O conselleiro de Medio Ambiente, Territorio e Infraestruturas, Agustín Hernández, avanzou esta mañá ao alcalde de Leiro, Francisco José Fernández, que a Secretaría Xeral de Ordenación de Territorio e Urbanismo vén de emitir a orde de aprobación definitiva do Plan Xeral de Ordenación Municipal do Concello de Leiro.

Esta decisión foi comunicada ao rexedor municipal no transcurso dunha reunión de traballo celebrada esta mañá na Casa consistorial, xornada na que tamén se visitou a estación de tratamento de auga potable de Leiro.

O conselleiro destacou que os técnicos da Secretaría analizaron a integridade e suficiencia dos documentos do plan, a conformidade do mesmo coa lexislación urbanística vixente e a adecuación das súas determinacións á protección do medio rural, así como a incidencia do plan sobre as materias de competencia autonómica e sobre as políticas autonómicas de desenvolvemento sostible.

O concello ten unha superficie de 3.830 km2, da cal un 95% é de solo rústico de protección, e un 3,21% é solo de núcleo rural. En relación cos solos urbanizables, o plan xeral prevé un total de cinco para completar a trama entre os núcleos existentes.

Tamén sinalou que neste municipio ordénanse máis de 85.000 m2 de solo de espazos libres e zonas verdes e máis de 50.000 m2 dedicados ao equipamentos comunitario. Unhas cifras que son o dobre no caso dos espazos libres e e máis do triplo no caso dos comunitarios, e que superan os mínimos establecidos por lei (39.500 para espazo libres e preto de 30.000 para o equipamento comunitario.

Hernández engadiu que en relación coas novas vivendas previstas, o PXOM cuantifica 900 novas vivendas que, sumadas ás vivendas existentes, fan un total de 2.401. Estas repártense do seguinte xeito:

- Núcleos rurais: 1.780 vivendas nos 31 núcleos rurais (74 % do total)
- Solo urbano: 474 vivendas no núcleo urbano de Leiro, que é o núcleo principal e á súa vez o único urbano existente (20% do total)
- Solo urbanizable: 147 vivendas (6% do total)

Recordou o conselleiro que a Xunta destinou un total de 118.000 euros para a a redacción do planeamento.

Os responsables municipais esperan que no transcurso da semana se adxudiquen por parte da Deputación as obras na rúa Ourense, de tal maneira que o inicio dos traballos sexa inminente.

O problema da focha aberta nesta rúa remontase a fai case dous anos. Aínda que o actúal grupo de goberno anunciou como prioritarira esta obra ao pouco tempo de tomar posesión, non obstante a mesma non pudo executarse polo seu elevado coste, unhos 50.000 euros, polo que optouse por incluila nos planos provinciais da Deputación.

A obra consistirá en repoñer o colector existente por un novo (a avaría produciuse precisamente polo estado do anterior colector, que era moi antigo e deterioraba todo o ámbito con continuas avarías). Así mesmo procederase á reparación de todos os ramais e enganches dese colector. Os traballos ampliaranse nuns 70 metros lineais, co que se garante un arranxo total da zona de actuación.

Argimiro Marnotes e Magín Daparte, alcalde e concelleiro de obras respectivamente, mantiveron  unha reunión cos veciños afectados por esta obra, aos que explicaron a situación de proxecto e as xestións realizadas polo concello para solucionar o problema. Neste sentido o alcalde agradecía a todos os veciños a comprensión que en todo momento mostraron neste asunto "temos que agradecerlles a paciencia durante este tempo, pero eles entenderon tamén que a nosa intención era facer un proxecto bo, e non algo que tivésemos que arranxar en pouco tempo".

 A actuación non se centrará só en tapar a focha, senón no cambio do colector e da rede da zona, e ao mesmo tempo unha mellora da capa de rodadura nese tramo.

O Concello de Boborás ven de abrir o prazo de matricula para o Punto de Atención á Infancia (PAI) para o curso 2012-2013. A data límite para facer a inscrición remata o vindeiro 27 de xullo.

