Arredor de seiscentas persoas participarán na XIII edición do Día da Bici, que se desenvolverá este domingo, 22 de outubro, cun percorrido urbano de 9 km. Entres as máis de 400 persoas que xa están inscritas, figuran dende nenos de curta idade a un home de 84 anos.

A ruta partirá ás 11,30 h., dende a Praza da Veracruz e rematará sobre as 13,00 h., no mesmo lugar.

A previsión de bo tempo para o domingo fai albergar unha boa expectativa de participación, pois as persoas interesadas poderán inscribirse incluso antes de comezar a proba, dende as 10,00 h., ata as 11,30 h., no posto de información da Praza da Veracruz. Neste posto tamén se entregará o agasallo ás primeiras 400 persoas que se inscribiron.

O evento foi presentado esta mañá polo concelleiro de Deportes, José Manuel Dacal, e o directivo do Club Ciclista Carballiño e propietario de Sobre Rodas, Roberto Rodríguez.

Dacal explicou que se trata dunha iniciativa deportiva lúdica, non competitiva, que promove o uso da bicicleta como medio ecolóxico de desprazamento durante todo o ano, pero que se intenta que nesta xornada adquira maior importancia. Por iso, pediu disculpas aos veciños e conductores, xa que se cortarán moitas rúas da vila polo paso dos ciclistas.

Roberto Rodríguez agradeceu que se contase unha vez máis co Club Ciclista Carballiño para colaborar, e tamén animou aos carballiñeses e a toda a xente dos concellos da comarca ou de calquera outro lugar a que se acheguen ata O Carballiño e disfruten con esta ruta, que é totalmente lúdica e que de feito terá zonas e tramos de reagrupamento.

Asemade dixo que Sobre Rodas ofrecerá un servicio de asistencia mecánica antes do comezo para solventar calquera problema que xurda coas bicicletas.

A ruta terá un percorrido de 9 km e percorrerá as rúas Curros Enríquez, Conde Vallallano, Aldara, Principal, Martínez Avellanosa, Marcelino Larrondo, Avda. do Balneario, Pedriña, Canteiros, Astureses, Paseo do Arenteiro, Avda. de Vigo, zona Residencial, rúa Galicia, Calvo Sotelo, Principal, e remate na Praza da Veracruz.

Así mesmo, crearase un circuito na Praza da Veracruz para os máis pequenos, co obxectivo de que os que non poidan participar na marcha o fagan neste lugar mentres se desenvolva a ruta.

Ao remate do percorrido, previsto para as 13,00 h., realizaranse unha serie de sorteos entre os participantes, coa entrega dos agasallos correspondentes.

Finalmente, José Manuel Dacal agradeceu aos patrocinadores a súa colaboración, destacando á Deputación Provincial, Inorde, Coca Cola, Gadis, Megamo e Sobre Rodas, así como á Garda Civil, Policía Local e Protección Civil.

O poeta Victor Campio, fillo predilecto do concello de Maside, recibíu un tributo organizado polo PEN Galicia e o Ateneo de Ourense,ao que se sumou a Xunta de Galicia, representada neste acto polo secretario xeral de Política Lingüistica, Valentín García.

No marco deste tributo,no centro cultural Marcos Válcarcel, Valentín García loou o traballo a prol das letra galegas que Víctor Campio realizou “tanto desde o ámbito da creación como desde a prensa ou o ensino”; un traballo que, en palabras do secretario xeral, “ben merece o recoñecemento de todos cantos estamos aquí e, tamén, de todos os galegos que aman a súa lingua”.

Tomaron a palabra no acto a presidenta do Ateneo de Ourense, Isabel Salgado Parada; o presidente do Centro PEN Galicia, Luís González Tosar; o académico da lingua galega Xesús Alonso Montero e os poetas Edelmiro Vázquez Naval e Manuel Outeiriño. Durante o encontro púidose escoitar o acordeón de Celia Adrián Rodríguez, así como poemas de Víctor Campio recitados por Marisa Calvo e por Carmen e Isabel Pereira Nolasco.

