A Cofradía da Veracruz tan so espera xa a colaboración do tempo, para favorecer a celebración das dúas grandes procesións da semana santa carballiñesa.

A procesión da Sentencia e A Misericordia, que se celebrará na medionoite deste Xoves Santo, está a suscitar certa expectación pola novidade no acompañamento do paso do Noso Señor da Sentencia, que irá custodiado por un escuadrón romano. Cantarán Almudena Mosquera, Emilo Rod´riguez e Maribel López, e contará co acompañemento musical dunha banda chegada dende O Ferrol. Abrirá filas a Cruz Franciscana de Santa María de Mesego.

Asemade, destaca o feito de celebrarse na medianoite, secundando a coñecida como “madrugá” sevillana, onde teñen lugar as procesións de máis sona no mundo. A procesión partirá do Asilo e recorrerá as rúas Curros Enríquez, Rosalía de Castro, Praza Maior, Aldara, dos Canteiros e Antonio Palacios, ata o templo da Veracruz, onde remata.

Nas rúas que non son peatonais prohibirase o aparcamento nas horas previas, e quedarán cortadas ao tráfico durante a procesión. Ademáis pídese a colaboración da hostalería para que retiren as mesas e as cadeiras e recollan os toldos das terrazas por onde pase a procesión.

A procesión que se prevé máis multitudinaria e que ten un recorrido máis longo é a do Venres Santo, coñecida como a dos “Caladiños”.

Esta procesión partirá ás nove da noite do templo da Veracruz e recorrerá as rúas Evaristo Vaamonde, Conde Vallellano, Aldara, Cesáreo Tizón, Vulcano, Tomás María Mosquera, Praza Maior, Rosalía de Castro, Curros Enríquez e Antonio Palacios.

Nas rúas que non son peatonais prohibirase o aparcamento dende as horas previas á procesión e quedarán cortadas ao tráfico durante todo o recorrido. Esta procesión, que ten tres pasos (María Magdalena, Cristo Xacente e Virxe das Dores), contará nesta ocasión cun remate musical moi novidoso. Trátase da interpretación dun nocturno de Chopin pola formación Alfonso Medela Trío e as voces de Maribel López, Almudena Mosquera, Samino Otero, Emilio Rodríguez, José Luis Reza e o Orfeón do Carballiño. Asemade, durante a procesión, o paso da Doorosa irá acompañado pola banda de gaitas Redegaitas, da Deputación Provincial de Ourense, e da banda de gaitas de Tui.

O concello agradece a colaboración veciñal e dos hostaleiros para permitir que estas procesións se poidan desenvolver nas mellores condicións posibles. Asemade, pide disculpas polo cambio provisional da ubicación dalgúns contenedores de lixo, que dificultan o paso das procesións.

A campaña de control de velocidade levada a cabo pola policía local nas avenidas e rúas do casco urbano do Carballiño está a dar un bo resultado, a tenor dos datos obtidos, que amosan a reducción a un tercio das infraccións cometidas por este motivo.

Concretamente, os controles da policía local propiciaron un total de 18 denuncias por exceso de velocidade, cando na campaña anterior do pasado ano se chegaron a contabilizar máis de 50. Das 18 denuncias, 10 supuxeron perda de puntos, ata 24 en total, e 5 conlevaron multas de 300 e 400 euros. As velocidades detectadas polo radar van dos 66 km/h, ata os 90 km/h, cando os límites de velocidade en todos estes casos é de 50 km/h.

A iniciativa púxose en marcha o pasado 18 de febreiro, coa intervención de ata cinco unidades simultáneas, incluido un coche dotado cun radar e coches camuflados. A rúa que rexistrou maior incidencia en canto a sancións máis graves foi a estrada de Ribadavia, onde se chegaron a detectar velocidades de 80 e 90 km/h, que conlevan sancións de 300 e 400 euros, ademáis da detración de 2 e 4 puntos, respectivamente, no permiso de conducir. A velocidade máxima permitida nesta rúa é de 50 km/h. Pero non foi nesta rúa onde máis infraccións se cometeron, senón na rúa Ourense, onde se formularon 9 denuncias, que oscilaron entre os 72 e os 85 km/h, conlevando sancións de 300 e 400 euros, e a perda de 2 e 4 puntos, respectivamente.

