A primeira hora desta tarde de martes a Garda Civil informou o achádego do cadáver de Manuela Conde, a muller veciña de Casfigueiro no concello de Piñor e de 73 anos de idade, que levaba desaparecida desde o pasado dia 16 de novembro no lugar de Rubillón, no concello de Avión, onde se encontraba de visita familiar.

A Garda Civil de Beariz ven de confirmar que o cadáver encontrado esta mañá é o desta muller. Foi o seu fillo quen a localizou nunha paraxe montañosa nas inmediacións la localidade de Acevedo, no mesmo concello de Avíón.

O Grupo Provincial do PP instará ao Goberno de Sánchez a mellorar o deficiente servizo de Correos que se presta na nosa provincia, a través dunha moción que levarán ao vindeiro pleno do mes de decembro.

Trátase dun novo recorte do Goberno Central contra o medio rural que se suma ao peche de cuarteis, á redución de frecuencias necesarias do AVE a Madrid, á centralización na cidade das competencias en materia de violencia de xénero en detrimento dos xulgados comarcais, entre outras moitas cuestións que están a privar á nosa veciñanza de servizos básicos e que contribúen ao seu desmantelamento.

A portavoz do Grupo Provincial do PP, Patricia Torres, acompañada polos representantes sindicais María Paz Saavedra de CC.OO. e Juan Carrera de C.G.T., e por representantes municipais populares, presentaron hoxe, na oficina de Correos da Derrasa do Pereiro de Aguiar, os detalles desta iniciativa que denuncia a falta de persoal, o atraso na entrega da correspondencia e a acumulación de envíos.

“Unha vez máis temos que poñer en evidencia o maltrato e a desidia do Goberno Central coa provincia de Ourense, desmantelando o servizo de Correos no rural e precarizando o traballo do persoal”, afirmou Patricia Torres, quen insistiu na importancia deste servizo nunha provincia “como a nosa cunha alta porcentaxe de poboación envellecida e cunha gran dispersión xeográfica”. Por elo, desde o Grupo Provincial do PP “non imos calar ante os constantes ataques silenciosos pero reais do Goberno de Sánchez contra a nosa provincia”, engadiu a voceira popular.

Pola súa parte, a representante sindical María Paz Saavedra reivindicou que desde ambos sindicatos "vimos denunciando o deterioro de servizo que se presta desde Correos na provincia, sobre todo, nun rural como o noso tan disperso, con moita montaña, cunha climatoloxía adversa e os traballadores pola falta de contratación e previsión non dan chegado a toda a cidadanía”

A problemática fundamental é, segundo María Paz Saavedra, “a falta de contratación de persoal” que repercute no servizo que se presta, exemplificando en que ás veces, “hai que pechar unha oficina para poder abrir outra, polo tanto, cremos que isto non é apostar polo rural”.

O concelleiro do Pereiro de Aguiar, Manuel Doval afirmou que esta é “unha mostra máis de como o Goberno de Sánchez defende o rural: retirando servizos esenciais que no caso particular deste concello, se pechan esta oficina, veranse privados deste servizo tan importante máis de 7.000 habitantes”.

Por todo elo, desde o GPP proponse instar ao Goberno de España a repoñer os postos de traballo vacantes para solucionar o problema de persoal e a cancelar o peche de oficinas e suprimir días de reparto na nosa provincia.

O Concello do Carballiño informa de que veñen de rematar as actuacións de mellora e mantemento realizadas no CEIP Calvo Sotelo – Edificio Uceira, centradas na recuperación e posta a punto dos muros de peche exterior do patio cuberto.

Os traballos executados incluíron unha limpeza integral dos paramentos exteriores, así como o seu saneamento e posterior pintado, actuacións que permiten mellorar tanto a estética como a durabilidade das instalacións e garantir un entorno escolar máis seguro e agradable para o alumnado.

A intervención comezou coa limpeza xeral dos muros, retirando previamente as pinturas soltas e os restos deteriorados. Para iso empregouse unha máquina hidrolimpadora de auga a presión con lanza, actuando de arriba abaixo en franxas horizontais para disolver a suciedade acumulada.

Antes do inicio da limpeza realizáronse probas técnicas previas co fin de axustar correctamente os parámetros de presión e caudal, garantindo unha intervención eficaz sen ocasionar danos nos materiais orixinais. Os traballos implicaron tamén o trasporte, montaxe e desmontaxe do equipamento especializado.

Ademais, procedeuse á eliminación dos detritus acumulados nas partes inferiores dos muros mediante chorros de auga a baixa presión, e á recollida e carga dos restos xerados nun camión contedor para a súa correcta xestión ambiental.

Unha vez finalizada a limpeza, realizouse o saneamento dos pechamentos exteriores do patio cuberto. Esta fase incluíu o tapado de fendas, selados, reparación de zonas deterioradas e aplicación de emplastes necesarios para consolidar a superficie.
O pintado final foi realizado con pintura acrílica plástica de alta durabilidade, aplicada en dúas mans de acabado, garantindo unha protección óptima fronte á intemperie.

Mellora integral do entorno escolar

Estas actuacións enmárcanse no plan municipal de mantemento e posta a punto dos centros educativos do Carballiño, co obxectivo de mellorar continuamente a seguridade, conservación e imaxe das instalacións públicas utilizadas por centos de nenos e nenas.
A concelleira de Educación, Lorena Castro, asegura que desde o goberno municipal seguirán “traballando na mellora dos tres edificios do CEIP Calvo Sotelo”.

