O temporal rexistrado a principios de ano deixou danos e causou estragos en varios puntos do municipio do Carballiño, sendo o desprendemento de terra e o derrubamento dunha parte da rúa Alberto Vilanova, nas proximidades do Centro de Saúde carballiñés, o episodio máis grave dos rexistrados e o que ten causado o principal problema dos causados polas chuvias e as crecidas dos ríos e os cursos de auga que percorren o municipio.

O Concello acometeu os traballos de emerxencia para asegurar a zona e evitar problemas neste lugar, ao tempo que se foron desenvolvendo as tarefas de inspección e valoración dos danos sufridos, para elaborar o proxecto necesario para actuar neste punto e recuperar o trazado da rúa Alberto Vilanova, co obxectivo de restablecer o tráfico rodado neste punto e normalizar o paso de peóns que acoden diariamente ao Centro de Saúde.

Logo de analizar a situación xerada polos danos causados polo río Carrás, e de elaborar un proxecto de urxencia para actuar neste punto, o Concello do Carballiño acometerá a reparación da rúa Alberto Vilanova con fondos propios para dar unha solución aos problemas xerados polo temporal e restablecer o tráfico rodado e repoñer as infraestruturas afectadas. O proxecto foi redactado por José Ángel Rodríguez Rodríguez, enxeñeiro técnico de obras públicas e máster en enxeñeiro de camiños, canles e portos. O investimento para realizar o proxecto de reparación levará consigo o investimento de 127.270 euros.

Como se recolle no proxecto “Arranxos de emerxencia na obra de drenaxe transversal no río Carrás, no cruce con Alberto Vilanova” as abundantes chuvias rexistradas hai unhas semanas causaron danos graves na obra de drenaxe transversal existente sobre o río Carrás, coa conseguinte perigosidade para o tránsito pola zona. Entre os traballos de emerxencia incluíronse accións como a retirada de obstáculos na embocadura e augas arriba (troncos de árbore e outros materiais) que impedían o paso da auga e a limpeza do río augas abaixo (accións que se desenvolveron nos primeiros días deste ano). Tamén se procedeu a instalar, in situ, unha estrutura metálica para garantir o paso de peóns para facilitar o acceso ao Centro de Saúde e o IES nº 1 do Carballiño.
Con posterioridade rexistrouse o desprendemento dunha placa do firme, situada sobre a canalización de gas e a liña eléctrica, o que fixo necesario actuar para erradicar o grave risco que iso supuña. Para evitar futuros episodios de risco procedeuse a demoler unha boa parte do firme que quedara ao aire enriba da drenaxe transversal.

Unha vez finalizados estes traballos unha empresa especializada procedeu a comprobar o estado do interior da construción pola que discorre a canalización do río Carrás, empregando para iso un robot específico para este tipo de traballos. Tamén se fixo unha inspección visual para comprobar o estado da tubaxe.
Logo de acometer estes traballos o Concello do Carballiño procederá agora a executar o proxecto para reparar os danos neste lugar.

Entre as actuacións a desenvolver no lugar figuran accións como retirar os materiais danados, demoler o pavimento existente na zona de actuación, retirada das zonas afectadas polas augas, instalación de tubaxe para mellorar a capacidade de desaugue de drenaxe transversal, tratado con formigón dos parámetros afectados, creación de muros de cachotería, recheo da zona con material seleccionado, acondicionamento das instalacións afectadas, execución do novo firme de aglomerado na zona de obras e rehabilitación da tubaxe metálica existente, entre outras iniciativas.

As empresas e autónomos asociados a Carballiño CCA contarán cun servizo personalizado para axudarlles a reducir o gasto enerxético e implementar medidas de aforro e eficiencia.

Este servizo será levado a cabo pola empresa ARSEM Servizos Enerxéticos, cuxa delegada, María Aurora Cacheda, asinou un convenio de colaboración co presidente de Carballiño CCA, Julián Garriga.

A Consultora realizará un estudo inicial gratuíto, a aqueles asociados que o precisen, de optimización das facturas de electricidade e gas. Do mesmo xeito, cando un asociado teña próximo o vencemento dalgún contrato de subministración, recibirá asesoramento desde ARSEM para atopar as mellores opcións do mercado.

Pola súa banda, a asociación Carballiño CCA, comprométese a divulgar entre os seus asociados os servizos e solucións que ofrece a consultora ARSEM.

O director da Axencia Galega das Industrias Culturais, Jacobo Sutil, e o presidente da Federación de Cineclubs de Galicia (Feciga), Manuel Precedo, mantiveron unha reunión na que acordaron renovar o convenio de colaboración entre as dúas entidades para continuar a garantir a proxección de películas durante todo o ano nas 13 localidades galegas, entre elas O Carballiño, da man do Cine-Club Carballiño que ofrece unha programación estable durante boa parte do ano, agás en verán.

