O PSdeG-PSOE de Beade insta ao goberno municipal do Partido Popular a protexer e conservar correctamente os lenzos do denominado Monumento á Semana Santa de Beade. Un conxunto artístico que data do século XVIII e que durante anos foi colocado na igrexa de Santa María, pero tras décadas gardado, volveuse a expor o pasado ano durante a Semana Santa.

Dende o Grupo Municipal Socialista explican que no último pleno municipal celebrado esta mesma semana propuxeron a firma dun convenio entre o concello de Beade, a consellería de Cultura e o bispado de Ourense con fin de “protexer os lenzos e madeiras, namentres se expoñan durante a Semana Santa”. Tal e como explican as e os socialistas “o monumento atópase moi deteriorado tralo paso dos anos e precisa dunha correcta montaxe e da presencia de expertos para realizar a mesma”.

O ano pasado o monumento foi instalado coa axuda da veciñanza, pero neste 2025, dende o PSOE de Beade piden que sexan os técnicos da Rede Galega de Museos da Xunta, os que se encarguen da montaxe. Neste senso explican que “podería empregarse aos técnicos e restauradores do museo Etnolóxico de Ribadavia, do Arqueolóxico de Ourense ou do de Peregrinacións de Compostela, que son os máis próximos a Beade e dependen da Xunta de Galicia”.

A voceira do PSdeG-PSOE en Beade, Carmen Rama Cotelo, deixa claro que “as e os socialistas de Beade non nos opoñemos á exposición dos lenzos, pero pedimos que se faga con garantías para un mellor coidado cara o patrimonio”. Tal e como relata a concelleira socialista “o concello non ten persoal cualificado e o pasado ano contou coa inestimable colaboración da veciñanza, polo que propuxemos a firma do convenio e que sexan profesionais os que se encarguen da montaxe e desmontaxe do monumento nesta e en vindeiras ocasións”.

Tal e como explica Rama Cotelo, a proposta foi feita durante unha sesión plenaria por parte do grupo municipal socialista, “o alcalde aceptouna e prometeu iniciar a xestión coa Xefatura Territorial de Cultura da Xunta de Galicia en Ourense mediante unha chamada telefónica”. A voceira socialista considera que “estamos ante unha peza artística única e cunha singularidade especial” e lembra que existe un estudo realizado por Fernando González Suárez, profesor do instituto Otero Pedrayo e que formou parte do grupo Francisco Moure sobre o monumento.

O PSOE de Beade considera “imprescindible” tamén restaurar esta peza, xa que tal e como explican “o estado de conservación non é bo, pero a maior parte das pinturas seguen permanecendo nos lenzos”. Ademais insisten en que a proposta “suporía un coste mínimo, pois só habería que abonar os gastos de desprazamento e manutención dos traballadores da Xunta”.

A corporación carballiñesa aprobou por unanimidade iniciar xestións ante a Confederación Hidrográfica para a recuperación das ribeiras do Carrás ao seu paso pola zona urbana do Carballiño, incluíndo a construcción dun paseo, ao estilo do que xa existe no río Arenteiro.

A proposta foi presentada ao pleno polo grupo municipal de Espazo Común, que tamén defendeu ante o pleno que concello e Xunta traballen para favorecer a apertura da Residencia de Tempo Libre, alomenos dez meses ao ano.

Escoita aquí a intervención en COPE O Carballiño do concelleiro e portavoz de ESCO, Adolfo Nogueira:

A iniciativa está impulsada pola Concellería de Deportes do concello do Carballiño e financiada a través do Plan de Cooperación da Deputación, e ten como obxetivo a promoción do exercicio físico entre a poboación carballiñesa maior de 16 anos de idade, co único requisito de figurar inscritos no Padrón Muncipal de Habitantes.

Serán dúas sesións gratuítas ao mes para todas as persoas participantes neste programa, que se levarán a cabo nas instalacións termais do balneario das Caldas de partovia, e serán os lùns de 4 a 5 da tarde para as sesións de pilates, e os mércores de 8 a 9 da noite para as sesións de ioga.

