Este venres 20 de outubro o Cine Club Carballiño proxecta a película italiana "Las ocho montañas", gañadora do Premio do Xurado no Festival de Cannes, 4 premios Donatello do cinema italiano, Mellor fotografía na Seminci de Valladolid...e unha magnífica acollida entre o público, tanto no seu país como fora del. O filme céntrase na amizade ao longo do tempo de Pietro, que vive na cidade, e Bruno, un mozo dunha aldea de montaña. Unha película chea de lirismo que acaba por converter á montaña e á natureza nun personaxe máis. Baseada na novela homónima de Paolo Cognetti, aproveitaremos para sortear dous exemplares da mesma, coma sempre en colaboración coa Libraría Escolma. Os pases serán ás 20:00 horas en sesión dobrada ao castelán e ás 22:30 en VOS, no Auditorio do Carballiño.

TRES PELÍCULAS NO NOVO CINE DE LEIRO

Na carteleira do Novocine de Leiro destaca a estrea da pelicula galega "O Corno", triunfadora no recentemente celebrado Festival de San Sebastián. A película, un drama rural ambientado na Galicia dos anos 70, está protagonizada pola bailarina Janet Novás (Premio ‘El Ollo Crítico’ de Danza 2021 de RNE), no que é o seu debut no cinema, e conta na súa repartición con Carla Rivas, Nuria Lestegás, María Lado, Siobhan Fernandes e Diego Anido ('As Bestas'), entre outros. Está rodada en galego en varias localizacións das comarcas de Arousa e Baixo Miño (Pontevedra) e Alto Minho (Portugal) e narra a historia de María, unha mariscadora e tamén parteira que, tras un terrible suceso, vese obrigada a fuxir a través dun roteiro de contrabandistas.

Completan a carteleira desta fin de semana a tamén película galega "O home e o can" e o filme de animación "La patrulla canina". Os horarios para as tres películas son os que podes ver no cartaz que ilustra esta información.

A MOSTRA DE TEATRO AMADOR OFRECE DOBLE OFERTA TEATRAL, SÁBADO E DOMINGO

A Mostra teatral que organiza Tiruleque continúa coas súas representacións durante este mes. Esta fin de semana con doble oferta ás 20:00 horas no auditorio do Carballiño.

Dunha parte, coa comedia VECIÑOS de A Tequerreté de Teo, este sábado, día 21, unha comedia de 80 minutos de duración para un público a partir dos 14 anos.

O domingo 22,  outra comedia AGÁRDAME NO CEO de Namarella Teatro de Verín, un espectáculo de 90 minutos de duración e apta para todos os publicos.

1º SERÁN DO OUTONO NO IRIXO

A Banda de Gaitas e Danzas do Irixo organiza este sábado dia 21 o 1º Serán do Outono que terá lugar no Polideportivo Municipal do Irixo. A partir das 19:00 horas comezará un obradoiro de baile tradicional gratuíto, seguido desde as 20:00 horas das actuacións das agrupacións "Gaitas e Danzas Airiños da Aronoia", "Xunquereteiras", "Tokaide", "Terras do Arenteiro", "Pandereiteiras de Zobra", "Ala, Pepes", "Pandereiteiras Rebulir", Pandereiteiras "Flor de toxo" de Avión e os anfitrións deste serán, a "Banda de Gaitas e Danzas do Irixo". Xa a partir das 23:00 horas iniciaráse unha foliada libre.

Durante todo o Serán haberá servizo de bar e comida, con bocadillos quentes, bebidas e chocolate. E durante a tarde-noite os asistentes terán ocasión de gañar un premio, xa que se van sortear ata once agasallos no transcurso do evento.

O presidente provincial anunciou que no vindeiro ano a Deputación duplicará esta iniciativa, pasando de dous a catro os balnearios da provincia nos que se desenvolverá o programa, e aumentando ata dez os concellos cos que se podería conveniar o seu desenvolvemento (actualmente existe convenio con Boborás, O Carballiño e Carballeda de Avia). Deste xeito, poderase aumentar ata 150 o número de usuarios no ano 2024, cando na actualidade son 77 os beneficiarios.

O presidente da Deputación, Luis Menor, visitou o Balneario de Partovia para coñecer de primeira man o desenvolvemento do programa de termalismo contra a soidade non desexada, así como as demáis modalidades do programa provincial que teñen lugar neste histórico centro termal. Na visita, Luis Menor estivo acompañado pola deputada de Políticas Sociais e alcaldesa de Boborás, Patricia Torres; así como polo alcalde do Carballiño, Francisco Fumega; e a directora do Balneario de Partovia, Eva Álvarez.

“A Organización Mundial da Saúde ten declarada a soidade non desexada como un problema de saúde pública, e nese eido estamos a traballar na Deputación, onde a través da área de Benestar fixámonos un obxectivo de mandato: que no 2027 se superen as 500 persoas maiores con acceso aos balnearios como recurso idóneo de saúde física e emocional”, explicou Luis Menor. “A loita contra a soidade é un reto para as administracións e a sociedade en xeral, e por iso non podemos mirar cara outro lado, senón intensificar os esforzos para contribuír a atallala”.

O presidente provincial tivo a oportunidade de coñecer de primeira man a satisfacción das persoas usuarias co programa. Luis Menor garantiu que o programa de termalismo para loitar contra a soidade non desexada non só terá continuidade, senón que será reforzado e as persoas usuarias na actualidade terán a praza garantida en 2024 se así o consideran.

