A Consellería de Medio Ambiente e Ordenación do Territorio colaborará con 20.000 euros no acondicionamento da marxe dereita do río Avia, no concello de Leiro. Esta aportación económica destinaráse aos gastos da redacción do proxecto.

Así se recolle no convenio asinado hoxe entre a titular deste departamento autonómico, Beatriz Mato, e o alcalde da localidade, Francisco José Fernández, durante unha reunión que tivo lugar en Santiago de Compostela.

O río Avia discorre por este concello ribeirán. Sobre a súa canle, próxima a área recreativa das Poldras e a súa praia fluvial, hai unha pasarela peonil de madeira na ribeira dereita, que está pechada ao paso debido ao deterioro sufrido polo transcurso do tempo.

O obxectivo desta actuación é substituír a pasarela peonil por unha senda fluvial que, discorrendo por esta mesma marxe dereita, dea continuidade ao paseo fluvial, ao tempo que interconecta de xeito máis directo o paseo coa trama urbana do núcleo.

A conselleira de Medio Ambiente e Ordenación do Territorio, Beatriz Mato, mantivo unha xuntanza de traballo co alcalde de San Cristovo de Cea, José Luis Valladares.

No encontro, que tivo lugar en Santiago de Compostela, ambos responsables abordaron as necesidades en materia de saneamento do concello e, máis en concreto, do polígono industrial sito no lugar do Fondo de Cea.

Esta reunión tivo como obxectivo seguir avanzando na posible colaboración de ambas administracións, autonómica e municipal, nesta materia.

O alcalde do Carballiño, Francisco Fumega, e o presidente do padroado da Fundacion Insua dos Poetas, Luis González Tosar, asinaron hoxe un convenio de colaboración para impulsar novas iniciativas culturais. No acto, ao que tamén asistiron o concelleiro de Cultura, Diego Fernández, e o vicepresidente do padroado, Celso Sánchez, puxose de relevo o interese cultural e patrimonial deste parque da Esgueva adicado á creación artistica.

Neste senso, anunciouse a apertura de novas actividades non só no eido literario senón tamén no audiovisual e teatral, así como noutras manifestacións culturais.

González Tosar botou man do Premio Nobel de Literatura William Faulkner para expresar o convecemento de que “o local é o principio básico de todo o que se queira converter en universal”, e de aí o significado da promoción da Insua dos Poetas, enclavada nunha paraxe histórica ao norte das terras do Carballiño. O presidente do padroado resaltou a importancia da sinatura deste convenio, que plasma un acordo de colaboración e implicación mútua na difusión da Insua dos Poetas como parte importante do patrimonio e da dinamización cultural do Carballiño. E agradeceu a colaboración do concello que, como administración local, é a mais próxima á cidadanía.

Francisco Fumega tamén expresou a súa satisfacción pola sinatura deste convenio, que formaliza a colaboración institucional municipal que xa se viña producindo, pero que a partir de agora vaise intensificar. O alcalde referiuse á Insua dos Poetas como “o magnífico parque da Esgueva, que aglutina tres elementos definitorios: as letras, a escultura e o medio natural. En definitiva, un lugar de encontro coa Cultura, que temos a gran sorte de que estea ubicado no termo municipal do Carballiño”.

E, asemade, agradeceu o alcalde carballiñés a Luis González Tosar a súa iniciativa. “Realmente, é moi importante para O Carballiño contar cun parque desta relevancia, polo que nos comprometemos a impulsar máis actividades e a promocionalas dentro e fóra do noso municipio e comarca, co obxectivo de que poida ser un marco cultural ainda máis relevante do que xa o é”, dixo Fumega, que engadiu: “A Insua dos Poetas é xa parte do noso patrimonio cultural, e estamos ante unha boa oportunidade para poñer en valor este patrimonio impulsando o coñecemento e a difusión tanto da programación como do mesmo significado deste conxunto escultórico, natural e simbólico que é unha auténtica homenaxe ás personalidades das letras galegas.

Será un dos principais eventos deste Nadal no Carballiño e na provincia, e pola marcha da venta de entradas anticipadas, xa se pode augurar unha gran afluencia ao concerto de música latina, house e electrónica que ofrecerán os cantantes e productores Dasoul e Dany Romero o próximo 23 de decembro na discoteca Isis Pharia.

