O Centro Comercial Aberto organiza este sábado, 17 de novembro, un DÍA DE COMPRAS (SHOPPING DAY) con importantes descontos, agasallos, unha exhibición de patinaxe artística e cinco concertos de grupos musicais nas prazas e rúas da vila. Nesta iniciativa participan un total de 39 establecementos comerciais que abrirán pola mañá, de 10,00 a 13,30 h., e pola tarde, de 14,30 a 21,00 h.

Trátase de establecementos asociados ao CCA, que engloban a prácticamente todas as actividades do sector, como moda infantil e de adultos, calzado, complementos, librerías, conxelados, xoguetes, xoiería e pintura, entre outras. Estes establecementos destacarán pola colocación de globos nas súas fachadas, que será o indicativo desta oferta especial do comercio carballiñés.

Anúncianse descontos que van dun 10% a un 40%, e ata un 50% en segundas unidades. Asemade haberá agasallos e un sorteo de 300 euros en vales de compra para os clientes que merquen en calquera destes 39 establecementos.

Pero o Centro Comercial Aberto elaborou, ademáis, unha xornada cun amplo programa de actividade cultural. Así, actuarán cinco grupos musicais e haberá unha exhibición de patinaxe artística. Os concertos previstos son os seguintes: 33 RPM, na rúa Xosé Pontes; Teez Trío, na Praza Emilia Pardo Bazán; Tropa Korriban, na Praza Maior; Canela Cafuné, na Praza de Abastos; Súper Aphonics, na rúa Curros Enríquez, e Tiutsider, na rúa Martínez Avellanosa.

Dependendo do tempo, estas actuacións, así como o flalshmobe de patinaxe artística a cargo do club AEHDE, trasladaríanse a unha carpa á Praza Maior, en caso de chuvia. Nesta mesma praza instalarase un photocall cos personaxes favoritos de Star Wars Galicia.

O evento foi presentado polo presidente do CCA, Juián Garriga; a xerente da asociación, Noelia Mares, e o concelleiro de Promoción Económica, Adolfo Nogueira.

Todos destacaron a ampla e moderna oferta comercial do Carballiño, así como a oporturnidade de realizar compras dun xeito ventaxoso, e animaron aos veciños da comarca e da provincia a achegarse ata a vila e disfrutar coa animación cultural e os agasallos que se ofrecen nestes 39 comercios

O Centro Galego e o resto das Casas Rexionais de Lleida promocionarán a Festa do Pulpo do Carballiño como un dos grandes eventos gastronómicos de Galicia.

Así se comprometeron as directivas destas entidades durante o acto de presentación da LV Festa do Pulpo nas Xornadas Culturais da Federación de Casas Rexionais con motivo do XXXV aniversario desta federación, ao que asistiron o alcalde do Carballiño, Francisco Fumega, e o concelleiro de Turismo, José Manuel Dacal. Fumega e Dacal viaxaron a Lleida por invitación do Centro Galego desta cidade para impartir unha conferencia sobre a Festa do Pulpo do Carballiño, que se celebrou no salón de actos desta entidade coa asistencia de tres concelleiros do grupo de goberno municipal da cidade, dos presidentes das casas rexionais de Aragón, Castela-León, Extremadura, Cantabria e Andalucía; do presidente dos empresarios, do vicepresidente da Federación de Asociacións Veciñais e de numeroso público que encheu o local.

O alcalde carballiñés realizou unha exhaustiva exposición da historia e da relevancia da Festa do Pulpo a nivel galego e estatal, como o amosa a declaración de Festa de Interese Turístico Nacional, e explicou que se estaba a traballar para conseguir a declaración de interese internacional, co que se daría un salto cualitativo moi importante. Asemade, o alcalde comentou os recursos turísticos do Carballiño e da comarca, destacando especialmente os balnearios e os proxectos de modernización que se realizan neste momento.

Ao remate do acto houbo un intercambio de agasallos entre o alcalde, o presidente do Centro Galego e o presidente da Federación de Casas Rexionais. Previamente a este acto, as autoridades carballiñesas realizaron un percorrido pola cidades e os seus monumentos máis característicos, acompañados polo presidente do Centro Galego, Xosé Terceiro Folgar, e outros membros da directiva da entidade, e despois visitaron o concello de Lleida, onde foron recibidos en audiencia polo teniente alcalde, Joan Gómez, e o concelleiro de infraestruturas, José Domínguez.

Tanto as autoridades municipais como a directiva do Centro Galego amosaron o seu interese por asistir á Festa do Pulpo do Carballiño, tra-la invitación realizada polo alcalde carballiñés, que expresou a súa satisfacción pola deferencia do Centro Galego e do “Ajuntament” de Lleida co Carballiño e a Festa do Pulpo.

O prazo para a presentación de propostas sobre o Parque Municipal prorrógase ate o 23 de decembro.

Ainda que estaba previsto que este prazo rematase precisamente hoxe, a concelleira de Medio Ambiente, Érika Paz, tras consultar aos portavoces dos grupos municipais, considerou oportuno ampliar o tempo de recepción de ideas.

Para adoptar esta medida tomouse en consideración o incremento de propostas realizadas nas últimas semanas, así como unha petición realizada polo concelleiro independente Marco Reboredo.

O concurso de ideas para o proxecto integral do Parque Municipal foi convocado pola concellería de Medio Ambiente a finais do mes de xullo, e o prazo para a presentación de propostas comezou o 1 de agosto. Sen embargo, foi neste último mes cando se intensificou a recepción de ideas, polo se considerou convinte ampliar un mes máis o concurso, ata o venres 23 de decembro.

Según Érika Paz, moitas propostas chegaron a raiz do anuncio do remate do prazo previsto inicialmente, o 15 de novembro, polo que resulta de interese amplialo para dar a oportunidade a todas persoas, asociacións ou entidades a expresar as súas ideas sobre o futuro do parque municipal. Na páxina páxina web do concello (www.carballiño.gal) ofrécese un modelo de instancia para presentar as propostas, que se deberán formalizar a través do Rexistro do concello.

O Plan de Emprego prosigue co programa de formación dos 60 alumnos e alumnas seleccionados, segundo o calendario previsto para este mes de novembro e o de decembro. Precisamente, hoxe remata o curso de técnicas de búsqueda de emprego, que está distribuido en sete módulos, e mañá comezará un curso de prevención de riscos laborais, de 60 horas de duración. En canto remate este curso, procederase a impartir outro de soldadura e calderería de 100 horas de duración.

O primeiro curso que se levou a cabo, tras da presentación deste plan denominado “Carbaemprega”, o pasado 28 de outubro, estivo relacionado coas novas tecnoloxías e versou sobre iniciación á informática e elaboración de bases de datos, así como de currículos. Foi impartido na aula do CEMIT do concello.

O obxectivo deste plan, que foi impulsado pola concellería de Promoción Económica que coordina Adolfo Nogueira, e que conta co financiamento da consellería de Economía, é formar aos alumnos e alumnas para adquirir habilidades que lles permitan acceder a un posto de traballo. A prevision é que ao remate do plan se poida acadar o 40% de inserción laboral.

PRESENTACIÓN CURSOS POBOACIÓN XITANA

Na aula do Cemit tamén se presentou hoxe, coa presencia da concelleira de Benestar, Igualdade e Saúde, Marina Ortega, un curso sobre “adquisición e desenvolvemento de habilidades sociais e hábitos laborais” de 15 horas de duración, e outro de “Alfabetización dixital” de 15 horas de duración, dirixidos ao colectivo de poboación xitana do Carballiño. Estas actividades realízanse dentro do programa “II plan galego de inclusión social”, que promove a consellería de Traballo e Benestar, e que conta co cofinanciamento do Fondo Europeo de Desenvolvemento Rexional e Fondo Social Europeo 2014/2020.

O novo ciclo de humor “Carballiño Comedy 2” traerá ao auditorio cinco destacados monologuistas do panorama artístico nacional e galego.

Trátase de Enrique SANFRACISCO, Ángel MARTÍN, Álex O´DOGHERTY e os galegos Xosé A. TOURIÑÁN e Carlos BLANCO. Enrique Sanfrancisco abrirá o ciclo o 10 de decembro, e o pechará Carlos Blanco o 8 de abril. Touriñán estará o 14 de xaneiro; Ángel Martín o 18 de febreiro, e Álex O´Dogherty o 4 de marzo.

O prezo de cada monólogo mantense en 10 euros se se adquire de forma anticipada, e 12 euros o día da actuación na billeteira. A venta anticipada realízase nos restaurantes A Fuchela e Comonacasa, ou a través da web TICKETEA.COM.

Tanto o concellleliro de Cultura, Diego Fernández, como os productores de Moitamerda Producións, Juan Pablo Quintela e Indalecio Caballero, que presentaron hoxe o evento, resaltaron a superación do listón do cartel da primeira edición, que foi xa moi importante, e que suscitou o interese de preto de 1.500 persoas, cunha media de 300 espectadores por sesión.

Diego Fernández agradeceu á productora a súa aposta polo Carballiño como vila ourensá de referencia de espectáculos de ámbito estatal que non se terían conseguido doutro modo, e animou aos carballiñeses, aos veciños da comarca e aos da provincia en xeral a acudir a estas sesións que son como un bálsamo para esquecer os problemas cotiás e divertirse.

Destacou así mesmo o significado deste ciclo para a hostalería local, xa que atrae a xente de fóra e contribúe á dinamización das cafeterías, dos mesóns e dos restaurantes os sábados de espctáculo.

O produtor Juan Pablo Quintela referiuse ao apoio do concello do Carballiño á cultura e destacou o interese amosado polo concelleiro para que este ciclo se siga desenvolvendo na vila carballiñesa a pesar da forte competencia que existe con outras vilas e capitais de Galicia. Dixo que a productora Moitamerda Producións, que organiza o ciclo en colaboración co concello, fixera un gran esforzo para conseguir un cartel de renome como o que se presentaba, e que nalgún caso os espectáculos son rigurosa estrea en Galicia, como é o caso do humorista Ángel Martín.
Tamén dixo que se quería comezar cun primeiro prato do máximo nivel como o que representa o artista Enrique Sanfrancisco, que actuará o sábado 10 de decembro. Para este monólogo xa se poden adquirir as entradas de xeito anticipado.

Todas as sesións celebraranse en sábado e co mesmo horario de comezo, ás 21,00 h., tal e como xa sucedera no primeiro ciclo.