Manuel Vázquez Fernández “Casalta” (Punxín, 1941) volverá a encabezar a lista do Partido Popular en Punxín para as eleccións locais de maio, optando así a un terceiro mandato “e revalidar o apoio que sempre obtivo da veciñanza, cuns magníficos resultados que responden ao seu carácter humilde e traballador a prol do seu concello”, afirmou o presidente provincial, Manuel Baltar, tras facer oficial a súa candidatura.

Vázquez “Casalta”, á fronte do Concello de Punxín desde 2011, agradeceu as mostras de apoio recibidas para liderar de novo a lista popular, tanto por parte dos seus veciños como do propio partido, lembrando que así sucedeu “cando fun concelleiro nos inicios da democracia e, logo, trala miña xubilación, cando me convenceron para optar á alcaldía”.

O candidato agarda que o traballo feito ata agora “se reflicta nas urnas e nos permita consolidar os logros alcanzandos neste tempo, coa vista posta para un próximo mandato en seguir desenvolvendo un dos nosos potenciais como é o termalismo, o que sen dúbida conseguiremos co apoio da Deputación que sempre tivemos”.

“Casalta” apuntou ademais a súa total confianza nas persoas que lle veñen de acompañar no goberno local, afirmando que a súa intención “é seguir contando co meu equipo”.

“Máis que alcalde, o candidato é o primeiro veciño de Punxín, unha persoa moi apreciada, humilde e traballadora, razóns do seu éxito”, declarou pola súa banda o presidente provincial, Manuel Baltar, para quen “non cabe dúbida da súa lealdade e compromiso, primeiro con Punxín, logo co partido e por suposto con Ourense”.

Para os populares, engadiu Baltar, “é unha gran noticia que o candidato se atope con forzas, e telas dabondo, para afrontar un mandato máis no que seguir a realizar ideas e proxectos, nun concello estratéxico para a provincia no ámbito termal”.

A denuncia foi presentada esta mañá no Xulgado nº 1 do Carballiño, que agora deberá resolver sobre a admisión a trámite da mesma, que podería abrir un novo capítulo xudicial polas supostas irregularidades na política de contratación de persoal no concello carballiñés.

Alternativa Veciñal ve indicios dunha presunta prevaricación en base á "formalización e concatenación de contratos no concello do Carballiño" entre 2011 ata a actualidade, durante os mandatos dos alcaldes Argimiro Marnotes e Fracisco Fumega.

A continuación transcribimos o comunicado de AV no que da conta da presentación desta denuncia:

O obxectivo de Alternativa Veciñal neste mandato foi conseguir que o Concello do Carballiño preste os mellores servizos ao menor custe para os contribuintes.Para elo presentou no 2015 unha moción ,que foi aprobada, pola que se recuperarían todolos seervizos externalizados asegún canducase a concesión.

Para elo é necesario ter personal suficiente e preparado para levar a cabo as tarefas do traballo diario.O que nun principio parecía factible e que iba a haber colaboración por parte do goberno en minoría de Paco Fumega ,non resultou asi. Todo se volveron atrancos e desdecirse do aprobado.Así a recuperación do servizo de Recadación, no que dúas auditorias detectaron perdas millonarias por prescripción de taxas,non foi acometido nin se dotou ao concello do personal axeitado.O mesmo ocurriu co Servizo de Axuda no Fogar(SAF) ou Bó Día Familia, que a día de hoxe siguen con xestión privada.

Tardaronse 3 anos en elaborar unha Relación de Postos de Traballo(RPT),pagada a unha empresa allea ao Concello, e que non resolveu os problemas de personal e organización como se pretendía.Foi un corta e pega do anterior coa finalidade de non mover ningún dos intereses creados a nivel laboral, e incluso con diversas alegacións por parte do personal por discriminación salarial a igual traballo.Por elo Alternativa Veciñal presentou un contencioso administrativo contra esa RPT .Nesa RPT entraron unhas 25 personas por resolución xudicial dado que habían concatenado varios contratos laboráis por obra.Se a iso engadimos os máis de 60 que entraron por ese método en tempos do alcalde Manuel Vázquez e outros , completamos o organigrama irregular a hora de acceder ao traballo no Concello do Carballiño, nunha plantilla actual de aproximadamente 126 personas.

A lei é crara no que respecta as responsabilidades neste tipo de contratos: “Os órganos competentes en materia de personal de cada unha das Administracións Públicas…velarán para evitar calquer tipo de irregularidade na contratación laboral temporal que poida dar lugar á conversión dun traballo temporal en indefinido non fixo”(Lei3/2017 de 27 de Xuño, de Orzamentos Xerais do Estado para o ano 2017).

O Xulgado nº1 do Carballiño valorará se houbo prevaricación administrativa na formalización e concatenación de contratos no noso Concello dende o 2011.Temos indicios de que nos mandatos de Argimiro Marnotes e Paco Fumega houbo neglixencia á hora de permitir a concatenación de contratos e suxerir a presentación de denuncias contra o Concello por parte dos interesados para ser incluidos por este sistema no organigrama laboral da entidade municipal.