Este espectáculo musical, que organiza unha sociedade de promotores carballiñeses, foi presentado a mediodía polo concelleiro de Cultura, Diego Fernández e o representante da sociedade promotora Uriel Bernárdez.

Bernárdez confirmou a día de hoxe a venta anticipada do 75% do aforo da sala, que é de 1.800 persoas, na súa maioría de persoas da provincia de Ourense e de Pontevedra, pero tamén de fóra de Galicia, como unha parella que viaxará dende Cataluña para asistir ao concerto. Isto fai prever que se encherá a discoteca e que O Carballiño recibirá esa noite a visita de centos de persoas, moitas das cales pernoctarán na vila.

Bernárdez tamén dixo que esta experiencia poderia ter continuidade con outros concertos de renome. Actualmente, Dasoul está completando unha xira internacional e, xunto con Dany Romero, conforman un cartel excepcional no panorama musical español, suscitando unha gran expectación entre a mocidade.

Tanto os promotores como o concelleiro de Cultura aseguraron que este concerto situaba ao Carballiño nun lugar preferente da oferta musical neste Nadal, e que a situación estratéxica da vila, con acceso por autovía en todas as direccións, estaba a contribuir ao éxito da iniciativa.

Neste senso, Diego Fernández agradeceu o risco e o esforzo desta sociedade promotora por traer ao Carballiño un evento de ámbito autonómico e estatal tan relevante para a mocidade. O concerto, que está recomendado para mozos e mozas a partir dos 16 anos, comezará ás 22,30 h., do venres, 23 de decembro, e prolongarase durante varias horas, xa que ademáis destes dous artistas contarase cos mellores DJ de Galicia, como Groove Amigos; de Ourense, como The Prieto Brothers e o DJ carballiñés Stewe Gómez.

Asemade anúnciase un servizo de autobuses dende Ourense e o centro do Carballiño coa discoteca para a ida e a volta do concerto ao módico prezo de 1 euro. As entradas poden adquirirse de forma anticipada por 15 euros en discotecaisispharia@gmail.com ou chamando aos teléfonos 658 666 723 e 600 289 504.

Os tres grupos da oposición -Polos veciños, PSOE e Fai O Irixo- solicitaron a convocatoria dun pleno extraordinario para que sexan tratadas as súas mocións,ante a ausencia de convocatorias de plenos ordinarios da corporación municipal do concello do Irixo.

A solicitude está acompañada da seguinte documentación:

FUNDAMENTACIÓN XURÍDICA

PRIMEIRO: Que a lexislación vixente e anteriormente citada, contempla a posibilidade de que os concelleiros propoñan a celebración dun pleno extraordinario atendendo os seguintes puntos.

SEGUNDO.- Que a solicitude ten que estar firmada polo menos pola cuarta parte dos concelleiros da corporación.

TERCEIRO.- Que ningún concelleiro poderá solicitar máis de tres sesións extraordinarias do Pleno o ano.

CUARTO.- Que a convocatoria solicitarase por escrito, no que se especificará o asunto que a motiva e, no caso de que se pretenda adoptar un acordo, se incluirá o texto que se queira someter a debate a votación.

QUINTO.- Que a celebración do Pleno extraordinario non poderá demorarse máis de quince días hábiles dende que fora solicitado, e sen que se poida incorporar o asunto proposto na orde do día dun Pleno ordinario ou de outro extraordinario, se non o autorizan expresamente os solicitantes da convocatoria.

SEXTO.- Que se o Sr. Alcalde presidente non convocase o Pleno extraordinario para a súa celebración no prazo sinalado, quedará automaticamente convocado para o décimo día hábil seguinte o da finalización de dito prazo, as doce horas.

SEPTIMO.- Que en ausencia do presidente ou de quen legalmente haxa de substituílo, o Pleno será presidido polo membro da Corporación de maior idade entre os presentes.

EXPOSICION DE MOTIVOS

PRIMEIRO.- Que entendemos os grupos da oposición que o Sr. Alcalde de O Irixo, e o seu tenente de alcalde en especial, xunto co resto de concelleiros do partido popular, exercen o goberno do concello de O Irixo de forma despótica sen ningún respecto polos concelleiros da oposición que democraticamente foron elixidos polos veciños e veciñas de O Irixo.

