A conselleira de Infraestruturas e Vivenda, Ethel Vázquez, xunto co secretario xeral técnico, Joaquín Macho, mantivo unha reunión de traballo co alcalde do Carballiño, Francisco Fumega, e representantes dos distintos grupos políticos municipais, na que lles trasladou que a ordenación do transporte público que se porá en marcha o vindeiro ano beneficiará á mobilidade dos veciños desta comarca.

Vázquez Mourelle agradeceu a implicación e colaboración dos representantes deste municipio para levar a cabo as accións necesarias para optimizar os servizos de transporte na zona, o que suporá o incremento da calidade de vida dos cidadáns.

A titular de Infraestruturas lembrou que o Goberno galego xa iniciou os estudos que definirán o novo mapa de transporte que se comezará a implantar en agosto de 2017, onde unha das zonas obxecto destas avaliacións é a do Carballiño.

Precisou que para mellorar a cobertura no rural serán fundamentais os servizos baixo demanda, coa fin de levar o transporte a onde faga falta e á hora que faga falta mediante unha reserva feita con anterioridade.

Para todos estes supostos empregaranse diferentes tipos de vehículos, aproveitando o máis adecuado en cada caso (autocar, microbús, taxi, transporte escolar...). Con esta reorganización do transporte público na comarca optimizaranse os servizos entre os concellos e os distintos núcleos dos mesmos, pero tamén os desprazamentos a cidades como Ourense ou Santiago.

Ethel Vázquez tamén lle indicou aos citados representantes municipais que no caso de que exista algún incumprimento dos servizos por parte das concesionarias, deben trasladarlle este feito á Xunta para que proceda á correspondente inspección e sanción, se se considera oportuno.

A conselleira manifestou o seu compromiso a avaliar as posibles modificacións nos horarios das liñas de autobús coa fin de facilitar a súa coordinación coas frecuencias de ferrocarril.

Vázquez tamén se comprometeu a analizar as distintas opcións que se poden acometer para conectar as estacións de tren e autobús, potenciando así unha intermodalidade que ampliaría as posibilidades dos veciños á hora de realizar os seus desprazamentos.

A ampliación do servizo de Pediatría a xornada completa no centro de saúde e a necesidade dunha segunda ambulancia para cubrir a carencia comarcal, foron dous dos temas que se trataron durante unha reunión desenvolvida entre a xerente do Centro Hospitalario de Ourense, Eloína Núñez Masid; a directora de procesos asistenciais sen ingreso e xestora da área médica para os centros de saúde, Isabel Gómez, e a concelleira de Benestar Social, Igualdade e Saúde, Marina Ortega.

O encontro, que se levou a cabo no CHOU por iniciativa da concelleira carballiñesa, tiña por obxecto, precisamente, analizar e plantexar unha serie de demandas sobre a sanidade pública no Carballiño.

Entre estas necesidades atópase poder dispoñer da especialidade de Pediatria de 8 da mañá a 9 da noite, e non só pola mañá, como sucede agora. Neste sentido, a xerente do complexo hospitalario de Ourense amosouse receptiva, dada a proporción de poboación infantil do Carballiño así como a necesidade de conciliación da vida familiar e laboral. Por iso, Eloína Núñez dixo que se ía a ter en conta nas próximas listas selectivas para persoal a quenda de tarde no centro de saúde do Carballiño.

Asemade, suxeriu solicitar de xeito formal por escrito unha segunda ambulancia á Fundación Urxencias Sanitarias do 061, motivando a súa necesidade.

Tamén se comentou a previsión de levar a cabo no primeiro trimestre do proximo ano a novedosa proba de cribado que detecta en fases temperás o cancro colorrectal, que é a segunda causa de morte no conxunto de homes e mulleres. Esta proba pioneira no noso país está dirixida á poboación de entre 50 e 69 anos.

Finalmente, cotexáronse datos e concretáronse melloras no tocante ao servizo preventivo de suicidios, que é tamén pioneiro na sanidade publica e exclusivo de Ourense en Galicia, que a convirte na provincia con menor taxa de suicidios da nosa comunidade autónoma.