Foron moitos os intentos por parte de Alternativa Veciñal da darlle unha solución política acorde coa lexislación vixente ao tema laboral , non recibindo máis que descalificacións e denegando información por parte do grupo de goberno, principalmente do seu responsable de personal, Sr. Adolfo Nogueira.Este é o único camiño que nos deixaron .

O presidente da Deputación de Ourense, Manuel Baltar, e o alcalde de Punxín, Manuel Vázquez "Casalta", asinaron no Pazo Provincial un convenio de colaboración entre ambas entidades a través do cal a Deputación de Ourense fará posible un novo acceso á zona termal de O Bañiño, en Punxín.

A colaboración do goberno provincial con estas actuacións xa figuraba nos orzamentos da Deputación de Ourense para o ano 2019, aprobados na sesión plenaria correspondente ao mes de setembro do 2018.

Trala reunión, Manuel Baltar destacou o apoio da Deputación de Ourense en materia de "termalismo, de mellora das comunicacións, de acondicionamento de espazos naturais e de atracción turística en actuacións como as que hoxe facemos realidade a través da sinatura deste convenio".

A titular do Xulgado de Instrución número 2 do Carballiño da por rematada a investigación sobre as contratacións de traballadores realizadas no Concello do Carballiño entre os anos 1999 e 2011, unha causa na que se encotran en calidade de investigados os exalcaldes Pachi Vázquez e Carlos Alberto Montes, asi como 3 exconcelleiros socialistas que formaron parte da corporación entre os anos anteriormente citados.

A Xuiza acorda neste auto que se siga a causa contra os cinco investigados polos feitos que se lles imputan fosen constitutivos de cinco delitos de prevaricación continuada.

A decisión xudicial foi dada a coñecer na tarde deste martes por parte do Tribunal Superior de Xustiza de Galicia.

Neste mesmo auto a xuíza decretou o sobresemento provisional sobre a presunta falsedade documental atribuída a Carlos Montes, tamén que o concello do Carballiño teña que personarse na causa como responsable civil subsdiario.

A xuiza instrutora determina que hai indicios de que os investigados, no exercicio dos seus cargos, subscribiron nos seus sucesivos períodos de mandato «un gran número de contratacións de persoal laboral de duración determinada para o desempeño de labores de competencia municipal». Concretamente foron sesenta os contratos de traballadores no concello do Carballiño que se realizaron durante eses anos e que foron obxeto desta investigación a instancias da Fiscalía.

Foron contratos temporais que acabaron converténdose en indefinidos que realizaron os exalcaldes e exconcejales dos gobernos socialistas sen atender, presuntamente, « aos principios de igualdade, mérito, capacidade e publicidade que deben inspirar a contratación pública», según manifesta o auto. Tamén se recolle no auto que os investigados, supostamente, coñecían «as advertencias e reparos de legalidade realizados en ocasións pola interventora e o secretario», recolle a instrutora, quen apunta que en ningún dos casos pediron «informes sobre a legalidade das contratacións que efectuaban».

A instructora tamén suscribe no auto que non puideron encontrarse os expedientes «da inmensa maioría dos contratos obrantes na causa», a pesar das procuras instadas polo xulgado ou o TSXG.

Non obstante, a xuíza aprecia indicios que apoiarían algúns dos argumentos utlizados polas defensas, que alegaron a inexistencia dunha regulagación específica dos procedementos de selección de persoal laboral temporal ao servizo da administración local antes do ano 2007.

A titular do Xulgado de Primeira Instancia e Instrución número 2 do Carballiño dá con este auto por concluida a instrución e acorda dar traslado ao Ministerio Fiscal e ás acusacións personadas para que no prazo de dez días formulen escrito de acusación, solicitando a apertura de xuízo oral, o sobresemento da causa ou de maneira excepcilnal a práctica doutras dilixencias complementarias.

O auto non é firme, xa que contra él cabe recurso, ante o propio xulgado do Carballiño e a Audiencia Provincial de Ourense, según aclara o Tribunal Superior de Xustiza de Galicia.

O gaiteiro e compositor oriundo de O Carballiño, comezou o 1 de xaneiro de 2018 o reto de compoñer e publicar de forma gratuíta en redes sociais unha peza musical ao día, con data de finalización en 31 de decembro de dito ano, o que bautizou como #composicion365 e que superaron as 40000 descargas.

Este proxecto foi presentando numerosos obxetivos, entre os que destacaban os didácticos, xa que aproveitaba para escribir pezas didácticas para os seu alumnos das diferentes escolas de O Carballiño, Boborás, Cea, Ourense, O Porriño e A Cañiza onde imparte aulas de música tradicional, ou os facía partícipes das gravacións das mesmas.

Durante varios meses, ofreceu a posibilidade de adicar as pezas a aqueles que lle propuxeran catro notas de comezo para a respectiva canción, facendo así un subreto #4noteschallenge #reto4notas, que consistía en elaborar unha peza a partir das 4 notas que lle propoñían, que acadou bastante éxito por parte do público.

Asemade, algunhas destas pezas foron gravadas por músicos de renome como David Bellas (Galiza), Santiago Molina – Santigaitero (Bos Aires), Brighde Chaimbeul (Escocia), Rodrigo Joglar e Javier Menéndez (Asturies), Yuki Kojima (Xapón), Tiago Morais (Portugal), Rémi Decker (Bélxica), Luis A. Pedraza (Zamora), René Stauffenegger (Suiza), Efraím Díaz (Lugo.

O mundo da composición chamoulle a atención xa de ben novo, e é que dentro do seu catálogo privado atopamos a primeira peza escrita con nove anos, e durante estes últimos anos ten publicado pezas da súa autoría coas editoriais Edicións do Cumio, Dos Acordes, a produtora audiovisual Noveolas, así como varios traballos autoeditados por el mesmo (Muiñeira do Pulpo, 2018) ou por diferentes bandas de indie das que foi partícipe nestes últimos anos.

Parte deste traballo, poderase ver reflexado no seu primeiro disco en solitario, que acaba de empezar a gravar, e que verá a luz durante os próximos meses, onde a música tradicional e folk, serán levados polo camiño das músicas urbanas actuais.

A Deputación de Ourense colabora cun estudo que analizará a situación socioeconómica do territorio que abrangue a Denominación de Orixe Ribeiro, así o explicou hoxe no centro cultural "Marcos Valcárcel", o presidente da Deputación de Ourense, Manuel Baltar, e o presidente da D.O. Ribeiro, Juan Manuel Casares. Esta iniciativa, que afondará polo miúdo na cadea de valor do viño e do enoturismo nos catorce concellos da provincia que forman parte desta Denominación, permitirá "analizar o territorio produtivo, os indicadores económicos, e tódolos recursos potenciais desta Denominación de Orixe, así como trazar un plan estratéxico para o sector que serva de folla de ruta para os vindeiros anos", explicou Manuel Baltar.

Neste mesmo sentido, o presidente da Deputación de Ourense destacou o compromiso do goberno provincial co sector vitivinícola de Ourense, eixo estratéxico da nosa economía, a través de numerosas mostras de colaboración como "as axudas directas para os Consellos Reguladores das catros Denominacións de Orixe da nosa provincia, que a Deputación de Ourense concede desde o ano 2016, para axudalos nas súas funcións e no desenvolvemento das súas competencias, froito do estudo do proxecto "Promercado" que presentamos no ano 2015 en colaboración coa Universidade de Vigo, centrado na posta en valor dos produtos endóxenos da nosa provincia, porque debemos buscar o futuro nas nosas raíces, nos produtos da nosa terra", explicou o presidente da Deputación de Ourense.

Así mesmo, a institución provincial colabora tamén puntualmente con "outras accións específicas de apoio á organización de Feiras do Viño e como colaboradores das catro Rutas do Viño, así como a colaboración nos últimos catro anos coa Evega en formación e transferencia ao sector vitivinícola en 16 accións formativas que beneficiaron a uns 1.000 alumnos", explicou Manuel Baltar.

O presidente do goberno provincial agradeceu a Juan Manuel Casares, como presidente da segunda Denominación de Orixe máis antiga de España, que contase coa Deputación de Ourense para colaborar con este proxecto "no que un grupo multidisciplinar, das tres Universidades galegas, avaliará e pescudará as posibilidades desta Denominación e marque a súa folla de ruta", sinalou o presidente da Deputación de Ourense.

Este estudo será executado por un grupo de investigación "Economía Agroalimentaria e Medioambienta. Desenvolvemento Rural e Economía Social" (ECOAGRAOSC) que coordinará Edelmiro López. O grupo estará constituído por dez mestres pertencentes ás tres Universidades Galegas, implicándose os departamentos das áreas de Economía, Socioloxía e Políticas Agraria, de Empresas e Marketing. "Este cadro de investigadores é unha garantía científica e académica do traballo que se vai a desenvolver", sinalou Juan Manuel Casares.

O estudo xorde da necesidade de facer "unha diagnose polo miúdo do que está a acontecer no tecido socioeconómico da nosa Denominación, e para elaborar un plan estratéxico que nos permita afrontar o futuro con garantías", explicou Juan Manuel Casares. Este proxecto implica tamén valorar a estrutura económica deste territorio co fin de obter as claves para o mellor aproveitamento de tódolos recursos patrimoniais, económicos e paisaxísticos da zona.

A Denominación de Orixe Ribeiro conta actualmente con 115 adegas, 5.700 viticultores e máis de 2.200 hectáreas de viñedos inscritas e "a principal diferenza que presenta a nosa Denominación, fronte ás demais Denominacións galegas, é que o viño na nosa comarca é o verdadeiro motor económico", matizou Juan Manuel Casares, quen dixo que "falar do viño de Ribeiro é falar dun produto senlleiro e bandeira de Ourense".