Corenta e oito establecementos comerciais e hostaleiros participarán este sábado, 9 de xuño, no Shopping Day (Día de Compras), que organiza o Centro Comercial Aberto do Carballiño.

En concreto, son 35 comercios dos sectores de moda infantil, home e muller, e moda íntima; deportes, zapatería, librería, xoiería, floristería, decoración e óptica, que ofertarán descontos en produtos de tempada, e entregarán unas papeletas polas compras que se realicen para poder degustar pinchos ou un café nalgún dos trece establecementos de hostalería incluidos nesta iniciativa, así como para participar no sorteo dun premio de 1.000 euros en vales de compra ou pases para os xogos inflables infantís.

Será unha xornada festiva que contará con animación musical, de patinaxe e danza en rúas e prazas, e incluso coa presencia de modelos que percorrerán os establecementos participantes.

A inauguración terá lugar ás 10,30 h., nunha carpa que se instalará na Praza Maior, onde se repartirán unas follas cos establecementos que participan, e a continuación terá lugar un pasarrúas a cargo do grupo de gaitas Os Tres Galeguiños.

Durante todo o día, dependendo das condicións meteorolóxicas, haberá exhibicións de patinaxe a cargo dos clubes Aehde e Fénix; de ballet, funky, zumba e bailes latinos a cargo da Escola Municipal de Danza; zancudos, así como de danza oriental a cargo da escola Enka. Tamén haberá DJs e un concerto do grupo Soul And Roll, a partir das 19,30 h., na Praza Maior.

Todos os establecementos participantes nesta iniciativa terán unha decoración chamativa nas fachadas con alfombras vermellas e globos de cores.

O evento foi presentado esta mañá pola xerente do CCA, Noelia Mares, e o concelleiro de Promoción Económica, Adolfo Nogueira.
Adolfo Nogueira felicitou ao CCA por esta nova iniciativa dirixida a suscitar o interese da veciñanza do Carballiño e da comarca para promover o comercio local, que é, según dixo, un dos eixos principais da economía carballiñesa.

Neste senso, destacou o labor que realiza o CCA, sobre todo do presidente, Julián Garriga; da xerente, Noelia Mares, do resto da directiva así como dos establecementos comerciais adheridos, que son a gran maioría deste sector.

Noelia Mares, ao igual que o concelleiro, animou aos veciños e veciñas do municipio e da comarca a aproveitar as ofertas que haberá ese día, así como optar ao premio de 1.000 euros ou obter agasallos como a degustación de pinchos ou café.

Ao respecto dixo que serán pinchos elaborados especialmente para ese día, e que a degustación de café farase no Mesón Os Portales, e será tirado polo campeón galego de baristas Javier Muradás.

Finalmente, agredeceu a colaboración do concello e da axencia de modelos Luena, así como dos clubs de patinaxe Aehde e Fénix, da Escola Municipal de Danza e da Escola de Danza Oriental Enka.

A Consellería de Economía, Emprego e Industria, en colaboración coa Fundación Instituto Cameral para a Creación e Desenvolvemento da Empresa (Incyde), pon en marcha a partir da próxima semana un novo curso de formación e asesoramento que apoiará a creación e consolidación de novos negocios por emprendedores e autónomos da comarca do Ribeiro.

Durante sete semanas os emprendedores participantes recibirán titorías personalizadas na sede da Mancomunidade IV do Ribeiro (lugar Fondal de Beade s/n), adecuadas ás necesidades dos proxectos empresariais que pretenden desenvolver. A formación ofreceralles unha visión global das distintas áreas funcionais dun negocio coa que poder determinar as oportunidades de mercado e desenvolver un plan de empresa propio. As persoas interesadas na formación poden inscribirse a través da web da Fundación Incyde.

Con estes cursos, a Consellería de Economía, Emprego e Industria prevé facilitar, durante este ano, formación e asesoramento a máis de 250 autónomos, emprendedores e empresarios, que desenvolven a súa actividade preferentemente nas diferentes comarcas afectadas polos incendios rexistrados en Galicia durante o ano pasado.

Unha vez rematados os cursos, os participantes poderán seguir accedendo ao asesoramento especializado ou titoría que precisen a través do Igape ou dos servizos do Igape, así como ás axudas do programa Galicia Emprende, ou a préstamos directos como os activados no novo programa de instrumentos financeiros innovadores (IFI) para financiar os seus investimentos.

O presidente da Deputación de Ourense, Manuel Baltar, visitou o concello de san Amaro, onde se reuniu co alcalde do municipio, Ernesto Pérez, e membros do equipo de goberno local.

