A Rede de Estudos Medievais Interdisciplinares participa nun macroproxecto de investigación centrado no patrimonio cultural da Eurorrexión Galicia-Norte de Portugal, liderado pola Axencia para a Modernización Tecnolóxica de Galicia (AMTEGA).

No marco deste macroproxecto, investigadores da Rede están a desenvolver un proxecto piloto (Piloto I-Lírica), en colaboración coa Universidade de Porto, que afonda na historia, na arte e na literatura medievais. O obxectivo é deseñar e elaborar diversos produtos de carácter fundamentalmente divulgativo e de orientación turística, servíndose das máis avanzadas tecnoloxías da información.

A investigadora principal deste proxecto é Mariña Arbor, veciña do concello de Cea,  profesora de Filoloxía Románica da Universidade de Santiago. Sinala que traballan “na análise das relacións que se verifican entre determinadas abadías cistercienses do sur de Galicia e do norte de Portugal e as familias nobres alí implantadas, así como no estudo da implicación que estas familias tiveron no primeiro cultivo e promoción da lírica galego-portuguesa”, co ánimo de “seleccionar espazos, autores, textos e música para dálos a coñecer entre un público non especializado” a través de aplicacións para móbiles e vídeos.

“Esta iniciativa pretende poñer en valor o patrimonio material e inmaterial dunha zona que non só ofrece unha riqueza patrimonial senlleira, senón que constitúe o berce dunha tradición literaria que guiou o canon da poesía lírica no centro e occidente ibéricos entre os séculos XII e XIV” -salienta a profesora-. Os resultados obtidos no proceso de investigación divulgaranse mediante unha serie de materiais interactivos, audiovisuais e impresos, creados para que os visitantes da zona coñezan como se desenvolvía a vida cotiá a as artes na Idade Media, grazas ao legado que ese etapa histórica nos deixou.

O grupo de investigación de Románicas da USC posúe unha longa traxectoria investigadora no ámbito da literatura medieval, en particular na lírica galego-portuguesa. Trátase agora de aplicar todos estes coñecementos para divulgar a riqueza patrimonial medieval galega e portuguesa desde o punto de vista literario, histórico, relixioso, cultural, artístico e literario, situando a poesía no contexto que a viu nacer. “Inspirámonos en rutas culturais baseadas como as que existen para Dante en Florencia, para Cervantes en Castela, para Shakespeare en Londres ou, se pensamos nun autor contemporáneo, para Stieg Larsson en Estocolmo” -indica Arbor-.

Nesta liña, estase a traballar en áreas moi concretas do sur de Galicia e norte de Portugal para, no marco do Interreg, “promocionar zonas deprimidas pero de elevado potencial artístico”. O equipo de investigación seleccionou dúas áreas xeográficas moi concretas para desenvolver o proxecto, referentes do trobadorismo en Galicia e no norte de Portugal. Por un lado, traballan, en Galicia, sobre o territorio das antigas terras de Castela, onde nace este movemento literario e poético, en particular nos concellos ourensáns de Cea, Amoeiro, Vilamarín, A Peroxa, O Carballiño, Maside e Leiro; cubrindo un eixo que vai do mosteiro de Oseira ao de San Clodio.

Como autor destacado desta zona, escolleron a Fernan Paez de Tamallancos, trobador ben documentado que conta, ademais, cunha rica produción literaria. Trala revisión de todos os elementos patrimoniais, tanto civís como relixiosos, relacionados co Císter e coa liñaxe á que pertencía este poeta, neste momento os investigadores traballan no deseño dunha ruta turística na que, servíndose das aplicacións para móbiles como elemento guía para o visitante, se recollerán varios elementos principais e outros complementarios, de xeito que o usuario poida realizar a visita nun día ou en varios.

Estas aplicacións vainas desenvolver un equipo do Centro Singular de Investigación en Tecnoloxías da Información da Universidade de Santiago (CiTIUS), liderado polo profesor Julián Flores. Ademais das rutas turísticas, elaboraranse pezas audiovisuais nas que se mostrará como se vivía nesa zona na Idade Media: a vida cotiá da nobreza, a súa relación coa Igrexa e co terceiro estado, e a súa implicación na promoción da lírica galego-portuguesa; “unha lírica que debe entenderse como un divertimento da corte, un produto refinado vinculado aos estratos superiores da sociedade, que cantaban e compoñían letra e música para o seu solaz”.

