O Concello de Piñor ultima os últimos detalles da que será a segunda edición da Festa dos Callos que terá lugar o vindeiro domingo día 8 de outubro.

O xantar terá lugar a partir das 14h no lugar de Arenteiro nunha xornada dominical ao que está previsto que asistan aproxidamente 300 persoas. As entradas están á venda nas dependencias municipais e nos bares do concello de Piñor. O xantar ten un custe de 12 euros e inclúe empanada, lacón asado, e callos como prato principal acompañados de pan de Cea; bica manteigada , viño, auga, refrescos e café.

Os callos serviranse nunha cazola individual de barro conmemorativa da xornada coa que concello agasalla a cada un dos asistentes. Dende o comezo da xornada poderase observar o proceso de elaboración deste produto estrela, característico da nosa gastronomía galega e presente en todas as cociñas dos fogares de Piñor.

Ademais haberá un mercado de produtos tradicionais e artesáns na que haberá postos de bisutería, alimentación e outros produtos de artesáns.Tamén se celebrará unha concentración moteira.

O Alcalde de Piñor, José Luis Gonzalez, celebra "que poidamos dar continuidade a unha festa que serve de unión entre a veciñanza e que o concello de Piñor poida consolidar no tempo esta celebración como unha data que teña cabida na axenda gastronómica de Galicia e que ó mesmo tempo sexa un motivo máis para que os ourensán e galegos se acerquen a descubrir Piñor. Temos fermosas paisaxes e sendeiros que percorrer e que son descoñecidos, neste sentido a xornada de mañá contribúe a dinamizar e dar a coñecer o Concello".

Despois de comer un grupo porá música para desfrutar dunha xornada de baile ata as 20:00 horas aproximadamente na que está previsto o remate.

A Festa gastronómica está organizada polo Concello de Piñor na que colabora económicamente a Deputación de Ourense, a través dun dos seus programas para a exaltación dos produtos típicos,do INORDE.

A oficina municipal de turismo atendeu durante os meses de xullo, agosto e setembro pasados a 1.878 persoas, que acudiron a este servizo para demandar todo tipo de información. A maioría dos visitantes procedían de Galicia, pero destacan ademáis os procedentes de Madrid, Castela-León, Andalucía, Cataluña e Valencia. Concretamente, no mes de agosto, e por riba de Galicia, o maior número de turistas procedía da comunidade de Madrid. Asemade, un 7% do total reside no extranxeiro.

Entre as consultas realizadas polos turistas, hai que resaltar a información sobre os principais monumentos e lugares de interese da vila, así como os balnearios, hoteis e restauración, acadando un espazo preeminente as pulperías. No ranking de preferencias turísticas figuran, en primeiro lugar, o templo da Veracruz e os balnearios, e a continuación o Paseo do Arenteiro, Parque Etrnográfico e onde comer pulpo.

Tamén acada interese o patrimonio do románico na comarca, o Mosteiro de Oseira, Pazos de Arenteiro e Ribadavia, pero a nivel provincial é a Ribeira Sacra e a capital ourensá quen suscita máis demanda de información.

E en Galicia, as preferencias son Santiago e as Rías Baixas, en especial as illas Cíes, e a Praia das Catedráis, en Ribadeo.

Ademáis de polos monumentos e a natureza, os turistas amosaron moito interese polas principais festas do Carballiño, como a Festa do Pulpo, pero tamén está acadando un auxe informativo excepcional a Feira Medieval “A Liorta”, que celebrou en xullo a segunda edición. Outras festas de interese turístico fonron as do San Cibrao, así como en xeral festas gastronómicas da comarca.

Finalmente, no eido cultural destacan as solicitudes de información sobre rutas de senderismo e programación das Xociviga e do Fetega.

A concelleira de Benestar Social, Igualdade e Sanidade, Marina Ortega, mantivo unha reunión co xerente do CHUO, Dionisio López Bellido, coa finalidade de analizar a solicitude de acondicionamento de diversos espazos do centro de saúde do Carballiño.

Específicamente, pídese a humanización de asistencia en embarazos e pediatría. Así mesmo, a concelleira solicitou a colaboración do xerente para manter unha reunión no propio centro de saúde cos seus responsables co obxectivo de abordar as melloras que se precisan.

Na reunión, Marina Ortega tamén plantexou a ausencia de matrona durante a baixa da titular no verán, así como a saturación de pacientes para os médicos e enfermeiras, sobre todo polas tardes. Ao respecto, Dionisio López apuntou que dende o departamento de Recursos Humáns realizarase un reaxuste de pacientes por facultativo, e a reasignación de atencións.

Asemade, ante a demanda do servizo de pediatría pola tarde, reiterouse a falla de profesionais especialistas, e con respecto á petición dunha ambulancia para o ámbito intercomarcal O Carballiño-O Ribeiro, o xerente dixo que lle corresponde ao 061. Marina Ortega ten previsto solicitar unha próxima reunión coa consellería de Sanidade para intentar facer efectivas canto antes algunhas das demandas plantexadas que sobrepasan o ámbito de actuación do Chuo.

