A alcaldesa do Irixo, Rosa Maria Dalama contactou con esta emisora de radio para desmentir calquera tipo de acordo co Partido Popular para conformar un novo goberno municipal no concello do Irixo, e tal como na tarde de onte difundiron os populares a través dun comunicado.

A rexedora municipal tan so confirma o nomeamento da concelleira do Partido Popular,,María José Villanueva Dejuane como a súa primeira tenenta de alcaldesa, designada mediante decreto da alcaldía no pasado mes de setembro, tal como xa adiantara COPE O Carballiño.

O Partido Popular do Irixo vén de asumir a tenencia de alcaldía do goberno municipal e tres áreas de xestión, logo do acordo alcanzado coa alcaldesa Rosa María Dalama, que preside a corporación local na compaña de María Dolores Fariñas, ambas como concelleiras non adscritas.

Un pacto que implica o cogoberno popular no Irixo e que ten como obxectivo principal "rematar coa parálise no Concello, dándolle a estabilidade política e de xestión que nunca tivo desde o inicio do mandato", subliña o portavoz popular Manuel Cerdeira A concelleira popular María José Villanueva asume a Tenencia de Alcaldía, ademais da responsabilidade na área de Cultura. Mentres, a concellería de Medio Rural recae sobre José Manuel Nogueira, mentres que Manuel Cerdeira, atende as competencias de Emprego.

Nas próximas semanas concretarase unha cuarta área de goberno para o grupo municipal popular. O portavoz do grupo popular lembra que o PP non alcanzou a maioría absoluta nas eleccións locais de 2023 por tan só vinte votos, "facéndonos cargo do goberno local en minoría, como forza máis votada e por responsabilidade diante da veciñanza". Dous meses e medio despois a oposición asinou unha moción de censura que apartou ao PP das responsabilidades de goberno, "e todo para abrir unha escura e triste etapa política no Irixo que levou ao Concello á parálise".

Agora, o goberno local está dirixido por un "amplo equipo de persoas que coincidimos en querer deixar atrás os enfrontamentos políticos e traballar para o benestar da veciñanza". A aprobación dos orzamentos municipais e dos plans de obras "demostran que estamos nese camiño".

Manuel Cerdeira destaca ademais que, neste momento, o Partido Popular é a única formación política que goberna no Irixo, en tanto que a alcaldesa Rosa María Dalama e a concelleira María Dolores Fariñas -antes no PSOE- e o edil Juan Manuel Villanueva, ex concelleiro de Xuntos polo Irixo, forman parte dos non adscritos. Esta última formación, agora na oposición, só ten dous representantes.

A Deputación de Ourense vén de adxudicar ao Laboratorio de Radon de Galicia (LRG) da Universidade de Santiago de Compostela a asistencia técnica do programa de cooperación para realizar as medicións deste gas nos concellos da provincia de menos de 20.000 habitantes. O Laboratorio está acreditado pola Entidade Nacional de Acreditación (ENAC) para medicións de radon e ten unha longa experiencia, sendo recoñecido a nivel nacional e internacional.

Este programa de cooperación, aprobado por unanimidade no pleno de xaneiro deste ano para protexer á veciñanza fronte aos riscos do radon, pretende colaborar cos municipios interesados na medición deste gas no seus respectivos ámbitos territoriais.

A práctica totalidade dos concellos da provincia amosaron o seu interese para participar neste programa de tal modo que, a primeira medición en postos de traballo das dependencias municipais será financiado pola Deputación integramente.

Unha vez que os concellos interesados informaron do número de estancias nas que traballa o persoal en planta baixa e soto, iniciouse o procedemento de contratación adxudicado ao LRG por importe de 14.976 euros, para contactar cos concellos e enviarlles as instrucións e os aparatos de medición que deberán ser colocados durante tres meses.

Unha vez rematado o tempo de medición, os medidores serán devoltos ao Laboratorio para recoller os resultados que serán comunicados aos concellos da provincia para que, en base a eles, poidan adoptar as medidas que recomenden os organismos acreditados, e axudar así a reducir as concentracións deste gas en caso de que existan niveis elevados.

Estes traballos de medición iniciaranse nos 20 concellos que foron os primeiros en aceptar a participación neste programa e, posteriormente, no prazo máximo dun mes ampliarase ao resto de concellos.

Os vinte concellos nos que se inicia este programa son: Arnoia, Beade, Melón, Calvos de Randín, A Rúa, Allariz, Xunqueira de Espadanedo, Celanova, Cartelle, Bande, Sandiás, Maceda, Xunqueira de Ambía, Taboadela, Castro Caldelas, O Bolo, Petín, Piñor, Toén e Cortegada.

A provincia galega con maior concentración de gas radon

Con este programa, a Deputación pretende colaborar cos concellos da provincia para protexer á veciñanza fronte aos riscos do gas radon, un elemento radioactivo natural, incoloro e inodoro, que se acumula en espazos pechados e cuxa inhalación prolongada asóciase a un maior risco de cancro de pulmón.

Ourense é a provincia galega cos índices máis elevados de concentración deste gas polas súas características xeolóxicas, é dicir, pola presenza de chans graníticos. Por elo, con este plan preténdese controlar e eliminar este elemento para protexer a saúde da veciñanza fronte aos riscos asociados ás elevadas concentracións deste gas.

O conselleiro de Emprego, Comercio e Emigración, José González, asistiu este domingo á XXXVII Festa do Cabalo Puzo do Lago, que se celebra na paraxe natural de Puzo do Lago, no concello de Maside.

Trátase dunha cita que congrega cada edición a afeccionados e espectadores para participar nun programa de actividades con diferentes competicións e exhibicións equinas, así como rutas a cabalo e xantar popular.

Isto reflicte a esta iniciativa como exemplo do dinamismo do rural galego e da capacidade económica e turística do sector cabalar para seguir xerando riqueza e atraendo poboación ao rural.

Sebastián Lamazares, Fátima Gómez, José Antonio Barge e Manuel Nogueira participan nesta tertulia de COPE O Carballiño, outro venres máis presentada e moderada por Xan Pinal.

Escóitaa aquí:

Deixando atrás máis de tres meses de baixa médica, Francisco Fumega  volve asumir as súas funcións ao fronte da alcaldía do Carballiño.

No transcurso dunha entrevista en COPE O Carballiño, Fumega avanzou cales van ser as  actuacións prioritarias na súa xestión, entre as que se encontran a humanización da Praza Maior e a súa contorna, asi como a apertura do vial que dará continuidade á rúa Faustino Santalices.

O rexedor municipal puxo en valor o sigñificativo incremento de poboación que ven rexistrando nos últimos anos O Carballiño, citando o Padrón Continúo, Fumega manifestou que o concello está a piques de alcanzar os 15.000 habitantes, estaría a apenas 15 habitantes de chegar a esa cifra, que consolidan ao municipio como o segundo con máis poboación da provincia, tras a capital.

Escóitao aquí:

O Concello do Carballiño aposta pola mellora da seguridade vial e cidadá no casco urbano co investimento de preto de 130.000 euros para o pintado de pasos de peóns, a instalación de cámaras de video-vixilancia e tráfico e a renovación integral do grupo semafórico do cruce dos Catro Camiños, un dos puntos con maior tráfico da vila, por tratarse da Nacional 541 e o principal acceso ao centro da vila.

A primeira das intervencións, iniciada esta mesma semana, inclúe o pintado dun total de 84 pasos de peóns repartidos polo casco urbano da vila. A actuación, valorada en preto de 20.000 euros, comezou na avenida do Balneario e na rúa Martínez de Avellanosa. Os traballos estenderanse durante as próximas semanas para actuar no resto de rúas.

Evitar o vandalismo e o acceso a zonas de tráfico restrinxido

O goberno local ten en fase de licitación a instalación de tres cámaras de video-vixilancia e tres cámaras de tráfico para evitar actos vandálicos e o acceso de vehículos a zonas de tráfico restrinxido. Estarán na Veracruz, no Barrio de Flores e no parque infantil da Alameda. A intervención, orzamentada en preto de 37.000 euros, permitirá reforzar a seguridade da veciñanza e a identificación de quen comenta actos de vandalismo, pois esa será precisamente a misión das cámaras de televixilancia.

En canto ás cámaras de tráfico, gravarán e memorizarán as matrículas dos vehículos que accedan sen autorización ou fóra de horario a estas zonas restrinxidas, xerando as correspondentes multas e a súa incorporación ao sistema informático da Policía Local.

Os tres puntos (A Veracruz, o Barrio de Flores e o parque infantil da Alameda) son zonas nas que, de xeito recurrente, circulan ou estacionan vehículos sen autorización, o que afecta non só ao tráfico senón tamén á mobilidade peonil.

Cambio de grupo semafórico

Por último, o Concello do Carballiño tamén ten en proceso de licitación a substitución do actual grupo semafórico localizado no cruce dos Castro Camiños, na confluencia da N-541 coas rúas Catro Camiños e Curros Enríquez. O orzamento da licitación será de 75.000 euros e o obxectivo é mellorar a circulación na zona corrixindo os fallos e desaxustes dos actuais semáforos, o que en ocasións provoca retencións.

O Servizo Galego de Saúde vén de adxudicar á empresa COVIASTEC S.L. a construción do novo centro de saúde de Boborás por un importe de 1.816.809 euros.

A nova infraestrutura permitirá ampliar en máis de 200 m² a superficie do actual centro de saúde ata acadar os 786 m², o que tamén posibilitará a ampliación dos seus servizos.

En concreto, posibilitará dispor dunha consulta para a saúde da muller, unha consulta polivalente de urxencias e outra destinada aos pacientes respiratorios.

Ademais, o novo inmoble contará con dúas consultas de medicina, dúas consultas de enfermería e tamén unha novas sala de xuntas.

O deseño elixido para o novo centro de saúde busca a mellor integración coa contorna en todos os seus aspectos, empregando materiais característicos da zona, como a pedra e a madeira.

A empresa adxudicataria dispón do prazo de 16 meses para levar a cabo a construción deste novo centro de saúde co que se optimizará a calidade dos servizos asistenciais nesta localidade ourensá.