O Voceiro do Grupo Municipal Socialista do Concello do Irixo, Iago Fariñas Valiña, presentou as pasadas semanas unha moción para ser debatida no pleno instando ao Concello Á ADQUISICIÓN PARA A SÚA CONSERVACIÓN E POSTA EN VALOR DAS CASAS REITORAIS ABANDONADAS NO CONCELLO DO IRIXO.

O concello do Irixo, do que forman parte doce parroquias, ten a meirande parte das súas casas reitorais en auténtica ruína como a de San Cosme ou a de Reádegos , Froufe ou Espiñeira; ou en semi-ruína, como a de Dadín, Cangues ou Corneda, esta última dun gran valor artístico e arquitectónico e en continua espoliación. Xa no ano 2002 o concello anunciou publicamente a adquisición da casa reitoral de San Cosme para turismo Rural e así fora reflectido nos medios de comunicación, pero pasados, máis, de 14 anos nada se sabe da compra de ningunha destas casas reitorais que forman parte do noso rico patrimonio, aínda que non sexan propiedade deste Concello.

O Grupo Municipal Socialista, indica que estas accións se poden realizar sen prexuízo de incluír outras casas reitorais, edificacións ou terreos que puideran quedar en desuso como a do Campo, ou en estado de abandono progresivo, pero actualmente de forma mais urxente centrándose claramente na Parroquia de Cangues (Santo Estevo), Parroquia de A Cidá (Santa Mariña), Parroquia de Corneda (Santiago), Parroquia de Dadín (San Pedro), Parroquia de Espiñeira (San Pedro), Parroquia de Froufe (San Xoan), Parroquia de Reádegos (Santa Baia) e Parroquia de San Cosmede de Cusanca (San Cosmede) As casas reitorais do Concello do Irixo, conforman, en gran parte, un conxunto artístico e arquitectónico que merece, sen lugar a dúbidas, a pena ser conservado e posto en valor e uso con múltiples posibilidades.

Debido ao estado destas propiedades, e a que a Igrexa hai xa uns anos que decidiu vender algunhas propiedades en desuso e especialmente as que están en estado ruinoso ou practicamente, como é o caso das anteriores sinaladas, sería moi asumible negociar coas autoridades eclesiásticas para que o Concello do Irixo adquirise a titularidade de todas estas antigas casas reitorais para recuperalas e poñelas en valor. Todas estas casas, algunhas situadas estratexicamente e outras con enormes posibilidades segundo o caso, poderían, despois dun laborioso proceso de restauración, non so albergar espléndidas vivendas de turismo rural ou albergues, que darían un pulo importante ó concello no ámbito laboral e turístico; senón tamén poderían ser convertidas en centros culturais, dotacionais ou municipais que darían servizo social para todos os veciños e veciñas do Irixo.

Xa que logo, poderían ser puntos de ocio e reunión dos veciños de cada unha das parroquias. É, ademais, unha obriga moral non deixar que se perda o patrimonio deste concello, senón arranxalo, conservalo e destinalo para uso e desfrute dos veciños ou dotar, nesas instalacións, outros servizos a este concello, porque non esquezamos que o patrimonio do concello é dos veciños e veciñas de todas as parroquias. Debido ao seu estado de deterioro á inversión inicial non debería ser moi elevada e perfectamente asumible por este concello, sempre e cando se axuste o seu presuposto, dotando unha partida orzamentaria, ou chegado o caso, unha modificación de crédito para acometer a compra despois dunha negociación coas autoridades eclesiásticas.

A rehabilitación de todas estas propiedades, que se iría prolongando no tempo, podería contar con diversas subvencións de distintas administracións e mesmo poderían dar lugar á creación dun obradoiro de emprego, xerado polo propio concello ou en colaboración con outros concellos veciños, o que xeraría traballo e riqueza no concello.

Os socialistas, queren destacar que a negociación para a adquisición destas casas reitorais coas autoridades eclesiásticas, debería incluír espazos ou metros de terreos da Igrexa que sexan necesarios para mellorar as comunicacións ou as infraestruturas do concello. Sirva como exemplo, que coa cesión duns dous ou tres metros na fachada do destro da parroquia do Campo se podería acometer o ancheamento e a urbanización do entorno con beirarrúas, que mellorarían considerablemente o entorno e garantirían a seguridade dos peóns que actualmente circulan pola estrada para desprazarse á igrexa; ao non dispoñer, no entorno da parroquia, de accesos axeitados.

O Grupo Municipal Socialista do Concello do Irixo, presentou, hai semanas, para a súa consideración e dada a importancia da conservación e posta en valor deste patrimonio existente no concello, que ademais serviría conxuntamente con outras accións para dinamizar o turismo e a economía do concello, unha moción instado ó Pleno municipal á adopción do seguinte ACORDO: “Que o Concello do Irixo negocie coas autoridades eclesiásticas, sexa o Bispado ou quen ostente a representatividade deste para tales cuestións, a adquisición na fórmula máis vantaxosa, preferiblemente a compra, das casas reitorais existentes no Concello, deshabitadas e en estado de abandono para rehabilitalas coa solicitude das axudas das distintas administracións autonómicas, estatais ou europeas, aproveitando a rehabilitación das mesmas para a creación dun Obradoiro que xere emprego e dinamice a economía do municipio e finalmente destinalas a vivendas de turismo rural, albergues, centros culturais, dotacionais ou municipais, etc. para todos os veciños e veciñas de O Irixo.”

A conselleira de Política Social e Igualdade, Fabiola García; o tenente de alcalde do Carballiño, José Rafael Castro; a concelleira de Educación, Lorena Castro; e a concelleira de Servizos Sociais, Silvia Baranda; reuníronse esta mañá en San Caetano para avaliar novas vías de colaboración entre ambas administracións para seguir reforzando a atención ás persoas maiores.

Neste sentido, o tenente de alcalde explicou á conselleira que O Carballiño é un concello rural cunha poboación envellecida, o que suscita cada vez máis necesidades para poder atender as súas necesidades. Por iso, trasladoulle a importancia de contar cun centro de atención diúrna que ofreza coidados de calidade e tamén permita facilitar a conciliación de moitas familias da contorna.

Pola súa parte, a conselleira indicou ao alcalde que o Goberno galego mantén un compromiso firme coa atención aos maiores e aposta por un modelo no que poñer a súa disposición todos os recursos necesarios para que poidan escoller onde pasar esta etapa das súas vida. Deste xeito, comprometeuse a avaliar o proxecto e estudar a súa viabilidade, co obxectivo de seguir mellorando a calidade de vida dos veciños e que complemente outros servizos públicos autonómicos como a residencia.

O Auditorio Manuel María do Carballiño será escenario este sábado, 20 de decembro, ás 20.00 horas, da primeira das actuacións do III Nadal Coral, unha cita musical xa consolidada no calendario cultural do Nadal na comarca. O festival, de entrada libre ata completar aforo, foi presentado esta mañá nunha rolda de prensa coa participación do concelleiro de Cultura, Diego Fernández, do director do Orfeón e das corais infantís do Carballiño, Christian Casas, e da directora do Coro Cantiga e a Cral Gaudeamus, Cristina Rodríguez.

Na súa intervención, Diego Fernández subliñou o intenso momento cultural que está a vivir o Carballiño nas últimas semanas e destacou a especial relevancia do canto coral na vila. “Levamos uns días de moita actividade cultural, cun auditorio cheo case a diario con espectáculos de maxia, teatro e música…, e se hai algo que no Carballiño é importantísimo, é o canto coral”, afirmou.

O concelleiro puxo en valor o carácter formativo do Nadal Coral e a súa aposta polo futuro da música coral. “É unha actividade que se enfoca claramente na canteira, nos rapaces e rapazas que están ensaiando, dedicando tempo e esforzo, e que tamén queren amosar todo o aprendido”, sinalou, agradecendo expresamente o traballo dos organizadores. “Para nós é un orgullo contar con xente como Christian e Cristina, que fan posible que a canteira xogue o seu partido”.

Fernández definiu o Carballiño como “un referente no interior de Galicia” no ámbito coral e animou á veciñanza a asistir ao concerto. “Queremos convidar a toda a xente a que se achegue ao auditorio este sábado, ás oito da tarde, e que desfrute dunha xornada única, ademais cun festival que xa vai pola súa terceira edición e ao que desexamos unha longa traxectoria”, indicou.

Pola súa banda, Christian Casas amosou a súa satisfacción por dar continuidade a un proxecto que “xa vai collendo peso e traxectoria”. “Para nós é unha alegría poder organizar novamente este Nadal Coral, un festival que busca fomentar o canto coral entre os mozos e mozas, non só do municipio, senón tamén da comarca e da provincia”, explicou.

O director incidiu na importancia de achegar a música coral aos centros educativos. “Non se trata só de dar clases ou tocar, senón de fomentar este tipo de actividades. Ir aos colexios, implicar aos mestres e ás directivas, e que os rapaces teñan contacto directo co canto coral é fundamental”, afirmou, agradecendo a colaboración dos centros participantes.

Casas detallou que o concerto do Carballiño será a primeira das dúas funcións do festival, que terá continuidade o luns en Ourense. “A nosa sede cultural é o Auditorio Manuel María, e alí comezamos este sábado. Logo repetiremos na igrexa de Santa Eufemia de Ourense”, indicou.

En canto ao contido artístico, explicou que o Nadal Coral contará cunha ampla participación de formacións corais da contorna e cun importante acompañamento instrumental. “Haberá cantos de Nadal, pero tamén variedade musical, bandas sonoras de cine, e unha posta en escena coidada, con iluminación e diferentes efectos. Tentamos beber doutras vertentes sonoras e visuais para ofrecer algo atractivo a todo o público”, sinalou.

Na súa intervención, Cristina Rodríguez quixo destacar o enorme esforzo organizativo que supón un festival destas características. “Aquí participan arredor de 130 persoas entre músicos e cantantes, e organizar algo así é moi complexo. Por iso quero agradecer especialmente o traballo de Christian”, afirmou.

A directora puxo o acento no carácter interxeracional do Nadal Coral. “É un festival no que participan rapaces, mozos e persoas adultas. Gústame moito esa imaxe de nenos cantando xunto a persoas maiores, porque todos poden aprender de todos”, explicou, reivindicando o valor social da música coral.

Cristina Rodríguez tamén defendeu os múltiples beneficios do canto. “Cantar ten que formar parte da vida das persoas. Todo o mundo pode cantar, non hai que ter unha gran voz. Cantar mellora a saúde, o benestar mental e tamén a formación dos rapaces, porque se aprenden valores como o respecto, a convivencia, o esforzo e o traballo en equipo”, sinalou.

Finalmente, agradeceu o apoio das institucións e entidades colaboradoras e convidou ao público a asistir á cita. “O Nadal é un tempo especialmente entrañable para este tipo de festivais. Temos moitísima ilusión e agardamos que sexan dúas xornadas moi especiais”, concluíu.

O III Nadal Coral confirma así o seu papel como espazo de encontro musical, educativo e social, coa actuación do Carballiño como punto de partida dun festival que celebra o Nadal a través das voces e da música compartida.

A Área de Comercio e Emprego do Concello do Carballiño lanza O Carballiño Contigo, unha campaña para fomentar as compras de Nadal no comercio local a través de 1.000 bonos de 20 euros para a veciñanza. “Queremos que os cartos das compras de Nadal queden no Carballiño e no noso comercio local”, asegurou José Castro, alcalde en funcións, esta mañá na presentación da campaña.

A iniciativa, que conta cunha inversión municipal de 20.000 euros, pretende revitalizar o comercio local durante estas semanas de compras de Nadal. “Queremos darlle a importancia que ten ao noso comercio, que forma un tecido económico e social moi importante para a nosa vila, fortalece a nosa comunidade, crea emprego e dá vida aos barrios”, resaltou Diana González, concelleira de Comercio.

Os establecementos interesados (calquera do Carballiño, estea asociado ou non ao Centro Comercial Aberto) poden adherirse á campaña desde hoxe ata este mércores, día 17. “Convidamos a aqueles comerciantes que teñan dúbidas a achegarse mañá, a partir das 20.30 horas, ao Concello para axudalos no que sexa necesario”, apuntou González. A partir do xoves, día 18, a veciñanza poderá descargar os seus bonos desde as 9.00 horas a través da páxina web carballinocontigo.com

Cada bono supón un desconto de 20 euros en compras de 50 euros, o que supón un importante revulsivo para animar á poboación a achegarse ao comercio local para os seus agasallos de Nadal. Resumindo, cada bono, que terá un custo de 30 euros para as personas que os descarguen, permitirá unha compra de 50 euros trocándoo nos propios establecementos.

Noelia Mares, xerente do CCA Carballiño, entidade colaboradora na campaña, agradeceu a iniciativa municipal porque “este tipo de campañas repercute no comercio e nos clientes”, pois “impulsa as compras, permite un maior poder de compra, fortalece a fidelización, o tecido comercial e a relación do pequeno comercio coa clientela, proporcionando unha experiencia de compra máis satisfactoria ao poder mercar o que cada un quere cun desconto adicional de 20 euros”.

O procedemento para acceder aos bonos é ben sinxelo e será presntado este martes 16, ás 20.30h no propio Concello, aos comerciantes. Nicolás González, da empresa Elitek_Soluctions, que o acceso á bono se realiza a través da web carballinocontigo.com , onde se abonan 30 euros e se basculan 50 a un monedeiro virtual, sen ningún tipo de rexistro, contrasinal nin correo electrónico. O cliente recibirá a continuación un sms no seu teléfono móbil cunha ligazón de xestión do cupón.

O Grupo Provincial Socialista presentou hoxe en Pereiro de Aguiar unha moción a debater este vindeiro venres no pleno da Deputación, na que esixe a elaboración dun plan estratéxico provincial de servizos sociais, reforce o financiamento do Servizo de Axuda no Fogar (SAF) e inste á Xunta a cumprir coas súas obrigas legais na materia.

O voceiro socialista, Álvaro Vila Araújo, estivo acompañado na presentación por deputados provinciais e concelleiras de Pereiro de Aguiar no Centro de Actividades para Maiores dos Gozos. Durante a presentación, o dirixente socialista denunciou que o SAF constitúe un piar fundamental no sistema de atención á dependencia en Galicia, pero que nos últimos anos “transformouse nunha carga económica insostible para os municipios galegos, nomeadamente para os máis pequenos, que son a maioría na provincia de Ourense”. Segundo a Federación Galega de Municipios e Provincias (Fegamp), os concellos ourensáns asumen case o 30% do custo do SAF con recursos propios, mentres a Xunta de Galicia só cobre pouco máis dun cuarto, malia ter a competencia exclusiva en servizos sociais.

"Fronte a desidia e o desleixo do goberno galego do Partido Popular, os concellos están asumindo custes que non lles corresponden. Cargas económicas impropias que afogan aos concellos para prestar un servizo clave, nunha das provincias máis envellecidas do estado", denunciou o secretario provincial do PSdeG-PSOE. "Transcorridos 16 anos desde a aprobación da Lei de Servizos Sociais de Galicia, a comunidade segue sen contar sequera co seu primeiro plan estratéxico, mentres que outras rexións contan con plans vixentes e actualizados", destacou.

Rol proactivo da Deputación para non quedar atrás

O voceiro socialista fixo fincapé en que “fronte á inacción da Xunta de Galicia, outras deputacións provinciais están a asumir un rol activo na planificación e financiamento dos servizos sociais comunitarios”. Neste senso, lembrou como no país temos os exemplos da Deputación da Coruña elaborou o seu propio Plan de Acción de Servizos Sociais, destinando en 2025 8,7 millóns de euros para financiar máis de 372.000 horas de SAF e contratar 180 profesionais, ou da Deputación de Lugo, que acordou neste pasado exercicio 3,3 millóns de euros ao SAF para municipios.

"É imprescindible que a Deputación de Ourense asuma un papel máis activo e ambicioso na planificación e financiamento dos servizos sociais. Cremos que as boas prácticas doutros entes provinciais no SAF poden servir tamén para a nosa provincia e rematar deste xeito cunha carga cada vez máis insoportable en termos económicos para os concellos da provincia de Ourense", afirmou o voceiro do Grupo Provincial Socialista. “O SAF é esencial e os nosos maiores ben merecen un servizo digno e de calidade", concluíu Vila.

