A conselleira do Medio Rural, María José Gómez, presidíu a entrega dos XIII Premios DO Ribeiro, onde puxo en valor o bo facer dos viticultores, adegueiros e das persoas e entidades vinculadas a esta denominación de orixe ourensá, que se reflicte en produción de viño de calidade, recoñecido a nivel nacional e internacional.

No acto tamén estiveron presentes a recentemente nomeada como presidenta do Consello Regulador da DO Ribeiro, Concha Iglesias; o director xeral de Gandaría, Agricultura e Industrias Agroalimentarias, José Balseiros; o director da Axencia Galega da Calidade Alimentaria, Martín Alemparte; a directora xeral de Patrimonio Natural, Marisol Díaz; a xerente de Galicia Calidade, Ana Méndez; e o delegado territorial da Xunta en Ourense, Manuel Pardo; entre outras autoridades. Durante a súa intervención, a titular de Medio Rural trasladou os seus parabéns a todos os premiados e, de forma xeral, a todos os que fan posible o éxito do viños da DO Ribeiro.

Por iso, resaltou que é preciso consolidar aínda máis o prestixio destes viños para seguir avanzando na liña do éxito e para logralo, engadiu, tanto o sector como o consello regulador terán ao Goberno autonómico comprometido con esta tarefa. 

A conselleira destacou a aposta da Xunta polo sector vitivinícola, ao que apoia a través de diferentes liñas de axuda destinadas tanto para os viños do Ribeiro como para as outras denominacións de orixe de viño galegas. Neste senso, María José Gómez puxo en valor algunhas como as achegas para a reestruturación e reconversión de viñedo, as axudas para accións de promoción en terceiros países ou aquelas de apoio á elaboración e comercialización de produtos vitivinícolas. Nos últimos anos, recalcou, a Xunta leva investidos máis de 40 millóns de euros, e só neste 2024 destínanse máis de 10 millóns para seguir potenciando o sector.

Por outra banda, a conselleira destacou a Estratexia de dinamización económica, territorial e turística das comarcas vitivinícolas, coa que se traballar para situar ao viño como panca de desenvolvemento, neste caso, da bisbarra do Ribeiro, nos eidos económico, territorial, cultural e turístico.

A promoción do viño foi outro dos puntos que resaltou durante a súa intervención, sobre o que salientou o apoio da Xunta ás adegas en feiras e certames sectoriais nacionais e internacionais. Neste senso, fixo mención ao compromiso cos produtos galegos de calidade diferenciada, poñendo ao viño como exemplo.

En materia de calidade, sinalou a estreita colaboración cos consellos reguladores aos que se apoia para desenvolver os seus programas de mellora e control da calidade e da orixe dos produtos agroalimentarios galegos con algún distintivo de excelencia.

A directora xeral de Administración Local, Natalia Prieto, acompañada polo delegado territorial da Xunta en Ourense, Manuel Pardo, visitou hoxe o concello de Leiro para coñecer as melloras de accesibilidade realizadas na casa consistorial coa colaboración da Xunta. As obras contaron cunha achega autonómica que ascendeu a case 34.000 euros no marco da Orde de infraestruturas de uso público.

A través desta iniciativa instalouse un ascensor para comunicar as tres plantas do edificio, baixo, primeiro e segundo andar, eliminando as escaleiras situadas na parte posterior. A maiores construíuse unha escaleira para acceder ao baixocuberta, onde se sitúa parte do arquivo. O obxectivo é garantirlle tanto á poboación como aos traballadores a accesibilidade aos diferentes espazos das instalacións municipais. A directora xeral destacou a importancia de apoiar os concellos na mellora das infraestruturas municipais, co obxectivo de garantir instalacións accesibles, eficientes e confortables, así como a prestación dos servizos nas mellores condicións para as persoas traballadoras e usuarias.

Neste marco de acción, Natalia Prieto sinalou que a Xunta inviste un ano máis 3,5 millóns de euros a través da Orde de infraestruturas de uso público. Esta liña de axudas beneficiou o pasado ano máis dun cento de administracións locais en toda Galicia, a meirande parte delas na provincia de Ourense con 31 concellos beneficiados que sumaron máis dun millón de euros en achegas. A esta medida engádeselle ademais o Fondo de Compensación Ambiental, que conta con máis de 11 millóns de euros de orzamento, e o fondo adicional do Fondo de Cooperación Local, con 5 millóns de euros. Como novidade este ano, os concellos dispoñen tamén dunha orde plurianual destinada a obras de mellora enerxética, cun orzamento de 5,3 millóns de euros cofinanciados con Fondos Feder para o período 2024-2025.

A través do conxunto de liñas convocadas en 2023 investíronse 27,2 millóns de euros no impulso a máis de 600 proxectos municipais. A directora xeral enmarcou estes apoios no compromiso do Goberno galego co eido local e, especialmente, coa veciñanza dos concellos de menor poboación para garantir recursos públicos de calidade en todo o territorio.

No que respecto ao concello de Leiro, a colaboración da Xunta no impulso aos seus proxectos municipais no marco destas medidas sumou nos últimos anos máis de 1,4 millóns de euros. Só o pasado ano, a Xunta destinou preto de 160.000 euros para proxectos como as melloras na casa consistorial, adquisición de maquinaria para limpeza viaria, modernización do abastecemento municipal, promoción e constitución de comunidades enerxéticas, restauración de escaleiras, mobiliario e sinalizacións en Corneira, entre outros. A maiores, o pasado exercicio este concello recibiu máis de 155.000 euros do fondo base de Fondo de Cooperación Local.