Para realizar as inscricións, as persoas interesadas poden facélo acudindo á Área de Deporte ou a través da APP do concello do Carballiño.

Escoita aquí ao concelleiro de deportes Pepe Castro-Gil, e a directora xerente das Caldas de Partovia, Eva Álvarez:

A Xunta vén de licitar hoxe a mellora da estrada OU-212 ao seu paso polos concellos de Beariz e Avión, cun investimento de case 1,5M€ (1.453.550€). A conselleira de Vivenda e Planificación de Infraestruturas, María M. Allegue, xunto ao delegado territorial da Xunta en Ourense, Manuel Pardo, presentou hoxe esta actuación, cuxas obras prevense iniciar ao longo deste vindeiro verán.

A intervención supón o acondicionamento desta vía autonómica nun tramo de 6 quilómetros entre o centro urbano de Beariz, á altura do punto quilométrico 6+250, e o desvío ao núcleo do Couso, en Avión, no quilómetro 12+620.

Como explicou a conselleira, a intervención “conxuga os obxectivos que nos marcamos para acadar unhas estradas máis humanas, sostibles e seguras”. Así, as principais actuacións serán a ampliación da plataforma do viario ata os 7 metros, así como a rectificación dunha curva en Beariz (no pq 7+350) aumentando o radio dos actuais 30 metros aos 50 metros para mellorar así a seguridade, ademais da humanización da travesía de Liñares, xa na zona urbana en Avión.

Nesta contorna dotarase á travesía de beirarrúas e zonas de aparcamento ao mesmo nivel da estrada, para integrar adecuadamente o viario nesta zona urbana.

A actuación contemplará outras melloras complementarias, como o acondicionamento dos accesos existentes á estrada OU-212, a renovación da iluminación e das varandas de protección peonil, así como a reposición de servizos afectados e a renovación da sinalización, adecuándoa ao novo deseño da estrada.

As empresas terán de prazo ata o 21 de abril para presentar as súas ofertas para a execución dos traballos.

“Trátase dunha actuación integral -apuntou M. Allegue- na que, como en todas as intervencións que realizamos nas infraestruturas, a nosa máxima prioridade é blindar a seguridade viaria, tanto para os usuarios das estradas como para os colectivos máis vulnerables, os peóns. Dotaremos a esta estrada de mellores condicións de visibilidade e amplitude e, ao mesmo tempo, será unha estrada máis amable para os desprazamentos a pé nesta contorna urbana de Liñares, tanto para veciños como visitantes”.

A Xunta xa levara a cabo nesta estrada unha actuación de reforzo de firme, cun investimento ao seu paso por Avión de 300.000 euros. Neste senso, a conselleira salientou o compromiso da Administración autonómica en materia de conservación de estradas e seguridade viaria, á que se destinan este 2025 un total de 68 millóns de euros.

Trátase dun dos sete proxectos en España elixidos por Bruxelas para reducir a dependencia europea de países de fora da UE, para a extraccion, procesado e reciclaxe de materias primas e consideradas como estratéxicas pola Comisión Europea.

O proxecto localizado en montes do concello de Beariz está promovido polo grupo aragonés Samca, a través da filial galega Recursos Minerales de Galicia, e xa completou o trámite de solicitude da concesión ante a Xunta de Galicia. Agora, a Consellería de Industria conta cun prazo de 18 meses para a súa súa avaliación e posterior autorización administrativa.

Prevése para esta mina en Doade-Beariz a construcción dunha explotación baixo terra con galerías entre os 50 e os 300 metros de profundidade, xunto á correspondente pranta de tratamento, ocupando unha superficie  total de 13,62 hectáreas.

A finalidade é a extracción de litio, un material altamente cotizado na actualidade e no futuro, xa que é utilizado para a elaboración de dispositivos tecnolóxicos ou as baterías dos vehículos eléctricos.

