O concello do Irixo perde a un dos seus fillos predilectos, ven de falecer aos 92 anos de idade D. Antonio González Bernárdez "o cura de Loureiro", como máis popularmente era coñecido tanto no Irixo como no resto da comarca.

Foi  fundador e ata fai poucos anos alma-mater da Cooperativa de Santa Mariña de Loureiro, na parroquia na que exerceu o sacerdocio e foi o seu párroco, durante máis de 50 anos, precursor e pioneiro do cooperativismo na comarca do Carballiño.

O cura de Loureiro, don Antonio para os seus parroquianos, aínda que lle molestase o don, estivo presente en mil batallas, sempre traballando polos intereses da súa parroquia, promoveu a chegada da luz eléctrica, exerceu como mestre ensinando aos seus feligreses, activista na defensa da natureza e os postulados ecoloxístas, e unha das últimas das súas grandes causas foi a súa rotunda oposición á instalación da incineradora de lixo que a Xunta pretendía ubicar no Irixo.

O velorio instalouse no centro social de Loureiro, a condución e funeral será este sábado dia 27 de xullo ás sete da tarde na igrexa parroquial de Santa Mariña de Loureiro.

O salón de actos da casa do concello de Carballedo, na localidade da Barrela, acolleu o programa especial dos venres de verán de COPE O Carballiño, que coincidíu neste 26 de xullo co dia festivo de carácter local neste municipio.

Precisamente da programación festiva destes días na Barrela falamos con Ismael González, unhas festas que se despiden nesta noite de venres cunha verbena a cargo da orquestra Charlestón Big Band, e a actuación estelar do artista galego “Ortiga”.

Con Raquel Vázquez, educadora familiar do concello do Carballiño, repasamos o verán neste concello de Carballedo, e avanzamos o que será o “FEST CLASICO RIBEIRA SACRA”, unha das propostas máis destacadas.

Silvia Vázquez, responsable da Aula Cemit, informounos de novas iniciativas que se poñen en marcha no ámbito dixital e para todas as idades.

E finalmente, con Patricia Aguiar, fixemos un percorrido pola natureza, o patrimonio cultural e arquitectónico, e os recursos turísticos cos que conta o concello de Carballedo.

Todo podes escoitálo no PODCCAST de COPE O Carballiño.

A Comune de Noventa Padovana, localidade italiana próxima a Venecia, formalizou durante o día de onte o irmandamento co Concello do Carballiño para asistir de forma oficial á Festa do Pulpo. Máis en concreto, unha delegación italiana presenciará a preparación da tapa máis grande do mundo, o 6 de agosto. Tal e como se explica dende a Comune, “será un momento de intercambio e crecemento mutuo que fortalecerá aínda máis esta nova amizade”.

O Concello carballiñés devolverá a visita no mes de outubro, coincidindo coa celebración da Fiera do Folpo, con características similares á festa que xa conta coa declaración de interese turístico internacional e acada este ano a súa edición número 62, dedicada á Denominación de Orixe Ribeiro.

O consigliere de Noventa Padova, David Iafelice, mostrou a súa satisfacción co irmandamento e a resposta recibida polas autoridades do Carballiño: “Recoñeceron o valor histórico e gastronómico da nosa celebración, aceptando con gran entusiasmo a nosa proposta para unir os noso lazos”.

O Concello do Carballiño levou a aprobación do pleno este irmandamento o pasado 18 de xullo, se ben o proceso iniciouse meses antes. Foi no mes de abril cando Iafelice, impulsor da iniciativa, xunto coa presidenta del consiglio comunale, Marguerita Franceschi, mantiveron unha videochamada coa alcalde do Carballiño, Francisco Fumega, e o concelleiro de Turismo, Manuel Dacal, na que sentaron as bases desta unión. A Fiera do Folpo aspira a lograr a declaración de Festa de Interese Turístico Internacional e a súa visita á Festa do Pulpo servirá como fonte de inspiración.

Viño, pulpo e música folk: a perfecta maridaxe
A programación da Festa do Pulpo do Carballiño combinará nesta edición a degustación do exquisito pulpo do Carballiño, do mellor do viño do Ribeiro e a mellor música folk, destacando a actuación de Óscar Ibáñez & Tribo, unha das bandas de folk máis destacadas de Galicia e que presentará o espectáculo Tribal 20 para celebrar dúas décadas de traxectoria. Será o 11 de agosto, ás 23.00 horas na Praza Maior.

Ademais, ao longo destes 15 días de programación, os asistentes á celebración poderán disfrutar de actuacións como as de Os Biruxes, Isidro Vidal, Terras do Arenteiro, Coribantes, Canta nas Croas, Cantareiras Madialeva, Auskelga ou Amigos do Acordeón Terras de Celanova, entre outros, algunhas delas dentro do Festival Folclórico de Música e Danza Tradicional, o mesmo día da Festa do Pulpo no Parque Municipal. En total, serán una quincena de grupos de música folk e tradicional os incorporados ao programa oficial, sen contar os de outros estilos musicais.

Outro dos puntos fortes do programa será a Mostra de Viños que terá como escenario a Praza Maior do Carballiño os días 3 e 4 de agosto en horario de 12.00 a 21.30 horas. Contarase coa participarán 6 bodegas: Arco da Vella-Adega do Eladio, Adega Viña-Carpazal, Eduardo Bravo, Casal de Armán, Pazo Tizón e Oryctes.