 As familias interesadas poderán solicitar información e cubrir a solicitude de inscrición nas oficinas do concello ou no propio Punto de Atención á Infancia situado no recinto do CEIP “Nosa Señora de Xuvencos”.

O prezo para aqueles nenos e nenas que están empadroados/as no concello de Boborás é de 30 euros ao mes por xornada completa, mentres que aqueles/as que non o están teñen un prezo público de 45 euros. Así mesmo existen bonificacións do 25% no caso de familias numerosas e do 50 % cando se ten máis dun/dunha neno/a matriculado/a no PAI.

Para máis información poden chamar as oficinas do concello ao 988402600-988402008 en horario de 8.30 a 14.30 horas.

 As piscinas municipais do Carballiño están abertas ao público desde o 22 de xuño, prolongando a tempada como é habitual ata o próximo mes de setembro. Durante o día de apertura a entrada será gratuíta, en horario de 11:00 a 20:30 horas. Este será o horario que rexerá durante todo o verán.

Os prezos das entradas durante o presente 2012 serán de 1,10 para os menores de 16 anos, e de 1,80 euros para os maiores desa idade. Tamén, e como en anos anteriores se dará a posibilidade de adquirir bonos mensuais ou de tempada. Os prezos destes bonos, ao igual que os cursos de natación que se impartirán durante o verán estarán a disposición do público nos despachos da propia piscina.

O concello do Carballiño cedeu a explotación destas instalacións municipais a unha empresa, a mesma que durante o pasado verán estivo a animar varios días as piscinas con inchables e outras actividades, e será esta a responsable do seu funcionamento dende o venres 22 de xuño. Entre as esixencias que estableceu o concello están as da seguridade, e por iso contarase cun equipo de 4 socorristas, que velarán polos bañistas durante todo o tempo en que as instalacións estean abertas.

A Ruta sairá da Praia Fluvial de Valderías facendo un traxecto circular, volvendo ao mesmo sitio, pero percorrendo a Ruta dos Canastros, nunha distancia aproximada de 17,7 quilómetros, estando todo o percorrido sinalizado e con dous puntos de control e avituallamento con auga, bebidas isotónicas e alimentos enerxéticos. A Andaina celebraráse o domingo dia 1 de xullo ás 8,30 da mañá.

Tras a saída da Praia Fluvial de Valderías iremos a Beresmo, chegando á zona coñecida como a Murada onde encontraremos os primeiros hórreos da ruta. Seguiremos por unha parte da zona vella e dende alí iremos ao Couto de Santa Eugenia para ver unhas vistas espectaculares do encoro de Albarellos, seguindo por unha das rutas de sendeirismo que ten habilitadas o Concello. Despois volveremos a Beresmo e iremos a unha eira na que se encontran 26 hórreos restaurados por un obradoiro de emprego, saíndo por Portocarro para coller un sendeiro que nos levará a Cendóns, onde veremos 2 eiras de hórreos tamén recuperadas. Por outro sendeiro rodeado de árbores e vexetación autóctona chegaremos a Cernadas, onde volveremos encontrarnos con máis hórreos antigos e dende aquí a Barroso, pasando polo coñecido como ponte Gabián, non sen antes admirar unha impresionante paisaxe co río Valderías ao fondo discorrendo entre montañas cheas de vexetación frondosa. Tamén poderemos ver o coñecido como "Pozo Negro", famoso pola súa profundidade. Unha vez en Barroso chegaremos a unha das eiras máis grandes de hórreos non só de Galicia senón de Europa, con 29 canastros restaurados. Dende aquí continuaremos por un vello camiño que nos conducirá finalmente de novo á Praia Fluvial de Valderías e con iso fin da Andaina.

Ao rematar, todos os participantes recibirán unha camiseta conmemorativa e darán boa conta dunha suculenta comida, ademais dalgunha sorpresa, para facer que unha xornada de exercicio e convivencia remate nunha gran festa.

O prezo da actividade é de 20 €.

O prazo para anotarse remata o próximo 25 de Xuño. Podes facelo no Concello de Avión, na Biblioteca Municipal, na Casa Vermella e no Pavillón Polideportivo.