Os representantes municipais e mailo mandatario provincial visitaron diversos proxectos desenvolvidos conxuntamente, froito da cooperación entre o goberno provincial e o concello de San Amaro, relativos ao ámbito das infraestruturas.

Na reunión valorouse moi positivamente o Plan de Empregabilidade e analizáronse novas actuacións para levar a cabo no municipio.

A praza de abastos comezará a campaña de verán este xoves, 7 de xuño, e rematará o 9 de agosto co sorteo dun televisior, un equipo de música, unha tablet, un teléfono móvil, un microondas, unha licuadora, unha aspiradora e unha caixa de viño Pazo Tizón.

Tamén está prevista a actuación o día 11 de agosto, víspera da Festa do Pulpo, do grupo de música tradicional galega Fetiche de Pau.
A campaña, que se desenvolverá co lema de “ENCHÚFATE COA PRAZA DE ABASTOS”, foi presentada esta mañá polo presidente da asociación de praceiros, Eligio González, e o concelleiro de Promoción Económica, Adolfo Nogueira.

Adolfo Nogueira destacou unha vez máis o traballo que leva a cabo a asociación de praceiros para promocionar a praza de abastos, así como todo o que se leva feito a prol da mellora das instalación nestes últimos anos, e asegurou que este tipo de ampañas estaban funcionando moi ben, ampliando a clientela e as compras no mercado municipal.

Por outra parte, incidiu na próxima conclusión do procedemento administrativo para a adxudicación dos postos vacantes da praza, e para o cal manterá unha xuntanza nos próximos días cos praceiros.

Eligio González tamén se referiu a esta cuestión dicindo que en canto se completen os postos baleiros, a praza de abastos do Carballiño sería unha das mellores de Galicia, e que de feito xa estaba recuperando unha boa parte do explendor que tivo antaño.

Reiterou o agradecemento ao concello e ao concelleiro polo interese amosado para mellorar e promocionar a praza de abastos, e cualificou a campaña de verán como unha das máis extraordinarias de cantas se levan feito.

A partir do 7 de xuño a clientela poderá depositar unha urna as papeletas cubertas que lle serán entregadas en cada un dos postos da praza pola realización das compras durante esta tempada de verán ata o 9 de agosto.

O concello acaba de editar un libro sobre os bos usos da auga, coincidido co Día Mundial do Medio Ambiente, que se celebra mañá, martes, 5 de xuño.

A publicación, que leva por título “No Carballiño amamos a auga”, recolle os principais recursos hídricos do Carballiño, tanto das augas superficiais como das termais e míneromediñais. E, sobre todo, recolle unha serie de consellos moi útiles para aproveitar mellor este recurso.

Con textos de Llerena Perozo Porteiro e ilustracións de Francisco Muñiz, o libro amosa dun xeito sinxelo e moi práctico, en 53 páxinas, informacións e suxestións relativas á importancia da auga para a vida, que é un ben finito, e o coidado que debemos ter no seu uso.

A súa distribición realizarase nos centros educativos, comercios, establecementos hostaleiros, asociación de veciños e nos fogares. O libro foi presentado esta mañá polo alcalde, Francisco Fumega; a concelleira de Medio Ambiente, Érika Paz, e a autora dos textos, Llerena Perozo Porteiro.

Francisco Fumega resaltou a cualidade do Carballiño como terra de augas, tanto superficiais como termais, pero cun uso moi elevado de auga sobre todo durante o verán, cando se multiplica a poboación, e por iso considerou moi oportuna a publicación deste manual dirixido a concienciar sobre a sostibilidade deste recurso. Por iso, agradeceu a Llerena Perozo e á editorial Versatil o traballo que desenvolven para contribuir á sensibilización da poboación sobre esta cuestión, que é, según dixo, un dos principais problemas do século XXI.

Ao respecto, asegurou que malia a que leva chovido dabondo últimamente, hai cinco meses tiñamos declarada a alerta vermella pola Confederación Hidrográfica, e os problemas neste senso comezaron a finais de agosto pasado. De aí que non se pode baixar nunca a garda, según dixo. Érika Paz referiuse a declaración do Día Mundial do Medio Ambiente, que este ano se centra na cuestión dos plásticos, e recordou a campaña levada a cabo coa hostalería para a recollida de envases de todo tipo co obxectivo de mellorala e contribuir á súa reciclaxe.

Neste senso asegurou que ainda que queda moito por facer, seguirase avanzando na medida do posible. Precisamente, neste labor de continuar coa concienciación da poboación na preservación do medio ambiente e dos recursos naturais, é no que circunscribiu esta nova iniciativa.