SEGUNDO.- Que proba de esto e que o Sr. Alcalde arbitrariamente non inclúe nas sesións plenarias ordinarias as propostas e mocións da oposición, mocións que entendemos axudarían a mellorar a vida dos veciños e veciñas de O Irixo.

TERCEIRO.- Que entendemos unha falta de talante democrático e bo goberno que non se consulten as convocatorias das sesións plenarias e sen permitir conciliar a vida municipal e profesional de forma escandalosa e a sabendas de que se prexudica os concelleiros da oposición os que arbitrariamente se aceptan ou denegan as súas moción a hora de incluír na orde do dia das sesións plenarias.

CUARTO.- Que non se convoca Pleno de ordinario dende o pasado 31 agosto 2016, fai xa mais de 3 mes, e nesta ultima convocatoria non se incluíron varias mocións xa presentadas pola oposición, algunha dende hai mais de catro meses, acumulándose a data de hoxe 13 mocións da oposición que non se levan a pleno. Que tendo en conta o anteriormente exposto e que todas as mocións xa foron presentadas no rexistro do Concello e entendendo que se cumpren tódolos requisitos legais esixibles, solicitamos a convocatoria dun PLENO EXTRAORDINARIO coa orde do día que debe ser transcrita segundo se achega da forma seguinte:

1º.-MOCIÓN QUE PRESENTA O GRUPO MUNICIPAL SOCIALISTA DO CONCELLO DE O IRIXO PARA A REPARACIÓN REHABILITACIÓN DO CRUCEIRO DE ORROS, E CONSERVACIÓN E PROTECCIÓN E POSTA EN VALOR DO ENTORNO E DO CRUCEIRO DA RUA E DA SUA PRAZA NA PARROQUIA DE LOUREIRO. (Rexistrouse o día 29 de xullo de 2016.)

2º.-MOCIÓN QUE PRESENTA O GRUPO MUNICIPAL SOCIALISTA DO CONCELLO DE O IRIXO PARA O MANTEMENTO, LIMPEZA E REPARACIÓN DAS HUMIDADES DO CENTRO ESCOLAR DE O IRIXO. (Rexistrouse o día 12 de agosto de 2016.)

3º.-MOCIÓN QUE PRESENTA O GRUPO MUNICIPAL SOCIALISTA DO CONCELLO DE O IRIXO PARA A CONSTRUCCIÓN E/OU APERTURA DUN CENTRO DE DÍA NO IRIXO. (Rexistrouse o día 19 de agosto de 2016.)

4º.-MOCIÓN QUE PRESENTA O GRUPO MUNICIPAL SOCIALISTA DO CONCELLO DE O IRIXO PARA O RECOÑECEMENTO PÚBLICO CUNHA DECLARACIÓN INSTITUCIONAL SOBRE DA LABOR E IMPORTANCIA DA COOPERATIVA DE LOUREIRO E DO SEU FUNDADOR PARA O IRIXO. (Rexistrouse o día 9 de setembro de 2016.)

5º.-MOCIÓN QUE PRESENTA O GRUPO MUNICIPAL SOCIALISTA DO CONCELLO DE O IRIXO PARA A ORGANIZACIÓN DE REUNIÓNS INFORMATIVAS POR PARROQUIAS SOBRE BENEFICIOS E PERXUIZOS DA CONCENTRACIÓN PARCELARIA NO IRIXO. (Rexistrouse o día 23 de setembro de 2016.)

6º.-MOCIÓN QUE PRESENTA O GRUPO MUNICIPAL SOCIALISTA DO CONCELLO DE O IRIXO CON MOTIVO DO DÍA INTERNACIONAL CONTRA A VIOLENCIA DE XÉNERO. (Rexistrouse o día 4 de novembro de 2016.)

7º.-MOCIÓN QUE PRESENTA O GRUPO MUNICIPAL SOCIALISTA DO CONCELLO DE O IRIXO PARA A CONTRATACIÓN DAS EMPRESAS DO IRIXO NAS OBRAS PÚBLICAS DO CONCELLO DO IRIXO. (Rexistrouse o día 11 de novembro de 2016.)