O subdelegado do Goberno en Ourense, Eladio Santos, visitou hoxe Maside para pór en valor a importancia que ten para os municipios o programa PIREP de axuda ao acondicionamento e mellora da eficiencia enerxética en edificios públicos.

O máximo responsable do Goberno na provincia destacou o investimento de 225.000 euros que se levará a cabo no antigo grupo escolar do municipio e que conta cunha subvención do Ministerio de Vivenda e Axenda Urbana.

Eladio Santos estivo acompañado polo alcalde de Maside, José Manuel Iglesias, que aproveitou para destacar a modificación de crédito realizada polo Concello para achegar 70.000 euros máis ao proxecto, que permitirán mellorar as carpintarías, aumentar o illamento térmico e instalar un sistema de calefacción a través dunha caldeira de pellets. O subdelegado do Goberno apuntou neste senso a importancia que ten que “Goberno e municipios vaian da man á hora de afrontar investimentos deste tipo”.

“O esforzo urbanístico e orzamentario levado a cabo polo concello de Maside, xunto co traballo do Goberno de España, son a demostración da aposta clara que teñen ambas institucións por recuperar e dotar aos veciños e veciñas dun edificio sustentable en eficiencia enerxética e novos equipamentos”, afirmou Eladio Santos. Tamén apuntou que esta “é unha oportunidade única para que os concellos do rural aproveiten estes fondos e melloren as súas instalacións para prestar un mellor servizo á cidadanía”.

Ademais, o subdelegado quixo pór o foco na aposta do Goberno polo municipalismo, con investimentos que “permiten acondicionar e mellorar a eficiencia enerxética de edificios públicos grazas ao programa PIREP local, encadrado no Plan de Recuperación”. Un programa de impulso á rehabilitación de edificios públicos das comunidades autónomas e dos concellos do que en Galicia xa se benefician 33 municipios, incluído Maside.

O proxecto de rehabilitación e mellora enerxética do antigo grupo escolar de Maside tamén contempla a instalación dunha bancada retráctil, co obxectivo de empregala nun futuro como un auditorio polivalente, que dea servizo aos veciños e veciñas.

O alcalde de San Cristovo de Cea, José Luis Valladares e o presidente da IXP Pan de Cea, Carlos Manuel Rodríguez, presentaron a trixésima primeira edición da Festa do Pan de Cea, na Casa de Galicia en Madrid.

Medios de comunicacion, influencers gastronómicos, restauradores e tamén galegos residentes na capital achegáronse a este evento que pretende ser punto de partida para a Festa do Pan e, ademais posición o concello turísticamente e comenzar a dar pasos para obter a declaración dela festa como de interese nacional (xa conta desde fai moitos años coa declaración de Festa de interesa a nivel autonómico)

Nun sinxelo acto presentado por Javier Vázquez, director da Casa de Galicia en Madrid, o alcalde e o presidente pormenorizaron as bondades do concello e do Pan de Cea, respectivamente, facendo especial fincopé na celebración festiva do vindeiro 6 e 7 de xullo.

Ao remate ofreceuse Unha pequena degustación co Pan de Cea como protagonista, ademais de establecer contactos profesionais e publicitarios con diferentes axentes dinamizadores.

Desde o concello de Cea agradecen "o trato recibido por todos os traballadores da Casa de Galicia e especialmente por Javier Vázquez, director da mesma na súa última presentación como director da Casa. Agradecer a Victoria o seu bo facer na degustación ofrecida e como non a todos os participantes por terse acercado a pesar da forte tormenta".

A alcaldesa do Irixo, Susana Iglesias manifestou hoxe no transcurso dunha intervención en COPE O Carballiño que leva meses de tensión e que se sinte liberada, porque desde o pasado mes de novembro xa sabía que o seu compañeiro de grupo e concelleiro de Cultura e Deporte Juan Manuel Villanueva "en vez de traballar o que nos daba era traballo".

Acusouno de deixadez nas súas responsabilidades no goberno municpal "nin xiquera aparece polo concello", asegurou a rexedora municipal.

Susana Iglesias defendeu a xestión da alcaldía e do traballo "da miña compañeira Tamara e os dous concelleiros do PSOE, que sí estamos no dia a dia traballando polo Irixo".

En relación ao rexeitamento dos orzamentos presentados ao pleno, al alcadesa ten claro que "si os 9 concelleiros que formamos a corporación lle quixeramos ao Irixo, eso non tería acontecido".

E culpou dese bloqueo non so a Juan Manuel Villanueva senón que tamén fixo responsable ao portavoz do grupo popular e exalcalde Manuel Cerdeira, ao que advertíu que "igual ten que dar explicacións no xulgado" e mesmo acusouno de intentar que o propio Villanueva o apoiase na sesión de investidura a cambio dalgunhas contraprestacións. A alcadesa asegurou en COPE O Carballiño ter probas destas afirmacións.

Escoita a intervención da alcaldesa no PODCAST de COPE O Carballiño: