A agrupación "Os Parrandas" levouse para O Irixo o primeiro premio do concurso de comparsas do martes de entroido no Carballiño, dotado con 1300 euros, o xurado tivo en conta a orixinalidade e traballo artesanal dos traxes e a carroza "a leira de millo", integrada por veciños e veciñas relacionados ou residentes no concello do Irixo. Ademáis, esta mesma agrupción tamén gañou o premio especial concedido por votación das propias comparsas, polo que sumaron outros 300 euros.

O segundo premio, dotado con 1.000 euros foi para a comparsa dos Arrieriños de Dacón e o seu "carrusel", terceiro recoñecemento que consiguen neste entroido 2024, xa que o pasado sábado triunfaron no carnaval de Chantada e o pasado domingo conseguiron o segundo premio no desfile do entroido de Ourense. 

O resto dos premios deste concurso de comparsas do martes de entroido no Carballiño foron os seguintes:

3⁰ Premio (800€ : Asoc. Entroula. "Natureza Máxica".

4⁰ Premio (400€): Asoc. Os Azucarados de Maside.

5⁰ Premio (350€): Asoc. Amigos de Partovia. "Noite de estrelas".

6⁰ Premio (300€): Asoc. Lumareda. "Noites de cabaret".

7⁰ Premio (250€): Asoc. Cultural e carnavalesca Os Nevadiños. "O Imperio dos Amarenses".

8⁰ Premio (200€): O mundo de fantasía de Aspadisi.

Accésits a(120€): Os Vikingos da Costa e Asoc. Medrando Amoeiro.

O desfile, que abriron fora de concurso os históricos Liborianos e pechou -tamén fora de concurso- a comparsa-espectáculo Os 100 Tolos, foi seguido por numeroso público, abarrotando as rúas máis centricas do Carballiño.

Finalmente, o tempo parece que non vai poñer impedimento e poderá celebrarse o gran desfile-concurso de comparsas deste martes de entroido no Carballiño, dia festivo local no municipio do Carballiño. Para esta tarde de martes 13 de febreiro prevese un dia con algunhas posibles chuviscadas pola mañá, e logo pola tarde nas horas do desfile, o seu inicio está programado para as cinco da tarde, os pronósticos apuntan a unha alternacia de nubes e sol no ceo do Carballiño.

A orde no que desfilarán as comparsas, tendo en conta que tanto Os liborianos como Os 100 tolos non entran no concurso, será a seguinte:

1.OS LIBORIANOS
2.ASOCIACIÓN ENTROULA E NATUREZA MÁXICA
3.O MUNDO DA FANTASÍA DE ASPADISI
4.NOITES DE CABARET DA ASOCIACIÓN LUMAREDA
5.OS AZUCARADOS DE MASIDE
6.A C. E CARNAVALESCA OS NEVADIÑOS – O IMPERIO DOS AMARENSES
7.ASOC. OS PARRANDAS DO IRIXO – A LEIRA DE MILLO
8.NOITE DE ESTRELAS DA ASOC. AMIGOS DE PARTOVIA
9.MEDRANDO AMOEIRO
10.VIKINGOS DA COSTA
11.OS ARRIEIRIÑOS DE DACÓN – CARRUSEL
12.OS 100TOLOS

Percorrido:
R/ Otero Pedraio/ Conde Vallellano/ Rotonda Alameda/ Avda. Julio Rodríguez Soto/ Calvo Sotelo/ Tomás Mª Mosquera/ Praza Maior.

Establécense os seguintes premios:

1º Premio: 1.300 euros
2º Premio: 1.000 euros
3º Premio: 800 euros
4º Premio: 400 euros
5º Premio: 350 euros
6º Premio: 300 euros
7º Premio: 250 euros
8º Premio: 200 euros

-Accesits de 120 euros ás comparsas que non acaden ningún dos premios anteriores.
-Un premio especial de 300 euros para a mellor comparsa que acade a maior puntuación. O xurado neste caso estará composto por un representante de cada comparsa que participe no desfile, que deberán seleccionar cun voto á que consideren mellor comparsa.

A decisión do xurado farase pública durante a festa que terá lugar na Praza Maior amenizada pola ORQUESTRA ALKAR ao remate do desfile.