Os investigadores traballan tamén nunha segunda área xeográfica, que abrangue as dúas ribeiras do Miño e que vai desde a localidade ourensá de Ribadavia ata a vila portuguesa de Melgaço, pasando polos concellos pontevedreses de Crecente, Arbo e A Cañiza. Os trobadores ligados a esta zona que serven de fío condutor para o deseño e elaboración da ruta turística son Joan Soarez Somesso e Pero Meogo, autores que compuxeron algunhas das máis refinadas e exquisitas cantigas de amor e de amigo. Xunto ás correspondentes pezas audiovisuais, para esta área está prevista a realización dun vídeo lyric no que se utilizarán dúas cantigas de amigo de Pero Meogo -moi suxestivas polo erotismo que rezuman os elementos simbólicos nelas presentes-.

As pezas serán cantadas por Antoni Rossell, profesor de Filoloxía Románica e director do Instituto de Estudos Medievais da Universitat Autònoma de Barcelona, experto na Idade Media, ademais de intérprete e compositor. Gravarase na facultade de Ciencias da Comunicación da USC, baixo a supervisión do profesor Enrique Castelló. “Trátase, pois, de unir historia, arte e literatura medievais co obxectivo de crear produtos divulgativos que poidan ser desfrutados por un público moi amplo (de todas as idades e graos de especialización), aproveitando as potencialidades dos soportes electrónicos e de dar a coñecer unha parte do noso patrimonio literario, que se sitúa entre os máis ricos dos producidos na Europa occidental, cando o galego era a lingua na que cantaba toda a Hispania centro-occidental” -salienta a coordinadora do proxecto-.

Non se trata dun caso puntual e illado, senón que é un episodio que se tería repetido varias veces no transcurso do últimos meses, asi o puxo de manifesto nunha intervención nesta emisora de radio o portavoz do grupo "Veciños de Piñor", Uxío Rodríguez.

O concelleiro puxo os feitos en coñecemento do alcalde de Piñor, a través dun escrito presentado no concello e que acompaña de documentación gráfica, na que poden verse varias bandexas do programa "Xantar Sobre Rodas" que foron localizadas nun colector da recollida do lixo esta semana "comida en bandexas que non foron desprecintadas, e que non caducan ata o vindeiro dia 9 deste mes de Maio", subliñou.

"Veciños de Piñor" pide ao alcalde que abra unha investigación e poña o feito en coñecemento da Consellería de Política Social, manifestan a súa repulsa por unha conducta "insolidaria e irresponsable", tendo en conta ademáis "que se trata dun servizo de quen un coste mensual de 225 euros, que na súa maior parte son costeados con diñeiro público"

Os dezaoito establecementos hostaleiros que participan na Ruta das Tapas ofrecerán este venres, 4 de maio, e o seguinte, 11 de maio, unha ampla variedade de pinchos elaborados a base de productos propios da gastronomía galega, na que prevalece o pulpo, e de feito, un dos pratos máis novidosos é un carpacho de pulpo con xeado de pulpo.

O evento foi presentado este mediodía nun acto que se celebrou na Praza da Veracruz coa asistencia do alcalde, Francisco Fumega; o concelleiro de Turismo, Manuel Dacal; o concelleiro de Cultura, Diego Fernández; a xerente do Centro Comercial Aberto, Noelia Mares, e representantes dos restaurantes, bares e mesóns que forman parte desta iniciativa.

Na presentación púxose de manifesto o éxito desta tempada e incidiuse na posibilidade de seguir obtendo importantes premios directos ou mediante sorteo. Por iso convidan aos veciños e visitantes a degustar este venres, a partir das 8 da tarde, estas tapas ao prezo de 1,50 euros cada unha.

Máis dunha vintena de actividades culturáis desenvolveranse no Carballiño durante o mes de maio co gallo da celebración das Letras Galegas.

Teatro, obradoiros, concertos, exposicións fotográficas, animación á lectura, así como sesións de cine club, sucederanse durante todo o mes no auditorio, na biblioteca, na Casa da Cultura e ao aire libre, ademáis doutro tipo de actividades, como a edición dun marcapáxinas cnmemorando á escritora homenaxeada pola festividade Letras Galegas.

En canto ás representacións teatrais, destacar a Mostra de Teatro da Escola Municipal de Teatro, o sábado, 5 de maio; a compañía de teatro Matrioska, coa obra “Señora que pasea pola rúa con dous cans preciosos”, o domingo, 5 de maio; A compañía Títeresficcións, coa obra teatral para bebés “Chove”, o domingo, 13 de maio; a compañía de teatro Malasombra, coa obra “D.E.P. Unha comedia de morte”, o sábado, 19 de maio. Todas as obras Terán lugar no auditorio municipal.