8º.-MOCIÓN QUE PRESENTA O GRUPO MUNICIPAL SOCIALISTA DO CONCELLO DE O IRIXO PARA QUE SE REFORCE CON OUTRA AMBULANCIA O SERVIZO DE EMERXENCIAS DO PAC DO CARBALLIÑO DO QUE DEPENDE O IRIXO. (Rexistrouse o día 25 de novembro de 2016.)

9º.-MOCIÓN QUE PRESENTA O GRUPO MUNICIPAL DE FAI IRIXO PARA QUE SE ADOPTEN MEDIDAS PARA INSTAR Á CONFEDERACIÓN HIDROGRÁFICA MIÑO-SIL PARA QUE PROCEDA Ó DRAGADO DE SEDIMENTOS DO LEITO DO RÍO VIÑAO Ó SEU PASO POLOS LUGARES DAS LAXAS E DA PONTE. (Rexistrouse o día 9 de agosto de 2016.)

10º.-MOCIÓN QUE PRESENTA O GRUPO MUNICIPAL DE FAI IRIXO PARA QUE SE ADOPTEN MEDIDAS PARA QUE A XUNTA DE GALICIA ASUMA OS GASTOS DE FUNCIONAMENTO E MANTEMENTO DO CENTRO DE SAÚDE DO IRIXO. (Rexistrouse o día 12 de agosto de 2016.)

11º.-MOCIÓN QUE PRESENTA O GRUPO MUNICIPAL DE FAI IRIXO PARA QUE SE ADOPTEN MEDIDAS PARA A CREACIÓN DE RUTAS DE ÁRBORES E FORMACIÓNS VEXETAIS SINGULARES DO CONCELLO DO IRIXO. (Rexistrouse o día 12 de agosto de 2016.)

12º.-MOCIÓN QUE PRESENTA O GRUPO MUNICIPAL DE FAI IRIXO PARA QUE SE ADOPTEN MEDIDAS PARA A PRESTACIÓN DE AXUDAS Á MOBILIDADE DENTRO DO CONCELLO. (Rexistrouse o día 18 de outubro de 2016.)

13º.-MOCIÓN QUE PRESENTA O GRUPO MUNICIPAL DE POLOS VECIÑOS PARA A CREACIÓN DUNHA ESCOLA TALLER AGROALIMENTARIA NO CONCELLO. (Rexistrouse o día 17 de xuño de 2016.)

O Grupo Municipal Socialista no Concello de Leiro denuncia "o desleixo do goberno municipal, máis unha vez, para coas necesidades do Concello".

Manifestan como "hai xa dous anos e medio que no lugar de A Agra, na estrada provincial OU-0307 que une Leiro e Berán, se procedeu a ampliación dunhas curvas nese tramo. A intervención consistiu en ampliar o radio das curvas e na colocación de sábrego como firme. Dende aquelas, o tramo segue sen ser asfaltado, co conseguinte risco para a circulación e para a integridade dos veciños e veciñas da zona".

Hai, precisamente, dous anos e medio que o Grupo Municipal Socialista lle preguntou ao Alcalde de Leiro -recordan- en Pleno cando se ía proceder ao asfaltado destas perigosas curvas, ao que respostou "que andaban en negociacións coa Deputación para facelo, de tales negociacións nada se sabe e a pista segue en condicións de provisionalidade", remarcan

"Fartos desta situación de desleixo, os socialistas de Leiro deron traslado ao Grupo Provincial Socialista, concretamente na persoa de Ignacio Gómez, deputado pola comarca do Ribeiro. En verbas de Nacho Gómez, quen procedeu a solicitar explicacións ante a institución provincial, competente no tema, Esta cuestión non é máis que a evidencia do que veño denunciando en numerosas ocasións, a falta dun plan de estradas provincial rigoroso e serio. Ano tras ano, fan pequenas obras e reformas nas estradas que, lonxe de solucionar, xeran problemas aínda meirandes”, afirman os socialistas.

Así pois, por unha banda, dende o PSOE de Leiro queren que o Alcalde explique en que consistiron as súas xestións coa Deputación para solucionar o problema e, por outra, dende o Grupo Provincial Socialista esixen que a institución provincial informe cando teñen pensado solucionar un problema que xera grave risco para os usuarios e usuarias.