondentes contratos coas empresas adxudicatarias, o concello resolveu os procedementos administrativos para a execución das obras de reforma das rúas Cuba, Brasil, Uruguay, Venezuela e República Arxentina, así como das rúas Alberto Vilanova, Aller Ulloa, Tellado, tramo da estrada a Treboedo e Carreira.

Estas obras, que comezarán a executarse no mes de febreiro, e que están incluidas no acordo subscrito polo Grupo Popular e o Grupo de Goberno na aprobación do orzamento municipal do 2018, suporán un investimento global de 385.739, 21 euros, que será financiado con fondos municipais.

Esta cantidade supón un aforro de 170.485,69 euros, con respecto ao presuposto de licitación, que era de 556.224,9 euros.
A reforma das rúas Cuba, Brasil, Uruguay, Venezuela e República Arxentina, que comunican a avenida Xullo R. Soto coa avenida do Balneario, conleva a substitución e mellora da rede de abastecemento, beirarrúas e asfaltado. Estas obras foron adxudicadas en 270.057,95 euros.

No relativo ás rúas Alberto Vilanova, que é a rúa do centro de saúde, Delegación de Facenda e Instituto nº 1, así como ás rúas Aller Ulloa, Tellado, tramo da estrada a Treboedo e Carreira, as obras de reforma consistirán na substitución e mellora da rede de abastecemento e asfaltado. A adxudicación realizouse en 115.681,26 euros.

Así mesmo, está previsto adxudicar con carácter inmediato as obras da continuación da beirarrúa na avenida do Parque cara ao Instituto Chamoso Lamas, do aceso ao instituto, campo da festa e vial á igrexa da parroquia de Mesego.

Ricardo Perea Fernández (Carballiño, 1967) encabezará a lista que o Partido Popular presentará no Concello do Carballiño para as eleccións locais de maio, co obxectivo de recuperar a alcaldía e “procurar novas oportunidades e mellores servizos para que os carballiñeses sigan a facer o seu proxecto de vida na vila e no concello”. O Partido Popular, dixo o seu presidente provincial, Manuel Baltar, saúda a incorporación do candidato á vida política local e afirma que “os populares imos darlle a O Carballiño un proxecto que ofreza xestión, que xere orgullo de pertenza e pise forte no contexto provincial”.

Abogado de profesión, Ricardo Perea hai anos que milita nas filas do Partido Popular do Carballiño, cunha activa participación na xunta local, “onde os meus compañeiros foron os que me animaron a aceptar o número uno da lista e aos que lles teño que agradecer esa confianza, comezando por Argimiro Marnotes –portavoz municipal do PP- que foi de quen partiu este proceso de renovación, un xesto que lle honra e ao que terei que responder cos votos dos veciños”.

Consciente da responsabilidade que asume, o candidato sabe que lle agarda “un gran traballo e dedicación para os carballiñeses, porque toda renovación, máis aló das caras, xera novas ilusións entre a xente, novos proxectos e novas formas de facer as cousas, aínda que os obxectivos sexan os mesmos”.

Neste sentido, Perea Fernández ten moi claro que o seu programa electoral vai ter a mesma meta pola que sempre loitou o PP do Carballiño, que non é outra que xerar as oportunidades necesarias para que os veciños sigan a vivir na vila e no concello.
O candidato aposta primeiro polo desenvolvemento económico “buscando as condicións para que se poda traballar no Carballiño dignamente, pero iso so non chega, senón que tamén a sociedade actual esixe outras cousas como a conciliación laboral e familiar con suficientes servizos para os fillos, máis oferta cultural e de deportiva para os mozos e moito máis que festa para os maiores”.

O presidente provincial, Manuel Baltar, destacou pola súa banda que o candidato é “unha persoa namorada do Carballiño e que ao seu carón terá un gran equipo e ao mellor partido, que ven de gobernar neste concello na pasada lexislatura”.

A xente, engadiu Baltar, “tivo a oportunidade de comprobar nestes catro anos o que signfica ter un partido forte que lles goberne ou outras cousas que nin sabemos o que deron de si”.

A candidatura de Ricardo e a súa lista, afirmou o presidente dos populares ourensáns, “vai ofrecer aos carballiñeses un proxecto político fiable, cun equipo compacto e onde dará cabida á participación, como unha administración esponxa que recolle as inquedanzas dos seus”.