O docente xubilado e escritor Víctor Campio Pereira González (Maside, 1928) ten publicados catro poemarios (O ar que nos leva; Perdida luz, O aire, a luz e o canto. Poesía reunida 1987-2006 e Quince sonetos de amor e once poemas máis), así como unha novela (Baixo o sol do Magreb) e ensaio (Escritos en do menor). Colaborou ademais en obras colectivas como Sete poetas ourensáns, Poesía dos aléns e Poetas e narradores nas súas voces. II.

Colaborador habitual das actividades culturais da Cidade das Burgas nos últimos anos da ditadura e na democracia, escribiu en revistas e en xornais, nomeadamente en La Región. Foi nomeado membro correspondente da Real Academia Galega no 2010, fillo predilecto de Maside no mesmo ano e membro de honra da Asociación de Escritores en Lingua Galega no 2011. No 2012 obtivo o Premio Sete Carballas da Insua dos Poetas.

Victor Campio naceu e vivíu a súa infancia na parroquia de Garabás, onde a súa nai exercía como mestra.

Un total de 80 persoas participaron o pasado domingo no Roteiro Cultural pola parroquia de Astureses guiados coma sempre polo Centro de Estudios Chamoso Lamas, e o Grupo Ecoloxista Outeiro e acompañados pola portavoz do grupo de goberno; Patricia Torres.

Desta maneira e dan man dos mellores especialistas na materia, os participantes puideron coñecer o patrimonio natural milenario agochado desta parroquia.

O inicio da visita foi onde a Capela da Saleta, nun marco de gran valor natural, así o historiador Xosé Luís Sobrado explicou a devoción a esta Virxe, procedente de Francia, e que veu da man dunha familia do lugar os Taboada. No lugar, explicou o biólogo Diego Reboredo sobre as especies alí existentes, de gran valor e que foran plantadas na súa maior parte hai moitos anos por nenos e os seus mestres. Hoxe é despois da do “Pulpo”, a maior romaría da comarca.

Xa na entrada do pobo de Astureses, Xaime Nogueira, explicou a toponimia do lugar e de todos os núcleos que a conforma. Dentro do mesmo foron coñecendo diferentes edificacións de grande porte como o Pazo dos Taboada, que aínda conserva o seu escudo.

Xa no lugar do Outeiro, Xosé Luís Sobrado falou sobre a capela alí existente, hoxe sen culto. Nun lateral hai unha inscrición na que se fai referencia a súa construción por parte de Francisco de Soto, pertencente á familia do Cervela de Pazos de Arenteiro. Antigamente tiña un escudo da familia, que logo da venta trasladouse o camposanto de Pazos. Nese mesmo lugar, Diego Reboredo explicou sobre o carballo centenario que da sombra ao espazo.

Continuaron na monumental e espectacular igrexa románica de San Xulián de Astureses, que explicou Severino Ferreiro, historiador, quen estudiou o templo. Era a igrexa da Orde do Santo Sepulcro, ata que pasou a Pazos de Arenteiro. Os entendidos cualificaron dun dos mellores expoñentes do románico en toda a provincia de Ourense. No seu interior, comprobamos mediante a interpretación dun tema musical tradicional a acústicaque posiblemente sexa a mellor das igrexas de Boborás, isto débese a súa altura e que está feita en pedra.

A visita rematou na Fábrica do Papel de Fondo de Vila, onde tamén hai un muiño, e alí o arqueólogo Jorge Lamas explicou como era o funcionamento da mesma. Durante a visita a este núcleo tamén se viron diferentes casas con inscricións e construcións importantes.

O próximo e último roteiro deste ano, será o 5 de novembro a Coto Molín, Brués.

A ministra de Agricultura e Pesca, Alimentación e Medio Ambiente, Isabel García Tejerina, visitou esta mañá a parroquia de Oseira, no municipio de San Cristovo de Cea, nunha das zonas máis castigadas pola vaga de lumes dos últimos dias.

Tras unirse á dor das familias e amigos das persoas falecidas a consecuencia do lume e en declaracións aos medios, García Tejerina subliñou que "o que vivimos en Galicia esta fin de semana non pode volverse a repetir".

A ministra puntualizou que vivimos nunha sociedade moi concienciada, que se mostra intolerante con moitos delitos, e "creo que nos temos que facer absolutamente intolerantes cos incendiarios, porque o dano que fixeron é irreparable".

Así mesmo, García Tejerina sinalou que España ten un dos mellores dispositivos contra incendios a nivel mundial,"pero os dispositivos están para apagar incendios, non están preparados para os incendiarios". Segundo recalcou, "avanzaremos moito na loita contra os incendios en España o día en que a sociedade rexeite frontalmente aos incendiarios".

Para que isto non volva suceder, a ministra pediu a colaboración de todos os cidadáns, para evitar as neglixencias e os descoidos, "pero tamén é moi importante a súa axuda para que non queden impunes aquelas persoas que tanto dano causaron".

Neste contexto, García Tejerina lembrou que na pasada Lexislatura reforzáronse as leis para endurecer as penas contra os incendiarios, que "son conscientes do que fan, non é casualidade que máis da terceira parte dos incendios ocorridos en Galicia nos últimos días prodúcense nunhas horas nas que son moi difíciles os labores de extinción", dixo.

Por tanto, a ministra insistiu na necesidade de contar coa colaboración cidadá, e lograr "unha intolerancia total en contra dos incendiarios". Segundo reiterou, contamos cun dispositivo prorrogado, tanto desde a Xunta como do Ministerio, que triplicou a capacidade de descarga de auga nestas datas "pero estamos preparados para extinguir incendios, e outra cousa é ter un dispositivo para combater a xente que sabe como, de que maneira e en que momento actuar para causar danos irreparables".

Por outra banda, García Tejerina asegurou que non hai ningunha motivación económica detrás dos incendios, porque "non hai incendios para recualificacións nin recualificacións por incendios". Na actualidade, o mercado da madeira está moi controlado, cunha trazabilidade a nivel europeo para evitar a venda de madeira ilegal. Por tanto, "cometeriamos un erro se pensamos que hai intereses económicos detrás dos incendios".

Na programación de COPE O Carballiño, tanto na nosa programación local en horario habitual, como no resto da xornada, no 91.9 FM terás toda a información actualizada da vaga de lumes forestais no ámbito comarcal.

A conselleira do Medio Rural, Ángeles Vázquez, recibiu esta semana os responsables da Adega Cooperativa San Roque, integrada dentro da Denominación de Orixe Ribeiro.

Con eles analizou as diferentes posibilidades que existen para apoiar o funcionamento desta cooperativa, que agrupa un total de 67 socios e ten a súa sede no concello de Beade, ainda que tamén ten socios doutros concellos ribeiráns, como Leiro. Precisamente, o presidente da cooperativa é Ramón Álvarez, viticultor de Viete.

A Adega Coooperativa San Roque produce viños que comercializa baixo a marca Terra do Castelo.

Conta cunha superficie de cultivo de 3.500 metros cadrados na que predomina a uva Treixadura. Traballa tamén coas variedades Mencía, Torrontés e Godello e ten capacidade para producir arredor de dous millóns de litros de viño.

Varios colectivos a asociacións de emigrantes retornados protagonizaron unha nova manifestación na que piden á Axencia Tributaria que cese no que considerán é un agravio comparativo cos xublidados que non emigraron.

Entenden que ese agravio que denuncian prodúcese na obrigatoriedade que teñen de tributar no IRPF "aínda que non cheguen a unha renda de 22.000 euros, como é o caso dos xublidados en España", manifestan

No caso destes emigrantes retornados sí teñen esa obrigatoriedade de tributar ao entender a Axencia Tributaria que reciben unha renda base e unha complemetaria, e considera que son dous pagadores distintos, polo que están obrigados a tributar a partir dos 11.200 euros.

A manifestación partíu da Praza do Emigrante e rematou fronte ao edificio que ten no Carballiño a Axencia Tributaria.