Na avenida 25 de Xullo, con precedentes de moitas queixas reciñáis, só se formularon 2 denuncias, detectándose, polo tanto, un elevadísimo grao de respecto ao límite de velocidade. Outra das rúas que foron obxecto de control especial foi a avenida Castelao, onde tamén se producen habitualmente queixas veciñáis ante situacións de risco por conducción a velocidade excesiva. Sen embargo, en toda a campaña non se percibiu ningunha infracción por exceso de velocidade e, polo tanto, non se realizou ningunha denuncia. Do mesmo xeito, tampouco houbo infraccións nin denuncias nas avenidas e rúas Galicia, San Cibrán, Balneario e Astureses.

O obxectivo desta campaña era non só exercer un control e denunciar os excesos de velocidade, senón concienciar aos conductores e conductoras da necesidade de respectar os límites de velocidade, para evitar situacións de perigo tanto para os peóns como para os demáis vehículos.

De feito, a campaña comezou tras ser anunciada previamente nos medios de comunicación e redes sociais, co fin de que se divulgase o máximo posible e tivese o efecto preventivo que se perseguía dende o principio. Isto fai que, tanto para o responsable da policía local, Francisco Valeiras, como da área de seguridade municipal, Adolfo Nogueira, se albergue un certo optimismo con respecto ao incremento da responsabilidade dos conductores e conductoras no cumprimento dos límites de velocidade, sobre todo, dentro do casco urbano, que é onde a conducción temeraria pode conlevar un maior perigo.

Os controis leváronse a cabo durante varios días, e centráronse especialmente nas avenidas e rúas Castelao, Galicia, San Cibrán, Balneario, 25 de Xullo, Compostela, Astureses, Rivadavia e Ourense. O remate desta campaña non significa que se deixen de facer controles de velocidade, senón que se siguen facendo pero con carácter alternante, de modo que non se produza ningún tipo de relaxación no cumprimento das normas de circulación, en especial, dos límites de velocidade.

O Diario Oficial de Galicia (DOG)ven de publicar a licitación das obras de mellora de seguridade viaria en tres estradas dos concellos de Vilamarín, Beade e San Cristovo de Cea mediante o investimento de máis de 710.000 euros.

A delegada territorial da Xunta en Ourense, Marisol Díaz, acompañada do alcalde de Cea, José Luis Valladares, visitou a estrada OU-504 unha das vías na que o Goberno galego executará melloras. Díaz Mouteira explicou que os traballos afectarán a un treito de 23 quilómetros_dende o remate da travesía de San Cristobo-Ribadavia ata a intersección coa N-525, en San Cristovo de Cea_ e consistirán na reparación do firme co obxecto de mellorar a seguridade viaria desta estrada.

A Consellería de Infraestrutura e Vivenda inicia hoxe o proceso de contratación deste proxecto, coa publicación da licitación, e das outras actuacións incluídas no contrato.

Este paquete de melloras de seguridade viaria licitadas hoxe inclúe ademáis un treito de 3,1km, entre A Grela (San Cristovo de Cea) e San Martiño (Vilamarín), na OU-901. A delegada territorial indicou que estes investimentos permiten que as estradas da Xunta de Galicia estean en óptimas condicións, incidindo na seguridade viaria e na comodidade na condución.

A deputada de Transparencia e Goberno Aberto da Deputación de Ourense, Montserrat Lama, deu conta esta dos acordos da Xunta de Goberno da institución provincial, no que destaca o convenio de cooperación entre a Deputación de Ourense e os concellos de Cenlle, Punxín e San Amaro para a prestación de asistencia para a xestión do abastecemento en Alta "Razamonde–San Trocado" durante o exercicio 2016. Dende a ETAP de Razamonde levaráse a auga ata o depósito distribuidor no monte de san Trocado

Por parte destes concellos solicitouse da Deputación a prestación da dita asistencia para o abastecemento, e tralos estudos e negociación das posibles fórmulas acadouse un acordo en canto ás condicións da dita asistencia. O servizo prestarase pola Deputación a través da entidade AquaOurense, Sociedade Provincial de Augas e Medio Ambiente, S.L.

En contraprestación polo servizo prestado, a Deputación de Ourense percibirá a seguinte retribución económica: do Concello de Cenlle: 1.737,05 euros; do Concello de Punxín, 1.085,66 euros, e do Concello de San Amaro, 1.519,92 euros. O convenio estará vixente entre o 1 de maio e o 31 de decembro de 2016. Montserrat Lama destacou a importancia dos convenios de colaboración entre Deputación de Ourense e os concellos da provincia "para levar a cabo obras, servizos e infraestruturas que teñen na cooperación institucional o seu piar fundamental".

Os portavoces dos grupos municipais do Carballiño arriaron este mediodía a bandeira da Unión Europea do balcón do consistorio en sinal de protesta polo posicionamento europeo ante a crise dos refuxiados sirios. Por este motivo, a bandeira europea deixará de ondear xunto coas bandeiras de Galicia e de España no balcón do concello.

Este acordo foi tomado unánimemente polos representantes dos catros grupos políticos, PSOE, PP, BNG e AV, a proposta do portavoz do BNG, Francisco Ferreiro co apoio do portavoz de AV, Bernardo García, durante unha reunión da Xunta de portavoces.

O alcalde, Francisco Fumega, sinalou que se trataba dunha chamada de atención pola crise humanitaria que se está vivindo nas fronteiras europeas coas persoas que fuxen da guerra de Siria.

O portavoz do BNG, Francisco Ferreiro, agradeceu o apoio á súa proposta e dixo que había que trasladar á cidadanía esta catástrofe humanitaria, que cualificou como a peor desde a Segunda Guerra Mundial, que ten xa contabilizados arredor de dez mil nenos e nenas desaparecidos.

O portavoz do PP, Argimiro Marnotes, indicou que era un feito simbólico, unha forma de poñer en evidencia o que está a pasar, e que a Unión Europea ten a suficiente capacidade e infraestrutura para cobixar aos refuxiados.

Finalmente, Bernardo García, de Alternativa Veciñal, recordou que O Carballiño era un pobo solidario, como xa o había demostrado acollendo na Residencia do Tempo Libre aos refuxiados bosnios que fuxían da guerra en Yugoslavia, e que propoñía que no próximo pleno municipal se acordase por unanimidade ofrecer de novo a Residencia para cobixar a refuxiados sirios.

Os concelleiros carballiñeses do BNG presentaron un escrito no concello no que piden ao goberno municipal que, con carácter inmediato, leven a cabo as xestións oportunas para que O Carballiño sexa a sede do Campionato do Mundo de Pesca Fluvial de Seleccións, que se celebrará no próximo mes de agosto en Galicia, en localidade aínda por decidirse.

Marco Antonio Reboredo e Chema Ferreiro refírense neste escrito a boa infraestructura hoteleira e a magnífica rede fluvial e de instalacións e servizos para a práctica da pesca deportiva coas que conta O Carballiño.

O BNG demanda do concello carballiñés que se poña en contacto coa Federación Galega de Pesca para presentar a candidatura do Carballiño para acoller a esta actividade. Tamén consideran os nacionalistas que sería interesante e fundamental a implicación dos diferentes axentes sociais e a Sociedade de Pesca Deportiva Arenteiro, que xestiona o couto do río Arenteiro.

A repercusión, tanto económica como mediática, considera o BNG  que serían relevantes para  O Carballiño