Para máis información poden falar con Darío Vázquez, no teléfono 609.77.09.73

O BNG vén de rexistar no Concello de O Carballiño unha moción a favor da constitución dunha Banca Pública Galega e para que se convoque de imediato un referendo que permita á cidadanía pronunciarse ante un rescate ao Estado español que significa un “roubo ao pobo”.

A portavoz municipal do BNG,Àurea Francisco Lorenzo, manifesta que “en realidade, o que se vai rescatar son os bancos -únicos beneficiarios desta operación- e quen vai pagar a factura da operación, en forma de xuros e de novos recortes no seu benestar, é o conxunto da sociedade. E ademais vai significar a destrución do sistema financeiro galego”.

“É por isto que a única alternativa para salvar o aforro galego, e impedir que sexa espoliado por entidades foráneas é a aposta pola Banca Pública Galega, instando á Xunta de Galiza a que demande do Estado a transferencia da participación que o FROB detenta en NGB”, engadiu a portavoz do BNG.

Asemade, Àurea Francisco Lorenzo, manifesta que “queremos que se rescate ás miles de persoas afectadas pola estafa das preferentes, así que con esta moción demandamos unha solución para elas. Solución que non pode ser outra que a da restitución até o último céntimo de todos os seus aforros. Se hai 100.000 millóns de euros para rescatar a banca, debe haber, de existir vontade política, capacidade económica máis que de abondo para devolver o estafado ás vítimas desta xigantesca fraude”.

A depuración das responsabilidades ás que houber lugar polo enorme burato deixado na economía polos xestores do sistema financeiro atopa tamén acomodo na moción do BNG que demanda a creación de comisións de investigación no Parlamento de Galiza e no Congreso dos Deputados. Até agora foron vetadas por un PP que claramente ampara os responsábeis dunha catástrofe financeira que, rescate á marxe, xa lle ten custado ao contribuínte 118.000 millóns de euros (máis de dúas veces o PIB galego).

A moción tamén se preocupa do impacto que a nova reestruturación financeira imposta polo rescate vai ter no cadro de persoal de Novagaliciabanco e na atención aos veciños e veciñas, sobre todo da zona rural. Neste sentido, o BNG demanda a adopción de medidas políticas que permitan que non se destrúa nin un só posto de traballo máis no sistema financeiro galego e se preste atención adecuada aos clientes.

O Bañiño de Arcos acolleu a presentación da dedicatoria da 50 festa do polbo, un acto que contou coa presenza da maior parte dos patrocinadores da convocatoria gastronómica carballiñesa.

Tamén se achegaron a esta presentación varios membros do grupo de goberno do Partido Popular, e os concelleiros socilalistas Paco Fumega e Manolo Dacal. O Alcalde, Argimro Marnotes, explicou que non era casual que se elixise o Bañiño para este acto "porque queremos simbolizar asi que o termalismo e a gastronomia do pulpo son dous dos eixos fundamentais da nosa economia e do noso potencial turístico, e tamén porque aquí no Bañiño estamos na parroquia de Arcos".

Marnotes suliñou que a deste ano, ao cumplirse a idade de ouro da festa é unha edición moi especial e por eso tamén se pensou "nunha dedicatoria moi especial, plantexamonos a quén podia dedicarse esta 50 edición, preguntámonos quen podia merecelo, qué institución ou cidade, acaso unha persoa, producto ou país, e chegamos a conclusión de que ninguén mellor podía simbolizar os 50 anos de tradición festiva como os propios pulpeiros e pulpeiras, porque ésta é a súa festa", dixo.

O rexedor municipal asegurou ademáis que "estamos en contacto case diario có Ministerio, porque a nosa intención é que cando chegue o dia da festa deste ano poidamos contar xa coa declaración de interés turístico nacional para unha festa que sabemos consta xa co recoñecemento internacional". Marnotes rematou o acto agradecendo a colaboración que prestan os patrocinadores a unha festa " que é certo, e témolo que decir todos os anos e sentirnos orgullosos delo, é a festa gastronómica máis importante de Galicia".