O programa de termalismo contra a soidade non desexada iniciado este ano permite a 77 usuarios acceder todas as semanas a un balneario para recibir terapias termais en grupo. Esta é a achega diferencial desta modalidade do Programa de Termalismo provincial posta en marcha este ano: non se trata dun acceso puntual durante uns determinados días ao ano a un balneario, como a modalidade de estancias ou a de tratamentos, senón que é unha modalidade de goce semanal, durante un período comprendido entre 6 e 9 meses. As terapias que se reciben, en grupos de 20 persoas como máximo, inclúen o acceso a servizos termais, que se complementan con actividades grupais de diferente natureza que xuntan a experiencia social cos beneficios da auga mineromedicinal.

Acceso ao programa
Ao “termalismo contra a soidade non desexada” pódese acceder a través dos servizos sociais dos concellos ou do servizo provincial de teleasistencia. Unha das posibilidades que contemplan as bases reguladoras do programa é a posibilidade de crear quendas para establecer convenios cos concellos, grupos de concellos ou mancomunidades, para que as todas prazas dun grupo sexan xestionadas desde os servizos sociais da entidade local. Son, por tanto, os servizos sociais municipais os que avalían a situación de soidade non desexada da persoa e onde deben dirixirse as persoas interesadas para participar no programa, xa que é desde este ámbito municipal desde onde se asignan as prazas dispoñibles.

Máis convenios
Os actuais convenios asinados con Boborás, Carballeda de Avia e O Carballiño posibilitaron que as persoas residentes nestes municipios tivesen acceso ao programa, sendo os servizos sociais de cada concello os que asignaron as prazas dispoñibles. En 2024, os convenios poderanse estender a máis de dez concellos, e aqueles responsables municipais ou os servizos sociais correspondentes que teñan interese poden contactar desde hoxe coa área de Benestar da Deputación para dispoñer de máis información e expor as preguntas que consideren.

O conselleiro de Sanidade, Julio García Comesaña, e o alcalde do Carballiño, Francisco José Fumega Piñeiro, asinaron hoxe o convenio de colaboración para a construción do novo centro de saúde desta localidade, nun acto ao que tamén asistiu o delegado territorial da Xunta, Gabriel Alén, e o xerente da área sanitaria Félix Rubial.

Tal e como detallou o conselleiro, o novo centro de saúde terá 4.500 metros cadrados e disporá de 22 consultas, área de saúde bucodental, despacho de traballador social, área de asistencia pacientes infecciosos, catro salas polivalentes, toma de mostras, área pediátrica con 4 consultas, área da muller con dúas consultas, área de fisioterapia, consulta de farmacia e sala de docencia. Respecto ao punto de atención continúa -PAC- terá 6 consultas e na área de saúde mental disporase de 3 consultas e despacho de saúde pública.

O Concello do Carballiño levará a cabo, en relación á parcela da estación de autobuses, a cualificación urbanística axeitada, mentres que a Xunta asume o compromiso de contratación do proxecto e obra, que ademais queda exenta dos impostos locais segundo este convenio. Ao respecto, Comesaña valorou moi positivamente o traballo do Concello e o consenso maioritario da corporación, que aprobou este convenio para que o centro de saúde sexa unha realidade.

O Real Avilés Industrial, un dos equipos máis potentes da Segunda Federación e que se quedou o ano pasado á portas do ascenso a Prmeira RFEF será o rival do Arenteiro na primeira ronda da Copa do Rei, asi o determinou o sorteo celebrado hoxe en Madrid.

A eliminatoria, a partido único, xogaráse no coqueto estadio do Suárez Puerta de Avilés, en data por concretar entre o 31 de outubro, 1 ou 2 de novembro.

Será polo tanto nun estadio e ante un equipo ben coñecidos do Arenteiro, co que competíu nas dúas últimas tempadas en Segunda RFEF, e con dous empates a un gol nas dúas visitas do Arenteiro a terras asturianas, agora deberá gañar o partido -aínda que sexa a penaltis-  para avanzar a segunda ronda e volver traer a Copa do Rei a Espiñedo.

O Arenteiro gañou de novo o dereito a xogar a COPA DO REI 2023-2024 na súa condición de campión do grupo 1º da Segunda Federación na pasada tempada. Este martes dia 17 de setembro coñecerá ao seu rival na primeira ronda do campionato, que se desputará a partido único entre os dias 31 de outubro ao 2 de novembro próximos.

O Arenteiro será un dos 18 equipos da Primeira RFEF clasificados para a nova edición da gran competición do fútbol español, que tan bos recordos trae á afección do Arenteiro, tras as históricas eliminatorias dos últimos anos en Espiñedo ante Valencia CF, Almería -ao que eliminou- e o Atlético de Madrid.

Agora como equipo de Primeira RFEF o Arenteiro emparellaráse cun equipo de inferior categoria, en concreto será un equipo de Segunda Federación, debendo desplazarse ao seu campo para desputar a eliminatoria.

O rirval do Arenteiro estará nun destes equipos:

Real Avilés, SD Compostela, Zamora, Guijuelo, Utebo, Gernika, Tudelano, Peña Deportiva, Manresa, Terrassa, Hércules, UCAM, Yeclano, Navalcarnero, Cacereño, Gimnástica Segoviana, Villanovense, Covadonga, Cayón, Barakaldo, Europa, Orihuela, Ursaria, Arandina, Marbella, Mensajero, Águilas, Llerenense, Valle de Egüés, Náxara, Barbastro, Club Atlético Antoniano, Andratx e Manchego Ciudad Real.

COPE O Carballiño ofrecerá en directo o sorteo, a partir das 13:00 deste martes dia 17 de outubro.