O concelleiro do BNG Manuel Pérez defenderá no próximo pleno que celebre a corporación de San Cristovo de Cea "que se elabore un plan municipal, con criterios obxetivos, que ordene a actuación sobre as pistas e camiños existentes na xeografía do concello de Cea e que se atenda de inmediato os casos máis urxentes".

Dende o BNG acompáñase a moción cunha relación de viais que se encontran en mal estado, e onde se debería priorizar as actuacións, xa que mesmo representan un perigo para a seguridade vial.

Ademáis, Manuel Pérez mostrou nesta emisora de radio as súas críticas pola non convocatoria do pleno ordinario do pasado mes de Setembro "sen que se nos dese unha explicación sobre esta circustancia".

Para acceder á moción do BNG prema no arquivo adxunto:

Por diante temos un mes de Outubro, que se prolongará aínda ata a primeira fin de semana de Novembro, co teatro como o gran protagonista na axenda cultural carballiñesa.

Trátase da "X Mostra de Teatro Amador" que neste tempo de outono organiza "Tiruleque Grupo de Teatro", coa colaboración tanto do Concello do Carballiño como da Deputación de Ourense. No acto de presentación participaron membros de Tiruleque, co seu director Pepe Prada á cabeza, asi como o concelleiro de cultura Diego Fernández e a deputada provincial Teresa Cerdeira.

As oito representacións teatrais desenvolveránse no auditorio municipal do Carballiño os domingos, tamén algúns sábados, sempre en horario de oito da tarde.

Podes descargar o programa no arquivo adxunto:

A conselleira de Medio Ambiente e Ordenación do Territorio e o alcalde do Irixo mantiveron unha entrevista na sede da consellería, en Santiago de Compostela.

Beatriz Mato "analizou posibles vías de colaboración co Concello do Irixo en materia de saneamento e abastecemento de auga", afirman dende o gabinete da consellería.

A titular do departamento autonómico "coñeceu as necesidades do Concello do Irixo en relación ao subministro de auga potable aos distintos núcleos de poboación" no transcurso dunha reunión co rexedor local, Manuel Penedo, e na que tamén participou o director xeral de Augas de Galicia, Roberto Rodríguez.

Según o que trascendeu trala reunión, o rexedor municipal trasladou á representante do Goberno galego a importancia de contar con novos sistemas de captación de auga que garantan o abastecemento a determinados núcleos como A Costa, Frouces, A Ermida e Fabeiros.

Conxuntamente, ambos mandatarios abordaron as diferentes propostas encamiñadas á posible creación de novas infraestruturas hidráulicas, que permitirían mellorar as condicións de prestación deste servizo municipal.

Non obstante, nesta reunión non se concretou ningunha actuación, nin se adquiríu compromiso algún por parte da consellería para levar a cabo obras no concello do Irixo, polo que de momento as demandas do alcalde quedan pendientes.

Tampouco houbo novidades sobre posibles actuacións en materia de saneamento, despois de saír á lúz pública un informe do concelleiro socialista Iago Fariñas, no que puxo de manifesto como máis de 25 localidades do municipio do Irixo non contan con infraestructuras de saneamento municipal.

A Xunta ven de publicar no Diario Oficial de Galicia (DOG) o anuncio polo que se somete ao trámite de información pública o anteproxecto da obra e explotación dunha área de servizo na AG-53, á altura do Concello de Maside.  

O prazo para a presentación de alegacións está aberto ata o vindeiro 8 de novembro.

No seguinte enlace ao DOG pódese ampliar a información relativa a este anuncio: https://goo.gl/h5fbzM

A parcela na que se localizará a futura área de servizo pertence á parroquia de San Miguel de Armeses, no límite co veciño concello de Punxín.

Estas intalacións ubicaranse entre os puntos quilométricos 80+250 e 80+750 da autoestrada, a maior parte delas na marxe esquerda, empregando só a dereita para dotar de acceso á mesma. A parcela conta cunha superficie irregular e atópase parcialmente explanada e sen vexetación na súa parte máis central.

Na actualidade, están executados os carrís de aceleración e deceleración en ambas marxes, así como a rotonda, parte dos viarios de acceso e o paso superior. O deseño da área de servizo que se somete a información pública, con acceso desde a AG-53, é perfectamente compatible coa posible execución nun futuro dun enlace nese punto entre a AG-53 e a N-541, na zona limítrofe entre os Concellos de Maside e Punxín.

Instalacións

O proxecto contempla a dotación de tanques para o almacenamento de combustible: un para gasóleo; outro para gasolina; e outro, con dous compartimentos, para gasolina e gasóleo especial. Este punto tamén contará con catro puntos de recarga de vehículos eléctricos.

A gasolineira tamén disporá de dous equipos de subministro de aire e auga, un para abastecer a vehículos lixeiros e outro para pesados.