O documental Sons no Camiño,producido polos alumnos do IES Chamoso Lamas gañou o segundo premio no OUFF Escola, no que participaron máis de 3000 escolares de toda Galicia.

O proxecto foi realizado por un grupo de 17 rapaces e rapazas de 4º da ESO dentro do programa internacional de pedagoxía do cine Cine en Curso, que coordina en Galicia o CGAI (Centro Galego das Artes da Imaxe).

Durante o pasado curso contaron coa presenza no centro do director Ángel Santos e a colaboración dun grupo de profesores para a realización da película que se centra nos pobos e habitantes do Val do Varón.

Na gala de entrega de premios do festival acudiron os alumnos e os profesores, acompañados do cineasta e o director do centro,recollendo o galardón que recoñece o seu traballo. Durante a gala exhibíronse as diferentes películas premiadas.

A peza documental xa poido ser vista en varios festivais internacionais de cine, tanto no noso país como noutros, polo que foi subtitulada polo CGAI a varios idiomas para a súa exhibición.

O Concello de Piñor informa da posta en marcha dunha serie de actividades para conmemorar o Día Contra a Violencia de Xénero. Esta lacra social está a ser unha problemática de tal importancia que require un traballo integral por parte de todos e todas.

No Concello de Piñor cóntase con Plan de Igualdade de Oportunidades entre Mulleres e Homes, máis concretamente trátase da terceira edición, co cal o obxectivo é manter este compromiso na loita contra a violencia de xénero.

Este ano levaráse a cabo o programa de actividades STOP VIOLENCIA DE XÉNERO, para o cal está solicitada a colaboración da Secretaría Xeral da Igualdade.

Dito programa cumpre os obxectivos do Plan de Igualdade municipal actual, e consiste en varias iniciativas que procuran chegar a tódolos colectivos poboacionais pero, sobre todo, á muller:

QUÉRE-T: OBRADOIROS DE ENRIQUECIMENTO PERSOAL. Os mércores do mes de novembro ofreceranse talleres de enriquecemento persoal e autoestima para mulleres. Terán lugar do 2 ó 30 de novembro en horario de 18:30h a 20:30h no centro social. Máis información e inscrición nos Servizos Sociais.

I CONCURSO DE LEMAS CONTRA A VIOLENCIA DE XÉNERO NO CONCELLO DE PIÑOR: A idea é mobilizar e implicar á toda a poboación, e as redes sociais é o medio idóneo para elo. No Facebook do concello poderase deixar un lema contra a violencia de xénero, como comentario ó cartel divulgativo da convocatoria do concurso. Admitiranse tódolos lemas publicados en dito cartel dende o 2 ó 14 de novembro ás 14:30h. O lema gañador darase a coñecer nesta mesma rede social o día 18 de novembro, e será a mensaxe central do Calendario 2017 Contra a Violencia de Xénero do Concello de Piñor, que será presentado no acto conmemorativo do día 25 de novembro, e repartido entre a poboación.

ACTO STOP VIOLENCIA DE XÉNERO: O venres 25 de novembro terá lugar o acto central desta programación de actividades. Consiste nunha charla-taller destinada principalmente á mulleres, na cal se alertará das influencias dos medios de comunicación na promoción de valores que fomentan a violencia de xénero. Toda persoa que acuda ó acto recibirá o Calendario 2017 Contra a Violencia de Xénero do Concello de Piñor. Todo isto terá lugar ás 20h no Centro Social.

Dende o Concello de Piñor animam á toda a poboación a colaborar nestas actividades, contribuíndo así ó traballo para acabar coa lacra da violencia de xénero.

A Praza de Abastos repartirá 1.000 euros en premios entre a clientela que merque neste mercado durante a campaña de promoción do Nadal.

Haberá dez premios, de 200, 100 e 50 euros, ata un total de 1.000 euros, para as persoas que resulten afortunadas no sorteo que se celebrará o 22 de decembro. Esta campaña de promoción, que foi presentada hoxe, comezará mañá, 3 de novembro e rematará o 22 de decembro.

Durante a presentación, o concelleiro de Promoción Económica, Adolfo Nogueira, anunciou unha próxima remodelación e mellora das instalacións da praza, cun proxecto que conta co financiamento da Xunta de Galicia.

Asemade, reiteriou que se segue traballando no pliego para sacar a concurso os postos libres, e amosou unha vez máis o apoio do concello para seguir promocionando o mercado público. Neste senso desexou que esta campaña consiga incrementar a clientela, como xa sucedeu na realizada o pasado verán.

Pola súa parte, o presidente dos praceiros, Eligio González, presentou a Campaña de Nadal como un incentivo para atraer máis clientela e fidelizar aos compradores habituais.

Asegurou que o sorteo efectuado no verán fora todo un éxito e que esperaba que este o superase, pois a cuantía total dos premios é máis do dobre da anterior campaña.

Ademáis, expresou o seu agradecemento ao concello polo seu empreño en seguir modernizando as instalacións e apoiar a promoción do mercado municipal como lugar onde mercar produtos frescos e de calidade.

A concellería de Medio Ambiente encargará un proxecto de acondicionamento da escaleira de acceso e balaustrada do mirador da Pena dos Namorados.

Para isto, incluirá unha partida específica nos orzamentos que se elaboran neste intre co obxectivo de poder executar a reforma a comezos do próximo ano.

Esta medida ven condicionada polo deterioro que sufre o entorno deste monumento dende hai algúns anos, sen que se tivese realizado ningún tipo de mantemento ou resposición dos travesaños da escaleira nin das madeiras da balaustrada, poñendo en perigo a seguridade das persoas que suben ao mirador, sobre todo, cando se trata de nenos.

Precisamente por esta circunstancia, e en aras de evitar calquera posible accidente, a concellería de Medio Ambiente, que dirixe Érika Paz, vai proceder ao seu precintado coa finalidade de prohibir o acceso mentres non se efectúe a reforma.

O obxectivo da concellería de Medio Ambiente é restituir as partes deterioradas para posibilitar o acceso ao mirador sen que haxa ningún tipo de perigo. A Pena dos Namorados é un dos lugares máis singulares da ribeira do río Arenteiro ao seu paso polo Carballiño.

Está situado fronte á antiga fábrica de papel da Labandeira, e o forman un conxunto de rocas graníticas de grandes dimensións, coroado por unha delas que se mantén pola súa base.

Os historiadores relacionan o lugar cun asentamento do período do Paleolítico, polos achados dos restos atopados nas súas cercanías, e cren que a Pena dos Namorados puido ser un monumento máxico-relixioso polos primeiros poboadores destas terras. Durante a limpeza, rehabilitación e acondicionamento levadas a cabo en 1996 pola Escola Taller Terras do Arenteiro apareceron restos dunha antiga ermita.

A configuración e a situación deste conxunto pétreo confírenlle un certo encanto a este lugar, xerándose ao longo da historia un sinfín de lendas relacionadas con tesouros e amoríos. E de aí o nome, que non se sabe con certeza a súa orixe e significado.

"Ver para creer" afirma o Partido Popular

"A Concelleira ven a estas alturas coa leria de que se mellorará a Pena dos Namorados logo de varios anos sen que se intervira nela, deixando caer que o anterior Goberno Municipal non fixera nada", manifestan dende o Partido Popular.

Recordanlle "á concelleira desmemorizada, que este lugar foi salvado ante o xulgado do mercantil de ser devolto aos seus anteriores donos e que por causa da INCAPACIDADE de Varios gobernos socialistas, costoulle a todos os veciños preto de 700.000€ que aínda se están pagando".

Engaden dende o Partido Popular que "a eso nos dedicamos no derradeiro mandato e durante os 4 anos e, por eso, nos parece unha desfachatez que diga o que dí".

"Foron anos nos que tanto a Pena dos Namorados, e a fábrica de papel correron grave risco de deixar de ser propiedade pública.
ou  acaso, nos esquezemos dos carteis de (se vende) colocados polos anteriores donos", remarcan os populares.

Finalmente, manifestan a súa satisfación dende o Partido Popular polo proxecto "se pense intervir nela pois agora si, e non antes se podía facer. E mais, incluso cando actuóu ali un obradoiro de Emprego, tampouco se podería ter feito, pois non estaba acreditada a titularidade tal como dixo o xulgado do mercantil"

O Plan Integral de Emprego “Carbaemprega” comezou hoxe a súa andaina. Un total de 60 persoas desempregadas e perceptoras de axudas foron seleccionadas para participar neste programa que ten por obxectivo acadar unha taxa de inserción no mercado laboral do 40% como mínimo.

A presentación deste plan realizouse esta mañá no concello coa asistencia do alcalde, Francisco Fumega; o director xeral de Orientación e Promoción Laboral, Alfonso Marnotes; o concelleiro de Promoción Económica, Adolfo Nogueira; os concelleiros Argimiro Marnotes, do PP, e Marcos Reboredo, independente; así como os presidentes dos empresarios do Polígono e do Centro Comercial Aberto, e o director do grupo empresarial do sector eólico GRI; formadores, orientadores laborais e alumnos e alumnas.

Francisco Fumega comezou agradecendo o apoio da Consellería de Economía, que singularizou no director xeral, por aprobar o proxecto do Plan Integrado de Empleo presentado polo concello do Carballiño.

Ao respecto, dixo que “cremos que é unha boa iniciativa para integrar ás persoas desocupadas no mercado laboral”. Fumega asegurou que a búsqueda de emprego era a principal demanda que lle plantexaban os veciños e veciñas do Carballiño, e que non había ningunha outra cuestión que lle ocupase máis tempo. “Por iso é tan importante que este plan se desenvolva do mellor xeito e co maior aproveitamento posibles”, según dixo.

Finalmente abogou pola colaboración entre as administracións e o tecido empresarial para cambiar o rumbo da situación en materia de emprego, e animou a todos a aproveitar esta oportunidade e traballar duro para conseguir o obxectivo de inserción que prevé o plan.

A esta cuestión tamén se referiu Adolfo Nogueira, que puxo de manifesto o traballo desenvolvido para lograr a aprobación deste plan pola Xunta e a súa posta en marcha.

Malia a que se persigue un obxectivo de inserción do 40%, o concelleiro animou aos alumnos, formadores e os representantes do tecido empresarial para superar esa meta e conseguir a maior ocupación posible das persoas participantes no programa.

Neste sentido, o director xeral de Orientación e Promoción Laboral, Alfonso Marnotes, dixo que, independentemente da inserción que se consiga, a formación incrementa as posibilidades de empregabilidade, porque sempre ten resultado e é moi útil.

Marnotes ensalzou o plan presentado polo concello, asegurando que era un bo plan, e o puxo como exemplo do traballo conxunto das administracións e o sector empresarial para que as 60 persoas seleccionadas poidan recibir orientación, información e formación específica en materias vencelladas coa industria local.

Asemade, informou que neste momento estaban en marcha na comarca do Carballiño cinco programas de formación laboral no que participaban 75 persoas, incluidos os obradoiros de emprego, e que a consellería de Economía destinaba 3 millóns de euros a esta cuestión en toda Galicia, coa participación de 1.700 persoas.

Por iso animou a aproveitar estas posibilidades que se ofrecen nestes programas e plans. Finalmente, puxo de manifesto o obxectivo da Xunta de baixar a taxa do paro do 16% ao 10% en catro anos.

O XXXIII Festival Galaico-Portugués de Polifonía e Canto Coral, que se celebra este sábado, 29 de outubro, no salón do Casino do Carballiño, terá como aliciente a interpretación dun tango polo grupo +QDANZA de Lalín, cun palmarés moi importante.

O festival, que contará coa Coral Polifónica Maruxía, de Bueu; o Grupo-Coral Santa Cecilia de Calvao, de Aveiro (Portugal), e coa Coral Polifónica do Casino do Carballiño, foi presentado esta mañá nun acto no que interviñeron o concelleiro de Turismo, José Manuel Dacal; o director e secretario da Coral do Casino, Jaime González e Antonio Luis Santiago, respectivamente; e as profesoras do grupo +QDANZA, Yolanda Ogando e Marta Maceira.

Jaime González destacou a importancia deste festival, que conta cunha longa historia e que é unha referencia no panorama das corais afeccionadas de Galicia. Asi mesmo, incidiu na calidade das corais invitadas a esta edición e na ampliación de programa a unha exhibición de danza coa colaboración do grupo +QDANZA de Lalín.

Precisamente, en relación a esta cuestión, as profesoras Marta Maceira e Yolanda Ogando sinalaron o reto de interpretar un tango clásico “El día que me quieras”, en dúas parellas de mulleres, tal e como se bailaban os tangos nos seus inicios, por parellas de homes ou mulleres, co acompañamento dun pianista e unha escenografía con 4 cadeiras. Ambas profesoras amosáronse encantadas de colaborar coa Coral do Casino e co Carballiño para ofrecer este espectáculo, co que estaban moi ilusionadas, segundo dixeron.

