O conselleiro de Sanidade, Julio García Comesaña garantiu ao alcalde de Piñor, José Luis González, a continuidade da asistencia médica no centro de saúde desta localidade ourensá, nunha reunión mantida na xerencia do Complexo Hospitalario Universitario de Ourense, na que estiveron acompañados do delegado Territorial da Xunta en Ourense, Gabriel Alén, e do xerente da Área Sanitaria de Ourense, Felix Rubial.

O conselleiro confirmou ao alcalde que a próxima xubilación da médico titular do centro de saúde do seu concello non afectará á asistencia sanitaria que recibe a veciñanza e que o centro de saúde manterá a asistencia sanitaria nas mesmas condicións, dispoñendo dunha médico de familia de luns a venres como ata o de agora.

O conselleiro do Medio Rural, José González, visitou a aldea modelo de Penedo, no concello de Boborás, na que resalta xa a posta en produción de gando, concretamente de porco silleiro en extensivo. Esta aldea modelo conta cunha superficie de 23,41 hectáreas distribuídas en 665 parcelas de 131 propietarios.

O conselleiro, que estivo acompañado pola alcaldesa de Boborás, Patricia Torres, destacou a recuperación da raza do porco silleiro en extensivo, así como a produción prevista da alimentación necesaria nas terras de cultivo, mediante cereais e plantas autóctonas, poñendo en práctica a economía circular. Ademais, os terreos serán de produción ecolóxica.

Para levar a cabo o aproveitamento gandeiro e a recuperación das terras da aldea, dende a Axencia Galega de Desenvolvemento Rural executáronse as obras e instalacións precisas. Así, realizáronse os peches (tres tipos distintos perimetrais e interiores que permiten a xestión do gando nas parcelas), infraestruturas gandeiras (refuxio, cría e lazareto), instalacións de enerxía (pastor eléctrico) e sinalización precisa.

O orzamento total investido nestas obras e instalacións aproximouse aos 82.700 euros, sendo a partida máis importante a destinada aos peches e cerramentos, con arredor de seis quilómetros lineais. Así, realizáronse as instalacións de refuxio e cría executadas en madeira para a integración na contorna da aldea.

Un incendio calcinou por completo unha vivenda unifamiliar situada no quilómetro 16 da N-541, na localidade de Punxín.

As lapas comezaron pouco despois da medianoite deste pasado domingo. Os propietarios da casa, un matrimonio de septuaxenarios foron os que avisaron a Emerxencias do que pasaba e saíron ilesos polo seu propio pé.

A central de alarmas mobilizou os bombeiros do parque comarcal do Carballiño e a Garda Civil. Tamén se enviou unha ambulancia pero non foi precisa a súa intervención. Os servizos de extinción confirmaron que puideron controlar o incendio contra as 01:45 horas, aínda que traballaron para arrefriar os restos ata pasadas as 03:30 horas.

A vivenda quedou arrasada por completo e a estrutura do tellado tamén quedou afectada. Os donos da casa explicaron que o lume comezou no teito por riba da cociña na que había unha cheminea. As lapas estendéronse con rapidez. Sospeitan que o lume se iniciara no tiro dunha estufa empotrada na cheminea, porque escoitaron un estoupido, pero as causas do incendio aínda están en fase de investigación.

O Servizo de Orientación Laboral do Concello do Carballiño "continúa traballando pola mellora da empregabilidade dos veciños e veciñas da Comarca, prestando un servizo información, apoio e asesoramento personalizado na procura de emprego", destacan nun comunicado dende a institución municipal.

Este departamento -engaden- segue apostando pola intermediación laboral, como ferramenta para acercar as ofertas de emprego aos demandantes, facilitando a conexión entre traballadores e empresas.

No último trimestre - indican- xestionáronse 11 ofertas de traballo para diversos sectores económicos, principalmente, no sector industrial, forestal e de servizos. Estas vacantes foron cubertas por demandantes de emprego inscritos na bolsa de traballo creada e xestonada por dito servizo.

Por outra banda, o servizo de orientación laboral aposta pola formación e cualifcación da poboación activa, informando acerca da oferta formativa, os requisitos de acceso e apoio na inscrición.

Deste xeito, "continúase a motivar a persoas con baixa cualifcación a realización das Competencias Clave e prestando apoio na presentación de solicitude de partcipación nas probas libres. Recordamos que o prazo de inscrición rematará o vindeiro 10 de febreiro de 2023. Asemade, estamos a programar unha acción formatva preparatoria para a superación das probas de avaliación, de carácter gratuita, para todas aquelas persoas interesadas".

Tamén se asesora nos procesos de homologación de titulos e convalidación de estudos estranxeiros.

Por úlitmo, informan da ampliación de novas entdades colaboradoras co servizo para traballar a prol da inserción laboral, manifestando dende o concello carballiés o seu compromiso "para mellorar a empregabilidade da veciñanza e reducir a taxa de desemprego".

A directora xeral da Garda Civil, Maria Gámez, visitou o Posto Principal do Carballiño, coa finalidade de entrevistarse con mandos e axentes, coñecendo os cometidos que realizan e cómo se desenvolve a súa actividade no día a día na comarca do Carballiño, a súa estructura, organización e problemática da Garda Civil que, ademáis do Carballiño, mantén as competencias de seguridade cidadán noutros concellos da comarca.

O Posto Principal da Garda Civil do Carballiño está ao mando dun Capitán, conta con máis de 35 efectivos dedicados á seguridade cidadán no municipio do Carballiño, e tamén cubre este mesmo servizo nos concellos de San Amaro, Punxín, Maside, O Irixo e Boborás. Ademáis, a Garda Civil tamén ten no Carballiño unha unidade de armas e explosivos, unha patrulla do SEPRONA e un destacamento de seguridade nos Xulgados do Carballiño.

O presidente da Deputación, Manuel Baltar, mantivo esta mañá no Pazo Provincial unha xuntanza co alcalde de Avión, Antonio Montero, para analizar os proxectos en marcha no concello e avanzar en novas liñas de colaboración entre as dúas administracións.

Manuel Baltar avanzou o apoio a varias propostas de colaboración formuladas polo rexedor. En concreto, a Deputación colaborará na renovación do equipamento da residencia de maiores de Avión; cooperará no arranxo de vías municipais e a estrada da OU-0308 e, ademais, afondará no seu compromiso coa mellora dos servizos públicos que este concello presta aos veciños.

O presidente do goberno provincial pondera a importancia destes encontros de traballo para “coñecer a situación concreta de cada concello da man dos alcaldes e reforzar a cooperación entre a Deputación e os gobernos locais”. Para a Deputación, remarca Manuel Baltar, “é un piar fundamental estar ao lado das administracións locais e apoialas naquilo que precisen e que resulte na mellora do benestar dos veciños e o desenvolvemento da provincia”.

Sofía García, voceira do Grupo Municipal do BNG do Carballiño, ven de rexistrar unha iniciativa no concello para impulsar de inmediato un Plan de Mobilidade Urbana Sostibel (PMUS), que inclúa entre outras cuestións e como mínimo as seguintes medidas urxentes: mellorar a mobilidade peatonal e a seguridade vial.

Resulta moi imporante a instalación de sistemas de iluminación ou sinalización específicos que resalten a presencia dos pasos de peóns e dos propios viandantes, declara a voceira nacionalista do Carballiño, así como mellorar a sinalización horizontal e vertical pondo especial interese na súa revisión e o seu bo estado. Sofía García analizaba que actualmente temos unha vila que está pensada para os vehículos, na que a dependencia do automóbil ocasiona un tráfico intensoen todas as rúas do Carballiño.

A isto hai que engadir, di García, que camiñar por algunhas rúas resulta imposible, pola combinación de beirarrúas estreitas nas que se sitúan farois, sinais e mobiliario urbano, así como diversas barreiras arquitectónicas que dificultan a mobilidade da veciñanza con unha mobilidade reducida, que mesmo en ocasións se ve obrigada a invadir a calzada poñendo en risco a súa seguridade. Tampouco debemos esquecer as sinalizacións mal conservadas, os problemas na ordenación do tráfico, ou iluminacións insuficientes que agravan aínda máis a problemática da mobilidade na vila.

Toda a veciñanza é nalgún momento un peón, os usuarios da vía pública máis vulnerables ao tráfico.Polo tanto, debe ser preocupación das institucións públicas municipais situar no centro da planificación ás persoas, priorizando a redución do transporte individual en beneficio dos sistemas colectivos e doutros modos non motorizados de transporte e desenvolvendo aqueles que sexan compatibles co crecemento económico, a cohesión social, a seguridade viaria e a defensa do ambiente, manifesta a concelleira nacionalista.

Todas estas medidas a implementar nun Plan de Mobilidade Urbana Sostible (PMUS) veñen a dar continuidade a varias iniciativas que o BNG xa levou ao pleno do Carballiño neste mandato para mellorar a seguridade vial e a mobilidade peatonal e solucionar un problema que cada día medra máis e ao que o goberno municipal non pon solución.