A viaxe de volta da expedición do Arenteiro desde Barcelona convertíuse nunha odisea, cando ás dúas da madrugrada o autocar sufría unha avaría no sistema de ventilación. Tras permanecer ata as seis e media da mañá a expedición foi trasladada en autocar ata a estación madrileña de Chamartín, desde a que completaron o regreso a O Carballiño en tren a primeira hora desta tarde de lúns.

O accidentado desprazamento para xogar ante o Barça Atletic no Johan Cruiyff, onde o Arenteiro obtivo un meritorio empate a un gol, tivo a súa outra noticia negativa na lesión do gardameta Diego García, que podería sufrir a rotura do tendón de Aquiles.

Escoita aquí a entrevista de Xan Pinal ao director deportivo do Club Deportivo Arenteiro, Alex Vázquez.

A Deputación de Ourense e os balnearios da provincia poñerán en marcha unha campaña de promoción e coñecemento do termalismo, pola que se habilitarán 500 prazas de acceso ás piscinas e instalacións termais durante os sábados e domingos de abril, desde o día 13, en diferentes horarios e a un prezo único para calquera centro: 5 euros.

Esta iniciativa dáse a coñecer coincidindo coa celebración, o 7 de abril, do Día Mundial da Saúde, data na que se lembra a necesidade de promover iniciativas que axuden a incrementar hábitos saudables de vida e afrontar os retos sanitarios actuais e futuros.

Con esta campaña, a Deputación de Ourense pretende que un número cada vez maior de persoas residentes na provincia coñezan e valoren todas as posibilidades que os balnearios ofrecen para mellorar a saúde física e mental.

Termalismo Social
Esta é unha acción máis que enmárcase na liña de cooperación que a Deputación e os balnearios ourensáns veñen mantendo desde hai anos en diferentes ámbitos, sendo o máis importante o Programa de Termalismo Social que se desenvolve desde 2013 e que constitúe todo un exemplo de cooperación público-privada no ámbito da saúde e o envellecemento activo.

A través deste programa anual, miles de persoas poden beneficiarse de diferentes modalidades balnearias centradas no uso terapéutico das augas mineiro medicinais.

Neste sentido destaca por innovadora a recente aposta para configurar os centros termais da provincia como ferramentas contra a soidade non desexada entre os maiores, un problema de saúde pública tal e como advertiu a Organización Mundial da Saúde. Grazas a esta modalidade, ao redor de 200 maiores que viven sós terán acceso este ano a terapias termais en grupos dun máximo de 20 persoas, axuntando a experiencia social cos beneficios da auga mineromedicinal.
Información en WhatsApp

Ademais dos medios habituais de información, a área de Benestar da Deputación acaba de estrear unha “Canle Termal” en WhatsApp, que será o primeiro en explicar o procedemento para participar nesta campaña. A través deste sistema, que en poucas horas ten xa preto de 600 seguidores, os usuarios tamén poderán atopar noticias sobre o Programa de Termalismo Social (inicio, solicitudes, novas prazas, ofertas..) e sobre aspectos de saúde e lecer relacionados cos balnearios. Todos os detalles sobre esta canle e a forma de facerse seguidor están dispoñibles en termalismourense.com/canal

As prazas poderán reservarse a partir do próximo mércores, día 10, ás 9:00 horas. Tamén se poderán consultar os detalles deste plan no teléfono da área de Benestar -988 317 760- e en termalismourense.com

Adeus ás exquisitas e únicas "puntillas" de chipirón da Cubana, adeus a tantas e tantas exquisiteces da súa cociña tradional, ao cordeiro asado, as carnes, os peixes frescos, as súas larpeiradas, adeus a unha cociña que gardaba a esencia dunha casa de comidas de sempre, adeus a tantas horas de mesa compartida e animadas sobremesas, adeus a 85 anos de historia gastronómica e historia do Carballiño.