Serán 30.000 euros os que se disporán desde a Xunta para que esta asociación sen ánimo de lucro, que traballa desde hai case que 40 anos a prol da cultura cinematográfica en xeral e con especial atención á defensa e apoio á produción galega, poida seguir ofrecendo ofrecendo o seu apoio a 13 entidades cineclubistas galegas, entre elas o Cine-Club Carballiño, que proxecta con carácter semanal a súa programación no auditorio do Carballiño, aínda que tamén organiza ciclos cinematográficos coincidindo cos datas concretas como o nadal, ou "Flores de Cine" durante o mes de xullo.

A casa da cultura do Carballiño acolleu o acto de presentación deste novo servizo de reparto de comida a domicilio, un acto que contou coa colaboración do Centyro Comercial Aberto do Carballiño. Roombo chega a Carballiño, os bares e restaurantes da localidade comezan a traballar coa súa aplicación de reparto a domicilio para pequenas cidades. Moitos dos locales xa decidiron sumarse a esta aplicación que ofrecerá servizo nun rango de 7 kilómetros dende o restaurante.

A súa aplicación é de uso fácil e intuitivo, onde inclúe os pratos dos conciñeiros dos restaurante de confianza de cada cliente. A app está pensada para un uso de acotío e está dispoñible para iOs e Android. No primeiro pedido, Roombo ofrece un desconto do 15% no primeiro pedido co código "carballiño" e, ademais, dende as redes sociais de @roombogalicia lanzan promocións semanais para os seguidores. Esta empresa naceu en plena pandemia no 2020, pensando nas necesidades dos pequenos establecementos das cidades e vilas de menor poboación.

O seu modelo de negocio está "comprometido co comercio local e os seus hostaleiros" e demostrou neste tempo a súa eficacia á hora de contribuír no aumento da facturación. Na filosofía de Roombo está "defender o ámbito local, apostando polas pequenas empresas e o fomento do traballo digno". Dende este compromiso, a empresa defende as condicións laborais dos seus repartidores, así coma as do resto de empregados da organización.

O seu compromiso pasa tamén polos proveedores, os bares e restaurantes, cos que negocian porcentaxes moito menores aos da competencia. As grandes franquicias traballan con beneficios que superan o 40% do prezo do pedido, mentres que Roombo manteno nun 18%. Estes datos supoñen un atrativo para empresarios da hostalaría, que se posicionan a favor da implementación deste modelo que xera riqueza nas comunidades grazas á redución dos "marxes abusivos".

O concello do Carballiño -a través as concellerías de cultura e turismo- destinará este ano preto de 40.000 euros para as actividades do entroido e a Festa da Cachucha, que se desenvolverán entre os dias 14 ao 26 de febreiro. Os titulares de ambas concellerías, respectivamente, Diego Fernández e Manolo Dacal deron a coñecer a programación festiva que terémos no Carballiño.

Martes, 14

AUDICIÓN DO CMUS e ESMU DO CARBALLIÑO ás 20.00 h no Auditorio Manuel María

Venres, 17: CHARANGA CLK a partir das 20 horas S

Sábado, 18 ENTROIDO INFANTIL. De 11:30 á 13:30 h Obradoiro infantil de máscaras e complementos de entroido A partir das 16:30 Festa-Concurso infantil de disfraces . Animación DJ MELO . A partir das 19.00 h: - Batucada PERCUCAR.  A partir das 21.00 h: - Doctor Anchoa

Domingo, 19. De 11:30 a 14 h Animación do Grupo TOKAIDE. A partir das 19:00 h na Praza Maior: - OS LIBORIANOS - Coplas de Entroido 2023

Luns 20. De 20 a 23 h polas rúas da Vila: FANFARRIA FARRUXA.  De 23.00 h a 01.00 h: - GIN TONI´S

Martes, 21: GRAN DESFILE-CONCURSO DE COMPARSAS E CHARANGAS. A partir das 19:00 h Actuación da ORQUESTRA ALKAR

Mércores, 22. ENTERRO DA SARDIÑA.  A partir das 19:30 Representación do ENTERRO por ASPADISI – “QATARLLIÑO” Animación CHARANGA CASTRO BELLO e  CHOCOLATADA

Domingo, 26 XXVIII FESTA DA CACHUCHA

Ás 11:30 h DESFILE DE FOLIÓNS, COMPARSAS E CHARANGAS - Comparsas de Amoeiro - Arrieiros de Petín - Folión de Fradelo - Folión de Tameirón - Asoc. Cult Son da Pedra Meiga Ás 14 h XANTAR DA CACHUCHA - Charanga Feitizo de Pau - Charanga Doctor Anchoa - Charanga Europa - Charanga CLK - Charanga Castro Bello As 17:30 h GRAN DESFILE DE FOLIÓNS, COMPARSAS E CHARANGAS - Comparsa Os da Caña - Comparsas de Amoeiro - Folión Arrieiros de Petín - Folión de Fradelo - Folión de Tameirón - Comparsa Os Solfamidas - Asoc. Cult Son da Pedra Meiga - Comparsas gañadoras do Martes de Entroido. Ás 19.30 GRAN BAILE na Praza Maior ORQUESTRA GRAN PARADA