O presidente provincial, Luis Menor, asistiu hoxe ao partido de fútbol Maside-Nogueira de Ramuín (encontro da liga 1ª Galicia Futgal), onde puxo en valor as recentes obras do campo Outeiro Grande, cunha instalación de céspede artificial e unha iluminación renovada, grazas ao investimento de 250.000 euros.

Menor asegurou que o céspede, xunto a reforma de vestiarios, “vai marcar un antes e un despois” para o que no seu momento foi un dos primeiros campos da provincia en ser de herba artificial, o de Maside.

No mesmo acto (na foto) tamén participaron o alcalde de Maside José Manuel Iglesias e o delegado territorial da Xunta, Manuel Pardo.

A Concellería de Cultura do Carballiño propón un menú de teatro, maxia e humor para desfrutar da fin de semana sen saír da vila.

O Nadal Cultural, que arrancou nos primeiros días de decembro, traerá ao Carballiño máis dunha trintena de actividades para maiores e pequenos. Nesta fin de semana, a oferta inclúe a obra teatral “Viaje al profundo norte”, de Teatro del Norte, e o espectáculo “Retranca… e maxia” do mago Luis Boyano. “Animamos á veciñanza da comarca a desfrutar da proposta cultural e a aproveitar para pasear polo Carballiño, desfrutar da nosa hostalaría e facer aquí as súas compras”, convida Diego Fernández, concelleiro de Cultura.

O sábado será a quenda de Teatro del Norte, que presentarán ás 20,00 horas no Auditorio Municipal a peza “Viaje al profundo norte”. Trátase dunha obra creada en 1987 e que neste 2025, cando a compañía cumpre 40 anos, volve aos escenarios cunha renovada proposta. Os personaxes reflexionan sobre o paso do tempo, o pasado que non volverá e os sentimentos que aparecen na vellez, como a soidade ou o medo. A entrada ten un custe de 8 euros e poderase adquirir na taquilla do Auditorio.

O coñecido mago Luis Boyano, pola súa parte, actuará no Auditorio Municipal o domingo, ás 19,00 horas, co seu espectáculo “Retranca… e maxia”, incluído na Rede Galega de Teatros e Auditorios. O artista, moi querido no Carballiño, presenta un show para público de todas as idades onde se misturan a maxia, a sorpresa e o humor para deixar ao público sen fala. As entradas pódense adquirir na taquilla do Auditorio por 5 euros.

Dia da Bici no Carballiño

O Concello do Carballiño impulsa este domingo o XX Día da Bici en colaboración con +Deporte La Región, ximnasio Korpore e club ciclista Carballiño Sobre Rodas. A actividade, gratuíta, está dirixida a poboación de todas as idades co obxectivo de desfrutar dunha xornada familiar, deportiva e divertida, na que haberá agasallos, sorpresas e animación musical.

“Este ano fixemos algúns cambios, temos tres carreiras diferentes por idades, pensadas para os máis pequenos, os rapaces e os adultos”, detalla José Castro, concelleiro de Deportes. As tres probas comezan ás 11,30 horas na Praza da Veracruz.

A carreira dos máis pequenos realizarase dentro do entorno da Veracruz; a dos rapaces (ou adultos que prefiran un percorrido máis curto) é de 4 kilómetros, con volta polo Parque Municipal, e a máis longa, de 8 kilómetros, chega a Mesego e regresa. “Quitamos a subida ao Chamoso e faremos unha volta arredor da Residencia de Tempo Libre”, indicou José Castro.

A inscrición, que permite acceder ao sorteo, pode realizarse a través da páxina Press Club La Región ou na propia Veracruz antes da saída. Porén, a participación é aberta a toda a poboación.

Nova entrega da tertulia dos venres en COPE O Carballiño, a deste 12 de decembro de 2025, desta vez con Fátima Gómez, Manuel Nogueira, Gonzalo Rodríguez e Sebas Lamazares.

Presenta e modera, Xan Pinal. Escóitaa aquí: