O xefe da Policia Local do Carballiño considera que a actuación dos servizos de emerxencias que acudiron este pasado dia 2 de agosto para controlar un incendio declarado nas instalacións da axencia Cer&Ber, nunhas galerias de Julio Rodríguez Soto foi a correcta, saíndo ao paso das críticas veciñais.

E lamenta que os bombeiros que desenvolvían o seu traballo fosen "increpados por alguén",chegou a asegurar.

Escoita a entrevista no audio adxunto:

O presidente provincial do PPdeOU, Manuel Baltar, define o acordo avanzado este martes por COPE O Carballiño entre os grupos da oposición do Concello do Irixo que desembocará nos próximos días nunha moción de censura contra o alcalde, o popular Manuel Cerdeira, coma “unha triste loita polo poder, un reparto de cargos e de postos. Cuestións que hai que poñer, sempre, por detrás dos veciños, sen priorizar nunca temas persoais ou partidistas”.

“Esta moción de censura terán que explicala os concelleiros asinantes”, sinalou Manuel Baltar antes de lembrar que o acordo coñecido esta mañá “apenas dará a metade dos 100 días de cortesía tradicionais da democracia e, por suposto, non dará oportunidade ao goberno para poder desenvolver o programa apoiado de forma maioritaria pola veciñanza do Irixo nos comicios celebrados o pasado 28 de maio”. “Este acordo de intereses persoais demostra que, ou ben os grupos da oposición se equivocaron ao non poñerse de acordo antes da constitución dos concellos ou que o erro ven agora”, di o presidente provincial do PPdeOU, incidindo en que “no momento de presentar unha moción de censura hai que argumentala, hai que explicala, hai que sinalar as cuestión deficitarias e o que se pode mellorar. E todo isto aquí queda reducido, insisto, a unha mera loita polo poder”. “

Os asinantes deste acordo terán que explicar moi ben neste mandato, que ven de comezar hai so 52 días, as razóns polas que non acordaron un goberno antes da data de constitución das corporacións, o pasado 17 de xuño, e por que agora, empregando unha ferramenta definida para censurar o goberno, que accións do goberno critican e teñen que ver coa suposta argumentación dunha moción de censura improcedente, e por suposto sen razoar”. “Sentímolo polos veciños do Irixo. Pero creo sinceramente que esta moción de censura afondará nunha cuestión: para que nos presentamos aos comicios uns, e para que se presentan outros”, conclúe Manuel Baltar.

Os pulpeiros e pulpeiras do Carballiño conseguiron o que parecía imposible. Prepararon, soportando temperaturas extremas, a tapa de pulpo máis grande do mundo: 580 quilos, 65 máis que na pasada edición, dos que deron boa conta os centos de veciños, veciñas e visitantes que quixeron ser testemuñas da consecución deste dobre récord. E fixérono en 10 minutos e 28 segundos, conseguindo rebaixar o tempo con respecto ao 2022.

Ao redor dun prato de 5,37 metros de diámetro cortaron este manxar máis dunha trintena de profesionais e as impresionantes imaxes quedan para o recordo. Nesta 61 edición, a segunda dende que se declarou festa de interese turístico internacional, os pulpeiros e pulpeiras deixaron moi alto o listón.
Para a elaboración da tapa de pulpo tamén foron necesarios 45 litros de aceite, 5 quilos de sal e 2 de pimentón.

O Carballiño leva xa máis dunha semana celebrando a Festa do Pulpo cunha programación que se estenderá ata o domingo, 13 de agosto, cando está prevista a gran romaría no Parque Municipal. Debido a gran demanda registrada mañá, entre as 9.00 e as 14.00 horas, poranse a venda 100 novas entradas para a comida no recinto oficial.

O Concurso de Camisetas, o 12 de agosto, contará con animación DJ, a partir das 18.00 horas, e será outro dos pratos fortes.

Este é o programa detallado para os próximos días:

9 de agosto:
Concerto de pop rock: Soul & Roll. Praza Maior 20.30 horas.

10 de agosto:
Festival Folclórico Internacional. Praza Maior. 22.30 horas.

11 de agosto:
Torneo de fútbol Festa do Pulpo. CD Arenteiro-Lugo. Campo de Espiñedo. 19.30 horas.
Animación na rúa: Charanga Mekánica Rolling Banda. A partir das 20.00 horas.

12 de agosto:
Concurso de camisetas. Animación Dj`s. Praza Maior. A patir das 18:00 horas.

13 de agosto:
Festa do Pulpo no Parque Municipal.
11.00 horas: Saída dos grupos de música tradicional.
11.30 horas: Apertura de postos grastronómicos.
12.00 horas: Concertos “Son do Pulpo”. Música tradicional. Coribantes de Buchabade. Ardentía.
Saída das charangas pola vila.
14.00 horas: Apertura do recinto oficial.
17.00 horas: As charangas volven saír na vila.
20.30 horas: Orquestra Yukatán. Primeiro pase.
23.30 horas: Orquestra Yukatán. Segundo pase.

O acordo entre ambas formacións, Xuntos polo Irixo e PSOE, está pechado e formalizaráse entre o venres e o sábado desta mesma semana coa presentación do escrito de mosicon de censura que asinarán os cinco concelleiros que suman ambas formacións políticas e presentarán, como é preceptivo, no rexistro municipal do concello do Irixo.

Desde ese momento, e de forma automática quedará convocado o pleno extraordinario da corporación para o décimo día hábil ás 12 horas, polo tanto neste mesmo mes de agosto o concello do Irixo terá nova alcaldesa, que será a cabeza de lista de Xuntos, Susana Iglesias. Según o acordo que propicia esta moción de censura, no último ano do mandato Xuntos cederá a alcaldía ao socialista Iago Fariñas, que ademáis exercerá como portavoz do goberno bipartito e adxudícase a concellería de obras.

Nas pasadas eleccións municipais do mes de maio o Partido Popular obtivo 4 concelleiros, Xuntos 3 e PSOE 2. No pleno de investidura do 17 de xuño cada grupo votou ao seu cabeza de lista, polo que ao non haber maioria, resultou elixido alcalde  o máis votado o 28 de maio, que foi o candidato do Partido Popular Manuel Cerdeira, ao que agora unha moción de censura desaloxará da alcaldía.

Pola súa contribución para preservar a memoria gráfica da tradición pulpeira recibiu este lúns dia 7 da agosto unha homenaxe a Asociación Fotográfica O Potiños no marco desta 61 edición da Festa do Pulpo. Foi nun acto celebrado na Casa Consistorial do Carballiño e no que se repasou a traxectoria dunha entidade creada en 1985. Tal e como destacou o concelleiro de Turismo, Manuel Dacal, “dende entón ten feito multitude de fotografías de diversa temática, pero hai unha que é moi relevante e que ten que ver coas pulpeiras e pulpeiros e coas Festas do Pulpo”.

Cómpre lembrar que O Potiños realizou campañas de recollida de fotografías antigas vencelladas con estes profesionais, destacando a recente publicación dun traballo memorable, nunca antes feito, e que leva por título “Pulpeiras do Carballiño, herdeiras dunha tradición”. Participaron 30 familias de pulpeiras e ata tres xeracións. O libro componse de 60 fotografías en branco e negro realizadas no estudio e nas que o pulpo desaparece como elemento esencial para dar protagonismo a este colectivo de traballadoras e á súa historia.

O presidente de O Potiños, Manuel Blanco, agradeceu este recoñecemento e asegurou que lles anima a seguir traballando para continuar “dando pulo ao Carballiño”. O colectivo traballa na actualidade en tres proxectos e son destacables as iniciativas que realiza durante todo o ano para contaxiar a súa paixón pola fotografía á veciñanza.

O alcalde, Francisco Fumega, aseguro que “hoxe é un día moi especial para min como alcalde, porque non hai nada máis gratificante que recoñecer a labor dos nosos veciños e veciñas e o traballo desta entidade é impagable, levamos 38 anos disfrutando del”.

Nun escrito asinado polos veciños do inmoble afectado polo incendio da pasada semana nas instalacións da xestoria Cer-Ber, ubicada no baixo das galerias deste edificio, manifestan o seu malestar ante o operativo desplegado ao asegurar que "nin bomberos, nin Policia Local, nin Protección Civil, nos informaron do que estaba ocurrindo e do que tiñamos que facer", desmentindo asi as informacións difundidas desde os propios servizos de emerxencias.

Descargando o arquivo adxunto "Lo que no ocurrió y pudo ocurrir" pode accederse ao escrito asinado por esta comunicade de veciños, que ademáis acreditan que 3 persoas tiveron que ser atendidas no centro de saúde do Carballiño por inhalación de fume.

A Xunta de Galicia lanza a campaña Por outros tantos máis coa que o Goberno galego busca promover o coidado do patrimonio cultural da Comunidade autónoma. Así o anunciou o conselleiro de Cultura, Educación, FP e Universidades, Román Rodríguez, nunha visita ao Mosteiro de San Salvador de Camanzo, en Vila de Cruces, coincidindo co inicio desta iniciativa.

Así, tal e como explicou o responsable autonómico de Cultura, o obxectivo desta acción é “fomentar a sensibilización e concienciación da cidadanía, impulsar o coñecemento sobre estes bens e incentivar as boas prácticas e iniciativas de preservación que permitan que un dos maiores tesouros de Galicia sexa legado ás xeracións vindeiras nas mellores condicións”. Para iso, a Administración autonómica elixe oito bens patrimoniais da Comunidade que representan a gran riqueza patrimonial de todo o territorio con exemplos de diferentes tipoloxías, estilos, épocas e zonas.

En concreto, a campaña difunde imaxes de bens como a Catedral de Santiago de Compostela, o Santuario de Santo Andrés de Teixido en Cedeira, a Muralla romana de Lugo ou o Mosteiro de San Pedro de Rocas en Esgos. Aparecen tamén o Castro de Viladonga en Castro Rei, os petróglifos do Parque Arqueolóxico da Arte Rupestre de Campo Lameiro, os Muíños do Folón e do Picón no Rosal ou a Igrexa da Veracruz no Carballiño.

“A campaña é un recordatorio dos anos e séculos que levan estes elementos entre nós axudando a construír a nosa identidade como pobo”, afirmou Román Rodríguez antes de engadir que serve tamén como chamamento “á responsabilidade colectiva para impulsar a sensibilización e evitar comportamentos incívicos que, aínda que son illados, poden danar o noso patrimonio cultural”. Entre eles atópanse 781 Bens de Interese Cultural (BIC), así como milleiros de bens catalogados.