Pola súa parte, o concelleiro de Turismo agraeceu á Coral do Casino o traballo que veñen desenvolvendo dende 1983, sendo auténticos embaixadores do Carballiño en Portugal e en moitos outros lugares por donde teñen actuado ou traendo corais ao Carballiño.

Finalmente, Antonio Luis Santiago fixo un chamamento aos veciños do Carballiño e da comarca para asistir a este evento, que culminará coa interpretación conxunta dunha canción polas tres corais participantes.

O Centro de Estudios Chamoso Lamas, en colaboración co Grupo de Acción Ecoloxista Outeiro, organiza este próximo sábado, 29 de outubro, unha andaina guiada ao xacemento arqueolóxico de Molín, que resultou moi afectado polo lume este pasado verán. Trátase de observar e explicar os efectos devastadores dos incendios forestais no patrimonio natural e no arqueolóxico.

A zona de Molín atópase nas parroquias de Brués e Moreiras, no concello de Boborás, que foi un dos lugares máis afectados polos incendios que acaeceron este pasado verán na comarca do Carballiño.

O percorrido desta andaina é duns 5 km., aproximadamente, e estará guiada polos responsables das seccións de Arqueoloxía e Bioloxía do Centro de Estudios Chamoso Lamas, así como por representantes do Grupo Outeiro.
A saída está prevista para as 10 da mañá, dende a igrexa de Brués, que é o punto de encontro.

Asemade, pola tarde, ás 7, terá lugar unha conferencia na Casa da Cultura, que será impartida polo presidente da Sociedade Galega de Historia Natural e investigador do CSIC, Serafín González Prieto, e que leva por título “Incendios forestais: a marea negra dos montes galegos”.

Tanto a andaina como a conferencia son de carácter aberto, polo que se convida a todas as persoas interesadas a asistir a ambos eventos.
Ambas iniciativas forman parte das actividades programadas polo centro de estudios para este último trimestre do ano.

A rúa Ben-Cho-Shey, unha das poucas rúas dos casco urbano do Carballiño sen servizos nin asfaltado nin beirarrúa mudará nestes próximos meses esta condición. Estes días execútase o proxecto de urbanización desta rúa, situada entre a Avenida 25 de Xullo e a rotonda da rúa Ourense. Ten 215 metros de lonxitude e 12 metros de ancho, e contará con todos os servizos de abastecemento, saneamento, luz pública, beirarrúas e zona de aparcamento en batería, con capacidade para uns 30 vehículos e circulación en dirección única.

É unha das obras de urbanización máis demandadas, pois trátase dunha rúa relativamente céntrica, con diversos edificios construidos, sobre todo na parte alta. De aí que o proxecto contemple dúas zonas con distintas infraestruturas, pois o tramo comprendido entre a rúa 25 de xullo e a rúa Xosé Fariña Jamardo está mellor acondicionado que o comprendido entre esta última rúa e a rotonda de Conde Vallellano.

En todo caso, o proxecto contempla unha nova canalización da rede de abastecemento e saneamento, que é o primeiro que se executa, así como un muro de contención nunha zona de parcelas ainda sen edificar. Asemade, incluirá rede e puntos de iluminación pública, beirarrúas con plaqueta, asfaltado en quente e pintado da calzada e dos aparcamentos.

As beirarrúas terán 2 metros de ancho e a calzada será de 10 metros. A rúa será de dirección única para poder fixar unha franxa de aparcamentos en batería, co obxectivo de ganar máis prazas.

Estas obras, que están sendo realizadas pola empresa BIDON Excavaciones, especializada en urbanizacións, ten un período de execución de seis meses e un custo de 146.000 euros, que son sufragados íntegramente polo concello do Carballiño.

400.000 EUROS PARA A MELLORA DE RÚAS

Neste intre, estanse realizando seis obras de interese no municipio carballiñés, fundamentalmente, no casco urbano. Así, ademáis desta obra de Ben-Cho-Shey, execútanse obras nas rúas Calviño, Río Avia, Galicia, Aldara e acceso ao núcleo rural da Barreira. O custo total destes proxectos supera os 400.000 euros, que son sufragados polas diferentes administracións, local, provincial e autonómica, segundo os diferentes proxectos.