O Concello tamén agradece a colaboración da comunidade educativa e lembra que seguirá impulsando intervencións deste tipo para garantir espazos escolares de calidade.

O Concello do Carballiño vén de recepcionar as obras de mellora da drenaxe de augas pluviais no aparcamento do Parque Municipal, unha intervención necesaria para resolver as acumulacións de auga que se producían puntualmente durante episodios de choiva intensa.

A concelleira de Medio Ambiente e Termalismo, Elvira Torres, salienta que “esta actuación permitiu solucionar un problema histórico no estacionamento, gañando en seguridade e comodidade para os veciños, veciñas e visitantes que utilizan este espazo a diario”. A obra foi financiada íntegramente por Augas de Galicia.

A intervención incluíu a mellora da recollida de augas pluviais mediante a construción dunha arqueta de reunión, a instalación dunha nova tubaxe de condución e dun sumidoiro na zona pavimentada, así como a colocación dunha canalización que leva a auga directamente ao río Arenteiro. Todos estes traballos completáronse dentro do prazo previsto.

“Desde o Concello seguimos apostando pola mellora dos servizos públicos e agradecemos a colaboración da cidadanía durante o desenvolvemento das obras”, engadiu Torres.

Sebas Lamazares, Fátima Gómez,  José Antonio Barge, Manuel Nogueira e Gonzalo Rodríguez participan nos estudos de COPE O Carballiño na tertulia deste venres dia 1 de decembro de 2025.
 

Presentada e moderada por Xan Pinal:

O Concello do Carballiño vén de presentar a súa programación especial “Nadal Infantil 2025–2026”, unha completa proposta cultural destinada a converter o municipio nun punto de encontro para as familias durante as festas. Música, teatro, maxia e tradición conforman un calendario pensado para os máis pequenos, que poderán gozar dunha ampla variedade de actividades durante todo o mes de decembro e o inicio de xaneiro.

O tenente alcalde e concelleiro de Cultura, Diego Fernández, salientou que “o obxectivo é ofrecer alternativas de ocio accesibles e de calidade, deseñadas para favorecer o goce compartido entre pais e fillos. Queremos que o Nadal no Carballiño sexa sinónimo de ilusión, cultura e participación”.

Ademais, subliñou que “cada actividade foi elixida pensando no estímulo creativo dos nenos e nenas, e no valor que ten para as familias contar con programación específica nestas datas”. Fernández destacou tamén que “esta é só a parte infantil dunha programación municipal máis ampla, pensada para todos os públicos e gustos”.

A oferta arranca o xoves 4 de decembro ás 18:00 horas no Auditorio co tributo musical “Las guerreras K-Pop”, organizado por Pares o Nones e dirixido ao público infantil e familiar, con entradas dispoñibles en gau.com. A programación continúa o sábado 6, tamén no Auditorio, cunha das propostas teatrais máis agardadas: “Os Tres Porquiños”, de Educateatro, pertencente á Rede Galega de Teatros e Auditorios (RGTA). A función, pensada para nenos e nenas a partir de 2 anos, comezará ás 18:00 horas, cun prezo en taquilla de 3,50 euros. O teatro volverá o luns 8 ás 18:00 horas co espectáculo “Bichiños”, de Spasmo Teatro, tamén integrado na RGTA e orientado ao público infantil e familiar a partir dos 6 anos, con entradas ao mesmo prezo. A

música coral tomará o relevo o sábado 20, ás 20:00 horas, co III Festival Nadal Coral, organizado polo Coro infantil Xuvenil EnHarmonía, o Coro Cantiga e o Orfeón do Carballiño. A entrada será de balde ata completar aforo. O domingo 21, ás 17:30 horas, o Auditorio acollerá o musical “Un mundo de fantasía”, unha proposta de Diverfest destinada ao público infantil e familiar, con entradas dispoñibles en atrapalo.com.

Ademais, Papá Noel estará no Carballiño, grazas á organización do Centro Comercial Aberto; os días 22, 23 e 24, ofrecendo ás familias un espazo de encontro coas tradicións máis queridas do Nadal.

A programación teatral regresará o domingo 28 ás 18:00 horas co espectáculo “A toupina que quería saber quen lle fixera iso na cabeza”, de A Xanela do Maxín, dirixido ao público infantil a partir de 2 anos. As entradas poderán adquirirse en Ataquilla.com e o mesmo día na taquilla do Auditorio.

As celebracións de fin de ano comezarán o mércores 31, desde as 18:00 horas, coa tradicional actividade das Badaladas de Fin de Ano na Praza Maior.

Xa en xaneiro, o Carballiño recibirá aos Reis Magos coa Gran Cabalgata, prevista para o luns 5, que percorrerá as rúas do centro e converterá a vila nun escenario de fantasía para os máis pequenos.

O mércores 14, ás 12:00 horas, o Auditorio acollerá a obra “A Biblioteca Galáctica Contra a IA Fantástica”, de Tanxarina Títeres, organizada polo Servizo de Normalización Lingüística e destinada ao alumnado de 4º de Educación Primaria. A

A programación infantil pechará coa celebración do Festival Máxico San Juan Don Bosco, que terá lugar no Auditorio os días 31 de xaneiro e 1 de febreiro, e que ofrecerá novas propostas de maxia e entretemento para o público infantil e familiar.

Con esta ampla oferta, o Concello do Carballiño consolida o seu compromiso cun Nadal vivo, diverso e plenamente orientado ás familias e á participación cultural da cidadanía máis nova.