Llerena Perozo agradeceu ao concello o interese pola política medioambiental e felicitou ao alcalde e á concelleira polas campañas que leva a cabo neste senso, como é o caso desta sobre o bo uso da auga. Dixo que o obxectivo da publicación era chegar ao maior número posible de familias coa intención de poder adquirir hábitos e prácticas encamiñadas ao aforro e reutilización da auga, e engadiu que o sistema hídrico está directamente vencellado co cambio climático, e que nos achegamos a un período crítico ao respecto.

Por iso, según dixo, iniciativas como esta contribúen en gran medida á loita contra o cambio climático.

O cartel da 56 Festa do Pulpo rende homenaxe ao tango con motivo da dedicatoria desta edición ao Centro do Carballiño en Buenos Aires, que este ano celebra o centenario da súa creación.

O cartel é obra da deseñadora gráfica carballiñesa Ari Quintas Núñez, e foi presentado esta mañá nun acto ao que asistiron o alcalde, Francisco Fumega, os concelleiros de Turismo e Cultura, Manuel Dacal e Diego Fernández, respectivamente, o portavoz do grupo municipal do PP, Argimiro Marnotes, e a concelleira do BNG, Sofía García, así como a autora, Ari Quintas.

Unha aceiteira, unha tesoira, dúas talladas e un rabo, conformando unha parella de tango sobre un prato de madeira de pulpo, xunto co pimentón, son o elemento central do cartel, que ten unha gran plasticidade e resulta moi significativo desta 56 edición.

“Quixen realizar unha simobiose dunha parella de tango cos aparellos propios das pulpeiras e pulpeiros”, dixo ao respecto a deseñadora Ari Quintas, que se amosou moi honrada por ter a oportunidade de elaborar o cartel da Festa do Pulpo deste ano.

O alcalde, Francisco Fumega, referiuse ao recoñecemento dos emigrantes carballiñeses en Buenos Aires, dicindo que “a festa deste ano se lle dedica ao Centro do Carballiño en Buenos Aires co gallo da celebración do seu centenario, e por iso o cartel deseñado por Ari Quintas Núñez, simboliza dun xeito evidente a simbiose do pulpo co tango, que é un elemento moi significativo de Buenos Aires”.

“É unha idea orixinal que Ari Quintas plasmou dunha maneira moi plástica, e que estou seguro gustará moito no Centro do Carballiño en Buenos Aires. Pero o que é máis importante, creo que gustará tamén aquí, xa que se trata de promocionar a nosa festa máis senlleira e popular, e coido que este cartel terá moi boa acollida en todos os lugares polos que se distribúa, e será un magnífico cartel para difundir a Festa do Pulpo deste ano”, engadiu o alcalde.

Por isto, felicitou á autora do cartel e agradeceu a súa colaboración.

Ari Quintas, que reside na Coruña, ten realizado diversos carteis para a Feira da Pepa Loba e as Xociviga, así como para outros eventos culturais e festivos do Carballiño. Neste senso, o alcalde destacou o fondo carballiñesismo da autora, moi vencellada ao barrio de Flores, o cerne da vila.

O cartel comezará a distribuirse a partir de mediados deste mes de xuño.

Alternativa Veciñal-En Marea ven de presentar unha moción que trasladará ao pleno da corporación muncipal do Carballiño na que propón que se inste á Xunta distintas medidas para mellorar os servizos de prevención e extinción de incendios forestais, e en base a seguinte exposición de motivos:

Galicia representa menos do 6% da superficie de España, pero na nosa comunidade prodúcense o 70% do total de incendios e arde un 56% da superficie total queimada en España. Sen ir máis lonxe na provincia de Ourense arderon o ano pasado cerca de 22.600 hectáreas das que o 80% de elas foron arrasadas naqueles fatídicos días do mes de outubro.

Os incendios forestais, que ano tras anos asolan o noso país, teñen custes inaceptables, vidas, vivendas, patrimonio forestal, biodiversidade, un conxunto de degradación e destrución do noso medio que precisan de accións eficaces e persistentes que eviten hipotecar o noso futuro e a nosa identidade.

A expansión do eucalipto e especies alóctonas para o seu uso na industria papeleira entre outros, a falta dunha política de prevención, a falta de ordenación do territorio ou a precarización dos dispositivos de loita contra os incendios son algunhas das claves para entender a situación que se viviu e se vive en Galicia e se acentúa .