Pechou "La Cubana", unha historia de restaurante familiar de tres xeneracións, sendo un referente na hostalaría local desde a súa apertura en 1939, por eso era a casa de comidas máis antiga do Carballiño aberta ata este ano 2024 cando apaga os fogóns.

Despídense comunicando que "pechamos de forma permanente e queremos agradecer aos nosos clientes e grandes amigos por todos estos anos de confianza e momentos felices, cerramos esta etapa co corazón cheo e orgullosos do noso traballo". 

No PODCATS de COPE O Carballiño podes escoitar a historia de "LA CUBANA" contada por Loli Ameijeiras, terceira xeneración desta saga da restauración carballiñesa.

José Antonio Barge, Maria Luisa Rodríguez, Sebas Lamazares e Fátima Gómez comparten coa audiencia de COPE O Carballiño a tertulia deste venres dia 5 de abril de 2024.

O Grupo Provincial Socialista na Deputación de Ourense vén de acadar un acordo “histórico” para un reparto de fondos públicos “xusto e equitativo” entre os concellos da provincia que chegará neste 2024 aos 22,8 millóns de euros. Deste xeito destinaranse 17 millóns de euros a través do plan único de colaboración cos 91 concellos da provincia de menos de 20.000 habitantes e a entidade menor de Berán e 5,8 millóns a través dunha liña de subvencións nominativas a todos estes concellos, seguindo o criterio de número de habitantes.

Durante a comparecencia ante os medios de comunicación, os e as socialistas anunciaron que “estamos ante un acordo histórico, non só para o PSOE, senón para a toda a provincia, pois teremos un reparto xusto e equitativo de 22,8 millóns, o que dará autonomía financeira aos concellos para afrontar novos retos”. Durante a súa intervención, o voceiro do Grupo Provincial Socialista sinalou tamén que “é bo recordar que fai xusto un ano, na modificación que aprobaba o PP co apoio de DO e da deputada non adscrita, os 15 millóns que se repartían non seguían ningún criterio obxectivo, correspondéndolle un 85% a concellos do PP, un 11% aos do PSOE, un 3% aos do BNG e un 1% a outras formacións, algo que logramos corrixir”.

Dende o PSOE ourensán salientan que este acordo “é froito da negociación levada a cabo polo grupo provincial socialista nos orzamentos de 2024 e nos que posibilitamos a aprobación dos mesmos en base a implantación do tan agardado plan único, que habilitaba unha partida para distribuír de forma equitativa e con criterios obxectivos para todos os concellos unha parte significativa deses orzamentos, sen importar a cor política”. Cabe lembrar que na negociación inicial se destinaban 14 millóns de euros e se comprometían, como mínimo outros 3 millóns nesta próxima modificación de crédito.

O voceiro do Grupo Provincial Socialista, Álvaro Vila Araújo, salienta que “unha vez coñecida a liquidación e o remanente de tesourería, trasladámoslle ao presidente a necesidade de falar e negociar o incremento desta achega e a incorporación de novas partidas que considerábamos importantes e máis que necesarias”. Neste senso, afirma que “dos 14 millóns iniciais, máis os 3 comprometidos para o plan CooperOU, engádense agora 5,8 millóns máis en subvencións nominativas a todos e cada un dos 91 concellos da provincia e a entidade menor de Berán”.

O criterio para o reparto destas subvencións nominativas irá en función do número de habitantes. Deste xeito, os concellos de menos de 1.000 habitantes percibirán unha contía de 50.000 euros; os concellos entre 1.000 e 5.000, recibirán 60.000; e os de máis de 5.000 habitantes, correspóndenlles 70.000 euros.