O coservatorio de música ofrecerá o 15 de maio un concerto no auditorio polas Letras Galegas, e a Escola Municipal de Danza realizará unha mostra de danza o domingo, 27 de maio.

Ambos eventos tamén Terán lugar no auditorio. As sección infantil e xuvenil da Biblioteca desenvolverá dez actividades con contacontos e obradoiros, e o cine club Carballiño terá os venres as habituais proxeccións cinematográficas. Asemade, a asociación fotográfica O´Poriños desenvolverá un obradoiro e diversas exposicións.

Pola transcendencia, destacan dous eventos: o monólogo de Carlos Blanco, que terá lugar o sábado, 12 de maio, no auditorio municipal, e o festival RomeríaRock Arenteiro 2018, que se desenvolverá o 26 de maio na finca As Barcias do parque municipal.

O Cabildo de Lanzarote quere que O Carballiño estea representado no evento gastronómico SABOREA ESPAÑA, que organiza esta entidade no mes de novembro dende hai varios anos cunha gran participación de púbico e profesionais.

Así llo expresou ao alcalde o vicepresidente do cabildo, Ángel Vázquez Álvarez, que é natural do Carballiño pero que reside na illa canaria de Lanzarote dende hai trinta anos.

Ángel Vázquez atópase estes días de visita na vila e mantivo unha reunión co alcalde, Francisco Fumega, e o concelleiro de Turismo, Manuel Dacal, para plantexar esta proposta, que supón promocionar a oferta gastronómica e o turismo do Carballiño e a comarca no salón Saborea España, que se celebrará o 24 e 25 de novembro coa intervención de recoñecidos chefs e profesionais da gastronomía nacional. Así mesmo, comprometeuse a asistir á próxima Festa do Pulpo cunha delegación do Cabildo de Lanzarote.

Tanto o alcalde como o concelleiro amosáronse agradecidos pola visita e o convite, e expuxeron o desexo de estudar a proposta, e incluso de trasladala á mancomunidade turística Carballiño-Ribeiro, para realizar unha promoción conxunta cos productos máis xenuinos da nosa gastronomía: pulpo á feira, pan de Cea e viño do Ribeiro.

Lanzarote recibe cada ano uns 3.000.000 millóns de turistas, e o evento Saborea España suscita o interese e asistencia de arredor de 200.000 persoas.

O persoal da Televisión de Galicia desplazado a O Carballiño traballa dende as 10 da mañá no operativo televisivo que  desplegará dende as catro e media da tarde en directo dende o Estadio Municipal de Espiñedo.

A TVG-2 retransmitirá o partido correspondente á 35 xonada do campionato de liga na terceira deivisión entre CD Arenteiro e CD Boiro.

Neste partido, os futbolistas do Arenteiro lucirán unha camiseta con deseño retro que evoca a utilizada na primeira etapa do club nos anos sesenta do século pasado.

O Club Deportivo Arenteiro celebra hoxe diversos actos conmemorativos do seu 60 aniversario, tras a súa fundación en 1958.

Alcaldes, concelleiras e concelleiros de quince concellos adheridos á ruta xacobea do Camiño Miñoto Ribeiro, reuníronse hoxe no Carballiño para perfilar novas inciativas.

Neste acto confirmouse a adhesión do concello do Carballiño á asociación que promove a valorización desta ruta que vai dende Braga a Compostela e que cruza O Ribeiro.

O obxectivo é acadar a declaración de Camiño Cultural como paso previo para establecer unha nova variante do Camiño de Santiago, que está perfectamente documentada, sobre todo a partir do século XVIII, según dixo o presidente da asociación, o alcalde de Cortegada, Avelino De Francisco.

Para isto, vaise encargar un estudio perimetral do camiño en cada un dos concellos polos que pasa, así como efectuar a limpeza en cada termo municipal e proceder a súa sinalización e promoción a través de diversos medios, entre eles, a elaboración dun video.

O concello do Carballiño estivo representado nesta reunión polo teniente alcalde e concelleiro de Turismo, Manuel Dacal, que se comprometeu en nome do alcalde a levar a adhesión canto antes a un pleno municipal para a súa aprobación, xa que é unha condición indispensable para formar parte da asociación.

Á ruta xacobea do Camiño Miñoto Ribeiro chamábanlle de antigo o Camiño dos Leprosos, xa que eran moitas as persoas enfermas que o transitaban buscando a súa curación, e para isto aproveitaban as augas mediciñais dos moitos manantiais e balnearios que hai nesta ruta.