Os grupos municipais do PSdG-PSOE de Lalín e O Irixo veñen de rexistrar unha moción para o seu debate e posible aprobación no vindeiro Pleno, na que solicitan que ambos Concellos soliciten da Xunta de Galicia retrotraer o expediente Parques Eólicos dos Complexos Valdepereira e Pico Seco ao trámite de exposición pública, tendo en conta que non se realizou.

Do mesmo xeito, o documento reclama que os Concellos de Lalín e O Irixo procedan a informar de forma activa, efectiva e real á veciñanza afectada que así o desexe nas dependencias municipais.

Por último, reclámase a ambas administracións que procedan a asesorar a veciñanza afectada facilitando información e asesorando na presentación de alegacións e en todos aqueles aspectos necesarios na defensa dos seus intereses.
A concelleira lalinense, Alba Forno, e o voceiro municipal no Irixo, Iago Fariñas, xa rexistraron ambas propostas plenarias. Nun encontro de traballo recordaron que “nin O Irixo nin Lalín dixeron nada sobre estes proxectos eólicos, non informaron, nin asesoraron nada á veciñanza afectada en ningún momento”.

“O mais grave” aseguran “é que nin tan sequera tiveron en exposición publica o referido proxecto para o seu coñecemento, incumprindo a obriga legal de facelo”.

Alba Forno e Iago Fariñas insisten en que os Concellos de Lalín e o Irixo non cumpriron coa súa obriga como administración pública impedíndolles ás persoas afectadas a posibilidade de formular alegacións. “Estamos ante un feito gravísimo que parece unha falta de dilixencia, unha deixadez manifesta ou que Crespo e Cerdeira non se enteran de nada”. “Máis grave sería que a información, como xa sucedeu noutras ocasións, fose ocultada intencionadamente”.

“Son moitas as persoas afectadas que se puxeron en contacto con nos preocupadas e sin que nos Concellos de Lalín e O Irixo fagan nada por informarlles”. “Tamén consideramos que sobre a omisión da exposición pública da documentación tanto Manuel Cerdeira coma Crespo deberían dar explicacións claras”, sinalan.

Para os socialistas “tamén é sorprendente que os alcaldes do PP traten de poñer toda a maquinaria política a funcionar cando se trata de parques eólicos de tramitación estatal e que calen cando os proxectos os está a tramitar a Xunta de Galicia, como é o caso”.

Dato record de descenso de contaxios activos no Carballiño, consecuencia da nova norma das altas médicas automáticas aos 7 dias, onte o Sergas notificaba 489 casos activos no Concello do Carballiño, hoxe a cifra descende ata os 357 contaxios activos, polo tanto son 132 menos en relación a onte.

Por outro lado, na incidencia acumulada a 7 dias, o indicador pasou dos 159 novos positivos no municipio que aparecian onte no cómputo dos últimos 7 dias, aos 228 casos que se contabilizan hoxe, o que pon de manifesto que a pandemia continúa aínda en plena fase expansiva no municipio carballiñés. 

No resto de concellos tamén se observa un notable descenso nos casos activos, sobre todo en Maside, que onte tiña 54 casos activos e quédase hoxe con 32, e San Cristovo de Cea, que tiña 32 e quédase hoxe con 23 casos. 

Os contaxios que o Sergas notifica hoxe para Boborás son 29, en Punxín 28, San Amaro 20, O Irixo 14, PIñor 10 e Beariz 4. Leiro baixa ata os 19 contaxios activos, e Avión ata os 10.

A oposición municipal, tanto PP como ESCO, deron a coñecer esta mañá sendas iniciativas en forma de mocións para que se traten no próximo pleno que celebre a corporación municipal do Carballiño, e nas que lle piden ao alcalde e na súa condición de membro do padroado da Fundación Irmáns Prieto Pereira, que aclare tanto a súa responsabilidade como membro nato do órgano rector da Fundación como diversas cuestións relativas á xestión na Residencia de Maiores, coñecida como o Asilo do Carballiño, que é propiedade e xestiona a Fundación promovida polos benefactores carballiñeses nos anos vinte do século pasado.

Os dous grupos políticos manifestan recoller a inquietude do pobo do Carballiño trala marcha, a mediados de 2020 das Hermanitas dos Anciáns Desamparados, e agora das Servas de Xesús, que tomaran o relevo no Asilo en Setembro dese mesmo ano. Este pasado lúns transcendía a súa marcha, tras unha curta etapa no Carballiño.

O Partido Popular demandará que "a partir de agora o alcalde informe semestralmente ao pleno da corporacón da súa actividade como patrón da Fundación, e dea conta das actas das reuniíons mantidas polo padroado nos últimos dous anos, tamén que se expliquen as razóns da marcha das relixiosas". Pola súa parte, Espazo Común, manifesta que "a situación no asilo preocupa no Carballiño e o alcalde Fumega esconde información" polo que demandará tamen ante o pleno "que se aclara toda a situación desta entidade sen ánimo de lucro, o asilo de toda  vida".

O alcalde Francisco Fumega aproveitou unha entrevista hoxe en COPE O Carballiño para manifestar a súa opinión sobre este asunto. O rexedor municipal entende que trátase dunha fundación do século pasado que hai que adaptar á realidade actúal, que nada ten xa que ver cos tempos nos que os fundadores comezaron con esta gran obra social, e neste contexto, Fumega dixo que a xestión no Asilo foi mellorando nos últimos anos.

O PODCAST coa entrevista íntegra ao alcalde do Carballiño podes descargalo nesta mesma WEB, no programa deste mércores dia 12 de Xaneiro de 2021.

O PSdeG-PSOE de Punxín levará ao vindeiro pleno municipal o peche da aula de espera do colexio do municipio. As socialistas instan ao goberno local a realizar tódalas xestións pertinentes para a “inmediata” posta en funcionamento da aula de espera do centro, así como garantir que tanto o que resta deste curso, como o próximo curso 2022-2023 se dispoña deste servizo. Denuncian que o peche da aula de espera está causando un “grave prexuízo” ás familias que facían uso dela, ben de forma permanente ou con carácter temporal.

Para o Grupo Municipal Socialista de Punxín “é inadmisible” que se proceda o peche deste servizo, “sen previo aviso”, tanto ás familias como ao persoal do centro de ensinanza, e unha vez que o Concello renunciou a unha subvención da Deputación Provincial de Ourense para manter operativo o mesmo. Consideran que esta decisión “se tomou de forma repentina e sen analizar as consecuencias que isto suporá tanto para os nenos e nenas de Punxín, como para os pais e nais, que se ven prexudicados pola falta de conciliación dun servizo que permitía ata hai pouco que puidesen deixar os cativos no colexio antes da hora de inicio da xornada lectiva”.

A voceira do PSdeG-PSOE en Punxín, Lorena Peleteiro, salienta que “pediremos explicacións polo peche da aula de espera e tamén queremos que o goberno municipal nos aclare cal foi o motivo polo que renunciaron a unha subvención da Deputación para dar cobertura a este servizo que agora se procede a non prestar”. Tal e como indica a edil socialista “o 26 de marzo de 2021 aprobouse unha subvención nominativa para o noso Concello por importe de 7.110 euros para o servizo de conciliación familiar - aulas de espera, pero posteriormente o alcalde de Punxín solicitou o cambio de finalidade de dita subvención para a realización do peche da área termal do Bañiño”.

Para Peleteiro está actuación supón que “unha vez máis o grupo de goberno do Partido Popular e o concelleiro non adscrito realizan unha pésima xestión dos recursos e conseguen o peche doutro servizo no noso municipio”. Tal e como relata este peche “pon en risco a continuidade da propia escola, algo que as socialistas non imos a consentir”. Ante esta situación, dende o Grupo Municipal Socialista de Punxín esixen “solucións inmediatas” e a “reposición con carácter de urxencia de dito servizo”.

A conselleira de Política Social, Fabiola García, acompañada do delegado da Xunta en Ourense, Gabriel Alén, visitou casa niño do Irixo, chamada Raparigos, para informar dunha nova convocatoria para financiar este servizo de gardeiría para cativos de 0 a 3 anos, que conta cun orzamento de 4,7 millóns de euros e inclúe diferentes novidades.

Fabiola García explicou que esta nova orde inclúe un incremento do 10% da subvención que viñan percibindo as titulares destes pequenos centros de atención á primeira infancia, que son totalmente gratuítos para as familias. A subvención elevarase ata os 24.200 euros anuais para as casas que leven tres anos en funcionamento, deste xeito poden facer fronte a gastos derivados da subida da luz ou das pólizas de seguro, entre outros.

A conselleira de Política Social explicou que outra das novidades que contempla esta nova convocatoria é unha achega adicional de 500 euros para aquelas casas niño que comezaron a súa actividade en 2016, coa finalidade de facilitar a renovación destes equipamentos máis antigos.

Ademais, e como terceira mellora, simplifícanse os trámites para acollerse ás axudas. Por primeira vez a orde ten carácter plurianual, de forma que aquelas titulares que se presenten xa estarán cubertas de maneira automática para os exercicios 2023 e 2024, o que lles evitará novos trámites administrativos.

O incremento diario no número de contaxios non parece, de momento, chegar ao teito nesta sexta onda da pandemia en Galicia, tampouco no ámbito intercomarcal O Carballiño-O Ribeiro, que vai xa camiño de alcanzar a barreira dos 1.000 casos de covid.

O Carballiño chega hoxe aos 461 contaxios activos, son 61 máis en relación ao pasado venres. Maside continúa con 57 casos, Punxín 32, San Cristovo de Cea 30, San Amaro 28, Boborás 25, O Irixo 18, Piñor 9 e Beariz 8.

Leiro notifica hoxe lúns 25 contaxios, e Avión 12. No resto de concellos ribeiráns tamén se incrementou o número de contaxios durante a pasada fin de semana, con Ribadavia á cabeza superando xa os 150 contaxios.

En apenas 24 horas quedaron esgotadas as autocitas para participar nos tres cribados que para a poboación dos nove concellos da comarca do Carballiño programou o Sergas, e que se levarán a cabo o lúns 10, o mércores 12 e o venres 14 no auditorio municipal do Carballiño.

Aínda en plena fase expansiva desta sexta onda da pandemia, na que a comarca carballiñesa supera os 500 contaxios activos, a finalidade dos cribados é detectar persoas infectadas e asintomáticas entre a poboación.

Tamén están esgotadas as autocitas dispoñibles para os dous cribados programados en Ribadavia para a poboación do concellos do Ribeiro.