“Nestas negociacións tamén consideramos de vital importancia que se incrementase a partida destinada ao plan provincial de estradas”, explica Vila Araújo, que tamén que “apostamos por un plan de choque para frear o deterioro sistemático da rede viaria provincial, conseguindo que se cheguen aos 3 millóns de euros”. Cabe destacar tamén a inclusión dunha nova partida para axudar a aqueles concellos que teñen conservatorios, cunha achega de 200.000 euros. “Entendemos que os conservatorios son responsabilidade da Xunta e debería ser a que os financie, pero namentres isto non ocorre, ten que ser a Deputación a que axude ao seu funcionamento, de aí esta partida, que solicitamos que se incremente nun futuro”, destaca o voceiro do PSdeG-PSOE na Deputación de Ourense.

Por último, Vila tamén quixo por o foco en que “tamén hai desacordos, especialmente no que se refire a aportación, unha vez máis a Meisa, para pagar débeda e gastos financeiros de exercicios pasados”. Neste senso apunta que a partida que se destina é de 1,4 millóns de euros e que agarda “solucións proximamente, tralos acordos acadados no último pleno, no que se aprobou unha moción socialista que pedía a constitución dunha mesa de traballo cos grupos políticos e entidades para corrixir o funcionamento deste organismo”.

Esta modificación de crédito sairá adiante gracias a abstención do PSdeG-PSOE.

O portavoz do PSdeG-PSOE do Irixo, tenente alcalde e concelleiro de obras, Iago Fariñas, repasa a actualidade municipal e responde ás preguntas da audiencia de COPE O Carballiño.

A Deputación de Ourense pon en marcha o programa “Vive o deporte” para continuar a fomentar a práctica deportiva prioritariamente entre o alumnado ourensán, “conscientes da importancia que ten para o deporte base e, ademais, para o desenvolvemento persoal de cada mozo e moza”, explicou o presidente provincial, Luis Menor na presentación desta iniciativa no Pazo dos Deportes Paco Paz, acompañado director da Área de Cultura e Deporte, Marcos Vázquez, o asesor de Deportes, Diego Enrique Álvarez e representantes de Federacións deportivas.

“Con esta iniciativa -que organizamos en colaboración con federacións, clubs e asociacións deportivas ourensás-, tamén pretendemos inculcar entre o alumnado a infinidade de valores que están ligados á práctica deportiva”, engadiu Luis Menor.

Coa posta en funcionamento desta iniciativa, dotada cun orzamento de 80.000 euros, “conseguimos materializar esa vocación do noso goberno de impulsar e fomentar a práctica deportiva na provincia, achegando actividades aos concellos que, de algún modo, máis precisan a nosa colaboración pola súa situación demográfica”, salientou o presidente provincial.

Desenvolvemento do programa

O programa desenvolverase entres os meses de maio a outubro de 2024 e serán as propias federacións deportivas e clubs os encargados de executalo. Estas actividades lúdicas e formativas desenvolveranse durante as fins de semana de 10.00 a 14.00 horas.

Nesta primeira edición, os deportes que se practicarán serán: tenis de mesa, ximnasia en varias modalidades, hockei, balonmán, patinaxe, baloncesto, fútbol feminino, deportes náuticos, volei, bádminton, tenis, atletismo, escalada e xadrez. Trátase dun programa concibido e deseñado para os escolares da provincia, pero aberto nalgunhas disciplinas deportivas a toda a veciñanza.

As Federacións deportivas promocionarán as actividades nos centros escolares e concellos dos lugares onde se desenvolvan, onde á súa vez poderán inscribirse os interesados.

“Vive o deporte” é “un programa aberto e polo tanto, aqueles concellos que inicialmente non estean neste calendario poderán solicitar a súa integración. Nesta primeira edición, encargámonos de garantir que se chegue a todas as comarcas cunha atención especial cara a aquelas con maior despoboamento”, explicou o presidente da Deputación.

As xornadas serán impartidas prioritariamente en espazos abertos ao público, sempre e cando, as esixencias técnicas deportivas así o permitan, de xeito que sexa unha actividade atractiva da que poidan desfrutar todos, participantes e público en xeral.