O conselleiro do Medio Rural, José González, acompañado da directora xeral da Axencia Galega de Desenvolvemento Rural, Inés Santé, mantiveron unha reunión co alcalde de San Amaro, Fernando Redondo, na que se abordou a evolución dos traballos de posta en marcha do polígono agroforestal situado neste municipio ourensán.

Este polígono agroforestal abrangue unha superficie de 28,03 hectáreas distribuídas en 422 parcelas de 146 propietarios, e xa conta coa declaración de utilidade pública e interese social. A súa orientación produtiva serán os sistemas agroforestais -gandaría e masas de frondosas autóctonas- e os cultivos agrícolas anuais, probablemente alimentación complementaria da gandaría.

Neste encontro, celebrado na Casa do Concello de San Amaro, o conselleiro indicou que, dentro dos traballos de posta a punto do polígono, xa se realizaron actuacións de roza en 2 quilómetros de camiños, co obxectivo da posta en valor dos terreos e a prevención de incendios forestais, ademais de facilitar as tarefas de revisión do parcelario. Neste sentido, estanse a levar a cabo traballos de investigación da titularidade. Prevese que nas próximas datas se poida informar aos titulares dos predios incluídos no polígono dos datos correspondentes ás súas propiedades.

O de San Amaro é un dos 29 polígonos forestais aprobados en Galicia -en diferentes fases de desenvolvemento-, 17 deles na provincia de Ourense. Estes polígonos, creados ao abeiro da Lei de recuperación da terra agraria, supoñen a posta en valor de 9.300 hectáreas distribuídas en 30.120 parcelas propiedades de 8.420 veciños. O primeiro en entrar en produción será, neste mesmo primeiro semestre de ano, o polígono de Oímbra, orientado á cultivos leñosos -como a vide- e a produción hortícola -como o pemento-.

O candidato socialista á Presidencia da Xunta, José Ramón Gómez Besteiro, interveu este domingo nun mitin na casa da cultura do Carballiño, dende onde se comprometeu a que haxa servizo de pediatría axeitado para as necesidades dos nenos e nenas da comarca.

O candidato, que estivo acompañado polo alcalde do Carballiño, Francisco Fumega, e a candidata número 1 pola provincia de Ourense, Carmen Dacosta, ofreceu un mitin no que se centrou especialmente no baleirado de servizos públicos na Galicia interior durante estes últimos 15 anos de goberno do PP na Xunta.

“Comprométome a que non haberá ningún neno sen pediatra no Carballiño, en Ourense, nin en toda Galicia” afirmou un Besteiro que amosou a súa indignación pola situación actual do concello que non conta con nin un só pediatra. Así mesmo, manifestou o seu respaldo á mobilización dos veciños para reclamar este servizo que terá lugar o vindeiro 16 de febreiro. O candidato do PSdeG criticou “as palabras baleiras” de Feijóo e Rueda desta semana en favor da Galicia rural, xa que non entende “como podes dicir defender ao mundo rural, á xente do interior, cando levas 15 anos recortando sistematicamente todos os servizos públicos?”, preguntouse. “A forma de loitar contra o reto demográfico é con máis e mellor sanidade pública, de proximidade, con educación pública e non pechando 1 de cada 10 colexios na última década, con promoción de vivenda e con impulso da economía para crear emprego”, engadiu Besteiro.

O candidato socialista remarcou as propostas que teñen no seu programa de cara a mellorar a atención primaria, como o establecemento dun máximo de 48 horas para ser atendido polo médico de cabeceira, ou a incorporación de novos servizos nos PAC, como o de saúde mental. “Ese é o modelo socialista para evitar que haxa unha Galicia de dúas velocidades, exactamente o contrario do que fai o Partido Popular”, remarcou. Besteiro tamén apuntou á necesidade de reforzar o sistema de pensións público con “remuneracións axeitadas que permitan ter unha vida digna no último tramo da vida”.

Para o socialista non é entendible que nin o PP nin o BNG votaran a favor da suba das pensións no Congreso dos deputados, “é algo que deben explicar a todos os pensionistas galegos”, engadiu. Tamén criticou as palabras de Rajoy que estivo este mesmo sábado no Carballiño, sendo que o ex presidente popular declarou que “ou goberna o PP ou entran os malos”. Para Besteiro estas palabras amosan “o sectarismo que teñen no Partido Popular” e que nunca pensaron en gobernar para todos, só en confrontar e dividir á sociedade”. “Quen pensa que o mundo divídese entre bos e malos, demostra que non é digno de gobernar aos galegos”, sentenciou.