Evidéncianse a necesidade de mellorar a capacidade organizativa incapaz de atender situacións de crise como as vividas o pasado ano e que parece que se volverá repetir este verán. Por elo e motivados polo incendio acaecido fai uns días na Xesteira (O Carballiño) e a mobilización e actuación dos servizos de emerxencia, vemos serias carencias de recursos e de persoal nas brigadas forestais que prestan servizos no distrito XI que atende as comarcas do Arenteiro e o Ribeiro e engloba os concellos de O Carballiño, Maside, Piñor, Punxín, San Amaro e San Cristovo (Demarcación de O Carballiño I); Beariz, Boborás e O Irixo (demarcación do Carballiño II); e Arnoia, Avión, Beade, Carballeda de Avia, Castrelo de Miño, Cenlle, Cortegada, Leiro, Melón e Ribadavia (demarcación de O Ribeiro). Debemos matizar que a área do distrito XI está declarada as Zonas de Alto Risco de incendios forestais (ZAR) e varios concellos están incluídos nas Parroquias de Alta Actividade Incendiaria (PAAI).

Estas brigadas contan a día de hoxe cunha plantilla conformada por 35 operari@s (son 5 brigadas e cada unha delas está composta por 7 operari@s) , 6 conductor@s motobomba, 3 vixiant@s fix@s e 3 emisoristas para dar cobertura a unhas 78.300 hectáreas de montes públicos e privados.

As carencias e limitacións nestas brigadas veñen marcadas por:
• Imposibilidade de prestar un servizo continuado de 24 horas (os turnos rematan as 04:00 horas da madrugada e inícianse as 08:00 horas), cubrir Baixas e períodos vacacionais debido a escaseza de plantilla;
• Cese de traballadores con contrato trimestral e fixos-descontinuos nos últimos tempos que afectou a esta brigada diminuíndo en 13 operarios os seus efectivos
• Mal acceso aso montes debido a inexistencia de pistas forestais e ao mal estado das poucas que existen;

A estas limitacións hai que engadir as propias deficiencias que se veñen dando ano tras ano nos plans de actuación contra o lume, das leis pouco axeitadas existentes e que as políticas forestais propostas pola Xunta de Galicia seguen sen adecuarse e sen dar uns plans de acción preventivos efectivos:
• Pouca información e escaseza de charlas promovidas pola consellería de Medio Rural sobre aproveitamento dos montes ( como fomentar a gandeira de ganado ovino, implantación de frondosas caducifoleas, e outras especies arbóreas autóctonas que serven de freo ao lume,...) e limpeza dos mesmos por parte de vecin@s e asociación veciñais;
• Pouca implicación dos concellos en ditas políticas, neste caso dende o concello do Carballiño;
• Escaseza de tratamentos preventivos : limpeza, adecuación e disposición de medios;
• Falta de ordenación forestal;
• A existencia de leis como a de Fomento de Iniciativas Empresariais, apodada “Lei de Depredación de Galicia”, aprobada polo parlamento galego no ano pasado, que fomenta a liberalización do solo, pondo o territorio ao servizo de calquera proxecto mineiro-extractivista ou de calquera outra índole de interese as administración;
• A pouca adecuación tanto da lexislación como dos programas da Xunta de ordenación forestal aos concellos e as comarcas, neste caso a do Carballiño-Ribeiro.

Todo esto sen ter en conta os costes económicos que supoñen estes lumes, e que tanto para os concellos como a propia Xunta lles serían menores si se fixesen efectivos plans de prevención e non so se limitase a poñer parches neste aspecto. Cumpre subliñar que dende A Comisión Europea se destina a Galicia 39,5 millóns de euros para a adaptación ao cambio climático e prevención de riscos, incluída a xestión dos incendios forestais, durante o período 2014-2020 a través dos fondos FEDER. Supoñen, aproximadamente, o 4,5% da cifra total dos arredor de 900 millóns destas achegas comunitarias que xestiona a CC.AA. Agora, esta comisión debería estudiar se a Xunta fai unha aplicación axeitada ou non destes fondos e saber certamente o destino totalitario dos mesmos.

Tendo en conta esta breve exposición de motivos, Alternativa Veciñal-En Marea somete á aprobación do Pleno a adopción dos seguintes acordos

1. Que a brigada que da cobertura no distrito XI sexa dotada con persoal e medios suficientes para poder dar un servizo de urxencia e vixilancia-intervención de 24 horas; Poñer en funcionamento e licitar os servizos de apoio aéreo que deixaron de ser prestados fai máis dun ano dende a base aérea de prevención e defensa contra incendios forestais de Beariz;
2. Se melloren os accesos e as pistas forestais existentes e se creen máis para ter un bo acceso as motobombas e os vehículos de intervención.
3. Melloras patentes e efectivas no Plan de prevención e defensa contra os incendios forestais de Galicia (PLADIGA);
4. Aumentar significativamente e promover as charlas informativas nas parroquias do Carballiño e por extensión nas das dúas comarcas Carballiño-Ribeiro sobre aproveitamento forestal, plans de prevención, lei de montes, herbicidas e toxicidade, limpeza e conservación, utilización e aproveitamento dos recursos naturais, etc.…