Comezaron os traballos que se inclúen dentro do acordo ao que chegaron a Deputación e o concello do Carballiño, dirixido principalmente á reparación e mellora de varias rúas e camiños do municipio.

 As primeiras actuacións leváronse a cabo na rúa Serra Martiñá, onde se executaron traballos de tratamento integral do asfaltado, e corrixiuse un problema existente na zona coas augas pluviais, colocando unha nova canalización para recoller estas augas.

Os traballos extendese á rúa Beariz, onde ademais do tratamento integral do asfaltado se está a proceder ao ancheado nalgunhas zonas para mellorar a circulación, tanto de vehículos coma de peóns. Dentro do mesmo acordo coa Deputación vanse levar a cabo outras actuacións nas rúas Leiro, Castelao e Corzos. En todas estas rúas executaranse os mesmos traballos de asfaltado, canalización de pluviais e ancheado onde sexa necesario. Na rúa Castelao executaranse tamén tarefas de rebacheo.

Este acordo coa Deputación consiste en que a institución provincial achega a maquinaria e os operarios especializados nas tarefas concretas a realizar, e o concello achega o material. Co que o concello pode executar unhas obras necesarias, e solicitadas polos propios veciños, a un custo reducido. As obras antes mencionadas non serán as únicas que se executen dentro deste convenio, pendentes só do plan de actuación que propoña o concello e o calendario de actuacións da Deputación

As Secretarias de Medio Ambiente e Medio Rural do PSdeG, Susana Bayo e Ana Doval, protagonizaron o acto "Enarborar o Bosque" que  en defensa do medio rural galego que tivo lugar no concello de Beariz.

O PSdeG-PSOE reclama ao goberno Feijóo, e en concreto ao departamento de Medio Rural, que non mire para outro lado ante a petición dos grupos da oposición e de numerosos colectivos sociais para que retire a Lei de Montes que se aprobará a finais deste mes. “Unha lei que abre a porta a especulación co noso patrimonio ambiental e que non valoriza os recursos forestais”, afirman.

 Precisamente cando o goberno galego acaba de publicar o decreto para a declaración da tempada de risco de incendios na nosa comunidade, os socialistas recordan que o PP non quixo aceptar o Pacto polo Monte Galego presentado polos Secretario Xeral dos Socialistas Galegos, Pachi Vázquez,  que recollía medidas para a prevención dos lumes e para unha maior coordinación dos efectivos dispoñibles en época de crise.  Neste punto recordan que "por cada euro que se destina a prevención, gástanse 3 en apagar incendios e 1,5 en rexenerar o monte ardido".

A responsable de Medio Rural, Ana Doval considera que “nun momento no que a crise e unha maior conciencia ambiental están a provocar un tímido retorno ao medio rural, o Goberno galego debe artellar medidas que respondan ás demandas actuais, en lugar de gobernar cun programa electoral de hai 8 anos que non ten solucións nin propostas de ningún tipo para problemas como a seca, a necesidade de maior superficie agraria para os gandeiros ante os retos da PAC, ou o millón de hectáreas abandonas de monte en Galicia”.

ENARBORAR O BOSQUE é unha actividade organizada por varios colectivos medioambientais e culturais co obxectivo de facer unha defensa do medio rural en Galicia, e en concreto na Terra de Montes. Este ano queren manifestar a oposición a unha posible mina a ceo aberto no concello de Beariz e parte de Forcarei, u proxecto no que está interesado unha multinacional canadiense, que está levando a cabo prospeccións nunha área de 3.690 hectáreas entre as parrquias de Rubillón e Presqueiras. Tamén denuncian a tala indiscriminada de especies protexidas por parte do concello de Cerdedo.

A Casa da Cultura do Carballiño acolleu  a primeira Convención de Populares do Carballiño, a que asistiu tamén o presidente provincial do PPOU, Manuel Baltar, quen deixou claro que “esta é a primeira convención do partido politico que mais se parece á sociedade do Carballiño ".

