Medio cento de persoas tiveron a oportunidade de coñecer parte dos segredos da parroquia de Xuvencos, na cal se asenta a capitalidade do propio municipio de Boborás.

Esta visita enmarcada na programación dos roteiros culturais, organizada polo Concello de Boborás e o Centro de Estudios Chamoso Lamas e financiada en gran parte pola Deputación de Ourense, é xa a octava cita para dar a coñecer os recursos naturais e patrimoniais do territorio boborense.

Tras este último roteiro, tanto as autoridades municipais, así como os propios membros do Centro de Estudios Chamoso coinciden ao resaltar o éxito e a boa participación xeral aos mesmos. Neste roteiroasistou a concelleira de Cultura e Turismo de Boborás, Patricia Torres, así como Xosé Luis Sobrado, Juanjo Álvarez, Jorge Lamas, Diego Reboredo e Adolfo Otero do Centro de Estudios Chamoso Lamas. Durante a visita de Xuvencos, o camiñantes puideron coñecer os encantos dun bosque autóctono conformado na súa maioría por castiñeiros, algún deles centenario, e aprenderon sobre as características deste tipo de plantación que ademais de ser un perfecto cortalume natural, tamén é un tipo de arboreda de coidado fácil.

Tralo paso polo bosque os asistentes chegaron a igrexa románica do século XIII de Santa María de Xuvencos. Trátase dun conxunto espectacular conformado non só polo templo senón tamén polo cruceiro do bispo único na comarca, que deixa ver o expoñente esplendor desta parroquia que tamén foi cabeza do arciprestado das Terras do Orcellón.

Nese lugar Xosé Luis Sobrado explicou sobre as dúas familias máis relevantes desta parroquia, as cales marcaron o rumbo económico do lugar. Unha delas era a de don Etelvino Viéitez, quen foi o que edificou o Pazo de Almuzara e o promotor do paso do tren por esta parroquia, dado que o trazado orixinal era polo concello de Cea.

Este feito debeuse a súa gran amizade con Calvo Sotelo, ministro de facenda daquel tempo, ademais de Alfonso XIII que mesmo pernoctou no Pazo de Almuzara. A outra familia importante eran os Munín, ou tamén coñecidos por “Caldeireiros”, oriundos de Asturias que chegan a Xuvencos para vender potes e caldeiros a mediados do século XIX, tempo no que tamén se asentaron na subasta do viño procedente do Ribeiro. Esta estirpe que emigrou a Manzanillo, Cuba, chegou a facer unha grande fortuna sendo os donos e señores de buques, do peirao do lugar, azucreiras...e fixan a súa residencia na que agora é a casa do Concello de Boborás e o Centro de Saúde.

Este edificio, foi vendido no seu día a PerfectinoVieitez que logo mercou o Concello polo prezo simbólico de 57.000 ptas nos anos 40. Dentro do templo de Xuvencos, os participantes quedaron impresionados polo impoñente retablo do 1780 do altar maior feito por un mestre ebanista de Parada de Cameixa e pintado co tratamento do pan de ouro por un pintor da Xesteira.

Tamén coñeceron os detalles sobre a construción da bóveda no altar principal feita polas Munín, así como a reforma e cambio de altura da zona do campanario feita tamén pola mesma familia, todo elo en 1869. Unha das capelas posteriores foi feita segundo un documento por unha familia de Sande, os “Taboadas” entorno a 1800.

Dentro do templo, conservase o chan orixinal, formado por lousas de pedra en forma de tumbas pero coa peculiaridade de que os enterramentos eran en vertical. No interior como ven sendo habitual, Juanjo Álvarez fixo sonar o canto gregoriano e adicouselle un minuto de silenzo en lembranza das vítimas do accidente do Alvia que hoxe cumpre catro anos. Como anécdota Sobrado contou sobre un pleito entre o cura do lugar e PerfectinoViéitez, que propiciou como detalle que este último se enfadara e cando morreu se fora a soterrar ao Carballiño a pesares de ter a súa residencia e finar naAlmuzara, ademais de contar con panteón na igrexa de Xuvencos.

No exterior do templo vimos o panteón dos Munín, no que está soterrada toda a familia que viña de Cuba embalsamada. No último dos enterros desta familia descubriuse un panteón subterráneo totalmente baleiro por debaixo do que se encontra en superficie. Ademais tamén se falou do mantemento das tradicións deste lugar como a famosa Danza de Xuvencos, que se escenifica cada 4 anos, e a xa perdida costume da bendición das varas para a protección do gando. Continuando o camiño o arqueólogo, Jorge Lamas, falou do camiño real no entorno do túnel que comunica co Penedo e do que ainda se conservan partes. Era un sendeiro fundamental para o comercio do viño e outros produtos cara a Santiago e Pontevedra. Alí explicou sobre a aparición dun documento de 960 que fala da Casa Torre de Xuvencos, torre derruída coa Revolta Irmandiña.

O roteiro cultural de Xuvencos rematou no lugar do Penedo, no que vimos as edificacións e divisamos o impoñente Coto Molín para finalizar visitando os exteriores do Pazo de Almuzara, feito entre finais do século XIX e comezos do XX, hoxe destinado a turismo rural e salón de eventos xunto co Barazal.

O Concello de Boborás e o Centro de Estudios Chamoso Lamas empraza a tódolos interesados a participar no vindeiro roteiro a celebrar o 6 de agosto en Pazos de Arenteiro.

O gaiteiro Xosé Manuel Budiño acompañado da tamén gaiteira e cantante galega Mercedes Peón ofrecerá un concerto no carballiño o mércores dia 9 de Agosto.

Dous dias despóis, o venres dia 11 de Agosto actuará o mítico grupo "La Uníon", un dos grupos máis recoñecidos da historia do pop español dos últimos 30 anos.

Ademáis, e dentro da mesma programación musical da Festa do Pulpo, terémos unha nova edición do "Ciclo de Músicas de Sofá", que os dias 4 e 5 de agosto ofrecerá cinco concertos de estilos tan variados como  jazz ou reggae, unha actividade promovida pola Asociación Cultural "Os Serandeiros"

Tamén destacan na programación musical da Festa do Pulpo o Festival de Habaneras que organiza o Orfeón, celebraráse o sábado dia 5 de Agosto ás 20:30 horas no auditorio municipal, asi como as Xornadas de Folclóre que trae cada ano a O Carballiño a Deputación de Ourense.

O gaiteiro Carlos Núñez ofrecerá este próximo venres dia 28 de Xullo un concerto no mosteiro de Stª María a Real de Oseira, enmarcado no programa "A Tradición Medieval", que desenvolve en colaboración coa Deputación Provincial, e que se completa con outros dous concertos nos mosteiros de San Pedro de Rocas e Montederramo.

Nestes concertos, Carlos Núñez presentará un repertorio con melodias medievais interpretadas con instrumentos que aparecen no Pórtico Da Gloria, recuperados e construídos polo artesán Brañas.

O concerto no mosteiro de Oseira comezará ás 20:30 horas e o prezo da entrada é de 18 euros. Poden adquirirse en https://entradas.ataquilla.com

A Deputación de Ourense e a Asociación "Ruta do Viño do Ribeiro" cooperarán para promover o enoturismo e as actividades relacionadas con esta modalidade, co obxectivo de difundir os valores enolóxicos, culturais, históricos, gastronómicos e turísticos dun dos enclaves vinícolas máis importantes de España e da súa denominación de orixe.

Así o acordaron Manuel Baltar e Felicísicimo Pereira, presidente da Asociación "Ruta do Viño do Ribeiro", na reunión que mantiveron no Pazo Provincial, na que o presidente da Deputación amosou o interese do ente provincial por formar parte da dita asociación e comprometeuse a destinar nos orzamentos de 2018 un total de 30.000 euros para que a "Ruta do Viño do Ribeiro" non teña problemas de supervivencia, para darlle un impulso e para colaborar nas actividades da asociación e contribuír así á promoción enoturística do Ribeiro.

A Asociación "Ruta do Viño do Ribeiro" está integrada por máis de cincuenta socios, que conforman unha rede establecementos de hostalería, enotecas, aloxamento e comercio, xunto a institucións e oficinas de turismo, que abranguen unha ampla oferta ao redor do viño do Ribeiro.

A Deputación de Ourense vén apoiando ao sector vitivinícola na provincia de Ourense a ás súas catro denominacións de orixe porque, segundo Manuel Baltar, "é un ámbito estratéxico da nosa economía e temos que seguir impulsando iniciativas que permitan visualizar a importancia que ten en Galicia e nacional e internacionalmente a produción vitivinícola ourensá". Neste sentido, accións de internacionalización como a recente misión USA-Ourense ou as reunións periódicas entre Deputación e consellos reguladores "posicionan e favorecen alianzas e oportunidades comerciais, para seguir distinguindo os nosos viños entre os mellores do mundo".

Baltar expresou, asemade, que a Deputación de Ourense seguirá mantendo en 2018 unha partida de axudas para os catro consellos reguladores por importe de 50.000 euros para cada un deles, "coa finalidade de apoialos nos ámbitos promocionais e tamén en aspectos relativos á produción vitivinícola".

A ministra de Emprego e Seguridade social, Fátima Bañez, e o presidente da Xunta Alberto Núñez Feijóo, fixeron entrega da Medalla de Honra da Emigración na súa categoria de Ouro ao carballiñés Aurelio Miras Portugal. Tamén recibíu a distinción, neste caso a título póstumo, Fernando Amarelo de Castro.

O acto tivo como escenario para a súa celebración o Pazo de Raxoi, en Santiago de Compostela.

A ministra tivo palabras de recoñecemento para os dous condecorados "galegos que souberon trasladar tanto ao ámbito das administracións autonómicas como á xeral do Estado esos valores adquiridos e que son parte do ADN de todos os emigrantes: solidariedade, responsabilidade, sensatez na xestión e un espíritu de traballo inquebrantable", remarcou Fátima Bañez.

De Aurelio Miras salientou, ademáis que "sempre deu o mellor de sí mesmo para mellorar as condicións de vida dos nosos paisanos no exterior, cuidando especialmente dos máis vulnerables, dos nosos maiores e dos que por unha ou outra razón, quedaron apartados do éxito na súa vida migratoria", remarcou a ministra.

Aurelio Miras, que iniciou a súa actividade política como concelleiro da Corporación Municipal do Carballiño, e durante varias lexislaturas formou parte do Parlamente do Galicia, obstentou varios cargos de responsablidade relacionados coa emigración. Foi conselleiro de Emigración da Xunta baixo a presidencia de Manuel Fraga, e nos últimos anos exerceu como "Director General de Migraciones" do goberno español.