O presidente de honra do Partido Popular, Mariano Rajoy, participou este sábado nun acto político con máis de 400 simpatizantes no Carballiño, onde afirmou que “se todos os que estamos aquí convencemos aos nosos amigos e achegados de que voten o domingo ao PP, Argimiro Marnotes será deputado e o Arenteiro iráse a Primeira División”. Foi no transcurso dunha comida-mitin baixo carpa celebrado no parque municipal do Carballiño.

Tras explicar que as únicas alternativas nestas Eleccións Autonómicas son “o PP e todos os demais”, Rajoy avogou por manter “un goberno que se ocupe dos problemas que lle preocupan á xente, que estea unido e forte, cun presidente sensato, tranquilo e con experiencia como é Alfonso Rueda”. Mariano Rajoy contrapuxo esta opción, “pois o PP converteuse na única referencia política do sentido común en España”, coa que ofrece o BNG, “o máis extremista dos extremistas”. Destacou, ademais, que “o Bloque non engana a ninguén: defende os intereses de Puigdemont, apoia a Bildu e esquécese dos intereses de Galicia”.

Por último, Rajoy apelou á mobilización de cara ao próximo domingo: “Hai que sacar maioría absoluta. Non nos pode pasar o que pasou en xullo, gañando amplamente as eleccións pero sen gobernar porque nos faltaron 4 deputados”.

A secretaria xeral do Partido Popular de Galicia, Paula Prado, explicou no Carballiño que nesta campaña electoral en Entroido “o BNG púxose unha máscara de moderación para intentar enganar aos galegos e esconder a súa verdadeira faciana: Piden, literalmente, a independencia para Galicia e o monolingüismo nas aulas”. Sinalou ademais que “no PP non somos de populismos, non somos de incorporar cousas no programa electoral que non se van a facer, porque nós cumprimos coa palabra dada”, explicou a número dous dos populares galegos, recalcando que “nós somos serios e cumprimos co que dicimos. Somos o partido da liberdade, da liberdade de cultura e da liberdade da lingua”.

O presidente dos populares ourensáns anunciou que é hora de “quitarlle a máscara ao BNG”, e fíxoo lembrando que, pese a que vai dando leccións de loita polos nosos intereses, “votou en contra de todos los concellos de Ourense, incluídos aqueles nos que goberna, rexeitando cos seus votos o novo modelo de financiamento que aprobamos na Deputación”. “O verdadeiro BNG, o que se opón a todo o que veña do PP, ten intencións ocultas no seu programa electoral: Eliminar as provincias para finiquitar as deputacións provinciais, porque din que non teñen funcionalidade, iso si, só lles vale cando gobernan eles”, explicou Menor Por ultimo, logo de evidenciar a “un PSOE que anda desaparecido en Ourense”, Luis Menor quixo apelar á importancia do vóto útil o vindeiro domingo: “Fronte ao caos, as chantaxes e as cesións, o noso é o sentidiño, demostrando que en Ourense hai un partido moi forte e de apoio maioritario que vai falar nas urnas, e con rotundidade, o próximo día 18”.

O candidato José González foi rotundo no Carballiño en apoio de agricultores e gandeiros: “A nosa posición é tan clara como contundente. O Goberno central, a través do ministro Luis Planas, ten que liderar a petición á UE dunha moratoria inmediata de toda a nova lexislación europea que está asfixiando a agricultores e gandeiros, ata que se poida valorar a flexibilización da mesma cunha aplicación progresiva e adaptada a cada territorio, tal e como levamos moito tempo demandando desde Galicia”. Tamén tivo palabras José González referentes á importancia da prevención de incendios forestais, destacando que “apostamos dun xeito decidido pola prevención de incendios forestais, a través dun traballo con fitos como o Centro Integral de Loita contra o Lume de Toén e no que é chave a cooperación institucional, con pancas como o convenio anual coa Deputación de Ourense, potenciado este ano ata os 3,8 millóns de euros e que permite que ata 38 concellos ourensáns teñan con cadanseu tractor de roza, ademais de potenciar as brigadas municipais e reforzar a súa formación”.