Unha vez que a Xunta dea luz verde ao proxecto, a intención de Recursos Minerales de Galciia é comezar as obras de inmediato, sería no transcurso do ano 2026, e dous anos máis tarde iniciaríase a extracción de mineral, a un ritmo de medio millón de toneladas anuais, e por un periodo de 40 anos, ao cabo dos que procederíase á restauración dos terreos.

Durante o periodo de construcción, aproximadamente dous anos, a obra daría emprego a unhas 500 persoas, e crearía posteriormente unhos 320 postos de traballos. A inversión do proxecto ascende a 130 millón de euros.

Máis información do proxecto no seguinte enlace:

https://minadoade.gal/es/la-mina-de-litio/

O presidente da Deputación de Ourense, Luis Menor, participou esta mañá, acompañado pola conselleira do Medio Rural, María José Gómez, na presentación de seis máquinas hidrostáticas polivalentes para as mancomunidades de Verín, O Ribeiro, O Carballiño e Terras de Celanova, así como tamén para o Servizo de Prevención e defensa contra os Incendios Forestais(SPIF). No acto, celebrado no Parque da Maquinaria da Deputación en San Cibrao das Viñas, fíxose unha demostración do funcionamento destes novos aparellos, que permitirán realizar traballos preventivos de roza e extinción.

Luis Menor puxo en valor a “cooperación pioneira” acadada con esta maquinaria “innovadora e útil”, xa que a entrega se enmarca no convenio asinado pola Deputación de Ourense coa Consellería de Medio Rural en materia de prevención de incendios. Neste sentido, o presidente provincial lembrou que a de Ourense é a deputación galega que máis convenios deste tipo asina co goberno autonómico, sendo o asinado para mantemento e conservación de infraestruturas preventivas contra o lume o primeiro que se impulsou en Galicia, xa en 2023.

4,1 millóns para un acordo pioneiro

Este convenio conta cun orzamento de 4,1 millóns de euros para esta anualidade e, ademais da entrega das máquinas hidrostáticas, contempla a adquisición de ata 12 tractores con rozadoiras, maquinaria motoniveladora e incluso a cesión, por parte da Deputación, de maquinaria da súa titularidade aos concellos para a realización de tarefas preventivas.

Tamén ao abeiro deste convenio, poranse en marcha de catro programas piloto para dotar cun total de 16 brigadas de prevención e extinción de incendios por seis meses noutras tantas mancomunidades municipais. Asemade, en virtude deste protocolo, darase formación especializada ao persoal municipal e ás mancomunidades a través do Centro Integral de Loita contra o Lume de Toén.

Na presentación da nova maquinaria tamén estiveron o director xeral de Defensa do Monte, Manuel Rodríguez; así como os presidentes das mancomunidades que se beneficiarán destes vehículos: Jaime Sousa, da mancomunidade de Terras de Celanova; Paco Fernández, da Intermunicipal Voluntaria do Ribeiro; José Luis Suárez, da comarca de Verín e Fernando Rodríguez, da comarca de Carballiño.

Pola súa banda, a conselleira María José Gómez explicou que se trata de máquinas “innovadoras” que permitirán que os territorios destas mancomunidades estean máis preparados para facer fronte aos lumes forestais. Do mesmo xeito, agradeceu a disposición amosada por parte da Deputación, que colaborou en todo momento para afondar no compromiso do Goberno autonómico de mellorar a prevención dos lumes forestais.

“Boa política” e “espírito de cooperación”

O presidente provincial quixo poñer en valor a “palabra dada” e a “boa política” á hora de abordar un convenio pioneiro coma este, clave para a prevención dos lumes forestais. Neste sentido, lembrou a máxima da “colaboración” e o “espírito de cooperación” entre a Deputación e a Xunta, fronte ás “mensaxes falsas” que negan o investimento do goberno autonómico na provincia de Ourense.

“Dende a Deputación de Ourense sempre chegamos a acordos beneficiosos para a cidadanía”, subliñou Luis Menor.
--