Ao termo do encontro acordouse manter unha próxima reunión no primeiro trimestre do próximo ano para seguir traballando e avanzar na resolución das demandas e problemas da sanidade no Carballiño.

A Consellería de Medio Ambiente e Ordenación do Territorio colaborará con 20.000 euros no acondicionamento da marxe dereita do río Avia, no concello de Leiro. Esta aportación económica destinaráse aos gastos da redacción do proxecto.

Así se recolle no convenio asinado hoxe entre a titular deste departamento autonómico, Beatriz Mato, e o alcalde da localidade, Francisco José Fernández, durante unha reunión que tivo lugar en Santiago de Compostela.

O río Avia discorre por este concello ribeirán. Sobre a súa canle, próxima a área recreativa das Poldras e a súa praia fluvial, hai unha pasarela peonil de madeira na ribeira dereita, que está pechada ao paso debido ao deterioro sufrido polo transcurso do tempo.

O obxectivo desta actuación é substituír a pasarela peonil por unha senda fluvial que, discorrendo por esta mesma marxe dereita, dea continuidade ao paseo fluvial, ao tempo que interconecta de xeito máis directo o paseo coa trama urbana do núcleo.

A conselleira de Medio Ambiente e Ordenación do Territorio, Beatriz Mato, mantivo unha xuntanza de traballo co alcalde de San Cristovo de Cea, José Luis Valladares.

No encontro, que tivo lugar en Santiago de Compostela, ambos responsables abordaron as necesidades en materia de saneamento do concello e, máis en concreto, do polígono industrial sito no lugar do Fondo de Cea.

Esta reunión tivo como obxectivo seguir avanzando na posible colaboración de ambas administracións, autonómica e municipal, nesta materia.

O alcalde do Carballiño, Francisco Fumega, e o presidente do padroado da Fundacion Insua dos Poetas, Luis González Tosar, asinaron hoxe un convenio de colaboración para impulsar novas iniciativas culturais. No acto, ao que tamén asistiron o concelleiro de Cultura, Diego Fernández, e o vicepresidente do padroado, Celso Sánchez, puxose de relevo o interese cultural e patrimonial deste parque da Esgueva adicado á creación artistica.

Neste senso, anunciouse a apertura de novas actividades non só no eido literario senón tamén no audiovisual e teatral, así como noutras manifestacións culturais.

González Tosar botou man do Premio Nobel de Literatura William Faulkner para expresar o convecemento de que “o local é o principio básico de todo o que se queira converter en universal”, e de aí o significado da promoción da Insua dos Poetas, enclavada nunha paraxe histórica ao norte das terras do Carballiño. O presidente do padroado resaltou a importancia da sinatura deste convenio, que plasma un acordo de colaboración e implicación mútua na difusión da Insua dos Poetas como parte importante do patrimonio e da dinamización cultural do Carballiño. E agradeceu a colaboración do concello que, como administración local, é a mais próxima á cidadanía.

Francisco Fumega tamén expresou a súa satisfacción pola sinatura deste convenio, que formaliza a colaboración institucional municipal que xa se viña producindo, pero que a partir de agora vaise intensificar. O alcalde referiuse á Insua dos Poetas como “o magnífico parque da Esgueva, que aglutina tres elementos definitorios: as letras, a escultura e o medio natural. En definitiva, un lugar de encontro coa Cultura, que temos a gran sorte de que estea ubicado no termo municipal do Carballiño”.

E, asemade, agradeceu o alcalde carballiñés a Luis González Tosar a súa iniciativa. “Realmente, é moi importante para O Carballiño contar cun parque desta relevancia, polo que nos comprometemos a impulsar máis actividades e a promocionalas dentro e fóra do noso municipio e comarca, co obxectivo de que poida ser un marco cultural ainda máis relevante do que xa o é”, dixo Fumega, que engadiu: “A Insua dos Poetas é xa parte do noso patrimonio cultural, e estamos ante unha boa oportunidade para poñer en valor este patrimonio impulsando o coñecemento e a difusión tanto da programación como do mesmo significado deste conxunto escultórico, natural e simbólico que é unha auténtica homenaxe ás personalidades das letras galegas.