A Festa do Pulpo arrancará xa o día 30 de xullo con actividades para os máis pequenos, todos os días desa semana en horario de 19.00 a 21.00 horas na praza da Veracruz. O día 2 de agosto programouse unha ruta nocturna aos petroglifos de Cangues, organizada polo centro de estudos Chamoso Lamas.

O día 5 de agosto, tamén na Praza Maior do Carballiño actuará Clon Mela e será o día 6 de agosto cando chegue un dos momentos máis esperados: os pulpeiros e pulpeiras intentarán bater un ano máis o recórd da tapa máis grande do mundo. Será a partir das 19.00 horas. Pola noite actuará grupo Soul&Roll.

O mércores 7 de agosto será a Orquesta América na que actúe neste mesmo escenario dende as 23.00 horas e o xoves 8 de agosto será o momento do Combo Dominicano na Veracruz. O fútbol tamén ten un espazo destacado na programación da Festa do Pulpo e o venres 9 de agosto o Artenteiro xogará co Pontevedra en Espiñedo a partir das 19.30 horas. Pola noite actuará a Disco Móbil Gramola.

O sábado 10 de agosto terá lugar a Festa das Camisetas, dende as 17.00 horas na Praza Maior.-

E para do día grande, o 11 de agosto, este serán os actos:
-A partir das 11.00 horas no Parque Municipal e nas rúas da vila actuarán charangas e grupos de música tradicional dende as 11.00 horas.
-De 12.00 a 18.00 horas no Parque Municipal: Festival folclórico de música e danza cos grupos Coribantes, Canta nas Croas, Cantareiras Madialeva e Auskelga.
-Ás 20.30 horas na Praza Maior: Concerto Amigos do Acordeón Terras de Celanova.
-Ás 23.00 horas na Praza Maior. Concerto de de Óscar Ibáñez & Tribo

A conselleira de Medio Ambiente, Ángeles Vázquez, e a alcaldesa de Boborás, Patricia Torres, acordaron avaliar vías de colaboración para levar a cabo o proxecto de mellora das canalizacións de abastecemento, saneamento e pluviais na contorna da travesía da Almuzara.

Durante unha reunión que mantiveron hoxe, a alcaldesa entregoulle á conselleira o proxecto municipal para levar a cabo esta actuación que resulta necesaria xa que a antigüidade da rede está provocando problemas de perdas e malos cheiros.

Así, segundo o documento proposto pola Administración municipal, nas dúas marxes da estrada N-541 instalaríanse novas tubaxes, así como os correspondentes pozos de rexistro, que se conectarían coa rede xa existente.

Ángeles Vázquez explicoulle a Patricia Torres que Augas de Galicia estudará a proposta municipal e reiteroulle que a Xunta continuará prestando o seu apoio técnico e económico aos concellos para que poidan exercer as súas competencias de saneamento e abastecemento de xeito máis eficiente e prestar servizos de calidade á s súa veciñanza.

Nesa liña, cómpre lembrar que ata o vindeiro mes de novembro permanece o prazo para que os concellos soliciten financiamento ao abeiro das ordes de axudas para auditorías de redes de saneamento para detección de filtracións e para obras de minimización de perdas de auga.

O Círculo de Belas Artes e o Concello do Carballiño presentaron onte ‘Atlas Palacios 2024-2026’, un proxecto de investigación e difusión patrimonial que enlaza a efeméride do 150 aniversario do nacemento do arquitecto, durante este ano de 2024, co primeiro centenario do edificio que na actualidade alberga a sede do Círculo de Belas Artes de Madrid, en 2026. A proposta permitirá enlazar tamén, baixo un diálogo experimental, o conxunto de edificios que o arquitecto deseñou no seu Galicia natal coas admiradas mostras da súa arquitectura situadas na cidade de Madrid.

En conxunto, este atlas virtual comprende o desenvolvemento de actividades expositivas (fundamentalmente, o deseño e montaxe de instalacións audiovisuais nos espazos creados por Palacios), pedagóxicas, a ferramenta web www.atlaspalacios.com, na que o Concello do Carballiño conta cunha páxina específica que recolle os avances no estudo e difusión do Templo da Veracruz, e a realización dun ensaio documental que verá a luz no ano 2026.

Como presentación xeral do proxecto, e en especial da súa páxina web, durante o evento tivo lugar unha conferencia do seu comisario, José Manuel Mouriño, acompañado no acto pola Directora de Publicacións e Eventos Externos do Círculo de Belas Artes, Carolina do Olmo, así como polo Alcalde do Carballiño, Francisco Fumega, e polo Concelleiro de Cultura, Diego Fernández. O encontro permitiu tamén que o director do Círculo de Belas Artes, Valerio Rocco, e os representantes do Concello do Carballiño celebrasen, xunto co comisario do proxecto, José Manuel Mouriño, unha reunión de traballo para expor a coordinación de novas actividades e estreitar a colaboración entre institucións.

Esta cita coa arquitectura serviu para informar sobre as formulacións teóricas, metodoloxía e liñas de traballo que conforman o Atlas no seu inicio, así como para dar conta dos primeiros avances obtidos en forma de accións desenvolvidas desde o proxecto en Galicia durante os meses de maio e xuño pasados. En especial o público madrileño descubriu os resultados da programación de actividades organizadas O Carballiño en torno ao Templo da Veracruz e ao seu creador, Antonio Palacios.