 O obxecto desta xuntanza foi dar conta, por parte dos membros do Goberno Municipal do Carballiño, da xestión levada a cabo neste primeiro ano de mandato. Asemade, tamén serviu para que os afiliados, militantes e simpatizantes populares aportasen ideas e suxerencias ao alcalde e mailos concelleiros.

O alcalde do Carballiño, Argimiro Marnotes, deu as grazas ao público asistente e aos membros do eu equipo de goberno, lembrando "o incansable traballo que se está levando a cabo a prol dos intereses do Carballiño". Tamén recordou os avances que se están desenvolvendo en política de Persoal do Concello (área asumida dende a Alcaldía), así como coa necesaria Auditoría para coñecer o estado real do Concello: “Era un clamor na rúa, era unha promesa e é unha realidade, pero o seu resutado é unha cruda realidade. Catro milons de débeda financiera, 2,8 millons de débeda a proveedores, e tres millóns que temos que dar por prescritos por unha deficiencia no sistema de cobro. Esto tradúcese nun problema de casi 10 millons. Para unhs seica é pouca débeda. Pero para nos é moito. So é pouca débeda para os que ata ese momento tiveron a desfachatez de ter un gran número de facturas ata sin dar por boas, cando o traballo está realmente executado, xa non digo pagadas, pero alomenos recoñecidas. Menos mal que nos somos xente de tirar para diante, que si nos temos que parar nalgunha desas facturas non avanzamos, só nos enzarzamos, e ese non é o noso estilo”, sinalou o rexedor, “feita a auditoría aparece o plan de pagos a proveedores, que sendo que sabemos que é un sacrificio para todos os veciños do pobo pois temos que pagar 1,6 millons a 10 anos, o certo é que si este plan non existise, os provedores terían moi complicado poder cobrar do Concello nun tempo prudente. É un plan do que alguen da oposición chegou a decir que era incrementar a débeda, como si so se puidese contar como débeda o que se lle debe aos bancos, como si eses mesmos euros debidos a empresas non fose débeda. Así lles ía aos proveedores”.

Tamén explicou Argimiro Marnotes a actual xestión económica, coa recente aprobación dos orzamentos  que baixan un 15% pasando de 10 millons a 8,2 millons, e mellorando as actividades que se viñan facendo, e conseguindo que por primeira vez logo de moitos anos o capítulo 1 dos orzamentos referido a gastos de persoal, xa non sexa o capítulo mais elevado do orzamento do Concello do Carballiño. “Estamos a facer mais con menos, demostrando que non por gastar mais se poden facer mellores cousas, senón que gastando con criterio, se gasta menos e se poden facer mais e mellores activiades e servicios. Estamos a aforrar en múltiples aspectos, dos que seguro xa vos diron boa conta. Facemos descontos por domiciliar recibos, e o que tamén é importante procuramos poñer ao día os cobros, para que todos paguen, pois é de xustiza que así sexa, asunto este que non estaba a suceder”, sinalou o alcalde.

Por último, Argimiro Marnotes agradeceu a súa presencia e colaboración dende a Deputación ao presidente provincial, Manuel Baltar, afirmando que “hoxe O Carballiño está incorporado á recollida de residuos solidos urbans xestionada pola Deputación e o servicio mellorou moitísimo, sin ter incremento de coste para os usuarios. sabemos da pronta incorporación da canceira como canceira piloto para a rede provincial de canceiras. A colaboración da Deputación en diversas actividades ao longo deste ano como formación, ou turismo co congreso internacional que se celebrará en Novembro, ou as máquinas da deputación que xa traballan nas nosas rúas, entre outras, foron, son e serán importantes para Carballiño”, anunciando para finalizar que “facémonos partícipes do PLAN 92 da Deputación de Ourense como parte dese 92 eue somos todos os concellos da Provincia e sabes que colaboraremos para que os servicios se poidan optimizar, pois é imprescindible para sobrevivir. O Carballiño, nese senso está a facer o posible para unha pronta incorporación na mancomunidade que leva o seu nome e que esperemos que para principios do vindeiro ano sexa unha realidade.”